تيانشان تورى
تيانشان تورى   ›   جاڭالىقتار   ›   ماڭىزدى حابارلار

جۇڭگو - قىرعىزستان دوستىق بايتەرەگىنىڭ ماۋەلەپ ءوسىپ، ماڭگى جاپ - جاسىل بولۋىن تىلەيمىن

شي جينپيڭ قىرعىزستاننىڭ اقپارات قۇرالدارىندا اۆتورلى ماقالا جاريالادى

جۇڭگو - قىرعىزستان دوستىق بايتەرەگىنىڭ ماۋەلەپ ءوسىپ، ماڭگى جاپ - جاسىل بولۋىن تىلەيمىن

  شينحۋا اگەنتتىگىنىڭ 6 - ايدىڭ 11 - كۇنى بەيجيڭنەن بەرگەن حابارى. 6 - ايدىڭ 11 - كۇنى، قىرعىز رەسپۋبليكاسىندا مەملەكەت ىستەرى ساپارىندا بولۋ ءارى شاڭحاي سەلبەستىك ۇيىمىنا مۇشە ەلدەر مەملەكەت باسشىلارى القالار كەڭەسىنىڭ 19 - رەتكى ماجىلىسىنە قاتىناسۋ قارساڭىندا، مەملەكەت ءتوراعاسى شي جينپيڭ قىرعىزستاننىڭ «پىكىر گازەتى»ندە، مەملەكەتتىك ”حابار“ اقپارات اگەنتتىگىندە ”جۇڭگو - قىرعىزستان دوستىق بايتەرەگىنىڭ ماۋەلەپ ءوسىپ، ماڭگى جاپ - جاسىل بولۋىن تىلەيمىن“ دەگەن تاقىرىپتا اۆتورلى ماقالا جاريالادى. ماقالا تومەندەگىدەي:

جۇڭگو - قىرعىزستان دوستىق بايتەرەگىنىڭ ماۋەلەپ ءوسىپ، ماڭگى جاپ - جاسىل بولۋىن تىلەيمىن

جۇڭحۋا حالىق رەسپۋبليكاسىنىڭ ءتوراعاسى شي جينپيڭ

  6 - ايداعى تيانشان ماساتىداي قۇلپىرىپ، جاسىل جەلەك جامىلدى. تابيعاتتىڭ وسىنداي كوركەم ماۋسىمىندا، جيەنبەكوۆ زۇڭتۇڭنىڭ ۇسىنىسمەن، مەن تاياۋدا قىرعىزستاندا 2 - رەتكى مەملەكەت ىستەرى ساپارىندا بولامىن ءارى شاڭحاي سەلبەستىك ۇيىمىنا مۇشە ەلدەر مەملەكەت باسشىلارى القالار كەڭەسىنىڭ 19 - رەتكى ماجىلىسىنە قاتىناسامىن. 6 جىلدىڭ الدىندا، مەن تۇڭعىش رەت كورىكتى قىرعىزستاندا ساپاردا بولىپ، قىرعىزستان جاقپەن بىرگە دوستىقتى تىلگە تيەك ەتىپ، سەلبەستىكتى بىرگە اقىلداسىپ، بولاشاقتى بىرگە اڭگىمەلەپ، جۇڭگو مەن قىرعىزستاننىڭ ستراتەگيالىق سەرىكتەستىك قارىم - قاتىناسىنىڭ جاڭا ءداۋىرىن اشتىق. 6 جىلدان كەيىن، مەن ەكى ەل قارىم - قاتىناسىنىڭ جان - جاقتى ستراتەگيالىق سەرىكتەستىك قارىم - قاتىناس دەڭگەيىنە كوتەرىلگەنىن سۇيىنە كورىپ وتىرمىن. جۇڭگو مەن قىرعىزستاننىڭ دوستىق سەلبەستىك ىستەرى جازعى جايلاۋداي قۇلپىرىپ، جالىندى تىرشىلىك تىنىسى مەن ومىرشەڭدىك كۇشىن قاۋلاتۋدا.

