− 2019 - جىلعى ”شەكارا وڭىرگە كومەكتەسكەن ەڭ كورىكتى تۇلعا“ تۋرالى
شينحۋا اگەنتتىگىنىڭ ءتىلشىسى
شەكارا وڭىرگە كومەكتەسۋشىلەردىڭ كوكەيىندە شەكارا ءوڭىر تەك ءبىر جاعراپيالىق ۇعىم عانا ەمەس، ول ارادا ولاردىڭ قوسقان ۇلەسى مەن جاساعان قۇلشىنىستارى، ءبىر تۋعان اعا - باۋىرداي ۇلتتىق باۋىرلاستارى، ەستەن كەتپەس ەلەستەرى بار......
بۇكىل پارتيادا ”اۋەلگى ماقساتتى ۇمىتپاۋ، بورىشتى ەستە بەرىك ساقتاۋ“ نەگىزگى تاقىرىپتىق تاربيەسى ىشكەرىلەي ورىستەتىلىپ، شىت جاڭا بەينەمەن جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعىن قارسى الۋ قارساڭىندا، ورتالىق كوميتەت ۇگىت ءبولىمى 2019 - جىلعى ”شەكارا وڭىرگە كومەكتەسكەن ەڭ كورىكتى تۇلعا“ كانديداتتارىنىڭ ىزگى ىستەرىن جاريالادى.
جان تەبىرەنتەرلىك حيكايالار ۇلتتار ىنتىماعىنىڭ بەرەكەلى شاڭىراعىنداعى اسەرلى اۋەن بولىپ توعىستى.
■ شىن پەيىلىن ارناپ، شىنايى سۇيىسپەنشىلىككە يە بولدى: شەكارا وڭىردەگى بۇقارانى تۋىسىنداي كوردى
وڭتۇستىك شينجياڭنىڭ كەريا اۋدانىندا قىزمەت ىستەيتىن تيانجيننەن شينجياڭعا كومەكتەسۋگە كەلگەن كادر شي شىميڭ ءۇرتىس ۇستەمە قىزمەت ىستەگەننەن كەيىن، تۇتقيىلدان ميعا قان قۇيىلۋ ناۋقاسىنا شالدىعىپ، شۇعىل قۇتقارۋ ءونىم بەرمەي، 2019 - جىلى 1 - ايدا اۋرۋ سەبەبىنەن نەبارى 43 جاسىندا قايتىس بولدى. ناۋقاستانىپ قالۋدان بۇرىن، شي شىميڭ تاعى قىزمەتتەستەرىنە اپتانىڭ سوڭىندا ”كىشكەنتاي انار“دى كورىپ قايتۋدى تاپسىرادى.
شي شىميڭ ۋايىمداپ جۇرگەن ”كىشكەنتاي انار“ ءبىر كىشكەنە ۇيعۇر قىز بولاتىن. 2017 - جىلى 4 - ايدا جۇكتى بولىپ قالعان مايمۇنحان اۋىر قان ازدىق ناۋقاسىنا شالدىعىپ قالعانىمەن، ەمدەلەتىن اقشاسى بولمايدى، شي شىميڭ شينجياڭعا كومەكتەسۋ قىزمەت گرۋپپاسى ىشىندە جىلۋ اتاۋ ۇيىمداستىرىپ، مايمۇنحاننىڭ قيىنشىلىق قىسپاعىنان وتۋىنە كومەكتەسەدى ءارى بالا تۋىلعاننان كەيىن وعان ”كىشكەنتاي انار“ دەپ ات قويىپ، ۇلتتار ىنتىماعى بەينە تىعىز ۇيىسقان اناردىڭ دانىندەي دەگەن ءماندى اڭداتادى. شي شىميڭ ەسسىز جاتقان كەزدە مايمۇنحان ناۋقاس بولمەسىنىڭ سىرتىندا وكسىپ جىلايدى. شي شىميڭنىڭ جۇپ قۇراعان تۋىسى تۇنيساحان وتباسى مەيىزىن كوتەرىپ كەلىپ، ICU بولمەسىنە كىرگىزىپ بەرۋدى وتىنەدى......
