ءتىلشى لي لي 8 - ايدىڭ 20 - كۇنى ۇرىمجىدەن حابارلايدى. 8 - ايدىڭ 20 - كۇنى تيانشان كينو ستۋدياسىنان ۇعىسۋىمىزشا، اۆتونوميالى رايوندىق پارتكوم ۇگىت ءبولىمى ۇيىمداستىرىپ جوبالاعان، تيانشان كينو ستۋدياسى سياقتى ورىندار بىرلەسىپ جاساپ، كەسكىنگە تۇسىرگەن كينو فيلم «ءومىر اعىسىندا» 15 - كەزەكتى رۋحاني وركەنيەت قۇرىلىسى ”5 ءبىر ينجەنەرياسى“ تاڭداۋلى تۋىندى سيلىعىن داڭقپەن العان. بۇل سوڭعى جىلداردان بەرى رايونىمىزدىڭ «شىنايى سۇيىسپەنشىلىك»، «تاكلاماكانداعى ناعىرا ءۇنى» اتتى كينو فيلمدەر ىلگەرىندى - كەيىندى 13 - كەزەكتى، 14 - كەزەكتى رۋحاني وركەنيەت قۇرىلىسى ”5 ءبىر ينجەنەرياسى“سيلىعىن، سونداي - اق 16 - كەزەكتى، 17 - كەزەكتى جۇڭگو كينوسى حۋابياۋ سيلىعىن داڭقپەن العاننان كەيىن يە بولعان تاعى ءبىر ەرەكشە داڭق ماراپاتى.
«ءومىر اعىسىندا» فيلمىندە قۇمار جانە قاديشا ەكى وتباسى ادامدارىنىڭ ءبىر رەتكى توسىن شىرعالاڭ سەبەبىنەن تۋىلعان قايشىلىعىنان وقيعا ءوربىتىلىپ، 40 جىلدان بەرگى ساحاراداعى كوشى - قون تۇرمىسى، سونداي - اق مۇنداي تۇرمىس تاسىلىندە وندىرىستە، تۇرمىستا جارىققا شىققان وزگەرىستەر، كەيىپكەرلەردىڭ سۇيىسپەنشىلىگى، وي وزگەرىسى باياندالادى. كينو فيلمدە ۇرپاقتار بويى سۋدىڭ تۇنىعىن، ءشوپتىڭ سونىسىن قۋالاعان جۇڭگو قازاق مالشىلارىنىڭ رەفورما جاساعاننان، ەسىك اشقاننان بەرى پارتيانىڭ مالشىلاردى وتىرىقتاندىرىپ، مال شارۋاشىلىعىن كوركەيتۋ ساياساتىنىڭ جەتەكشىلىگىندە، ساحارا ەكولوگياسىن قورعاۋ ءداۋىر جاعدايىندا وتكەنگە قوش ايتىپ، جاڭا تۇرمىسقا قادام تاستاعان حيكاياسى باياندالادى.
بۇل كينو فيلم شينجياڭنىڭ كينو فيلم جاسامپازدىعى تاريحىنداعى تۇڭعىش كەڭ ەكراندى كينو فيلم، جوبالاپ، نىسانعا ەنگىزۋدەن كەسكىنگە تۇسىرگەنگە دەيىن 3 جىلعا جۋىق ۋاقىت جۇمسالدى. كينو فيلمدە تابيعي ەكولوگيانى ەستەلىككە الۋ مەن وقيعا جەلىسىن ىلگەرىلەتۋدى ۇشتاستىرۋ، دەرەكتى كينو ستيلىنە جاڭالىق ەنگىزۋ جاعىندا باتىل ىزدەنىس جاسالعان.
ۇعىسۋعا قاراعاندا، 15 - كەزەكتى رۋحاني وركەنيەت قۇرىلىسى ”5 ءبىر ينجەنەرياسى“ سيلىعىن العان تۋىندىلار كينو فيلم، تەلە تەاتر (تەلە فيلم)، تەاتر، راديو تەاتر، ءان - كۇي، كىتاپ سياقتى تۇرلەردەگى 73 تۋىندىنى قامتىپ، سوڭعى جىلداردان بەرى بۇكىل ەلدىڭ ادەبيەت - كوركەمونەر ونىمدەرىن جاراتۋىنىڭ، ءوندىرۋىنىڭ ەڭ جاڭا جەتىستىكتەرىن تولىق ايگىلەپ، جاڭا ءداۋىردىڭ رۋحاني كارتيناسىن بەينەلەگەن.
