تيانشان تورى   ›   جاڭالىقتار   ›   شينجياڭ حابارلارى

رايونىمىزدىڭ مادەني مۇرالاردى جوندەپ قالپىنا كەلتىرۋ ورەسى تىڭ ساتىعا كوتەرىلدى

  ءتىلشى جاڭ يىڭچۇن 8 - ايدىڭ 24 - كۇنى ۇرىمجىدەن حابارلايدى. قابىرعا سۋرەتتەر ايقىندالىپ، مىس بۇيىمدار اۋەلگى بەينەسىنە كەلىپ، حات - قاعازدار شىت جاڭا قالپىنا كەلدى... جوندەپ قالپىنا كەلتىرۋ قىزمەتكەرلەرى شىرىندىدەن كەرەمەت شىعاراتىن شەبەر قوس قولدارىمەن قامبادا شىرت ۇيقىدا جاتقان بۇلىنگەن مادەني مۇرالارعا قايتادان ءار بەردى. جۋىرداعى جىلداردان بەرى، بۇكىل ەلدىڭ مادەني مۇرالار ارقىلى شينجياڭعا كومەكتەسۋ قىزمەتىنىڭ ىشكەرىلەي ىلگەرىلەتىلۋىنە ىلەسە، رايونىمىزدىڭ مادەني مۇرالاردى قالپىنا كەلتىرۋ ورەسى ۇزدىكسىز جوعارىلادى.

  ”2011 - جىلى ءبىز توقىما بۇيىم مادەني مۇرالارىن قورعاۋ شينجياڭ قىزمەت پۋنكتىن قۇرىپ، ىلگەرىندى - كەيىندى بۇكىل شينجياڭنىڭ جەر - جەرىندەگى مۇراجايلارمەن سەلبەستىك جاساپ،’جوندەپ قالپىنا كەلتىرۋ ارقىلى باۋلۋدى جەبەۋ‘ تاسىلىمەن نەشە ءجۇز توقىما بۇيىم مادەني مۇراسىن قالپىنا كەلتىرىپ قانا قالماستان، شينجياڭداعى جوندەپ قالپىنا كەلتىرۋ قىزمەتكەرلەرىنىڭ قالپىنا كەلتىرۋ تەحنيكاسى مەن ورەسىنىڭ اماليات بارىسىندا شىڭدالۋىنا جانە جوعارىلاۋىنا مۇمكىندىك جاساپ، ءبىرشاما جاقسى ناتيجەلەرگە قول جەتكىزدىك“. 8 - ايدىڭ 24 - كۇنى جۇڭگو جىبەك مۇراجايىنىڭ باستىعى جاۋ فىڭ تىلشىگە وزدەرىنىڭ وسى رەت شينجياڭعا كەلىپ مادەني مۇرالاردى قورعاۋ، جوندەپ قالپىنا كەلتىرۋ نىساندارىن تەكسەرىپ وتكىزىپ العاندا، بۇلىنگەن توقىما بۇيىمداردىڭ قىزمەتكەرلەردىڭ زەر سالا قالپىنا كەلتىرۋىنەن كەيىن، تازا دا تولىق بەينەگە قايتادان كەلگەنىن كورىپ بارىنشا رازى بولعاندىعىن ايتتى.

  تەك جۇڭگو جىبەك مۇراجايى عانا ەمەس، جۇڭگو مەملەكەتتىك مۇراجايى، دۇنحۋاڭ زەرتتەۋ مەكەمەسى، نانجيڭ مۇراجايى سياقتىلار دا جەكە - جەكە شينجياڭدا قىزمەت پۋنكتتەرىن قۇرىپ، مادەني مۇرالاردى قالپىنا كەلتىرۋگە كومەكتەسىپ جانە جەتەكشىلىك ەتىپ، شينجياڭنىڭ مۇراجايلاردا ساقتالعان ءبىر توپ باعالى مادەني مۇرالارىن جوندەپ قالپىنا كەلتىردى.

  ۇعىسۋعا قاراعاندا، شينجياڭدا مۇراجايلاردا ساقتالعان قىرۋار مادەني مۇرالار بار، جايشىلىقتا كورسەتىلەتىنى تەك وتە از ءبولىمى عانا، كوپ ساندى مادەني مۇرالار ۇزاق ۋاقىت قامبادا تۇرادى ەكەن. وسى توتەنشە باعالى مادەني مۇرالاردى قالاي قالپىنا كەلتىرۋ، ويداعىداي قورعاۋ ۇزاق ۋاقىتتان بەرى ادامدى الاڭداتقان ماسەلە بولىپ كەلەدى.

  2010 - جىلى بۇكىل مەملەكەتتىك شينجياڭعا باعىتتامالى كومەكتەسۋ قىزمەتى ءماجىلىسى اشىلعاننان كەيىن، مەملەكەتتىك مادەني مۇرا مەكەمەسى ايرىقشا ءمان بەرىپ، بۇكىل مەملەكەتتىك مادەني مۇرالار ارقىلى شينجياڭعا كومەكتەسۋ قىزمەتى نىساندارىن ءتۇيىلىستىرۋ ءماجىلىسىن اشىپ، كوپ رەت مەملەكەتتىك دامۋ جانە رەفورما كوميتەتىمەن، قازىنا مينيسترلىگىمەن بىرلەسىپ مادەني مۇرا ارقىلى شينجياڭعا كومەكتەسۋ قىزمەتى جونىندە بىرلەسكەن تەكسەرۋ - زەرتتەۋ جۇرگىزىپ، مادەني مۇرا ارقىلى شينجياڭعا كومەكتەسۋ قىزمەتىن مەملەكەتتىڭ شينجياڭعا كومەكتەسۋ جوباسىنىڭ جالپى ارناسىنا ەنگىزدى، مادەني مۇرالاردى قالپىنا كەلتىرۋ مۇنداعى ماڭىزدى تۇيىندەردىڭ ءبىرى.

