− شينجياڭ اۋا رايى ستانسياسىنىڭ باس مالىمەتشىسى، اعا ينجەنەر چىن چۇنيان تۋرالى
اۋەلگى ماقساتتى ۇمىتپاۋ بورىشتى ەستە بەرىك ساقتاۋ
قاسىمىزداعى ۇلگىلەر
ءتىلشى شيە حۇيبيان
7 - ايدىڭ 6 - كۇنى شينجياڭ اۋا رايى ستانسياسىنىڭ باس مالىمەتشىسى، اعا ينجەنەر چىن چۇنيان جۇمىس كەڭسەسىنە ەرتەمەن كەلىپ، كومپيۋتەرىن اشىپ، تاياۋ كۇندەردەگى اۋا رايىنىڭ وزگەرىس احۋالىن قاراپ، ەستەلىككە الا باستادى. ول كومپيۋتەر ەكرانىنداعى جىپىرلاعان ورنەكتەرگە، ءتۇرلى - ءتۇستى بەلگىلەرگە ىنتى - شىنتىسىمەن بەرىلە قاراپ وتىر.
چىن چۇنياننىڭ نازارىندا بۇل ورنەكتەر، بەلگىلەر سان - سيفرلارعا اينالعان، اسپان قاباتتارعا بولىنگەن، بۇلتتاردى مولشەرلەپ ەسەپتەۋگە بولادى، جەلدىڭ ءوزى ساندى مالىمەتتەردەن تۇرادى. چىن چۇنيان بىلاي دەيدى: ”اۋا رايىنىڭ وزگەرىس بارىسى ديناميكالى بولادى، ءسات سايىن وزگەرىپ وتىرادى، ءبىزدىڭ جۇمىسىمىز تالداۋ جاساۋ، اۋا رايىنان اناعۇرلىم ءدال الدىن الا مالىمەت دايىنداۋ“.
مىندەت - جاۋاپكەرشىلىگىن ادا ەتىپ، اۋا رايىنان الدىن الا مالىمەتتىڭ اناعۇرلىم ءدال بولۋىنا مۇمكىندىك جاسادى
1991 - جىلى چىن چۇنيان نانجيڭ اۋا رايى شۋەيۋانىنان (قازىرگى نانجيڭ ينفورماتسيا ينجەنەرياسى داشۋەسى) وقۋ تاۋىسقان سوڭ، اۋىلى تولى اۋدانىنا قايتىپ اۋا رايىن جەر بەتىنەن باقىلاۋ قىزمەتىمەن شۇعىلداندى. 2002 - جىلى چىن چۇنيان اۆتونوميالى رايوندىق اۋا رايى مەكەمەسىنە قىزمەتكە كەلدى ءارى ءوزىنىڭ قاجىرلى قۇلشىسىنا سۇيەنىپ، 2 جىلدا شينجياڭ اۋا رايى ستانسياسىنىڭ باس مالىمەتشىسى بولدى.
ەلەۋلى اۋا رايىنا جولىققاندا، باس مالىمەتشى رەتىندە، چىن چۇنيان اسا ۇلكەن سالماق ارقالايدى. ”شەشۋشى ساتتە، باس مالىمەتشىنىڭ الدىن الا مالىمەت جونىندە ايقىن پىكىر بەرۋىنە تۋرا كەلەدى“.
2013 - جىلى 5 - ايدىڭ 23 - كۇنى مالىمەتشىلەر وڭتۇستىك شينجياڭدا بولاتىن جاۋىندى اۋا رايى جونىندەگى الدىن الا مالىمەت ناتيجەسى تۋرالى قيان - كەسكى تالقى جۇرگىزەدى. سول كەزدە، كەزەكشى مالىمەتشى ”قالىڭ نوسەر ورتالىعىنداعى جاۋىن مولشەرى 30 ميلليمەتر اينالاسىنا جەتۋى مۇمكىن“ دەگەن قورىتىندى شىعارادى. ويتكەنى، قاشقار، حوتان ايماقتارىنىڭ بۇرىنعى جىلدىق ورتاشا جاۋىن مولشەرى 50 ميلليمەترگە جەتپەيتىن، سوندىقتان بۇل الدىن الا مالىمەت قالىپتان اۋىتقىپ كەتكەندەي ەدى.
