تيانشان تورى
تيانشان تورى   ›   جاڭالىقتار   ›   ماڭىزدى حابارلار

جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعى بايلانىسىمەن جازاسىن وتەپ جاتقان 9 تۇردەگى قىلمىستىلارعا ەرەكشە كەشىرىم جاسالادى

مەملەكەت ءتوراعاسى شي جينپيڭ ەرەكشە كەشىرىم جاساۋ بۇيرىعىن قول قويىپ جاريالادى

جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعى بايلانىسىمەن جازاسىن وتەپ جاتقان 9 تۇردەگى قىلمىستىلارعا ەرەكشە كەشىرىم جاسالادى

  شينحۋا اگەنتتىگىنىڭ 6 - ايدىڭ 29 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 6 - ايدىڭ 29 - كۇنى ەرەكشە كەشىرىم جاساۋ بۇيرىعىن قول قويىپ جاريالادى، مەملەكەتتىك 13 - كەزەكتى حالىق قۇرىلتايى تۇراقتى كوميتەتىنىڭ 11 - رەتكى ءماجىلىسى 6 - ايدىڭ 29 - كۇنى مەملەكەتتىك حالىق قۇرىلتايى تۇراقتى كوميتەتى جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعى بايلانىسىمەن جازاسىن وتەپ جاتقان ءبىر ءبولىم قىلمىستىلارعا ەرەكشە كەشىرىم جاساۋ تۋرالى قارار ماقۇلداپ، جازاسىن وتەپ جاتقان 9 تۇردەگى قىلمىستىلارعا ەرەكشە كەشىرىم جاسادى.

  مەملەكەت ءتوراعاسىنىڭ ەرەكشە كەشىرىم جاساۋ بۇيرىعى بويىنشا، 2019 - جىلى 1 - ايدىڭ 1 - كۇنىنەن بۇرىن حالىق سوت مەكەمەسى شىعارعان كۇشكە يە ۇكىم بويىنشا جازاسىن وتەپ جاتقان 9 تۇردەگى قىلمىستىلارعا ەرەكشە كەشىرىم جاسالادى: ءبىرىنشى، جۇڭگو حالقىنىڭ جاپون شاپقىنشىلارىنا قارسى سوعىسىنا، جۇڭگو حالىق ازاتتىق سوعىسىنا قاتىناسقاندارعا؛ ەكىنشى، جۇڭحۋا حالىق رەسپۋبليكاسى قۇرىلعان سوڭ، مەملەكەتتىڭ يەلىك ۇقىعىن، حاۋىپسىزدىگىن جانە تەرريتوريا بۇتىندىگىن قورعاپ، سىرتقا باعىتتالعان سوعىسقا قاتىناسقاندارعا؛ ءۇشىنشى، جۇڭحۋا حالىق رەسپۋبليكاسى قۇرىلعان سوڭ، مەملەكەتتىڭ ەلەۋلى ينجەنەريا قۇرىلىستارى ءۇشىن ءبىرشاما ۇلكەن ۇلەس قوسقان ءارى ولكە - مينيسترلىك دارەجەلىدەن جوعارى ”ەڭبەك ۇلگىسى“، ”وزات قىزمەتكەر“، ”1 - مامىر ەڭبەك مەدالى“ سياقتى داڭقتى اتاقتارعا يە بولعاندارعا؛ ءتورتىنشى، كەزىندە مىندەت وتەگەن اسكەري ءارى جەكە 1 - دارەجەلىدەن جوعارى سيلىققا يە بولعاندارعا؛ بەسىنشى، قورعانۋ اعاتتىعى نەمەسە قاتەردەن ساقتانۋ اعاتتىعى سەبەبىنەن 3 جىلدان تومەن مەرزىمدى قاماۋ جازاسىنا كەسىلگەندەرگە نەمەسە قالعان جازا مەرزىمى ءبىر جىلدان تومەندەرگە؛ التىنشى، جاسى 75كە تولعان، اۋىر مۇگەدەك ءارى ءوزىن - ءوزى قاراۋعا قابىلەتسىزدەرگە؛ جەتىنشى، قىلمىس وتكىزگەن كەزىندە 18 جاسقا تولماعان، 3 جىلدان تومەن مەرزىمدى قاماۋ جازاسىنا كەسىلگەندەرگە نەمەسە قالعان جازا مەرزىمى ءبىر جىلدان تومەندەرگە؛ سەگىزىنشى، قوساعىنان ايرىلعان ءارى ازامات جاسىنا تولماعان پەرزەنتتەرى نەمەسە اۋىر مۇگەدەك، ءوزىن - ءوزى قاراۋعا قابىلەتسىز پەرزەنتتەرى بار، ولاردى شىنىمەن سونىڭ باعۋى قاجەت ايەلدەردىڭ 3 جىلدان تومەن مەرزىمدى قاماۋ جازاسىنا كەسىلگەندەرىنە نەمەسە قالعان جازا مەرزىمى ءبىر جىلدان تومەندەرگە؛ توعىزىنشى، مەرزىمنەن بۇرىن شارتتى تۇردە بوساتۋ ۇيعارىلعان ءارى مەرزىمنەن بۇرىن شارتتى تۇردە بوساتۋدىڭ سىناق مەرزىمىنىڭ بەستەن ءبىرى اتقارىلعاندارعا نەمەسە باقىلاۋعا الۋعا ۇكىم ەتىلگەندەرگە.

