شينحۋا اگەنتتىگىنىڭ 6 - ايدىڭ 29 - كۇنى وساكادان بەرگەن حابارى (تىلشىلەر حۋاڭيىن جيازى، حاۋ ۋيۋي). مەملەكەت ءتوراعاسى شي جينپيڭ 6 - ايدىڭ 29 - كۇنى وساكادا فرانسيانىڭ زۇڭتۇڭى ماكرونمەن كەزدەستى.
شي جينپيڭ مىنالاردى ءبىلدىردى: بيىل 3 - ايدا مەن مەملەكەت ىستەرى بابىمەن فرانسيادا ءساتتى ساپاردا بولدىم. ساپار كەزىندە ءبىز كەلىسكەن ءبىر قىدىرۋ ستراتەگيالىق ورتاق تانىمدار مەن سەلبەستىك كەلىسىمدەرى ورنىقتى تياناقتانۋدا. دۇنيە ءجۇزى 100 جىلدا بولماعان زور وزگەرىسكە ءدوپ كەلگەن تۇستا، قورعامپازدىق، سىڭار جاقتىلىق تەرىس اۋقىمى جانە كليمات وزگەرىسى سياقتى ادامزاتتىڭ ورتاق سايىستارى الدىندا جۇڭگو - فرانسيا ءىرى ەل جاۋاپكەرشىلىگىن ايگىلەپ، دەربەس ءوزىن - ءوزى باسقارۋعا تاباندى بولىپ، قول ۇستاسا سەلبەسىپ، بىرگە كوپ جاقتىلىقتى جاقتاۋشى، ەسىك اشا سەلبەسۋدى اتقارۋشى، دۇنيە ءجۇزىنىڭ بەيبىتشىلىگىن قورعاۋشى، وركەنيەتتەر اۋىس - كۇيىسىن باستاۋشى بولىپ، دۇنيە ءجۇزىنىڭ بەيبىتشىلىگىن، ورنىقتىلىعىن جانە دامۋىن، العا باسۋىن جەبەپ، كورىكتى جەر شارى مەكەنىمىزدى قورعاۋى ءتيىس.
شي جينپيڭ بىلاي دەپ اتاپ كورسەتتى: حالىقارالىق قوعامنىڭ ”ءبىر بەلدەۋ، ءبىر جول“دى بىرگە قۇرۋى جوعارى ساپالى دامۋدىڭ جاڭا كەزەڭىنە ءوتتى، جۇڭگو - فرانسيا ەكى جاق 3 - جاق بازار سەلبەستىگى نىسانىن تياناقتاندىرۋدى جەدەلدەتىپ، يادرو ەنەرگياسى، عارىش سياقتى ءىرى نىساندار سەلبەستىگىن ىلگەرىلەتۋ كەرەك. جۇڭگو جاق فرانسيانىڭ 2 - كەزەكتى جۇڭگو حالىقارالىق يمپورت كورمەسىنە قاتىناسۋىن قارسى الادى. ەكى جاق 2021 - جىلعى جۇڭگو - فرانسيا مادەنيەت، ساياحات جىلىنا دەن قويا دايىندالۋى، گۋمانيتارلىق اۋىس - كۇيىستى جەبەۋى كەرەك. جۇڭگو - فرانسيا حالىقارالىق جانە وڭىرلىك ماسەلەلەردە تىعىز سايكەسۋدى ساقتاپ، ءتۇيىندى ماسەلەلەردىڭ ساياسي جولمەن شەشىلۋىن ىلگەرىلەتۋ كەرەك.
ماكرون مىنالاردى ءبىلدىردى: ءتوراعا شي جينپيڭنىڭ بيىل 3 - ايدا فرانسياداعى ساپارى ەكى ەلدىڭ ساياسي، ەكونوميكا، گۋمانيتارلىق سياقتى سالالارداعى قارىم - قاتىناستا تىڭ جەتىستىكتەرگە قول جەتكىزۋىن پارمەندى تۇردە ىلگەرىلەتتى. مەن جۇڭگوعا تاعى دا ساپارلاي بارۋدى كۇتەمىن. فرانسيا جاق جۇڭگو جاقپەن اۋىل شارۋاشىلىعى، سيفرلى ەكونوميكا، ەنەرگيا، حالىقتىق يادرو ەنەرگياسى سياقتى سەلبەستىكتەردى كەڭەيتىپ، مادەنيەتتە اۋىس - كۇيىس جاساۋدى جيىلەتۋدى قالايدى. فرانسيا مەن جۇڭگو تۇگەلدەي كوپ جاقتىلىقتى قولدايدى، الەمدىك جونگە سالۋدا تىعىز سەلبەسىپ، كليمات وزگەرىسىنە توتەپ بەرۋ، ورگانيزمدەردىڭ كوپ تۇرلىلىگى سياقتى كوپ جاقتى كۇن تارتىپتەردە بەلسەندى سەلبەستىكتەر ورىستەتىپ، جەتەكشىلىك رول اتقارۋ كەرەك.
ەكى جاق تاعى چاۋشيان تۇبەگى، يران يادروسى سياقتى ماسەلەلەر جونىندە كوزقاراس اۋىستىردى. فرانسيا جاق جۇڭگو جاقتىڭ جاراستىرۋ، كەلىسسوز وتكىزۋدى جەبەۋ جاعىندا اتقارعان ماڭىزدى جانە سىندارلى رولىنا جوعارى باعا بەرىپ، جۇڭگو جاقپەن بايلانىستى، سايكەسۋدى كۇشەيتىپ، ءوڭىردىڭ بەيبىتشىلىگىن، ورنىقتىلىعىن قورعاۋدى قالايتىندىعىن ءبىلدىردى.
ديڭ شۋەشياڭ، ليۋ حى، ياڭ جيەچى، ۋاڭ ي، حى ليفىڭ قاتارلىلار كەزدەسۋگە قاتىناستى.