  جۇڭگو مەن قىرعىزستان ەكى ەل حالىقتارى كورشىلەس قونىستانعان، ءداستۇرلى دوستىعى ارىدان جالعاسىپ كەلەدى. 2000 نەشە جىلدىڭ الدىندا، جۇڭگونىڭ حان پاتشالىعى داۋىرىندەگى جاڭ چيان باتىس وڭىرگە ۇزاق ساپارعا شىققان، ەجەلگى جىبەك جولى بايىرعى سۇياپ قالاسىنان وتەدى. نەشە جۇزدەگەن جىلدان كەيىن، قىرعىزدار الىس ساپار شەگىپ، شالعايداعى تاڭ پاتشالىعىنىڭ استاناسى چاڭ - انعا كەلدى، قايتارلارىندا ادەمى جىبەك پەن فارفور ىدىستاردى الىپ قايتتى ءارى اعالى - ىنىلەردەي شىنايى دوستىق سۇيىسپەنشىلىككە دە يە بولدى. جۇڭگونىڭ تاڭ داۋىرىندەگى ۇلى اقىن لي بايدىڭ سۇلۋ ولەڭ - جىرلارى ەكى ەلگە كەڭىنەن تارالىپ، جاپپاي جاتتالدى. 2000 جىلدان استامعى تاريحي ءۇردىس ەكى ەل حالىقتارىنىڭ مىزعىماس تەرەڭ سۇيسىپەنشىلىگىن سومدادى.

  ديپلوماتيالىق قارىم - قاتىناس ورناتقاننان بەرى، جۇڭگو - قىرعىزستان قارىم - قاتىناسى حالىقاراداعى اۋمالى - توكپەلى وزگەرىستەردىڭ سىنىنان ءوتىپ، ەكى ەل قيىن - قىستاۋ كۇندەردە بىرگە بولىپ، ءوزارا قارايلاستى، اتى - زاتىنا ساي جاقسى كورشى، ابزال دوس، جاقسى سەرىك، تاماشا باۋىرلاس بولدى، حالىقارالىق قوعامدا ءوزارا قۇرمەت ەتەتىن، تەرەزەسى تەڭ تۇرعىدا سەلبەستىك جاسايتىن، ءوزارا پايدا جەتكىزىپ، تەڭ يگىلىككە كەنەلەتىن جاڭاشا مەملەكەتتەر قارىم - قاتىناسىنىڭ ۇلگىسىن ورناتتى.

  − جۇڭگو مەن قىرعىزستاننىڭ ساياسي جاقتاعى ءوزارا سەنىمى كۇن سايىن نىعايا ءتۇستى. ديپلوماتيالىق قارىم - قاتىناس ورناتىپ كوپ وتپەي، ەكى جاق تاريحتان قالعان شەكارا ماسەلەسىن تۇبەگەيلى شەشتى، جۇڭگو مەن قىرعىزستاننىڭ 1000 كيلومەتردەن استام ورتاق شەكاراسى ەكى ەل حالىقتارىن جالعايتىن دانەكەرگە اينالدى. قازىر جۇڭگو - قىرعىزستان قارىم - قاتىناسىندا ەشقانداي شەشىلمەي كەلە جاتقان ماسەلە جوق، ەكى جاق ءبىر - ءبىرىنىڭ وزەكتى مۇددەسىنە ساياتىن ماسەلەلەردە ءبىرىن - ءبىرى تاباندىلىقپەن قولدادى. جۇڭگو جاق قىرعىزستان حالقىنىڭ ءوز ەلىنىڭ مەملەكەت جاعدايىنا ساي دامۋ جولىن دەربەس تاڭداۋىن تاباندىلىقپەن قولدايدى، قىرعىزستان ۇكىمەتىنىڭ مەملەكەتتىڭ تاۋەلسىزدىگىن، يەلىك ۇقىعىن، تەرريتوريا بۇتىندىگىن قورعاۋدا قولدانعان ءتۇرلى ساياساتتارىن، شارالارىن تاباندىلىقپەن قولدايدى. قىرعىزستان جاق تا تايۋان، شينجياڭعا ساياتىن ىستەر، ”ءۇش ءتۇرلى كۇش“كە سوققى بەرۋ سياقتى ماسەلەلەردە جۇڭگو جاققا تاباندىلىقپەن قولداۋ كورسەتىپ جانە پارمەندى تۇردە سايكەسىپ كەلەدى.

