سەرۋەن ساياحاتىن، كۇتىنۋ ساياحاتىن، سايالاۋ ساياحاتىن دامىتتى
اقسۋ ايماعى ەكولوگيالىق ساياحاتتىڭ جاڭا كاسىپ كۇيىن جەتىلدىردى
ءتىلشى چىڭ يۋەيۋە 5 - ايدىڭ 28 - كۇنى اقسۋدان حابارلايدى. 5 - ايدىڭ 24 - كۇنى كوپتەگەن ساياحاتشىلار سەرۋەن كولىگىنە وتىرىپ، اقسۋ ايماعىنىڭ دولان وزەنى مەملەكەتتىك سازدىق باقشاسىن تاماشالادى. ولاردىڭ كوبى 5 - ايدىڭ 22 - كۇنى بيىلعى تۇڭعىش ”كورىكتى جىجياڭ − اقسۋ“ اتتى ساياحات ارقىلى شينجياڭعا كومەكتەسۋ ارناۋلى جالعا العان ۇشاقپەن وسى اراعا كەلگەندەر. ولار اقسۋ قالاسىنىڭ تاكلاماكان ءشولىنىڭ قويناۋىنداعى تاۋ - سۋى كورىكتى، جاسىل جەلەك جامىلعان ساياحات قالاسىنا اينالعاندىعىن ويلاپ تا كورمەگەندىكتەرىن ايتتى.
ءتىلشىنىڭ اقسۋ ايماقتىق مادەنيەت، دەنە تاربيە، راديو، تەلەۆيزيا جانە ساياحات مەكەمەسىنەن ۇعىسۋىنا قاراعاندا، بيىل جىل باسىنان بەرى اقسۋ ايماعى جەرگىلىكتى ورىننىڭ مول ەكولوگيالىق بايلىق قاينارىنا سۇيەنىپ سەرۋەن ساياحاتى، كۇتىنۋ ساياحاتى، سايالاۋ ساياحاتى سياقتى ەكولوگيالىق ساياحاتتىڭ جاڭا كاسىپ كۇيىن بار كۇشپەن جەتىلدىرىپ، قورشاعان ورتانىڭ پايداسىن ساياحات بايلىق قاينارىنا اينالدىرۋدى جەبەپ، ساياحات كاسىبىنىڭ وزگە كاسىپ سالاسىمەن ورگانيكالى توعىسۋىن ىلگەرىلەتىپ، شينجياڭنىڭ ەكولوگيالىق ساياحاتتاعى جوعارى دەڭگەيىن قالىپتاستىرعان.
قالا كورىنىسىندەگى وزەن اعارى، كورىكتى اۋىل - قىستاق قۇرىلىسىنداعى جاڭاشا قىستاق، سازدىق اۋماعىنداعى بايىرعى ەكولوگيالىق ورمان ... ەكولوگيالىق جاراتىلىستىق ورتا بىرتە - بىرتە اقسۋ ايماعىنىڭ ساياحات بايلىعىنا اينالۋدا.
ءۇشتۇرپان اۋدانىنىڭ شىرعاناق سازدىق باقشاسىنداعى جابايى شىرعاناق ورمانىنىڭ شەتىنە كوز جەتپەيدى، 5 كيلومەترلىك شارباق جول ورمان اراسىندا يرەلەڭدەي سوزىلعان، بۇلاق، باستاۋ سۋى سىلدىراپ اعىپ جاتىر. ”بىرنەشە جىل دامۋ ارقىلى بۇل ارا قازىر جەرگىلىكتى ادامداردىڭ ەڭ ۇناتاتىن جاياۋ ءجۇرۋ جانە تۇزدە تۇنەۋ ورتاسىنا اينالدى“، - دەدى ءۇشتۇرپان اۋداندىق مادەنيەت، دەنە تاربيە، راديو، تەلەۆيزيا جانە ساياحات مەكەمەسى پارتيا باسشىلىق گرۋپپاسىنىڭ شۋجيى ان شياۋجۇن.