  ”2011 - جىلى مەملەكەتتىك مادەني مۇرا مەكەمەسى شينجياڭداعى مۇراجايلاردا ساقتالعان قابىرعا سۋرەتتەردى قورعاۋ، قالپىنا كەلتىرۋ جۇمىسىنىڭ تۇڭعىش باۋلۋ كۋرسىن اشتى، ورنى شينجياڭ مۇراجايىندا بولدى، سول كەزدە ەل ىشىندەگى مول ماماندىق بىلىمگە جانە امالي تاجىريبەگە يە مامانداردى شينجياڭنىڭ جەر - جەرىنەن كەلگەن كۋرسانتتارعا نازاريالىق ساباق وتۋگە جانە جۇمىس باسىندا جەتەكشىلىك ىستەۋگە ۇسىنىس ەتتى. 3 ايدان كەيىن، بۇل كۋرسانتتار قابىرعا سۋرەتتەردى قالپىنا كەلتىرۋدىڭ نەگىزگى نازاريالىق بىلىمدەرىن ۇيرەندى ءارى ءىس جۇزىندىك جۇمىس ىستەۋ شەبەرلىگىن العاشقى قادىمدا يگەردى“، - دەدى شينجياڭ مۇراجايى مادەني مۇرالاردى تەحنيكالىق قورعاۋ ورتالىعىنىڭ مەڭگەرۋشىسى ۋان جيە.

  وسىدان كەيىن، مەملەكەتتىك مادەني مۇرا مەكەمەسىنىڭ ءتۇيىندى عىلمي زەرتتەۋ بازاسىنىڭ شينجياڭ قىزمەت پۋنكتى، مەملەكەتتىك بايىرعى زامان قابىرعا سۋرەتتەرىن قورعاۋ ينجەنەرياسى تەحنيكا زەرتتەۋ ورتالىعىنىڭ شينجياڭ قىزمەت پۋنكتى سياقتىلار ىركەس - تىركەس شينجياڭدا ماڭدايشالىق استى، شينجياڭ مۇراجايى وسى ورايدان پايدالانىپ مەملەكەتتىك مادەني مۇرا مەكەمەسىمەن جانە بۇكىل ەلدەگى ايگىلى عىلمي زەرتتەۋ مەكەمە - ورىندارىمەن سەلبەستىگىن كۇشەيتىپ، مادەني مۇرالاردى قالپىنا كەلتىرۋ، قورعاۋ قىزمەتىن تىزە قوسا جاقسى ىستەپ، قىرۋار قولا بۇيىمدار، توقىما بۇيىمدار، قابىرعا سۋرەتتەر، قاعازعا قالدىرىلعان حات - قاعاز سياقتى مۇراجايدا ساقتالعان مادەني مۇرالاردى جوندەپ قالپىنا كەلتىردى.

  مەملەكەتتىك مادەني مۇرا مەكەمەسى، جۇڭگو مادەنيەت مۇرالارىن زەرتتەۋ مەكەمەسى، شيبەي داشۋەسى سياقتى ورىندار ىركەس - تىركەس كۋرس اشىپ، شينجياڭنىڭ ءتىپتى دە كوپ مادەني مۇرالاردى قالپىنا كەلتىرۋ قىزمەتكەرلەرىنىڭ ءتۇرلى مادەني مۇرالاردى قالپىنا كەلتىرۋ بىلىمدەرىن، قالپىنا كەلتىرۋ شەبەرلىگىن تولىق، جۇيەلى يگەرۋىنە مۇمكىندىك جاسادى.

  ”بۇرىن شينجياڭ مۇراجايى ءبىر جىلدا تەك ءبىر عانا مادەني مۇرانى قالپىنا كەلتىرە الاتىن. قازىر ءبىر جىلدا قولا بۇيىم، توقىما بۇيىم، بالشىق ءمۇسىن، قابىرعا سۋرەت سياقتىلاردى قامتىعان نەشە ونداعان مادەني مۇرانى قالپىنا كەلتىرە الادى، بۇل كەزىندە ويلاۋدىڭ ءوزى مۇمكىن ەمەس ءىس ەدى“، - دەدى ۋان جيە اسەرلەنە.

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.

  • ءۇرىمجى يامالىق تاۋى بۇكىلدەي جاسىلدانۋدى جۇزەگە اسىردى
  • تارباعاتايدىڭ قىس ماۋسىمىنداعى ساياحات ونىمدەرىنىڭ ساۋداسى كۇسەتتەندى
  • ”قوس 11“ جونەلتۋمەن قاربالاس
  • كاسىپتەنۋ جولىن اشتى
  • شينجياڭ ساۋدا - ساتتىق ۇيىرمەسى ”شينجياڭ جاقسى جەر“ نەگىزگى تاقىرىبىندا كورمەگە قاتىناستى