  − جۇڭگو مەن قىرعىزستاننىڭ ناقتى سەلبەستىگى ۇزدىكسىز تەرەڭدەدى. قىرعىزستان ”ءبىر بەلدەۋ، ءبىر جول“دى بىرگە قۇرۋدى ەڭ ەرتە قولداعان جانە وعان قاتىناسقان ەلدەردىڭ ءبىرى، ەكى جاق ەكونوميكا - ساۋدا، ەنەرگيا، نەگىزدىك قۇرىلعى قۇرىلىسى، ءوزارا ۇلاستىرۋ - تۇتاستىرۋ سياقتى سالالاردا ءبىرسىپىرا ماڭىزدى سەلبەستىك تابىستارىنا قول جەتكىزدى. جۇڭگو قىرعىزستاننىڭ ءبىرىنشى ۇلكەن ساۋدا سەرىگىندىك ەلگە جانە قارجى سالۋ قاينارىندىق ەلگە اينالدى. 2018 - جىلى جۇڭگو مەن قىرعىزستاننىڭ ەكى جاقتى ساۋدا سوماسى 5 ميلليارد 600 ميلليون دوللاردان اسىپ، ديپلوماتيالىق قارىم - قاتىناس ورناتقان العاشقى تۇستاعىدان 150 ەسەدەن استام ارتتى. جۇڭگو جاق قىرعىزستانعا جالپى 3 ميلليارد دوللارعا تاياۋ قارجى قوستى. ەكى جاق بىرگە اتقارعان داتقا - كەمەن كەرنەۋ وزگەرتۋ، ەلەكتر جەتكىزۋ ينجەنەرياسى قىرعىزستاننىڭ ەلەكتر قۋاتى بايلىعىنىڭ تارالۋىنىڭ بىركەلكىسىزدىگى، ەلەكتر جەتكىزۋدىڭ ىركىلىسسىز بولماۋى تاريحىن اياقتاتتى، وش قالالىق شيپاحانا جەرگىلىكتى ورىنداعى بۇقاراعا ورتا ازيا ءوڭىرى بويىنشا ەڭ ساپالى مەديتسينالىق قىزمەت وتەدى، جۇڭگو - قىرعىزستان - وزبەكستان تاس جولى اسقار تاۋلاردان اسقان، ىركىلىسسىز حالىقارالىق تاسىمالدىڭ كۇرەتامىرىنا اينالدى. قىرعىزستان جۇڭگوعا ەكسپورتتى ۇزدىكسىز كەڭەيتىپ، بال، جەمىس - جيدەك سياقتى جاسىل، ساپالى اۋىل شارۋاشىلىق ونىمدەرى جۇڭگوداعى جاي بۇقارانىڭ داستارقانىنان ورىن الدى. قىرعىزستان جۇرتشىلىعى ينتەرنەتتە زات ساتىپ الۋدى جاقسى كورەدى، ەلەكتروندىق ساۋدا ولارعا شىت جاڭا تۇتىنۋ اسەرىن سيلادى.

  − جۇڭگو مەن قىرعىزستاننىڭ گۋمانيتارلىق اۋىس - كۇيىسى اناعۇرلىم قىزا ءتۇستى. 2018 - جىلى ەكى ەل ادامدارى اراسىنداعى بارىس - كەلىس 70 مىڭ ادام - رەتتەن استى، قىرعىزستاننىڭ جۇڭگودا وقيتىن وقۋشىلارى 4600دەن استى. قىرعىزستان كۇڭزى شۋەيۋانىنان 4ىن جانە كۇڭزى ساباقحاناسىنان 21ىن اشتى، جۇڭگونىڭ كومەگىمەن سالىنعان بىشكەك 95 - ورتا مەكتەبى سول جەردە ەڭ قارسى الىنعان مەكتەپكە اينالدى. جۇڭگو مەن قىرعىزستان ەكى ەل قىرعىزستاننىڭ ايگىلى جازۋشىسى ايتماتوۆ دۇنيەگە كەلگەندىگىنىڭ 90 جىلدىعىن ەسكە ءتۇسىرۋ ۇلاسپالى قيمىلدارىن بىرگە وتكىزىپ، قوعامنىڭ ءار سالاسىندا قىزۋ اڭىس تۋدىردى. جيەنبەكوۆ زۇڭتۇڭنىڭ ۇسىنىسىمەن، جۇڭگو ورتالىق وپەرا ۇيىرمەسى قىرعىزستانعا بارىپ حانزۋ تىلىندەگى «ماناس» وپەراسىن قويادى. ەكى ەل حالىقتارىندا بىردەي بار وسى مادەنيەت جاۋھارى تاعى دا قۇلپىرىپ، جۇڭگو مەن قىرعىزستاننىڭ ءداستۇرلى دوستىعىنىڭ اسقاق، ايبىندى ءداۋىر اۋەنىن شىعانداتادى.

