شينحۋا اگەنتتىگىنىڭ 7 - ايدىڭ 5 - كۇنى بەيجيڭنەن بەرگەن حابارى (ءتىلشى باي جيە). مەملەكەت ءتوراعاسى شي جينپيڭ 7 - ايدىڭ 5 - كۇنى دياۋيۇيتاي مەملەكەت قوناق ۇيىندە بانگلادەشتىڭ زۇڭليى حاسينامەن كەزدەستى.
شي جينپيڭ بىلاي دەپ اتاپ كورسەتتى: جۇڭگو مەن بانگلادەش ءداستۇرلى دوس كورشى. مەن 2016 - جىلى ەلدەرىڭىزدە مەملەكەت ىستەرى ساپارىندا بولعاندا، ەكى ەلدىڭ قارىم - قاتىناسىن ستراتەگيالىق سەلبەستىك سەرىكتەستىك قارىم - قاتىناسقا كوتەرىپ، ەكى جاقتى اۋىس - كۇيىستىڭ، سەلبەستىكتىڭ تەز قارقىنمەن دامۋدىڭ جاڭا ساتىسىنا ءوتۋىن ىلگەرىلەتىپ، ءوز ەلدەرىمىزدىڭ ەكونوميكالىق، قوعامدىق دامۋىنا جاڭا قوزعاۋشى كۇش سيلادىق، ەكى ەل حالقىنا دا اناعۇرلىم كوپ باقىت اكەلدىك. قازىر جۇڭگو - بانگلادەش ەكەۋى دە ءوز دامۋىنىڭ شەشۋشى كەزەڭىندە تۇر. ستراتەگيالىق سەلبەستىك سەرىكتەستىك قارىم - قاتىناستى ويداعىداي بەكەمدەۋ، ويداعىداي دامىتۋ ەكى ەلدىڭ جانە ەكى ەل حالقىنىڭ ورتاق مۇددەسىنە ۇيلەسۋمەن قاتار، ازيانىڭ گۇلدەنۋىنە، ورنىقتىلىعىنا جانە دۇنيە ءجۇزىنىڭ ەسىك اشۋىنا، سەلبەستىگىنە دە ءتيىمدى.
شي جينپيڭ بىلاي دەپ باسا دارىپتەدى: ەكى جاق ءداستۇرلى دوستىقتى اسقاقتاتىپ، ەكى ەلدىڭ سەلبەسە دامۋىن، بىرگە دامۋىن جۇزەگە اسىرۋعا قۇلشىنۋ كەرەك. جوعارى جىكتەگىلەر اۋىس - كۇيىسىنىڭ ساياسي جاقتاعى جەتەكشىلىك رولىن ساۋلەلەندىرىپ، جوعارى دەڭگەيدە جوبالاۋدى كۇشەيتىپ، ءتۇرلى سالاداعى اۋىس - كۇيىستىڭ، سەلبەستىكتىڭ ۇزدىكسىز ىشكەرىلەي دامۋىنا شىنايى كەپىلدىك ەتۋ كەرەك. ەكى ەل ۇكىمەتىنىڭ، زاڭ شىعارۋ قۇرىلىمىنىڭ، ساياسي پارتياسىنىڭ اۋىس - كۇيىسىن ساقتاپ، ەكى جاقتى قارىم - قاتىناس جونىندە تىلدەسۋدى كۇشەيتىپ، ورتاق تانىم ۇيىستىرۋ كەرەك. جۇڭگو جاق بانگلادەش جاقتىڭ جۇڭگونىڭ وزەكتى مۇددەسىنە ساياتىن ماسەلەلەردە جۇڭگو جاققا قىمباتتى قولداۋ كورسەتكەندىگىن القايدى، بانگلادەشتىڭ دەربەس يەلىك ۇقىعىن قورعاۋىن، ءوز ەلىنىڭ مەملەكەت جاعدايىنا ۇيلەسەتىن دامۋ جولىن قاراستىرۋىن، ساياسي جانە قوعامدىق ورنىقتىلىقتى قورعاۋىن باياعىسىنداي تاباندىلىقپەن قولدايدى. جۇڭگو - بانگلادەش سەلبەستىگىنىڭ كەلەشەگى جارقىن، بولاشاعى نۇرلى. ەكى جاق ساۋدا، قارجى قوسۋ، ءوندىرىس قۋاتى، ەنەرگيا، ەلەكتر قۋاتى، قاتىناس - تاسىمال، ينفورماتسيا - حابارلاسۋ، نەگىزدىك قۇرىلعى قۇرىلىسى، اۋىل شارۋاشىلىعى سياقتى ءتۇيىندى سالالارداعى سەلبەستىكتى كۇشەيتۋ، سيفرلى ەكونوميكا سالاسىنداعى سەلبەستىكتى ىلگەرىلەتىپ، ”سيفرلى جىبەك جولىن“ بىرگە قۇرۋ كەرەك. جۇڭگو جاق بانگلادەش جاقپەن وقۋ - اعارتۋ، مادەنيەت، جاستار، اقپارات قۇرالدارى سياقتى جاقتاردا اۋىس - كۇيىستى، سەلبەستىكتى كۇشەيتىپ، جۇڭگو - بانگلادەش ءداستۇرلى دوستىعىنا ويداعىداي مۇراگەرلىك ەتۋدى جانە مۇنى اسقاقتاتۋدى قالايدى. جۇڭگو جاق بانگلادەشتىڭ لاڭكەستىككە قارسى تۇرۋ جانە زاڭ اتقارۋ قابىلەتى قۇرىلىسىنا ۇزبەي قولداۋ كورسەتۋدى قالايدى.
حاسينا مىنالاردى ءبىلدىردى: جۇڭگو كوممۋنيستىك پارتياسى قۇرىلعاندىعىنىڭ 98 جىلدىعىن جانە جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعىن قىزۋ قۇتتىقتايمىن، بۇگىنگى جۇڭگونىڭ شي جينپيڭنىڭ جاڭا ءداۋىر جۇڭگوشا سوتسياليزم يدەياسىنىڭ جەتەكشىلىگىندە جاڭا، كەسەك تابىستارعا قول جەتكىزگەندىگىن قۇتتىقتايمىن. بانگلادەش ەكى ەلدىڭ اعا بۋىن باسشىلارى نەگىزىن قالاعان بانگلادەش - جۇڭگو دوستىق قارىم - قاتىناسىن قاستەرلەيدى، ءبىر جۇڭگو ساياساتىن تاباندىلىقپەن قولدايدى، جۇڭگو جاقتىڭ ۇزاق ۋاقىتتان بەرگى قىمباتتى قولداۋىنا العىس ايتادى. بانگلادەش جاق مەملەكەت اتاسى مۋجيبۋر راحمان العا قويعان ”التىن بانگلادەش“ ارمانىن جۇزەگە اسىرۋ ءۇشىن كۇرەس جۇرگىزۋدە جۇڭگونىڭ قولداۋىنا يە بولا بەرۋدى، ەكى جاقتى ساۋدانى، قارجى قوسۋ ورەسىن جوعارىلاتۋدى، نەگىزدىك قۇرىلعى قۇرىلىسى، سيفرلى ەكونوميكا، كليمات وزگەرىسىنە توتەپ بەرۋ، لاڭكەستىككە قارسى تۇرۋ، حاۋىپسىزدىك سياقتى سالالارداعى سەلبەستىكتى تەرەڭدەتۋدى ءۇمىت ەتەدى. بانگلادەش جۇڭگونىڭ ەل باسقارۋداعى تاجىريبەلەرىنەن ونەگە الۋدى، ”ءبىر بەلدەۋ، ءبىر جول“دى بىرگە قۇرۋعا بەلسەنە قاتىسۋدى، بانگلادەش - جۇڭگو - ءۇندىستان - بيرما ەكونوميكالىق ءدالىزى قۇرىلىسىن ىلگەرىلەتۋدى قالايدى.
ياڭ جيەچى، ۋاڭ ي، حى ليفىڭ قاتارلىلار كەزدەسۋگە قاتىناستى.
