لو شىڭجياۋدىڭ سۋرەتى. شينحۋا اگەنتتىگى تاراتقان
شينحۋا اگەنتتىگىنىڭ 6 - ايدىڭ 30 - كۇنى چاڭشادان بەرگەن حابارى (ءتىلشى شيە يىڭ). 67 جىلدىڭ الدىندا جۇڭگو حالىق ەرىكتىلەر ارمياسىنىڭ جاۋىنگەرى لو شىڭجياۋ ابايسىزدا سۋعا ءتۇسىپ كەتكەن چاۋشياندىق بالا سۇي يىڭدى قۇتقارۋ ءۇشىن قىمباتتى ءومىرىن ارنادى. سول جىلى لو شىڭجياۋ ەندى عانا 21 جاسقا شىققان ەدى. ساقىلداعان سارى ايازدا ادىلەت جولىندا ەشتەڭەدەن تايىنباي، مۇز قاتىپ جاتقان وزەنگە سەكىرىپ تۇسكەن جاستىڭ بەينەسى ەشقاشان الىستاعان ەمەس، بۇگىنگى كۇندە دە ءبىزدىڭ جۇرەك قىلىمىزدى باياعىداي تەربەۋدە.
لو شىڭجياۋ، 1931 - جىلى حۋنان ولكەسى شينحۋا اۋدانى سۇڭشان اۋىلى تۇڭزى قىستاعى مالۇڭ اۋداعى ءبىر قاراپايىم شارۋا وتباسىندا دۇنيەگە كەلگەن. وتباسى كەدەي بولعاندىقتان، 11 جاسقا شىققاندا بارىپ وقۋعا تۇسكەن. ول قايسار دا قاجىرلى رۋحپەن ماي شامنىڭ جارىعىندا ءتۇن جارىمىنا دەيىن زەيىن قويا ۇيرەنىپ، وقۋ تاۋىسقاندا ۇزدىك ناتيجەمەن ولكەلىك 9 - سىفانعا وقۋعا قابىلدانادى.
جاڭا جۇڭگو قۇرىلعاننان كەيىن، لو شىڭجياۋ تىزىمدەلىپ ارمياعا قاتىناسىپ، شياڭشي اسكەري ىستەر جانە ساياسي كادرلار مەكتەبىنە ۇيرەنۋگە جىبەرىلەدى. 1950 - جىلى لو شىڭجياۋ بەلگىلى ءبولىمنىڭ حاتشى تاربيەلەۋ كلاسىنا ۇيرەنۋگە جىبەرىلەدى، سودان كەيىن 47 - جۇن 141 - شىعا توتە قاراستى بارلاۋشىلار ليانىندە حاتشىلىق ىستەۋگە ورنالاستىرىلادى، شياڭشيدەگى باندىلاردى الاستاۋ شايقاسىنا قاتىناسادى.
1951 - جىلى لو شىڭجياۋ پارتيانىڭ ۇندەۋىنە ءۇن قوسىپ، جۇڭگو حالىق ەرىكتىلەر ارمياسىنا قاتىناسادى ءارى قوسىنمەن بىرگە چاۋشيانعا اتتانادى.
لو شىڭجياۋ چاۋشيان توپىراعىنا قادام تاستاپ، بارلىق جەردەن ورتەنگەن ۇيلەردى، قيراندىلاردى كورگەن كەزدە بەيبىتشىلىكتى قورعاۋ سەنىمى ءتىپتى دە بەكەمدەلەدى. ول ىشتەي: ”امەريكا جيانگەر قاراقشىلارىن جويماي ەلگە قايتپايمىن!“ دەپ انت بەرەدى. ول تاعى ەستەلىگىنە: ”ەگەر كۇندەردىڭ بىرىندە ماعان شاپقىنشىلاردىڭ وعى تيسە، جاۋىنگەر سەرىكتەرىم ماعان استە قارايلاماڭدار! ءسوزسىز، ۇزدىكسىز العا ىلگەرىلەپ، ۇدەرە العا تارتىپ، ميلليونداعان چاۋشيان حالقىنىڭ جانە قۇربان بولعان جولداستاردىڭ كەگىن الۋعا بەل بۋىڭدار!“ دەپ جازادى.