سوڭىندا، جۇرت جانارى چىن چۇنيانگە قادالدى، ونىڭ قورىتىندىسى تىپتەن تاڭ قالارلىق بولدى: ”قالىڭ نوسەر ورتالىعىنداعى جاۋىن - شاشىن مولشەرى 50 ميلليمەتردەن اسادى!“ ۇزاق جىلدىق تاجىريبەسىنە سۇيەنگەن ول وسى رەتكى سيرەك كەزدەسەتىن قالىڭ نوسەردىڭ پايدا بولاتىن ۋاقىتىن، اۋماعىن، كۇشىن كورسەتىپ بەردى. سوڭىندا، وسى رەتكى الدىن الا مالىمەت 3 كۇن بۇرىن جاريالانىپ قالماستان، شينجياڭنىڭ قالىڭ نوسەر سەبەبىنەن تاۋدا بولاتىن سەل تۋرالى زەرتتەۋ جەتىستىگىنەن دە پايدالانىپ، شينجياڭ تاريحىندا تۇڭعىش رەت تاۋداعى سەل اپاتى جونىندە اۋا رايى قاتەرىنىڭ قىزىل ءتۇستى الدىن الا ساقتاندىرۋىن جاريالادى. 5 - ايدىڭ 26 - كۇنىنەن 28 - كۇنىنە دەيىن، قالىڭ نوسەر ”ايتىلعان ۋاعىندا جەتىپ كەلىپ“، جاۋىن - شاشىن ورتالىعىنداعى جيىنتىق جاۋىن - شاشىن مولشەرى 88.2 ميلليمەترگە جەتتى. كىسىنى جۇبانتارلىعى، جەرگىلىكتى ورىن اۋا رايىنان الدىن الا مالىمەت پەن ۇسىنىس نەگىزىندە، تاۋداعى سەل اپاتىنىڭ قاتەرىنە ۇشىراۋى مۇمكىن اۋىل - قالاشىقتاردان 14 مىڭنان استام ادامدى الدىن الا كوشىرىپ كەتكەن بولاتىن.
”ءدال الدىن الا مالىمەت بەرۋ دەگەندە، ۋاقىتىنىڭ، دارەجەسىنىڭ، ورنىنىڭ مۇلتىكسىز بولۋى وتە قيىن، مالىمەتشىنىڭ مىندەت - جاۋاپكەرشىلىگى الدىن الا مالىمەت ناتيجەسىن بارىنشا ءدال ەتۋ، شۇعىل اۋا رايىنان بولاتىن زياندى بارىنشا ازايتۋ“، - دەيدى چىن چۇنيان.
شوگەلدىكپەن دەن قويا ىزدەنىپ، مەملەكەت دارەجەلى باس مالىمەتشى بولدى
اناعۇرلىم ءدال الدىن الا مالىمەت بەرۋدى جۇزەگە اسىرۋ ءۇشىن چىن چۇنيان از ەڭبەك ەتكەن جوق. تالاي رەت كەزەكشىلىك وتەپ بولعان سوڭ، جۇمىس كەڭسەسىندە قالىپ ءتۇن ورتاسىنا دەيىن ۇستەمە جۇمىس ىستەپ، بوران، قالىڭ نوسەر (قار)، بۇرشاق سياقتى اپاتتى اۋا رايىنىڭ ەرەكشەلىكتەرىن جانە ونان الدىن الا مالىمەت بەرۋ تەحنيكاسىنا تالداۋ جاساپ، زەرتتەدى.
”اۋقىمدىق اينالمالى اعىن جاعدايىنىڭ ىقپالىنا ۇشىراعاندىقتان، جاقىنعى 2 جىلدا شينجياڭدا شۇعىل بولاتىن اۋا رايى ءبىرشاما كوبەيدى، ءبىراق ەلەۋلى اۋا رايى بارىستارى جونىندە ءبىز تۇگەلدەي الدىن الا ساقتاندىرۋ ينفورماتسيالارىن جاريالاپ وتىردىق“، - دەيدى چىن چۇنيان ايرىقشا ماقتانىشپەن.
چىن چۇنياننىڭ قاراۋىنشا، تاڭداۋلى مالىمەتشى كەزەكشىلىگىن جاقسى ىستەۋمەن عانا قاناعاتتانباۋى، عىلمي زەرتتەۋگە دە ۋاقىت جۇمساۋى كەرەك.
