”ۇلكەن تۇعىر“ ”شاعىن اينالىم“مەن قاباتتاستى
رايونىمىز ەلەكتروندىق ساۋدا بويىنشا كەدەيلەردى سۇيەمەلدەۋگە ءۇرتىس كۇش سالدى
ءتىلشى چىن چياڭۋي 8 - ايدىڭ 17 - كۇنى ۇرىمجىدەن حابارلايدى. 8 - ايدىڭ 2 - كۇنى اقسۋ قالاسى شينكاڭ اۋىل شارۋاشىلىق قوسىمشا ونىمدەرى كاسىپتىك سەلبەستىك كووپەراتيۆىنىڭ باستىعى جۋ شۋەسىن كۇنى بويى ەگىنشىلىك بازاسىندا ءجۇرىپ، كوك قابىقتى جاڭعاقتىڭ ەگىلۋ جاعدايىن ۇعىسىپ، بىرنەشە كۇننەن كەيىنگى ساتىپ الۋعا دايىندىق جاسادى. ەندى عانا اقىرلاسقان جۇڭگو (شينجياڭ) كەدەي وڭىرلەردىڭ ەرەكشەلىككە يە اۋىل شارۋاشىلىق ونىمدەرى ماركاسىن تانىستىرۋ كەڭەسى جانە ەلەكتروندىق ساۋدا بويىنشا كەدەيلەردى سۇيەمەلدەۋ تيانشان ساپارى قيمىلىندا جۋ شۋەسىن ەل ىشىندەگى كوپتەگەن ءىرى ەلەكتروندىق ساۋدا تۇعىرىنىڭ تاپسىرىسىن قابىلدادى.
جۋ شۋەسىندى پايداعا كەنەلتكەن قيمىل رايونىمىزدىڭ 2018 - جىلدان باستالعان ”ۇلكەن تۇعىر“دى ”شاعىن اينالىم“عا قاباتتاستىرۋ سىندى ەلەكتروندىق ساۋدا بويىنشا كەدەيلەردى سۇيەمەلدەۋ ۇلگىسىن ورناتۋداعى ناقتى امالياتى. سوڭعى جىلدارى رايونىمىز ەلەكتروندىق ساۋدانى اۋىل - قىستاققا جەتكىزۋدەن جان - جاقتى ۇلگى كورسەتۋ نىسانىن اتقارۋ، اۋىل - قىستاقتاردىڭ ەلەكتروندىق ساۋدا بويىنشا الەۋمەتتىك قىزمەت وتەۋ جۇيەسىن ورناتۋ، جەلىدە جانە جەلىدەن تىس ءوندىرۋ - ساتۋدى ۇشتاستىرۋدى جەدەلدەتۋ، ءوز جەرىندەگى بازار نەگىزگى تۇلعالارىن جانە شينجياڭنىڭ ەلەكتروندىق ساۋدا ماركاسىن جەتىلدىرۋ سياقتى شارالار ارقىلى ەلەكتروندىق ساۋدا بويىنشا كەدەيلەردى سۇيەمەلدەۋگە ءۇرتىس كۇش سالۋدى ىلگەرىلەتتى.
سوڭعى جىلدارى، رايونىمىزداعى اۋىل - قىستاقتاردىڭ ەلەكتروندىق ساۋدانى دامىتۋ ورتاسى ۇزدىكسىز جاقساردى. بيىل الدىڭعى جارتى جىلدا، رايونىمىزدىڭ توراپتا بولشەك ساتۋ سوماسى 17 ميلليارد 418 ميلليون يۋانعا جەتىپ، ارتۋ قارقىنى ％22.75 بولىپ، بۇكىل مەملەكەتتىڭ ارتۋ قارقىنىنان جوعارى بولدى.
اۆتونوميالى رايوندىق ساۋدا ىستەرى مەڭگەرمەسى ەلەكتروندىق ساۋدا بويىنشا كەدەيلەردى سۇيەمەلدەۋ تيانشان ساپارى قيمىلىن ۇدايىلاندىرۋدى ىلگەرىلەتۋدى جوسپارلادى ءارى شينجياڭ ەلەكتروندىق ساۋدا بويىنشا كەدەيلەردى سۇيەمەلدەۋ بىرلەستىگىن جەدەل جەتىلدىرىپ، زورايتىپ، كەدەيلەردى سۇيەمەلدەۋ بىرىككەن كۇشىن اناعۇرلىم ۇيىستىردى. ”ءبىز جۇڭگو ەلەكتروندىق ساۋدا بويىنشا كەدەيلەردى سۇيەمەلدەۋ بىرلەستىگىمەن ۇزاق ۋاقىتتىق سەلبەستىك مەحانيزمىن ورناتىپ، اۋىل شارۋاشىلىعى ونىمدەرىن ەلەكتروندىق ساۋدالاندىرۋعا، ولشەمدەندىرۋگە، شوعىرلاندىرۋعا قاراي تيبىن وزگەرتىپ، دارەجەسىن جوعارىلاتىپ، ەلەكتروندىق ساۋدا بويىنشا كەدەيلەردى سۇيەمەلدەۋدىڭ اناعۇرلىم ءدال، اناعۇرلىم سەرپىندى بولۋىنا مۇمكىندىك جاسايمىز“، - دەدى اۆتونوميالى رايوندىق ساۋدا ىستەرى مەڭگەرمەسىنىڭ ورىنباسار باستىعى ساۋ شياڭ.
قازىرگە دەيىن، بۇكىل رايونىمىزدا مەملەكەت دارەجەلى ەلەكتروندىق ساۋدانى اۋىل - قىستاققا جەتكىزۋدەن جان - جاقتى ۇلگى كورسەتەتىن جيىنى 47 اۋدان بار، مەملەكەت دارەجەلى كەدەي اۋدانداردى تۇگەلدەي قامتۋدى ىسكە اسىردى، اۋدان دارەجەلى ەلەكتروندىق ساۋدا بويىنشا الەۋمەتتىك قىزمەت وتەۋ ورتالىعىنان جانە زات اينالىمى، جەتكىزۋ ورتالىعىنان 47سىن، اۋىل - قىستاق دارەجەلى پۋنكتتەن 2500گە جۋىعىن قۇرىپ، جيىنى 3 ميلليارد 395 ميلليون يۋان اۋىل شارۋاشىلىعى ونىمدەرىن ساتىپ، ارحيۆ تۇرعىزىلىپ، كارتچكالاندىرىلعان 180 مىڭ 200 كەدەي جان سانىنا (رەت) قىزمەت وتەدى.
