حوتان ساياحاتى ”قوس مول ونىمگە“ قول جەتكىزدى
شينجياڭ گازەتىنىڭ جالپىلىق اقپارات قۇرالدارى تىلشىلەرى شۇي بو، ياۋ گاڭ، رىن جياڭ، جاۋ يۋە، جوۋ پىڭ 8 - ايدىڭ 27 - كۇنى حوتاننان حابارلايدى. بيىل 1 - ايدان 7 - ايعا دەيىن، حوتان ايماعى ەل ءىشى - سىرتىنداعى ساياحاتشىلاردان جيىنى 2 ميلليون 520 مىڭ 900 ادام - رەت قابىلداپ، سايكەس مەزگىلدەگىدەن ％128.39 ارتقان، ساياحات كىرىسى 2 ميلليارد 791 ميلليون يۋانعا جەتىپ، سايكەس مەزگىلدەگىدەن ％97.24 ارتقان.
بيىل حوتان ايماعى ”ساياحاتشىلاردى حوتانعا باستاۋ“ ستراتەگياسىن بەلسەنە اتقارىپ، ساياحات سالاسىنداعى جوسپارلاۋ - ساتۋ جۇمىستارىنىڭ سەرپىنىن ارتتىرىپ، ەرەكشە تۇردەگى ساياحات، قىزىل ساياحات سياقتى بايلىق باسىمدىقتارىن ساۋلەلەندىرىپ، مول، الۋان مازمۇندى مادەنيەت - ساياحات قيمىلدارى ارقىلى ساياحاتتاعى قىزمەت وتەۋدىڭ دەڭگەيىن ۇزدىكسىز كوتەرىپ، ساياحات كاسىبىنىڭ جوعارى ساپالى دامۋىن ىلگەرىلەتىپ، ساياحاتشى قابىلداۋ مەن ساياحات كىرىسىنىڭ ەكەۋىنەن دە ”مول ءونىم الدى“.
ساۋلەتتى شامدار جايناي باستادى، حوتان قالاسىنىڭ كەشكى بازارىندا جۇرت ءيىن تىرەسىپ، ساياحاتشىلار ايران زۇڭزى، قاقتالعان جۇمىرتقا، قاربىز قوسىلعان كەپتەر سورپاسى سياقتى ەرەكشە ءدامدى تاعامداردان ءدام تاتادى. حوتان ايماقتىق مادەنيەت، دەنە تاربيە، راديو - تەلەۆيزيا جانە ساياحات مەكەمەسى كاسىپ سالاسىن دامىتۋ ءبولىمىنىڭ باستىعى چىن سۇڭمەي بىلاي دەپ تانىستىردى: حوتان كەشكى بازارى، حوتان كەشكى بازارى كول ماڭى دۇكەندەرى ءار كۇنى 20 مىڭ ادام - رەت ساياحاتشى قابىلدايدى. ماركا اسەرى قالىپتاسىپ كەلە جاتقان حوتان كەشكى بازارى ساياحاتشىلار مىندەتتى تۇردە باراتىن جەرگە اينالدى.
8 - ايدىڭ 18 - كۇنى ”ءجۇز ۇيشە اۆتوموبيلدىڭ كۇنلۇنعا ساياحاتى“ قيمىلى حوتان قالاسى ءشول توراڭعىسى ەكولوگيالىق كورىنىس وڭىرىندە باستالدى. بەيجيڭ، تيانجين، گۋاڭجوۋ قاتارلى ولكە، قالالاردان كەلگەن ءوز اۆتوموبيلدەرىمەن ساياحاتتاۋشى اۋەسقويلار 100دەن استام ۇيشە اۆتوموبيل جۇرگىزىپ، قۇمدى شولگە ساپارعا شىقتى.