وسى جىلداردا، چىن چۇنيان باستاماشى بولىپ الدىن الا مالىمەت بەرۋ نازارياسى مەن تەحنيكاسىن ۇڭىلە زەرتتەپ، شينجياڭنىڭ كۇردەلى گەوگرافيالىق شارت - جاعدايىمەن بىرلەستىرىپ، دارا ويعا يە الدىن الا مالىمەت بەرۋ وي جەلىسىن قالىپتاستىردى، اسىرەسە، شينجياڭداعى قالىڭ نوسەر - قار، بوران، قۇمدى بوران سياقتى اپاتتى اۋا رايىنان الدىن الا مالىمەت بەرۋ، قىزمەت وتەۋ سالاسىندا مول تاجىريبە جينادى.
چىن چۇنيان جاڭالىق اشۋ توبىن باستاپ، شينجياڭنىڭ قىسقا ۋاقىتتىق الدىن الا مالىمەت بەرۋ كاسىبى جۇيەسىن ورناتىپ، جۇيەنىڭ قىسقا ۋاقىتتاعى اۋا تەمپەراتۋراسىنان الدىن الا مالىمەتتىڭ ℃2 ىشىندە بولۋ دالدىگى ۇدايى 8 جىل بويى ％70تەن اسۋىنا مۇمكىندىك جاسادى. سونىمەن بىرگە اۆتونوميالى رايوندىق اۋا رايى مەكەمەسىنىڭ تاۋداعى سەلدەن ساقتانۋ جانە ونى تىزگىندەۋ اۋدان دارەجەلى بەيينجەنەريالىق شارا نىسانىنىڭ تەحنيكالىق جاۋاپتىلارىنىڭ ءبىرى رەتىندە، ول جوبالاپ، زەرتتەپ اشقان كوپ يقۋاتتى، ”ءبىر كنوپكامەن“ جاريالاناتىن ”شينجياڭنىڭ ورتا، شاعىن وزەندەرىندەگى تاسقىن جانە تاۋداعى سەل گەوگرافيالىق اپاتىنان دالمە - ءدال الدىن الا مالىمەت بەرۋ، ساقتاندىرۋ جالپىلىق كاسىبى تۇعىرى“ بۇكىل شينجياڭدا جالپىلاستىرىلدى.
كاسىپكە جۇيرىك بولىپ، كورنەكتى ۇلەس قوسقاندىقتان، چىن چۇنيان سان رەت ”مەملەكەتتىك تاڭداۋلى كەزەكشى مالىمەتشى“، ”جۇڭگو اۋا رايى مەكەمەسى ەلەۋلى اۋا رايى بويىنشا قىزمەت كورسەتۋدەگى وزات“، ”اۆتونوميالى رايوندىق اۋا رايى مەكەمەسىنىڭ تاڭداۋلى ورتا جاس، جاس عىلىم - تەحنيكا قىزمەتكەرلەرىنىڭ 1 - دارەجەلى سيلىعى“ سياقتى اتاق - ماراپاتتارعا يە بولدى. 2014 - جىلى ول جۇڭگو اۋا رايى مەكەمەسى جاعىنان ”بۇكىل ەلدەگى 100 باس مالىمەتشى“نىڭ ءبىرى بولىپ باعالاندى، سونداي - اق بۇكىل شينجياڭ بويىنشا بىردەن - ءبىر مەملەكەت دارەجەلى باس مالىمەتشى سانالدى. بيىل چىن چۇنيانگە تاعى دا ”اۆتونوميالى رايوننىڭ تاڭداۋلى كومپارتيا مۇشەسى“ اتاعى بەرىلدى.
اۋەلگى ماقساتتى وزگەرتپەگەندە عانا، ءتىپتى دە الىسقا بارۋعا بولادى
كاسىپتىك قىزمەتكەر رەتىندە، ءتىپتى دە ءدال الدىن الا مالىمەت بەرۋ − چىن چۇنياننىڭ تالپىنىس ارمانى، سونىمەن بىرگە كومپارتيا مۇشەسى رەتىندە، ونىڭ اۋەلگى ماقساتى باستان - اياق قايتكەندە ءوزىنىڭ كاسىپتىك قابىلەتىن ساۋلەلەندىرىپ، بۇقاراعا اناعۇرلىم ويداعىداي قىزمەت وتەۋ بولدى.