5 - ايدىڭ 23 - كۇنى كۇشار اۋدانى چىمان قالاشىعى باي - ۋي سالت - سانا باقشاسىنداعى كۇسان حالىقتىق تۇسەلحانادا ساياحات ارناۋلى پويەزىمەن جاڭا عانا كۇشار اۋدانىنا جەتكەن جىجياڭ ولكەسى نيڭبو قالاسىنان كەلگەن 10 نەشە ساياحاتشى جەردە وتىرىپ، ءالى پىسا قويماعان اق ورىكتەن جانە جاڭادان ۇزگەن تۇت جەمىسىنەن ءدام تاتتى. ”بۇل ارانىڭ كينوحاناسى، حالىقتىق تۇسەلحاناسى، مالتاۋ كولشىگى، شاپتول باقشاسى سياقتىلارىنىڭ بارلىعى ينتەرنەتتە اتى داڭقتى، ءسوزسىز، باراتىن ورىنعا اينالعان. اپتانىڭ سوڭىندا 400دەن استام ادام ءبىر ۋاقىتتا تاماقتانا الاتىن اۋلا ساياحاتشىعا تولىپ كەتەدى“، - دەدى چىمان قالاشىعى باي - ۋي سالت - سانا باقشاسىنىڭ باس مەڭگەرۋشىسى وۋياڭ جىجۇن.
اقسۋ ايماعىنداعى قۇم - شولىندە سازدىق، كول عانا ەمەس، باقشا، شامگۇل كولشىگى جانە حايۋانات باقشاسى دا بار. جەرگىلىكتى ورىننىڭ ەكولوگيالىق بايلىق قاينارى ەڭ زور مولشەردە ساياحات بايلىق قاينارىنا اينالۋدا. توقسۋ اۋدانىندا قۇم - ءشول سەرۋەن باقشاسىنا اينالا باستادى. قۇم - شولدەگى گۇل تەڭىزى كورىنىس رايونىندا قۇم قورشاعان جاساندى كولدىڭ بەتىندە مايدا تولقىن كوتەرىلىپ، قايىقتار قايشالىسسا، حايۋانات باقشاسىندا مايمىل تاۋى جاسالىپتى، وندا تاعى قاسقىر، تۇلكى، تۇيەقۇس، توتىقۇس سياقتى نەشە ون ءتۇرلى حايۋاناتتار بار. حىناننان ەنگىزىلگەن 400 مۋ اۋماقتاعى راۋشانگۇل قايتالاپ ەگىلىپ سىناق ەتىلگەننەن كەيىن، قۇلپىرا اشىلىپ، جەلمەن بىرگە تەربەلدى. ”مۇندا ءداستۇرلى قۇمدىقتان ەندەي ءوتۋ، اۆتوكولىگىمەن قۇم جارۋ سياقتى ويىن تۇرلەرىنىڭ ءبارى بار“. توقسۋ اۋدانى قۇم - شولدەگى گۇل تەڭىزى ساياحات اشۋ شەكتى جاۋاپكەرلىك سەرىكتەستىگىنىڭ باس ديرەكتورى لي گۇيمەي كورىنىس رايونىنىڭ بىرتە - بىرتە ءىرى كولەمدى امبەباپ دەمالىس ورتاسىنا اينالعاندىعىن ايتتى.
اقسۋ ايماعىنا عانا ءتان اڭعار، قۇمدىق، ورمان، جايلاۋ سياقتى ەكولوگيالىق الۋان تۇرلىلىك سيپاتى بىرتىندەپ ساياحات بايلىق قاينارىنىڭ الۋان تۇرلىلىگىنە قاراي ويىسۋدا، ەكولوگيالىق كورىنىس رايوندارى ماۋسىمنىڭ الماسۋىنا ىلەسە ءار ايدا ۇقساماعان كورىنىس قالىپتاستىرادى. كەزەكتە كوكتەمدە گۇل تاماشالاسا، جازدا سۋدا سەيىل - سەرۋەن قۇراتىن، كۇزدە جەمىس - جيدەكتەن اۋىز تيسە، قىستا دەنساۋلىقتى كۇتەتىن ەكولوگيالىق ساياحات جۇلگەسى اقسۋدا بىرتىندەپ قالىپتاسا باستادى.