1952 - جىلى 1 - ايدىڭ 2 - كۇنى جاڭا جىل كىرگەن كەز، ءدال چاۋشيان تۇبەگى قار جامىلىپ، مۇز قۇرسانىپ جاتاتىن مەزگىل ەدى. لو شىڭجياۋ گرانات لاقتىرۋعا جاتتىعۋ ءۇشىن تاڭ سارىدە سول ماڭداعى مۇز قاتىپ جاتقان وزەنگە كەلەدى. ءدال وسى ساتتە وزەننەن اياق استىنان چاۋشياندىق بىرنەشە بالانىڭ ايعايلاپ جىلاعان داۋىسى ەستىلەدى. لو شىڭجياۋ كورەي ءتىلىن بىلمەيتىن، ءبىراق ول چاۋشياندىق بالالاردىڭ قول يشاراتىن جانە جارىلعان مۇزدى كورگەندە، جاعدايدى تاباندا بىلە قويادى. ول مۇز ويىعىنا قاراي جۇگىرە باسىپ كەلە جاتىپ ماقتالى شاپانىن شەشىپ، ىزعارى سۇيەكتەن وتەتىن وزەنگە سەكىرەدى.
نولدەن تومەن 20 سەلتسي گرادۋستىق قاقاعان ايازبەن ساناسپاعان لو شىڭجياۋ اسا سابىرلىلىقپەن سۋعا ءتۇسىپ كەتكەن چاۋشياندىق بالانى تەز تاۋىپ الادى ءارى ونى ءساتتى تۇردە سۋ بەتىنە شىعارادى. ايتسە دە مۇز ويىعىنىڭ اينالاسىنداعى مۇز تىم جۇقا بولعاندىقتان، سۋعا ءتۇسىپ كەتكەن بالانىڭ سالماعىن كوتەرە الماي، ەكەۋى سۋعا قايتا ءتۇسىپ كەتەدى.
ءبىر رەت، ەكى رەت، ءۇش رەت... بالا سۋ بەتىنە ءۇش رەت شىعارىلادى، ءبىراق ءۇش رەتتە دە جاعاعا شىعا المايدى. وسى كەزدە لو شىڭجياۋ ابدەن شارشاپ، قول - اياعى ۇيىپ قاتىپ قالادى، دەسەدە ول قايسارلىقپەن سۋ تۇبىنە تاعى ءبىر رەت سۇڭگىپ، بالانى تاعى تاۋىپ الادى ءارى ونى سۋ بەتىنە يتەرىپ شىعارادى...
قۇتقارىپ الىنعان وسى بالا كەيىن چاۋشيان ارمياسىنىڭ جوعارى دارەجەلى قولباسشىسى بولعان سۇي يىڭ ەدى. ءبىراق لو شىڭجياۋ جاعاعا قايتىپ شىعا المادى.
لو شىڭجياۋ قۇرباننىڭ سۇيەگىن تاۋىپ العاننان كەيىن، چاۋشيان شىتيانلي حالقى ايرىقشا قايعىردى. ولار چاۋشياننىڭ جەرگىلىكتى ەڭ سالتاناتتى جەرلەۋ سالتى بويىنشا ونى جاسىل جەلەك جامىلعان فوتيدۇڭ تاۋىنا جەرلەدى. شىتيانلي حالىقتىق كوميتەتى لو شىڭجياۋ قۇربان بولعان جەرگە اعاش تاقتاي ورناتىپ، وعان ”چاۋشيان توپىراعىندا ەسەيىپ - ەرجەتكەن حالىقتىڭ ءبارى ءبىزدىڭ دوسىمىز لو شىڭجياۋ جولداستى ماڭگى ەسىندە ساقتاپ، ونىڭ ۇلى ينتەرناتسيوناليزمدىك رۋحىنان ۇيرەنۋ كەرەك“ دەپ جازدى.
