تيانشان تورى   ›   جاڭالىقتار   ›   شينجياڭ حابارلارى

اۋىل شارۋاشىلىعى ماشينالارىن تاپقىرلاۋشىنىڭ باقىتتى ءومىرى

− ساۋان اۋدانى قورقىس قالاشىعىنىڭ ديقانى حان بو تۋرالى

  باتىلدىقپەن امەريكا اۋىل شارۋاشىلىعى ماشينالارى سەرىكتەستىگىنىڭ ونىمىنەن ”كىلتيپان“ تاپتى؛ ءوزى ويلاپ تاپقان، وندىرگەن اۋىل شارۋاشىلىعى ماشيناسى جەرگىلىكتى جاعدايعا اناعۇرلىم ۇيلەسىپ، امەريكالىق اۋىل شارۋاشىلىعى ماشينالارى مامانى ونان ”ءتالىم الۋعا ىزدەپ كەلدى“؛ شارۋاشىلىق قۇرىپ، تابىسقا جەتكەن سوڭ اۋىلداستارىن ۇمىتپاي، كوپشىلىكتى باستاپ بىرگە بايۋ جولىنا ءتۇستى. ول − حان بو، ساۋان اۋدانى قورقىس قالاشىعىندا تۋىپ وسكەن ديقان.

تاپقىرلىق پاتەنتى بار

اۋىل شارۋاشىلىعى ماشيناسىنىڭ مامانى

  1974 - جىلى تۋعان حان بو ورتالاۋ مەكتەپتى تاۋىسقان سوڭ رەمونتشى بولدى، اۆتوموبيل تاسىمالىمەن دە اينالىستى... 2003 - جىلى سىرتتا كوپ جىل جۇرگەن ول اۋىلىنا قايتىپ، اۋىل شارۋاشىلىعى ماشينا - قۇرالدارىن زەرتتەۋگە كىرىستى. 2008 - جىلى حان بو 2 ميلليون 400 مىڭ يۋان نەسيەمەن امەريكانىڭ ماقتا جيناۋ ماشيناسىن ساتىپ الىپ، ءوزىنىڭ اۋىل شارۋاشىلىعى ماشينالارىن تاپقىرلاۋ جولىن باستادى. 2014 - جىلى حان بو ماقتا جيناۋ ماشيناسىندا ءورت ءسوندىرۋ قۇرىلعىسى جوق ەكەنىن بايقاپ، قايتا - قايتا وي جۇگىرتىپ، ماقتا جيناۋ ماشيناسى الا جۇرەتىن ءورت ءسوندىرۋ جۇيەسىن زەرتتەپ جاساپ، سىناق رەتىندە قولدانعان سوڭ ونىمدىلىگى ەرەكشە جاقسى بولىپ، سوڭىندا ماقتا جيناۋ ماشيناسىن وندىرەتىن زاۆودتاردىڭ ولشەمدى جوباسىنا اينالدى.

  حان بو بىلاي دەيدى: ”مەن جايشىلىقتا بىردەڭەلەردى شۇقىلاعاندى ۇناتامىن، ماشينا جاساۋ، ەلەكترلەندىرۋ تۇرىندەگى كىتاپتاردى وقىعاندى جاقسى كورەمىن، بىرتە - بىرتە تاپقىرلىق جاساۋدى ۇناتىپ قالدىم“. زەرتتەۋ - اشۋ جانە جاڭالىق اشۋ حان بونىڭ جانە ونىڭ باستاماشىلىعىمەن قۇرىلعان اۋىل شارۋاشىلىعى ماشينالارىنان قىزمەت وتەۋ كاسىپتىك سەلبەستىك كووپەراتيۆىنىڭ جەتىلۋىمەن ءارقاشان بىرگە ءجۇردى، 10 جىلدان بەرى حان بو مەن كووپەراتيۆ مۇشەلەرى ۇنەمى ناقتى جۇمىس ىستەۋ جاعدايىنا باعىتتاي وتىرىپ جاڭا تەحنيكا، جاڭا ءونىم زەرتتەپ اشتى، ءساتسىز بولسا قايتا باستان كەلدى، قانشا ماتەريال جۇمساعانىن ونىڭ ءوزى دە ناقتى ايتىپ بەرە المايدى.

  حان بو ىلگەرىندى - كەيىندى زەرتتەپ اشقان ”كوتەرىلىپ - تۇسەتىن جىلجىمالى ماقتا شومەلەلەۋ ماشيناسى“ سياقتى 5 ءتۇرلى تاپقىرلىق پاتەنتى مىڭداعان، ون مىڭداعان وتباسىلارعا جەتتى. اۋىل شارۋاشىلىعى ماشينالارىن وندىرەتىن كوپتەگەن زاۆودتار حان بونى ىزدەپ كەلىپ، ونىڭ پاتەنتتەرىن ساتىپ العىسى كەلگەنىمەن، ول تويتارىپ تاستادى. بۇلاردى زەرتتەپ اشۋداعى ماقساتىم اۋىل شارۋاشىلىعى وندىرىسىندە ديقاندارعا اناعۇرلىم كوپ ناقتى پايدا جانە قولايلىلىق جەتكىزۋ، - دەيدى ول.