  مەملەكەت ءتوراعاسىنىڭ ەرەكشە كەشىرىم جاساۋ بۇيرىعىندا سونىمەن بىرگە مىنالار ايقىندالدى، اتالعان 9 تۇردەگى وبيەكتىلەردە مىنا جايتتەردىڭ ءبىرى بولسا ەرەكشە كەشىرىم جاسالمايدى: بىرىنشىدەن، ەكىنشى، ءۇشىنشى، ءتورتىنشى، جەتىنشى، سەگىزىنشى، توعىزىنشى تۇردەگى وبيەكتىلەردىڭ ىشىندە قياناتشىلدىق، پاراقورلىق قىلمىسىن وتكىزگەندەرگە، اسكەريلەردىڭ قىزمەت مىندەتىنە قايشىلىق جاساپ قىلمىس وتكىزگەندەرىنە، قاساقانا ادام ولتىرگەندەرگە، باسقىنشىلىق جاساعاندارعا، توناۋشىلىق ىستەگەندەرگە، ادام بارىمتالاعاندارعا، ءورت قويعاندارعا، جارىلىس تۋدىرعاندارعا، قاتەرلى زاتتار تاستاعاندارعا نەمەسە ۇيىمداسقان زورلىقتى كۇش سيپاتىندىق قىلمىس وتكىزگەندەرگە، قارا قوعام سيپاتىندىق ۇيىمداسقان قىلمىس وتكىزگەندەرگە، ەسىرتكى ساۋدالاۋ قىلمىسىن وتكىزگەندەرگە، مەملەكەتتىڭ حاۋىپسىزدىگىنە قاتەر ءتوندىرۋ قىلمىسىن وتكىزگەندەرگە، لاڭكەستىك قيمىل قىلمىسىن وتكىزگەن قىلمىستىلارعا، باسقا دا ۇيىمداسقان قىلمىس وتكىزگەندەردىڭ باستى قىلمىستىلارىنا، قايتالاپ قىلمىس وتكىزگەن قىلمىستىلارعا؛ ەكىنشىدەن، ەكىنشى، ءۇشىنشى، ءتورتىنشى، توعىزىنشى تۇردەگى وبيەكتىلەردىڭ ىشىندە قالعان جازا مەرزىمى 10 جىلدان جوعارىلارعا جانە ءالى مەرزىمسىز قاماۋ جازاسىن وتەپ جاتقاندارعا، ءولىم جازاسىن كەشىكتىرىپ اتقارۋ مەزگىلىندەگىلەرگە؛ ۇشىنشىدەن، بۇرىن ەرەكشە كەشىرىم جاسالىپ تاعى دا قىلمىس وتكىزىپ قىلمىستىق جازاعا تارتىلعاندارعا؛ تورتىنشىدەن، قىلمىسىن مويىنداماعان، رايىنان قايتپاعاندارعا؛ بەسىنشىدەن، سارالاۋدا رەال قوعامدىق قاتەرى بار دەپ قارالعاندارعا.

  مەملەكەت ءتوراعاسىنىڭ ەرەكشە كەشىرىم جاساۋ بۇيرىعىندا 2019 - جىلى 6 - ايدىڭ 29 - كۇنى اتالعان شارتتارعا ۇيلەسەتىن جازاسىن وتەپ جاتقان قىلمىستىلار حالىق سوت مەكەمەسى زاڭ بويىنشا كەسىم جاساعان سوڭ بوساتىلادى دەپ اتاپ كورسەتىلدى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.