13 - كەزەكتى بۇكىل مەملەكەتتىك قىسقى سپورت جينالىسىنىڭ جابىلۋ سالتىنا قاراعان كۇنى، 2016 - جىلى 1 - ايدىڭ 29 - كۇنى تۇندە اۋا رايى شۇعىل وزگەرىپ، قويۋ تۇمان باسىپ كەتتى. ۇيىمداستىرۋ كوميسسياسىنداعى قىزمەتكەرلەر تەلەفون سوعىپ: ”ەرتەڭگى جابىلۋ سالتىن ۋاعىندا وتكىزۋگە بولا ما، جوق پا، انىق جاۋاپ بەرسەڭىزدەر“، - دەدى. كەزەكشىلىك اتقارىپ وتىرعان باس مالىمەتشى رەتىندە، چىن چۇنيان تالداۋ جۇرگىزگەننەن كەيىن، ەرتەڭ تاڭەرتەڭ قار توقتاپ، تۇمان سەيىلەدى دەپ قورىتىندى جاسايدى. الدىن الا مالىمەت قورىتىندىسى ءدال شىعىپ، قىسقى سپورت جينالىسىنىڭ تابىسپەن اياقتالۋىنا كەپىلدىك ەتىلەدى.
2018 - جىلى 11 - ايدىڭ 30 - كۇنىنەن 12 - ايدىڭ 1 - كۇنىنە دەيىن، سولتۇستىك شينجياڭعا سيرەك كەزدەسەتىن سۋىق اعىس، قالىڭ قار، بوران، قۇمدى بوران سياقتى اپاتتىق اۋا رايى قۇبىلىسى تۋىلدى. ”قىستىگۇنى قۇمدى بوران سوعۋ تىم سيرەك كەزدەسەدى“، - دەيدى چىن چۇنيان. كوپ جىلدىق تاجىريبەسىنە نەگىزدەلگەن ول الدىن الا مالىمەت بەرۋشى قىزمەتكەرلەردى باستاپ وسى رەتكى اۋا رايىنىڭ جالعاسۋ ۋاقىتى، ىقپال كولەمى سياقتىلاردان الدىن الا مالىمەت بەرىپ، قاتىستى وڭىرلەردىڭ الدىن الا ساقتاندىرۋ قىزمەتىنە جەتەكشىلىك ەتىپ، جەرگىلىكتى شەشىم جاساۋعا قاجەتتى ماتەريالمەن دەر كەزىندە قامداپ، زياندى ەڭ تومەنگى شەككە ءتۇسىردى.
كۇندەلىكتى قىزمەتتە چىن چۇنيان ۇنەمى ەگىنشى - مالشىلاردان كەلگەن تەلەفونداردى قابىلداپ جاتادى. ول: اسىرەسە، بيىل وڭتۇستىك شينجياڭ قىسقا مەرزىم ىشىندە نەشە رەتكى ەلەۋلى اۋا رايى وزگەرىسىن باستان كەشىردى، بوران سوعىپ، بۇرشاق جاۋىپ، جەرگىلىكتى ەگىنشى - مالشىلارعا نەداۋىر زيان سالدى، - دەدى. سونىمەن، ەگىنشى - مالشىلار اۋا رايى ستانسياسىنا ارنايى تەلەفون سوعىپ، چىن چۇنياندى ىزدەپ، جۋىقتاعى اۋا رايى جاعدايىن سۇراستىرىپ، ونىڭ ۇسىنىسىنا نەگىزدەلىپ ەگىنشىلىك جوسپارلارىن ورنالاستىردى.
اۋەلگى ماقساتىنان اينىماعان چىن چۇنياننىڭ دالمە - ءدال الدىن الا مالىمەت بەرۋگە تالپىنۋ قادامى ەشقاشان توقتاعان ەمەس. ”اۋا رايىنان دالمە - ءدال الدىن الا مالىمەت بەرۋدى جۇزەگە اسىرۋدىڭ جولى ءالى ۇزاق، تەك اۋەلگى ماقساتتى وزگەرتپەي، تاباندىلىقپەن جۇرە بەرگەندە عانا، ءتىپتى دە الىسقا بارۋعا بولادى“. چىن چۇنيان باستان - اياق: ”بۇقارانىڭ قاجەتى ءدال ءبىزدىڭ ىستەيتىن ءىسىمىز“، - دەيدى.
