6 - ايدىڭ 19 - كۇنى ساياحاتشىلار باركول قازاق اۆتونوميالى اۋدانى گاۋجياحۋ كولى كورىنىس اۋماعىنداعى فۋيۋان حالىقتىق تۇسەلحانانى ەكسكۋرسيالادى. ەرەكشە حالىقتىق تۇسەلحانا شينجياڭنىڭ ساياحات كاسىبىندە ەڭ باۋرامدى كاسىپ كۇيىنىڭ بىرىنە اينالىپ، ءار ۇلت ەگىنشى - مالشىلارىنىڭ كىرىسىن ارتتىرۋدى جەبەۋمەن بىرگە، شينجياڭ ساياحاتىنا كورىك قوستى. سۋرەتتى داۋۇت رىشات تۇسىرگەن
ءتىلشى ۋاڭ شيڭرۇي 6 - ايدىڭ 19 - كۇنى ۇرىمجىدەن حابارلايدى. 6 - اي تۇرپاندا شىلىڭگىر ىستىق، الايدا مي قايناعان ىستىق ەل ءىشى - سىرتىنان كەلگەن ساياحاتشىلاردىڭ ”ءجۇزىم قالاسى“نا ساياحاتتاي كەلۋ ىنتاسىنا بوگەت بولا المادى. 6 - ايدىڭ 17 - كۇنى تۇستەن كەيىن تۇرپان قالاسى گاۋچاڭ رايونىنداعى دابۋ جاستار مەيمانحاناسىندا، 4، 5 شەتەلدىك ساياحاتشى اۋلاداعى ءجۇزىم سورەسىنىڭ استىندا اڭگىمەلەسىپ وتىر. ولارعا وسى مەيمانحانانىڭ قاراپايىم دا تابيعي شارۋالار ءۇيى ۇلگىسى قاتتى ۇناپتى.
دابۋ جاستار مەيمانحاناسى 2 ءداستۇرلى شارۋالار اۋلاسىنان وزگەرتىلىپ سالىنعان، كوك ءتۇستى تەرەزە - ەسىگى جاسىل ءتۇستى جۇزىممەن قۇپ جاراسقان. ”مەيمانحانا ءبىر ۋاقىتتا 60 ساياحاتشى قابىلداي الادى، بىلتىر 5000نان استام ساياحاتشى قابىلدادى“. مەيمانحانانىڭ جاۋاپتىسى ليۋ بيڭجىڭ بىلاي دەدى: ”قازىر مەيمانحانامىزداعى قوناق بولمەلەردىڭ تەڭ جارتىسىندا قوناق بار، 7 -، 8 - ايلاردا بىردە - ءبىر بوس بولمە قالمايدى“.
سوڭعى جىلداردان بەرى، تۇرپان قالاسىندا 210 نەشە حالىقتىق تۇسەلحانا تىڭنان سالىنىپ، تىڭنان ارتقان قوناق بولمە 1460قا جەتتى. بىلتىر تۇرپانداعى ساياحات حالىقتىق تۇسەلحانالار 207 مىڭ 200 ادام - رەت ساياحاتشى قابىلداپ، 29 ميلليون 435 مىڭ يۋان كىرىس كىرگىزدى، قويۋ مادەنيەت فاكتورى تەرەڭ سىڭىرىلگەن، وڭىرلىك ەرەكشەلىگى كورنەكتى حالىقتىق تۇسەلحانا جەرگىلىكتى ورىننىڭ وڭىرلىك ساياحاتىنىڭ تاماشا تانىسقىسىنا اينالدى.
شينجياڭنىڭ ساياحات كاسىبىنىڭ ءۇرتىس قارىشتاپ دامۋى ساياحات كاسىپ كۇيىن بايىتۋ جونىنەن تىڭ تالاپ قويدى. ساياحات حالىقتىق تۇسەلحانالاردىڭ ەلگە تانىلۋى ساياحات قونالقىسىن بارىنشا سەزىنۋدەگى جانە اۋىل - قىستاقتاردىڭ كوركەيۋىن جەبەۋدەگى، كەدەيلىكتەن دالمە - ءدال ارىلتۋداعى ماڭىزدى تاسىلگە اينالدى. قازىر رايونىمىزدا 2092 ساياحات حالىقتىق تۇسەلحانا، 7978 قوناق بولمە، 22870 توسەك ورىن بار. 2018 - جىلى رايونىمىزداعى ساياحات حالىقتىق تۇسەلحانالار قابىلداعان ساياحاتشىلار 2 ميلليون 973 مىڭ 700 ادام - رەتكە جەتىپ، 445 ميلليون يۋان كىرىس كىرگىزدى.
