شينجياڭ گازەتىنىڭ جالپىلىق اقپارات قۇرالدارى تىلشىلەرى لي چۇنشيا، باۋ دۇڭشي، جاڭ تيڭ 8 - ايدىڭ 1 - كۇنى التايدان حابارلايدى. 7 - ايدىڭ 29 - كۇنى ءتىلشى التاي قالاسى قىزىلتاس قالاشىعى سارقامىس قىستاعىندا تىلشىلىك جاساعان كەزدە قىستاق نەگىزگى جولىنىڭ قاسىنا سۋمەن شايىلاتىن دارەتحانا سالىنعاندىعىن، ونىڭ وتە جاقسى تازالانعاندىعىن كوردى. ”قىستاعىمىز تاڭبا كولى كورىنىس اۋماعىنا جاقىن، كوپتەگەن ساياحات كولىكتەرى وسى ارادان وتەدى، بۇل دارەتحانا ساياحاتشىلارعا ەرەكشە قولايلى بولدى“، - دەدى قىستاق تۇرعىنى كۇلاش ءمانتاي تىلشىگە.
شاعىن عانا قىستاق دارەتحاناسىنان التاي ايماعىنىڭ ساياحات قىزمەت وتەۋ ساپاسىنىڭ ۇزدىكسىز جوعارىلاعاندىعى مەن مۇندالايدى. التاي ايماعى ساياحات نەگىزدىك قۇرىلعىلارى قۇرىلىسىنىڭ تەبىنىن ۇزدىكسىز ارتتىرىپ عانا قالماستان، نازىك بۋىنداردان باستاپ ىسكە كىرىسۋگە اناعۇرلىم ءمان بەرىپ، تاماقتانۋ، جاتىن ورىن، ءجۇرىس - تۇرىس، ساياحات، زات ساتىپ الۋ، كوڭىل اشۋ سياقتى جاقتارداعى قىزمەت وتەۋدى كەمەلدەندىردى.
”بيىل ءبىز نەگىزدىك قۇرىلعىلاردىڭ دەڭگەيىن جوعارىلاتىپ، جاڭالاۋ ينجەنەرياسىن ۇزدىكسىز جۇرگىزىپ، ’ءۇش قيىنشىلىق، ءبىردىڭ ىركىلىسسىز بولماۋى‘ (دارەتحانا قيىنشىلىعى، كولىك توقتاتۋ قيىنشىلىعى، ماي قۇيۋ قيىنشىلىعى، حابار - بايلانىس سيگنالى ىركىلىسسىز بولماۋ) ماسەلەسىن شەشتىك“. التاي ايماقتىق مادەنيەت - دەنە تاربيە - راديو - تەلەۆيزيا جانە ساياحات مەكەمەسىنىڭ باستىعى ليۋ كىچۋاننىڭ تانىستىرۋىنشا، بيىل التاي ايماعى 29 ءتۇرلى قوناقجاي قۇرىلىسى نىسانىن جۇرگىزگەن، مۇندا 7000عا تاياۋ توسەك ورىنى جاڭادان كوبەيتىلەدى؛ 35 ساياحات دارەتحاناسى، 1300 قالا - قالاشىق الەۋمەتتىك دارەتحاناسى مەن اس - سۋ ورنىنداعى الەۋمەتتىك دارەتحاناسى تىڭنان سالىندى، جاڭالاندى؛ 14 ماي قۇيۋ پۋنكتى، 5 كولىك توقتاتۋ الاڭىنىڭ قۇرىلىسى سالىنادى؛ حابار - بايلانىس بازالىق ستانسياسىنان بىرگە يگىلىكتەنۋ قۇرىلىسىن كۇشەيتىپ، بۇكىل ايماق كولەمىندە جىلجىمالى حابارلاسۋ سيگنالىنىڭ ەسكەرۋسىز الابى بولماۋعا كەپىلدىك ەتىلەدى ەكەن.
دارەتحانانى جاڭالاپ، دەڭگەيىن جوعارىلاتىپ قانا قالماستان، حالىقتىق تۇسەلحانالاردىڭ قىزمەت وتەۋ ساپاسى دا ۇزدىكسىز جوعارىلادى. 7 - ايدىڭ 30 - كۇنى حۋبەيلىق ساياحاتشى ۋاڭ جيڭ كوكتوعاي اۋدانىنا ساياحاتتاي بارعاندا، كوكتوعاي قالاشىعى تاراتى قىستاعىنا قوندى، ”بۇل اراداعى حالىقتىق تۇسەلحانالاردىڭ مۇنداي جاقسى سالىنعاندىعىن ويلاماعان ەكەنمىن، ءۇي تازا، قۇرىلعىلار تولىق، قىستاقتا بولعانىمەن، ءبىراق دارەتحاناعا بارۋ، جۋىنۋ سياقتى ماسەلەلەردەن الاڭداۋدىڭ مۇلدە قاجەتى جوق ەكەن“، - دەپ تىنباي القاۋ ايتتى كەتەرىندە ۋاڭ جيڭ.