  قىرعىزستاندا ”تۋىسقاندىق سۇيىسپەنشىلىك بارلىق بايلىقتان ارتىق“ دەگەن ماتەل بار. جۇڭگولىقتار دا ”باۋىرلاستاردىڭ تىلەگى ءبىر بولسا، المايتىن قامالى جوق“ دەگەندى ۇنەمى ايتادى. بۇگىنگى دۇنيە ءجۇزى 100 جىلدا بولماعان ۇلكەن وزگەرىسكە ءدوپ كەلىپ وتىر، جۇڭگو مەن قىرعىزستاننىڭ قول ۇستاسا سەلبەسىپ، سىن - سايىستاردى بىرگە قارسى الىپ، ەكى ەل قارىم - قاتىناسىنىڭ ۇزدىكسىز، ورنىقتى، اقاۋسىز دامۋىنا شىنايى كەپىلدىك ەتۋى − تاريح بىزگە جۇكتەگەن جاۋاپكەرشىلىك. مەن وسى جولعى ساپار ارقىلى جيبەنبەكوۆ زۇڭتۇڭمەن بىرگە جۇڭگو مەن قىرعىزستاننىڭ جان - جاقتى ستراتەگيالىق سەرىكتەستىك قارىم - قاتىناسىنىڭ بولاشاقتاعى دامۋىنىڭ ايبىندى جوباسىن سالىپ، ەكى ەل قارىم - قاتىناسى مەن ءار سالاداعى سەلبەستىگىنىڭ تاعى دا تىڭ ساتىعا كوتەرىلۋىنە جەتەكشىلىك ەتۋدى كۇتىپ وتىرمىن.

  ءبىز قىرعىزستان جاقپەن ستراتەگيالىق ءوزارا سەنىمدىلىكتى نىعايتىپ، جوعارى جىكتەگىلەردىڭ بارىس - كەلىسىن جيىلەتىپ، ۇكىمەت، پارلامەنت، ساياسي پارتيا، جەرگىلىكتى ورىنداعى ءار ساتىنىڭ اۋىس - كۇيىسى مەن سەلبەستىگىن كۇشەيتىپ، يەلىك ۇقىق، حاۋىپسىزدىك، تەرريتوريا بۇتىندىگى سياقتى ءبىر - ءبىرىنىڭ وزەكتى مۇددەسىنە ساياتىن ماسەلەلەردە ءبىرىن - ءبىرى ۇزدىكسىز تاباندىلىقپەن قولداپ، اۋمالى - توكپەلى حالىقارالىق جاعدايدا تىزە قوسا سەلبەسىپ، ەكى ەلدىڭ ورتاق ستراتەگيالىق حاۋىپسىزدىگى مەن دامۋ مۇددەسىن قورعاپ، ەكى ەلدىڭ گۇلدەنۋىن، بايۋىن، قۇدىرەتتەنۋىن جۇزەگە اسىرۋ جولىندا بىرگە كۇرەس جۇرگىزۋدى قالايمىز.