رايونىمىزدىڭ جەر - جەرى وڭىرلىك جانە مادەنيەت ەرەكشەلىگىندەگى بايلىقتى ىشكەرىلەي اشىپ، اۋىل - قىستاقتارداعى حالىقتىق تۇسەلحانالارعا تىڭ تىنىس، تىڭ قۇن جەتكىزدى. موري قازاق اۆتونوميالى اۋدانىندا يۋەلياڭدي قىستاعى، شۇيموحى قىستاعى سياقتى ءداستۇرلى قىستاقتاردىڭ اۋىلدىڭ بايىرعى بەينەسىن ساقتاعان ەرەكشەلىگىنەن پايدالانىپ، اۋەلگى قالپىنداعى اۋىل - قىستاق حالىقتىق تۇسەلحانالاردى قۇرىپ، ساياحاتشىلارعا وزگەشە اۋىل مادەنيەتىن سيلادى. تەكەس اۋدانىندا وزىندىك ەرەكشەلىكتەگى قاراجون ساحارا مادەنيەتىن حالىقتىق تۇسەلحانالارمەن توعىستىردى، شىت جاڭا بەينەدەگى ءداستۇرلى كيىز ۇيلەر مەن جاڭاشا ۇلگىدەگى وسى زامانعى كيىز ۇيلەر ساياحاتشىلاردى ايرىقشا باۋرادى. ”ۇستىرتتەگى مەرۋەرت“ اتانعان تاشقورعان تاجىك اۆتونوميالى اۋدانى حالىقتىق تۇسەلحانالاردى دامىتۋدا ءۇستىرت مادەنيەتىن كورنەكتىلەندىردى، قويۋ ۇلتتىق سالت - سانا، وزگەشە ءۇستىرت كورىنىسى سول جەردەگى حالىقتىق تۇسەلحانالارعا وراسان زور باۋراۋ قۋاتىن ۇستەدى.
شينجياڭ ساياحات حالىقتىق تۇسەلحانالارىنىڭ جەدەل دامۋى ءتىپتى دە كوپ ادامنىڭ ساياحات كاسىبىنە ات سالىسۋىنا تۇرتكى بولدى. تەكەس اۋداندىق مادەنيەت، دەنە تاربيە، راديو - تەلەۆيزيا جانە ساياحات مەكەمەسى پارتيا باسشىلىق گرۋپپاسىنىڭ شۋجيى باي يۇن - ي بىلاي دەپ تانىستىردى: جەرگىلىكتى ورىن جەرگىلىكتى ەرەكشەلىكپەن ۇشتاستىرىپ، قاراجون ساحاراسى، ۇلكەن قۇشتاي ءداستۇرلى قىستاعى، كۇرە ساياحات شاعىن قالاشىعى سياقتى ساياحات مادەنيەت بايلىعىن تياناق ەتىپ، 7 ساياحات حالىقتىق تۇسەلحانا شوعىرلانعان رايون قۇردى. قازىرگە دەيىن بۇل اۋدانداعى تىركەۋگە الىنعان حالىقتىق تۇسەلحانا 247گە جەتىپ، اۋدان بويىنشا ساياحات حالىقتىق تۇسەلحانالاردا جۇمىس ىستەيتىندەر 2500 نەشە ادامعا جەتتى.
قازىر اۆتونوميالى رايون ساياحات حالىقتىق تۇسەلحانالارىنىڭ دامۋىن جەدەل ىلگەرىلەتىپ، تۇتاس رايوننىڭ ساياحات كاسىپ كۇيىن ۇزدىكسىز بايىتىپ، ساياحات ونىمدەرى جۇيەسىن كەمەلدەندىرىپ، تۇتاس رايوننىڭ ساياحاتتىق تۇتىنۋىنىڭ تىڭ ورلەۋ ءتۇيىنىن جەتىلدىردى.
