ساپار تەزدەدى، كورىنىس وڭىرلەرى تۇتاستى
مەملەكەت بويىنشا تۇڭعىش وڭىرلىك ”كەڭىستىك ساياحات ۇشاعى اينالمالى لەنياسى“ اشىلدى
تىلشىلەر ما جيانلۇڭ، جاڭ تيڭ 6 - ايدىڭ 10 - كۇنى التايدان حابارلايدى. 6 - ايدىڭ 10 - كۇنى ساعات 14تە 50 جولاۋشى وتىرعان ”التاي“ ساياحات ارناۋلى ۇشاعى التاي اۋەجايىنان اۋەگە كوتەرىلدى، 30 مينۋت ۇشقاننان كەيىن ۇشاق قاناس اۋەجايىنا كەلىپ ورنىقتى قوندى. 2 ساعاتتان كەيىن، ارناۋلى ۇشاق قاناس اۋەجايىنان تاعى ءبىر توپ جولاۋشىنى الىپ، كوكتوعاي اۋەجايىنا جول الدى. ”التاي“ ساياحات ارناۋلى ۇشاعىنىڭ تۇڭعىش ۇشۋى مەملەكەت بويىنشا تۇڭعىش وڭىرلىك ”كەڭىستىك ساياحات ۇشاعى اينالمالى لەنياسى“نىڭ رەسمي اشىلعاندىعىن كورسەتەدى.
”كەڭىستىك ساياحات ۇشاعى اينالمالى لەنياسى“نىڭ اشىلۋى التاي اۋەجايى ماڭىنداعى بايشاحۋ كولى، بۋىرشىن اۋدانىنداعى قاناس، كوكتوعاي اۋدانىنداعى كوكتوعاي كورىنىس ءوڭىرى سىندى مەملەكەتتىك 5A دارەجەلى 3 كورىنىس ءوڭىرىنىڭ اۋە جەلىسىن تۇتاستىردى. ”كەڭىستىك ساياحات ۇشاعى اينالمالى لەنياسى“ قاناس كورىنىس وڭىرىنەن كوكتوعاي كورىنىس وڭىرىنە دەيىنگى ۋاقىتتى قۇرلىقتاعى 10 نەشە ساعاتتى ءبىر ساعاتقا، التاي اۋەجايىنان قاناسقا، كوكتوعايعا دەيىنگى ۋاقىتتى جارتى ساعاتقا قىسقارتاتىندىقتان، ”جولدىڭ الىس، ساياحاتتىڭ قىسقا بولۋى“نداي قيىن ماسەلەنى شەشتى.
”كەڭىستىك ساياحات ۇشاعى اينالمالى لەنياسى“نىڭ بەلەت باعاسى دا مەملەكەتتىك حالىقتىق اۆياتسياسىنىڭ ولشەمدى بەلەت باعاسىن نەگىز ەتە وتىرىپ حالىققا ءتيىمدى اۆياتسيالىق ساياحات باعاسى بويىنشا بەلگىلەنگەن، اينالمالى لەنيانىڭ ءار بەكەتىنىڭ بەلەت باعاسى ورتا ەسەپپەن 300 يۋان اينالاسىندا، بۇكىل كەڭىستىك ساياحات ۇشاعى اينالمالى لەنياسىنىڭ (3 بەكەتتى تولىق اينالىپ ۇشۋ) جالپى باعاسى 1000 يۋاننان اسپايدى.”كەڭىستىك ساياحات ۇشاعى اينالمالى لەنياسى“ − التاي ايماعىنىڭ جەبەۋىندە، التاي اۆياتسيا كاسىبى قارجى قوسۋ شەكتى جاۋاپكەرشىلىك سەرىكتەستىگى (تومەندە قىسقارتىلىپ التاي اۆياتسيا قارجى قوسۋ سەرىكتەستىگى دەلىندى) شيڭفۋ اۆياتسياسىمەن بىرلەسىپ اشقان وڭىرلىك اۆياتسيا لەنياسى.
التاي ايماقتىق پارتكومىنىڭ مۇشەسى، اكىمشىلىك مەكەمەسىنىڭ ۇنەمىلىك ىستەرگە جاۋاپتى ورىنباسار ءۋاليى چىن بو بىلاي دەپ تانىستىردى: جاڭا اۆياتسيا لەنياسىنىڭ اشىلۋى ساياحات ارقىلى شينجياڭدى گۇلدەندىرۋ ستراتەگياسىن تياناقتاندىرىپ، ”شينجياڭنىڭ ءىشىن تۇتاستىرۋ، شينجياڭعا كىرىپ - شىعۋدى تەزدەتۋ“دى جۇزەگە اسىرۋ ءۇشىن قۇرعان ”كەڭىستىك الەۋمەتتىك قاتىناس لەنياسى“، ول ”جولدىڭ الىس، ساياحاتتىڭ قىسقا بولۋى“ سىندى قيىن ماسەلەنى شەشىپ، تۇتاس وڭىرلىك ساياحاتتىڭ دامۋىن ىلگەرىلەتەدى.
”التاي، قاناس، كوكتوعاي سىندى ءبىر وڭىردەگى 3 اۋەجايدىڭ ءبىر ۋاقىتتا جاڭا اۆياتسيا لەنياسىن اشۋى ءارى تىزبەكتى اينالمالى ۇشۋدى قالىپتاستىرۋى ەلىمىز ىشىندە تۇڭعىش رەت بولىپ وتىر. بۇل شيڭفۋ اۆياتسياسىنىڭ سولتۇستىك شينجياڭدا قۇرعان اينالمالى ۇشۋ تورىنىڭ العاشقى قادامدا قالىپتاسقاندىعىن كورسەتەدى“، - دەدى شيڭفۋ اۆياتسياسىنىڭ باستىعى جوۋ جيان.
التاي اۆياتسيا قارجى قوسۋ سەرىكتەستىگى پارتكومىنىڭ شۋجيى، باسالقاسى سۇن شياۋجين بىلاي دەدى: التاي رايونىمىز ىشىندەگى تارماق لەنيالى اۋەجاي تورى ءبىرشاما مول قوسىمشا توراپتىق اۋەجاي، بولاشاقتا جالپىلىق اۆياتسيا اۋەجايى جانە اۆياتسيا لەنياسى قۇرىلىسى تەزدەتىلىپ، تارماق لەنيا اۋەجايلارىنىڭ شينجياڭنىڭ ءىشى - سىرتىمەن تۇتاسۋى بىرتىندەپ جۇزەگە اسىرىلادى، جالپىلىق اۋەجاي رايون ىشىندە تۇتاستىرىلىپ، ۇشۋ - قونۋ ورنى ءارقايسى كورىنىس وڭىرلەرىندەگى اۆياتسيا تورىمەن ۇلاستىرىلادى، ءسويتىپ، التاي ”جىبەك جولى اۆياتسيا بەكەتى“ ەتىپ قۇرىلىپ، سولتۇستىك شينجياڭداعى نەگىزگى اۆياتسيا ساياحاتشىلارىنىڭ جيناۋ - جونەلتۋ ورتالىعى بولىپ قالىپتاسادى.