تاراتى قىستاعى كوكتوعاي قالاشىعىنان 5 كيلومەتر قاشىقتىقتا، ەرتىس وزەنى اعارى باسىنداعى ءبىرىنشى قىستاق، ”ەرتىستەگى ءبىرىنشى قىستاق“ دەپ اتالعان، ونان دا ماڭىزدىسى، الىس - جۋىققا تانىمال حالىقتىق تۇسەلحانا قىستاعى ورتا ەسەپپەن كۇنىنە 200دىڭ اينالاسىندا ساياحاتشى قابىلدايدى.
”حالىقتىق تۇسەلحانا ساياحاتشىعا جاتىن ورىن ازىرلەپ عانا قالماستان، ونان دا ماڭىزدىسى، ساياحاتشىعا قونا - تۇنەي جاتۋدىڭ تاماشا كەشىرمەسىن سيلايدى، كەلسە كەتكىسى كەلمەيدى، كەتسە قايتا كەلگىسى كەلەدى“، - دەدى كوكتوعاي كورىنىس اۋماعىن باسقارۋ كوميتەتى كەن - تاۋ گەولوگياسى باسقارۋ مەكەمەسىنىڭ تاراتى قىستاعىندا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ باستىعى، ءبىرىنشى شۋجي جىڭ دۇڭچيان، ساياحاتشى قابىلداۋ ساپاسىن جوعارىلاتۋ ءۇشىن، قىزمەت اترەتى نىسان قارجىسىن قولعا كەلتىرىپ، ۇيلەردى ءبىر تۇتاس جاڭالاپ، اۋلالاردى كوركەمدەپ، اسىرەسە، قىستاقتىڭ سۋ جەتكىزۋ، سۋ ىعىستىرۋ ماسەلەسىن شەشىپ، ساياحاتشىلاردى ۋايىمنان ارىلتتى.
قاتتى بولشەكتەردىڭ دەڭگەيى جوعارىلادى، جۇمساق بولشەك تە ءجىتى ىلەسۋى كەرەك. جىڭ دۇڭچيان تىلشىگە بىلاي دەدى: قىستاق اس پىسىرۋ، قوناقساراي قىزمەت وتەۋى سياقتى ءار ءتۇرلى شەبەرلىككە تاربيەلەۋ - باۋلۋ كۋرسىن ۇنەمىلىك اشىپ، قىستاق تۇرعىندارىن قوناق قابىلداۋ جول - جورالعىسىن ۇيرەنۋگە، قىزمەت وتەۋ ارەكەتتەرىن ولشەمگە تۇسىرۋگە جەتەكتەپ، حالىقتىق تۇسەلحانانىڭ قىزمەت وتەۋ ساپاسىن جالپى بەتتىك جوعارىلاتتى. ”ىقىلاستى، كەمەلدى قىزمەت وتەگەندە عانا، ساياحاتشىلاردى باۋراي الامىز، وسىندا قالدىرا الامىز“، - دەدى قىستاق تۇرعىنى گۇلپاران قابىلعازى.
بيىل 9 - ايدا التاي ايماعىنداعى تۇڭعىش جوعارى دارەجەلى كاسىپتىك - تەحنيكالىق شۋەيۋان − التاي كاسىپتىك - تەحنيكالىق شۋەيۋانى بۇكىل ەلدەن وقۋشى قابىلدايدى. وسى شۋەيۋاننىڭ پارتكوم شۋجيى ۋ جيانجۇننىڭ تانىستىرۋىنشا، بۇل شۋەيۋان ساياحات باسقارۋ، سەيىل - سەرۋەندىك اۋىل شارۋاشىلىعى، قوناقساراي باسقارۋ سياقتى 6 كاسىپ اشۋدى جوسپارلاپ وتىر، بيىل جوسپاردا 600 ادام قابىلدانادى، بۇدان بىلاي وقۋشى قابىلداۋ كولەمى ۇزدىكسىز كەڭەيەدى. ”شۋەيۋان، باستىسى، جوعارى ساپالى شەبەرلىك سيپاتتى ساياحات دارىندىلارىن تاربيەلەپ، ساياحات كاسىبىنىڭ جوعارى ساپامەن دامۋى ءۇشىن دارىندىلار تىرەگىن ازىرلەيدى“، - دەدى ۋ جيانجۇن.
اقىل - پاراساتتىق بۇكىل وڭىرلىك ساياحات تۇعىرى ساياحاتتى سەزىنۋدى جوعارىلاتتى، جاڭادان سالىنعان مەيمانحانالار، حالىقتىق تۇسەلحانالار ساياحاتشىلارعا جايلى قونالقى ورىن سيلادى، ”اۋەدەگى اۆتوبۋز“دىڭ قاتىناۋى ساياحاتشىلاردىڭ ءجۇرىس - تۇرىسىن ونان ارى قولايلىلاستىردى... التاي ايماعى جوعارى ساپالى ساياحات قىزمەت وتەۋ جۇيەسىن قۇلشىنا قالىپتاستىرىپ، ساياحاتشىلاردىڭ الاڭسىز ساياحاتتاپ، رازى - حوش بولىپ قايتۋىنا مۇمكىندىك جاسادى.