  ءبىز قىرعىزستان جاقپەن ”ءبىر بەلدەۋ، ءبىر جول“دى بىرگە قۇرۋ سەلبەستىگىن تەرەڭدەتىپ، دامۋ ستراتەگيالارىنىڭ توعىسۋىن جەدەل ىلگەرىلەتىپ، 2 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنىڭ تابىستارىن بىرگە تياناقتاندىرىپ، اۋىل شارۋاشىلىعى، نەگىزدىك قۇرىلعى قۇرىلىسى، ءوزارا ۇلاستىرۋ - تۇتاستىرۋ سياقتى سالالارداعى سەلبەستىكتى تەرەڭدەتىپ، ساۋدا مەن قارجى قوسۋدىڭ قولايلىلاسۋىن جەبەۋدى قالايمىز. ءبىز قىرعىزستان كاسىپورىندارىنىڭ جۇڭگونىڭ حالىقارالىق يمپورت كورمەسىنە ۇزدىكسىز بەلسەنە قاتىناسۋىن قارسى الامىز، قىرعىزستاننان اناعۇرلىم كوپ جوعارى سورتتى اۋىل شارۋاشىلىق ونىمدەرىن يمپورت ەتۋدى قالايمىز. ءبىز، سونداي - اق قىرعىزستاننىڭ ەكونوميكالىق دامۋى مەن حالىق تۇرمىسىنىڭ جاقسارۋىنا قولىمىزدان كەلگەنىنشە ۇزدىكسىز كومەك بەرەمىز جانە قولداۋ كورسەتەمىز.

  ءبىز قىرعىزستان جاقپەن حاۋىپسىزدىك سەلبەستىگىن كۇشەيتىپ، ورتاق، جان - جاقتى، سەلبەسكەن، باياندى حاۋىپسىزدىك كوزقاراسىن امالياتتا ايگىلەپ، ”ءۇش ءتۇرلى كۇش“كە، ەسىرتكى اتكەزشىلىگىنە، ەل ارالىق ۇيىمدىق قىلمىستارعا تىزە قوسا سوققى بەرىپ، ەكى ەل حالىقتارىنىڭ ءومىرى مەن مال - مۇلكىنىڭ حاۋىپسىزدىگىن قورعاپ، ءوڭىردىڭ جاراسىمدى، ورنىقتى حاۋىپسىز ورتاسىن بىرگە قالىپتاستىرۋدى قالايمىز.

  ءبىز قىرعىزستان جاقپەن گۋمانيتارلىق اۋىس - كۇيىستى كەڭەيتۋدى قالايمىز. دوستىق ۋاقىت وتكەن سايىن قويۋلاي تۇسەدى، كورشىلەر ۋاقىت وتكەن سايىن ەتەنە بولا تۇسەدى. ەكى جاق وقۋ - اعارتۋ، عىلىم - تەحنيكا، مادەنيەت، دەنساۋلىق ساقتاۋ، جاستار، اقپارات قۇرالدارى، بىرلەسكەن ارحەولوگيالىق تەكسەرۋ سياقتى سالالارداعى سەلبەستىك دەڭگەيىن ءوسىرىپ، ەكى ەل حالىقتارى جۇرەكتەرىنىڭ اناعۇرلىم قاۋىشىپ، سۇيىسپەنشىلىكتەرىنىڭ اناعۇرلىم تەرەڭدەۋىنە مۇمكىندىك جاساۋ كەرەك.

  ءبىز قىرعىزستان جاقپەن حالىقارالىق سەلبەستىكتى نىعايتىپ، بىرلەسكەن مەملەكەتتەر ۇيىمى، شاڭحاي سەلبەستىك ۇيىمى، ازيا ءوزارا ىقپالداستىق جانە سەنىم شارالارى ءماجىلىسى سياقتى كوپ جاقتى اياداعى بارىس - كەلىس پەن سايكەسۋدى كۇشەيتىپ، بىرلەسكەن مەملەكەتتەر ۇيىمى ۋستاۆىنىڭ باستى ماقساتى مەن پرينسيبىن نەگىز ەتكەن حالىقارالىق قارىم - قاتىناس نەگىزگى ەرەجەسىن بىرگە قورعاپ، كوپ جاقتىلىقتى قولداپ، ەكونوميكانىڭ جاھاندانۋ ءۇردىسىن ىلگەرىلەتىپ، جاڭاشا حالىقارالىق قارىم - قاتىناس پەن ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايمىز.