شينجياڭعا كومەكتەسۋگە كەلگەن ساقشى يە شيۇڭ قۇتىبي اۋدانى ارشىليديان قالاشىعىنداعى ۇيعۇر شارۋا سىلايىم وتباسىمەن جۇپ قۇراپ ”تۋىس“ بولعان ەدى. 2017 - جىلى 50 جاستاعى سىلايىم كوزى كورمەي قالعاندىعى سەبەپتى اتىزدا ەڭبەك ىستەۋدەن قالادى، ۇيدەگى بار جيعان - تەرگەنىن دە كىشى ۇلىنىڭ ناۋقاسىن ەمدەتۋگە ىستەتەدى. يە شيۇڭ سىلايىم وتباسىنداعىلارعا ءبىر تۋعانداي قامقورلىق ىستەپ كومەكتەسەدى. ”قول ۇستاسقان ۋاقىت ۇزارعان سايىن، ايتاتىن اڭگىمە كوبەيدى، كوڭىل جاقىندادى، بارعان سايىن ەتەنە بولدىق“، - دەيدى يە شيۇڭ.
2013 - جىلى چىن ياۋپيڭ مەن ايەلى ەكەۋى حىناننىڭ لوحىسىنان شينجياڭنىڭ اقسۋىنا كەلىپ، بەستيىرمەن اۋىلى ارالدىڭگار قىستاعىندا بەيقۇت ءۇي سالۋ قۇرىلىسىنا ات سالىسادى. ءبىر جولى قۇرىلىس ورنىنداعى سەمەنت ارالاستىرعىش بۇزىلىپ قالعاندا، ۇيعۇر تۋىسقان تۇرسۇن توحتى ىرىقتىلىقپەن كومەكتەسىپ جوندەپ بەرەدى، بۇعان چىن ياۋپيڭ قاتتى اسەرلەنەدى. تۇرسۇن وتباسىنىڭ تۇرمىستا قيىنشىلىعى بارىن بىلگەننەن كەيىن، چىن ياۋپيڭ وسى وتباسىنا كومەكتەسۋگە بەل بۋادى.
كامشات قويان باعۋ تاجىريبەسى بار چىن ياۋپيڭ تۇرسۇنعا قويان باعۋدى ۇيرەتۋگە بەكيدى. 5 اسىل تۇقىمدى قويان باعۋدان باستاپ قازىر 3000نان استامعا جەتۋگە دەيىن، بىلتىر تۇرسۇن وتباسىنىڭ قويان باعۋدان تاپقان كىرىسى 270 مىڭ يۋاننان استامعا جەتىپ، قويان باعاتىن جىلىجاي سالىپ، جاڭا ۇيگە كوشىپ كىرەدى. تۇرسۇن تەبىرەنە: ”ونىڭ ءبىزدىڭ وتباسىمىزعا جاساعان جاقسىلىعى ايتىپ تاۋىسقىسىز!“، - دەدى.
”وقۋ - اعارتۋعا كومەكتەسۋ سەبەپتى، ءبىز شيزاڭنان كوپتەگەن ’تۋىس‘ تاۋىپ الدىق“. بۇل حۋبەي قوعامدىق جانە جاراتىلىستىق عىلىمدار شۋەيۋانى ”گىسار گۇلى“ وقۋ - اعارتۋعا كومەكتەسۋ اترەتىندەگى مۇشەلەردىڭ سەزگەندەرى.
چيۇڭجيە اۋدانى شيزاڭنىڭ شىعىس وڭتۇستىگىنە ورنالاسقان، وقىتۋشى كۇشى ءالسىز ەدى. 2014 - جىلى حۋبەيدىڭ شياڭياڭ قالاسىنىڭ شيزاڭعا كومەكتەسۋ كەڭسەسى مەن حۋبەي قوعامدىق جانە جاراتىلىستىق عىلىمدار شۋەيۋانى مەكتەپتەگى ۇزدىك ستۋدەنت ەرىكتىلەردى چيۇڭجيە اۋدانىنداعى ورتا، باستاۋىش مەكتەپتەرگە وقۋ - اعارتۋعا كومەكتەسۋگە تاڭداپ جىبەرۋدى ۇيعارادى. باستابىنداعى ءبىر جىلدا ءبىر توپ جىبەرۋدەن ءبىر جىلدا 2 توپ جىبەرۋگە دەيىن، حۋبەي قوعامدىق جانە جاراتىلىستىق عىلىمدار شۋەيۋانى وقۋ - اعارتۋعا كومەكتەسۋ اترەتى مۇشەلەرىنەن جيىنى 8 توپ بويىنشا 37 ادام - رەت جىبەرەدى. وقۋ - اعارتۋعا كومەكتەسۋگە بارعان مۇشەلەردىڭ كوپ ساندىسى وقۋ تاۋىسقاننان كەيىن شيزاڭعا قايتىپ قىزمەت ىستەيدى. تەرەڭ دوستىق سۇيىسپەنشىلىك گىسار گۇلىندەي قۇلپىرا اشىلىپ، جۇپار ءيىسىن شاشتى.
