حۇڭشان باقشاسىنىڭ ۇشاقپەن تۇسىرىلگەن سۋرەتى (6 - ايدىڭ 15 - كۇنى تۇسىرىلگەن)
1959 - جىلى ۇرىمجىدەگى ءار ۇلت بۇقارا حۇڭشاندى جاسىلداندىرۋدا. شينجياڭ گازەتىنىڭ ماتەريال سۋرەتى
”بەتاشار“
سۋرەت لەنتالارىندا ورنەك بولىپ قالعان ەستەن كەتپەس ساتتەردى كورگەندە، جادىڭىزداعى وتكەن ىستەر ءسىزدىڭ ويىڭىزدا جالتىلداي جاڭعىرىپ، مەن مۇندالاي ما... بۇگىننەن باستاپ، گازەتىمىز ”ايبىندى 70 جىل كۇرەسكە تولى جاڭا ءداۋىر − ەستەن كەتپەس سول ءبىر ءسات“ ارناۋلى ايدارىن اشادى، ءبىز تاماشا كەسكىندەر ارقىلى شينجياڭنىڭ بايتاق دالاسىنىڭ وراسان زور وزگەرىستەرىنە قايىرىلا قاراپ، سۋرەتتەر ارقىلى سىزگە جاڭا جۇڭگو قۇرىلعان 70 جىلدان بەرگى تارتىمدى شينجياڭ حيكايالارىن باياندايمىز.
حابارىن جازىپ، سۋرەتىن تۇسىرگەن ءتىلشى حان لياڭ
7 - ايدىڭ 8 - كۇنى بيىل 80 جاستاعى حۋاڭ ديڭچي قاريا تاعى دا حۇڭشان باقشاسىنا كەلىپ، كەزىندە ءوزى ەككەن اعاشتاردى كوردى. 1961 - جىلى حۋاڭ ديڭچي اسكەري قوسىندا قىزمەت ىستەگەن. ول بىلاي دەدى: ”مەن تۇرعان اسكەري قوسىن دا سول كەزدە حۇڭشاندى جاسىلداندىرۋ قيمىلىنا قاتىناستى، تاۋ تۇگەل جارتاس، توپىراق قاباتى وتە جۇقا بولعاندىقتان، ءبىز قايلامەن، بولات سۇيمەنمەن جارتاستان شۇقاناق قازىپ، ونان سوڭ تاۋدىڭ ەتەگىنەن توپىراقتى ارقالاپ شىعارىپ، كوشەتتەردى ءبىر - بىرلەپ وتىرعىزدىق“. 1988 - جىلى حۋاڭ ديڭچي اسكەري قوسىننان كاسىپ اۋىستىرىپ، حۇڭشان باقشاسىنا كەلىپ پارتيا ياچەيكاسىنىڭ شۋجيى مىندەتىن ارقالايدى. حۋاڭ ديڭچي بىلاي دەپ تانىستىردى: 1956 - جىلدان باستاپ، ءۇرىمجى قالاسى ءار ۇلت قالا تۇرعىندارىن جۇمىلدىرىپ، حۇڭشاندى جاسىلداندىرۋدى باستادى، نەشە ون جىل تالىقپاي قۇلشىنۋ ارقىلى حۇڭشان قىزىل سامالدىق، جاسىل اعاشتى، كوك مۇنارا، قىزىل جارتاستى ەرەكشە كەلبەتكە يە حۇڭشان باقشاسىنا اينالدى. 2006 - جىلى حۇڭشان باقشاسى مەملەكەتتىك 4A دارەجەلى كورىنىس اۋماعى بولىپ دارەجەسى جوعارىلاتىلدى ءارى ۇرىمجىدەگى جاڭا 10 ءىرى كورىنىس ءتۇيىنىنىڭ ءبىرى بولدى، قازىر جىلىنا 4 ميلليون ادام - رەت ساياحاتشى قابىلدايدى.