  شاڭحاي سەلبەستىك ۇيىمى قۇرىلعان 18 جىلدان بەرى، مۇشە ەلدەر ءوزارا سەنۋ، ءوزارا پايدا جەتكىزۋ، تەڭدىك، كەڭەسۋ، كوپ ءتۇرلى وركەنيەتكە قۇرمەت ەتۋ، بىرگە دامۋعا ۇمتىلۋ سىندى ”شاڭحاي رۋحى“ن ۇستانىپ، «شاڭحاي سەلبەستىك ۇيىمىنىڭ ۋستاۆى» مەن «شاڭحاي سەلبەستىك ۇيىمىنا مۇشە ەلدەردىڭ ۇزاق ۋاقىتتىق تاتۋ كورشىلىك دوستىق سەلبەستىك شارتى»ندا بەلگىلەنگەن باستى ماقسات پەن پرينسيپكە تاباندىلىقپەن بويسۇنىپ، ءوزارا قۇرمەت ەتەتىن، ءادىل، تۋراشىل، سەلبەسىپ تەڭ يگىلىككە كەنەلەتىن جاڭاشا حالىقارالىق قارىم - قاتىناس ۇلگىسىن ورناتىپ، ءوڭىردىڭ ورنىقتىلىعى مەن گۇلدەنۋىن جەبەۋدە ورنىن وگەيسىتۋگە كەلمەيتىن ماڭىزدى رولىن ساۋلەلەندىردى.

  شاڭحاي سەلبەستىك ۇيىمى حاۋىپسىزدىك، ەكونوميكا، گۋمانيتارلىق، سىرتقى قارىم - قاتىناس سياقتى سالالارداعى سەلبەستىككە بارىنشا ءمان بەرىپ، ”ءۇش ءتۇرلى كۇش“ كە قاتاڭ سوققى بەرىپ، ”ءبىر بەلدەۋ، ءبىر جول“دى بىرگە قۇرۋدىڭ ءار ەلدىڭ دامۋ ستراتەگيالارىمەن جانە وڭىرلىك سەلبەسىك باستاماسىمەن توعىسۋىن كۇش سالا تەرەڭدەتىپ، ساۋدا، قارجى قوسۋ، ءوزارا ۇلاستىرۋ - تۇتاستىرۋ، ەنەرگيا، جاڭالىق اشۋ، گۋمانيتارلىق سياقتى سالالارداعى سەلبەستىكتى ۇزدىكسىز كۇشەيتىپ، باقىلاۋشى ەلمەن، تىلدەسۋشى سەرىكپەن، سونداي - اق بىرلەسكەن مەملەكەتتەر ۇيىمى سياقتى حالىقارالىق ۇيىمدارمەن سەرىكتەس قارىم - قاتىناستى كۇش سالا كەڭەيتىپ، شاڭحاي سەلبەستىك ۇيىمىنىڭ اناعۇرلىم تىعىز تاعدىرلاس ورتاق تۇلعاسىن قالىپتاستىرۋعا كۇش سالدى.

  قىرعىزستان شاڭحاي سەلبەستىك ۇيىمىنا كەزەكتى ءتوراعا ەل مىندەتىن ۇستىنە العاننان بەرى، وسى ۇيىمنىڭ دامۋىن ىلگەرىلەتۋگە قىرۋار ناتيجەلى قىزمەتتەر ىستەدى. ءار جاقتىڭ بىرگە قۇلشىنۋىندا، بىشكەك باسشىلار ءماجىلىسىنىڭ مول تابىستارعا قول جەتكىزىپ، شاڭحاي سەلبەستىك ۇيىمىنىڭ اناعۇرلىم زور دامۋىن ىلگەرىلەتىپ، وڭىردەگى ءار ەل حالىقتارىن اناعۇرلىم جاقسى باقىتقا كەنەلتەتىندىگىنە سەنەمىن.

  ءبىز ۇرپاقتار بويى دوستىقتان جازباي، سەلبەستىكتى بۇلجىماي ىلگەرىلەتسەك بولعانى، جۇڭگو مەن قىرعىزستاننىڭ دوستىق ىستەرى، ءسوز جوق، ايباتتى تيانشاننىڭ كوككە بوي سوزعان اسقاق شىرشالارىنداي قاۋلاپ ءوسىپ، ماڭگى جاپ - جاسىل بولىپ تۇرادى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.