■ شىن پەيىلمەن ۇلەس قوستى: شەكارا وڭىرگە كومەكتەسۋدى قاستەرلى ءىس دەپ سانادى
بيىل 59 جاستاعى گو گۇيفاڭ شينجياڭ ءوندىرىس - قۇرىلىس بيڭتۋانى 5 - شىسى جوعارى دارەجەلى ورتا مەكتەبىنىڭ (حۋاڭگاڭ ورتا مەكتەبىنىڭ 5 - شىداعى بولىمشە مەكتەبى) باستىعى. 2014 - جىلى 8 - ايدان باستاپ، ونىڭ شينجياڭدا ءۇرتىس قىزمەت ىستەگەنىنە 5 جىلعا تايادى. تاڭەرتەڭ ول تاڭ سارىدە وقۋشىلارمەن بىرگە تاڭەرتەڭگى گيمناستيكاعا شىعادى؛ تۇندە وقۋشىلار ۇيىقتاپ قالعاننان كەيىن ۇيىنە قايتادى. لاۋگو: شينجياڭدا زەينەتكە شىققانعا دەيىن ىستەيمىن، - دەدى.
2016 - جىلى 7 - ايدا، جۇڭگو جىلجىمالى حابارلاسۋ جياڭسۋ سەرىكتەستىگى ليانيۇنگاڭ بولىمشە سەرىكتەستىگى ءتارتىپ تەكسەرۋ كوميتەتىنىڭ شۋجيى، ورىنباسار باس ديرەكتورى دۋان يۇيپيڭ شيزاڭعا بارىپ، الي ايماقتىق اكىمشىلىك مەكەمەسىنىڭ ورىنباسار باس حاتشىسى، گايزى اۋداندىق پارتكومنىڭ تۇراقتى مۇشەسى، ورىنباسار اۋدان اكىمى مىندەتىن اتقارادى. 1000نان استام كۇندى اتىرىپ، كەشتى باتىرعان دۋان يۇيپيڭ بارىن سالا قۇلشىنىپ، اناعۇرلىم كوپ كەدەي وتباسىنداعى بالالاردى ساباقحاناعا كىرگىزىپ، گايزى اۋدانىنا بايۋدىڭ ”كوكتەم سامالىن“ جەتكىزدى.
2010 - جىلى 7 - ايدا، شانشي ولكەسى حانجۇڭ قالالىق شيپاحاناسىنىڭ ايەلدەر تۋىت ءبولىمىنىڭ تەتە اعا شيپاگەرى لو مىڭ شانشي ولكەسىنىڭ 6 - توپتاعى شيزاڭعا كومەكتەسۋگە كەلگەن كادر رەتىندە، الي ايماقتىق حالىق شيپاحاناسىنا قىزمەت ىستەۋگە كەلەدى. ول ناۋقاستاردى كوڭىلىندە ساقتاپ، قولتەلەفونىن 24 ساعات اشىق ۇستايدى، قانشا شارشاسا دا، ءار كۇنى ءوزى بارىپ ناۋقاستاردىڭ جاعدايىن تەكسەرەدى، شۇعىل، قاتەرلى، اۋىر ناۋقاستارعا كەزىككەندە، شاقىرعان زامان قاستارىنان تابىلادى.
”مەنىڭ جۇرەگىم اليدا، ول ارا مەنى قاجەت ەتەدى“. شيزاڭعا كومەكتەسۋدى اياقتاتىپ شانشيگە قايتىپ كەلگەن لو مىڭ اليداعى اۋىلداستارىنىڭ ۇمىتكە تولعان جانارلارىن ۇنەمى ەسكە الادى. 2018 - جىلى 3 - ايدا، لو مىڭ تاعى دا الي ايماقتىق حالىق شيپاحاناسىنا قىزمەت ىستەۋگە جىبەرىلەدى.
■ ءبىر - بىرىنە قۋات بەردى: باۋىرلاستارىنىڭ قاجەتىن بورىش دەپ ءبىلدى
2 جىلدان استام ۋاقىتتىڭ الدىندا، گۋاڭدۇڭنىڭ جۋحايىنداعى شيپاگەر گۋان يانپيڭ يۇننان ولكەسى نۋجياڭ ليسۋزۋ اۆتونوميالى وبلىسى بيڭجۇڭلو قالاشىعىنا كەلەدى. ول قىستاقتاردى ارالاپ، وتباسىلارىنا بارىپ قىستاق تۇرعىندارىنىڭ دەنساۋلىعىن تەكسەرىپ، ارحيۆ جازىپ، اۋرۋ ەمدەيدى. بيىك تاۋ مەن تەرەڭ شاتقال اراسىنداعى 46 قىستاق - گرۋپپانى ول 4 رەت اينالىپ شىعادى.