اۋىلداستارىن ۇمىتپاعان

بايۋعا باستاۋشى

  ”جالعىز ادامنىڭ بايىعانى بايۋعا جاتپايدى، كوپشىلىك تۇگەل بايىسا عانا بايىعان ەسەپتەلەدى“. بۇل حان بو ۇنەمى اۋزىنان تاستامايتىن ءسوز. 2011 - جىلى حان بو پارتياعا قابىلدانادى، ول يىعىمداعى جاۋاپكەرشىلىك ءتىپتى دە اۋىرلاي ءتۇستى دەپ سەزىندى. ول جانىنداعى ماشينا بىلەتىن قىستاق تۇرعىندارىن سەلبەستىك كووپەراتيۆىنە تارتىپ، ولارعا اۋىل شارۋاشىلىعى ماشينالارىنىڭ تەحنيكا - ونەرىن تەگىن ۇيرەتتى. قازىرگە دەيىن سەلبەستىك كووپەراتيۆى 80نەن استام ادامنىڭ جۇمىستانۋىن شەشىپ، ءار ادام ورتاشا ەسەپپەن جىلىنا 40 − 50 مىڭ يۋان كىرىس تاۋىپ وتىر.

  الىس - جۋىققا تانىمال ىسكەر ادام بولعاندىقتان، حان بونىڭ اۋىلدا كوپتەگەن ”جانكۇيەرلەرى“ بار. 2018 - جىل حان بو قورقىس قالاشىعى سۇڭشىڭگۇڭ قىستاعىندا باستاماشى بولىپ حۇڭجي جەر جارنا سەلبەستىك كووپەراتيۆىن قۇرىپ، سول جەردەگى 240تان استام ديقاندى كووپەراتيۆكە قاتىناسۋعا تارتىپ، جيىنى 6000 مۋدان استام جەر شارۋاشىلىق جۇرگىزۋگە ارناپ جارناعا سىندىرىلىپ، سول جىلى مۋىنان ورتاشا ەسەپپەن 1000 يۋاننان ارتىق پايدا ءبولىسىن الۋ جۇزەگە استى. سەلبەستىك كووپەراتيۆى بۇكىل اۋدان كولەمىندە تەڭ يگىلىكتەنۋ تۇزىمىندەگى دالمە - ءدال اۋىل شارۋاشىلىعىن 34 مىڭ جەردە تۇيىندە سىناق ەتىپ، بۇدان 481 وتباسى پايدا كوردى.

  حان بو بىلاي دەيدى: ”مەنىڭ ەڭ باقىتتى سەزىنەتىنىم، كووپەراتيۆ مۇشەلەرىنە پايدا ءبولىسىن تاراتۋ، قولما - قول اقشانى ۇستەلدىڭ ۇستىنە ءۇيىپ قويىپ، كوپشىلىك شات مەرەيمەن سەن نەشە ون مىڭ، ول نەشە ون مىڭ الدى دەگەن كەزى. كوپشىلىكتىڭ جۇزىندەگى كۇلكىنى كورگەندە، جەتىستىككە جەتۋ سەزىمى مەن تابىس سەزىمى بويىمدى بيلەي جونەلەدى، كوپشىلىكتىڭ مەنەن كۇتەتىن ءۇمىتى جانە مەنى شابىتتاندىرۋى ماعان وسى ىستەردى ويداعىداي ىستەيتىن اناعۇرلىم كۇشتى قوزعاۋشى كۇش سيلايدى“.

دامۋ وي جەلىسى العا وزعان

جەتەكشى

  حان بونىڭ دامۋ وي جەلىسى العا وزعان، 2016 - جىلى 3 - ايدا ول ساۋان اۋدانىنداعى شينيە، تيەنيۋ، كاڭۋاڭ سىندى 3 اۋىل شارۋاشىلىعى ماشينالارى سەلبەستىك كووپەراتيۆىمەن جانە شۋاڭچۋان، رۇيشياڭ سىندى 2 اۋىل شارۋاشىلىعى سەلبەستىك كووپەراتيۆىمەن بىرلەسىپ، بىرلەسكەن كووپەراتيۆ قۇرىپ، ۇجىمداسىپ بازار اشىپ، ىلگەرىندى - كەيىندى 20 ميلليون يۋاننان استام اقشامەن اسا زور قۋاتتىق تراكتور، يوندىق ءدارى بۇرىككىش ماشينا، ماقتا جيناۋ - تايلاۋ ماشيناسى، زەردەلى دالمە - ءدال تىڭايتقىش بەرۋ ماشيناسى جانە جاساندى سەرىك جول نۇسقايتىن اۆتوماتتى جۇرگىزۋ جۇيەسى سياقتى زەردەلەنگەن، ينفورماتسيالانعان اۋىل شارۋاشىلىعى ماشينا - جابدىقتارىن ساتىپ الىپ، بۇكىل شينجياڭداعى اقتاڭداقتى تولتىردى.