ءتىلشى كەزىندە گۋان يانپيڭگە ىلەسىپ قىستاققا بارعان بولاتىن. بۇلت باسىپ، تۇمان قاپتاعان جالاما قۇزداعى تاۋ جولىندا قاشىر مەن اتتىڭ ءىزىن قۋالاپ، ارەڭ زورعا جۇرەسىڭ.
وسىنداي بولا تۇرا، گۋان يانپيڭ قىزمەتتەستەرىمەن بىرگە جۇرەك سۋرەتتەۋىش اسپابى، ەمدەۋ سومكەسى، ۇنەمى ىستەتەتىن ءدارى - دارمەك سياقتى بۇيىمداردى ارقالاپ، كەيدە ورمەلەپ، كەيدە ءجۇرىپ، تاۋعا 300 رەتتەن استام ەمدەۋ جەتكىزىپ، 3000نان استام ادام - رەت دياگنوز قويىپ، ەمدەپ، قىستاق تۇرعىندارىنان 10 مىڭنان استام ادام - رەت دەنساۋلىق تەكسەرىپ، جەرگىلىكتى بۇقارا جاعىنان ەڭ كورىكتى ”شارباق ارقالاعان شيپاگەرى“ دەگەن اتقا يە بولادى.
2015 - جىلى 10 - ايدىڭ باسىندا، حۋنان ولكەسىنىڭ شيزاڭعا كومەكتەسۋگە كەلگەن كادرى ۋ گوچياڭنىڭ شيزاڭعا كومەكتەسۋى اياقتالاتىن كەزدە شاننان قالاسى گۇڭگا اۋدانىندا تۇتقيىلدان ىندەت تارالىپ، سيىر، قويلار ارت - ارتىنان ىندەتكە شالدىعادى، بۇقارانىڭ قامىققان بەينەسى ونىڭ جۇرەگىن قاتتى اۋىرتادى.
”مەن وسىندا قالايىن، سەندەر جۇرە بەرىڭدەر!“ ۋ گوچياڭ سەرىكتەرىمەن بىرگە حۋنانعا قايتپاي، باتىلدىقپەن ارتىنا بۇرىلىپ، ىندەت ەڭ اۋىر بولعان قىستاققا بارىپ، جەرگىلىكتى ورىننىڭ ىندەتتى تىزگىندەۋىنە كومەكتەسەدى.
2014 - جىلى 7 - ايدا، چىن شيان انحۇي ولكەسىنىڭ شيزاڭعا كومەكتەسۋگە كەلگەن تۇڭعىش ايەل ادۆوكاتى رەتىندە، شيزاڭنىڭ چاڭدۋ قالاسى كارو رايونىنا كەلەدى. ءۇستىرت، سۋىق، وتتەگى جەتىسپەيتىن ورتادا، ول باس يمەي، بار ىنتا - پەيىلىمەن قىزمەتكە كىرىسەدى.
2014 - جىلدان بەرى، چىن شيان ىلگەرىندى - كەيىندى شيزاڭعا، ىشكى موڭعۇلعا، شينجياڭعا بارىپ، شەكارا وڭىردەگى قيىنشىلىعى بار بۇقاراعا زاڭدىق كومەك كورسەتتى. كەيبىرەۋلەر ءبىر ادۆوكات قوماقتى كىرىسى مەن جايلى تۇرمىسىن تاستاپ، كەڭ - بايتاق باتىس سولتۇستىككە كەلىپ كومەكتەسكەندە نەنى كوزدەيدى ەكەن؟ دەپ تۇسىنبەي جۇرەدى، ”كومەككە يە بولا الماعان داۋگەردىڭ زاڭدىق كومەكتىڭ ارقاسىندا ءۇمىت ۇشقىنىن قايتا جالىنداتقاندىعىن كورگەن سايىن، ەڭبەگىمنىڭ جانعاندىعىن سەزىنەمىن“، - دەيدى چىن شيان.
(شينحۋا اگەنتتىگىنىڭ 7 - ايدىڭ 19 - كۇنى بەيجيڭنەن بەرگەن حابارى)