  جاساندى سەرىكتىڭ جول نۇسقاۋىمەن دالمە - ءدال جۇمىس ىستەۋگە سۇيەنىپ، حان بونىڭ اۋىل شارۋاشىلىعى ماشينالارى سەلبەستىك كووپەراتيۆى بىرلەسكەن كووپەراتيۆى 2019 - جىلعى ماقتا ەگۋ قىزمەتىن وتە تەز ورىندادى. سونىمەن بىرگە، بىرلەسكەن كووپەراتيۆ بارلىق تۇقىم سەپكىش ماشينا - قۇرالدارىنا جالپى بارىستىق باقىلاۋ - مەڭگەرۋ جۇيەسىن ورناتتى، قولدانۋشى ۇيىندە وتىرىپ تەلەفونىمەن ەگۋ جۇمىستارىنىڭ تۇتاس بارىسىن ناقتى ۋاقىتتا باقىلاپ - باسقارا الاتىن بولدى، بۇل ەگىس جۇمىسىنىڭ ساپاسىنا كەپىلدىك ەتتى. حان بو ماقتانىشپەن بىلاي دەيدى: ”ءبىزدىڭ جۇمىس ساپامىز، جۇمىس تىندىراتىن اۋماعىمىز، جۇمىس ىستەۋ جىلدامدىعىمىز بەن ونىمدىلىگىمىز تۇگەلدەي ەرەكشە جوعارى، ماڭىزدىسى، جۇمىس ساپامىز جوعارى، ارالىق تاستاپ كەتۋ، قاباتتاپ كەتۋ، جەردى اق تاستاپ كەتۋ جايتى بولمايدى، ءسويتىپ، بۇرىن باس اۋىرتاتىن ماسەلەلەردى شەشتىك“.

  وسى زامانعى اۋىل شارۋاشىلىعى دامۋىنداعى قورشاعان ورتانى قورعاۋ، جەردىڭ شەگەندەنۋى سياقتى ماسەلەلەرگە مەڭزەس، حان بو دا ۇزاق بولاشاقتى ويلادى ءارى ونى ارەكەتكە اينالدىردى. 2018 - جىلى ونىڭ سەلبەستىك كووپەراتيۆى بۇكىل اۋدانداعى 500 مىڭ مۋدان استام ەگىستىك جەردەگى تەرەڭ قوپسىتۋ، تەرەڭ ەگۋ مىندەتىن ۇستىنە الدى. ول قالدىق جارعاقتى جيناپ الۋ جابدىعىن جاقسارتىپ، جيناپ الىنعان قالدىق جارعاقتاردى تىكەلەي وڭدەپ تۇيىرشىككە اينالدىرىپ، زاۆودقا جىبەرىپ تامشىلاتىپ سۋارۋ قۇبىرى ەتىپ جاساپ، اق ءتۇستى بىلعانىشتى ءونىمدى ازايتتى.

  بۇدان كەيىنگى دامۋعا حان بو نىق سەنىم ارتىپ وتىر. ول تۇقىم تاڭداۋ، تۇقىم ەگۋ، اۋىل شارۋاشىلىعى ماشينالارىنان قىزمەت وتەۋدەن جيناۋ، وڭدەۋگە دەيىنگى اۋىل شارۋاشىلىعى ءوندىرىسىنىڭ اينالمالى تىزبەگىن ورناتىپ، قازىرگى ەگىس اتىزدارىندا وزىندىك قۇندى تومەندەتۋدىڭ مۇمكىندىگى قالماۋ سياقتى ”قيىن، كۇردەلى اۋرۋلار“دىڭ ەمىن تابۋدى زەرتتەپ، قالىڭ ديقاندارعا كىرىستى ارتتىرۋدىڭ جاڭا ءتۇيىنىن جاراتىپ بەرۋگە قۇلشىنۋدا.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.

  • وسى كەزەكتى جۇڭگو − ازيا - ەۆروپا كورمەسى تۇڭعىش رەت نەگىزگى قوناق ولكەلەردى بەلگىلەدى
  • تاپسىرىس ونىمدەردى جەدەل ءوندىرىپ، قامداۋدى قامتاماسىز ەتتى
  • جىلدىق مىندەتتى ءساتتى ورىنداۋعا شىنايى كەپىلدىك ەتتى
  • شينجياڭ جۇڭتاي توبى دۇنيە جۇزىندەگى 500 قۋاتتى كاسىپورىن قاتارىنا ءوتتى
  • جەل - جارىق ەنەرگياسى ءوزارا تولىقتىردى