حوتان تاكلاماكان ءشولىنىڭ وڭتۇستىك جيەگىنە ورنالاسقان، قۇمدى ءشول ساياحاتىندا كوپ ىستەر تىندىرۋعا بولادى. تانىستىرۋدان بەلگىلى بولۋىنشا، حوتان تاكلاماكاندى اينالۋ راللي جارىسى ماركاسىنىڭ جەتەكتەۋ اسەرىن بەلسەنە ساۋلەلەندىرىپ، ەرەكشە تۇردەگى ساياحاتتى، قۇمدى شولدە ءوز اۆتوموبيلىمەن ساياحاتتاۋدى دامىتقان. حوتان قالاسى ءشول توراڭعىسى ەكولوگيالىق كورىنىس ءوڭىرىنىڭ ديرەكتورى جوۋ يۇڭ بىلاي دەپ تانىستىردى: كورىنىس ءوڭىرى ولشەمدى كارت اۆتوموبيل جارىس جولىن سالىپ، مەملەكەتتىك كارت اۆتوموبيل جارىسىن وتكىزىپ، سپورت جارىسى ارقىلى ساياحاتشىلاردى باۋراماق ەكەن.
”شاراپتىڭ تاتتىلىگىن تاتۋعا جول كەدەرگى“. بيىل حوتان ايماعى ساياحاتتى ۇگىتتەۋ - تانىستىرۋ سەرپىنىن ارتتىرىپ، جياڭسۋ، جىجياڭ، شاڭحاي قاتارلى جەرلەردە ساياحاتتى ۇگىتتەۋ - تانىستىرۋ ءىس - شارالارىن وتكىزىپ، وڭتۇستىك شينجياڭ ساياحات وداعىنىڭ، چاڭجياڭ اتىراۋى ءوڭىرىنىڭ ساياحاتپەن شينجياڭعا كومەكتەسۋ سەلبەستىك وداعىنىڭ ساياحاتشىلاردى جەتەكتەۋ اسەرىن ساۋلەلەندىرىپ، كوپ ارنامەن ۇگىتتەۋ ارقىلى ”ساياحاتشىلاردى حوتانعا باستادى“، قازىرگە دەيىن حوتانعا كەلگەن ۇيشە اۆتوموبيلدەر 200دەن اسىپ، ساياحات ماقساتىندا 8 مارتە ۇشاق جالدانىپ، ساياحات ارناۋلى پويەزى 12 رەت قاتىناپ، 5000نان استام ساياحاتشى حوتانعا قادام تاستادى.
بيىل حوتان ايماعى 5 ميلليون 560 مىڭ يۋان قارجى سالىپ، ءارقايسى كورىنىس وڭىرلەرىنەن 26 دارەتحانا سالدى، سونداي - اق ءار جەردەن 13 اۆتوتۇراق، 3 حات - حابار بايلانىس پۋنكتىن، 2 جانار ماي پۋنكتىن سالىپ، حالىقتىق تۇسەلحانالاردان جاڭادان 1197 توسەك - ورىن كوبەيتىپ، ساياحاتتىڭ دامۋىن تەجەپ وتىرعان ”ءۇشتىڭ قيىن بولۋى، ءبىردىڭ ىركىلىسسىز بولماۋى“ ماسەلەسىن كۇش سالا شەشىپ، ساياحات كاسىبىنىڭ دامۋىنداعى ولقىلىقتاردى تولىقتادى. سونىمەن بىرگە، تاربيەلەۋدى ۇيىنە دەيىن جەتكىزۋ سياقتى شارالار ارقىلى ساياحات كاسىبىمەن شۇعىلدانۋشىلاردىڭ ساپاسىن جوعارىلاتتى.
ۇعىسۋىمىزشا، حوتان ايماعى بەيجيڭ، جىڭجوۋ، شي - ان سياقتى شينجياڭ سىرتىنداعى قالالارعا، سونداي - اق ءۇرىمجى، قاشقار، كورلا سياقتى شينجياڭ ىشىندەگى قالالارعا توتە باراتىن اۋە لەنيالارىن اشقان. قاشقار - قاعىلىق - قاراقاش جوعارى جىلدامدىقتى تاس جولىنىڭ پايدالانۋعا بەرىلۋى، حوتان - چارقىلىق تەمىر جولىنىڭ سالىنۋى حوتاندى ”قالتارىس جەردەن“ شينجياڭنان كىرىپ - شىعاتىن ماڭىزدى ارناعا اينالدىردى.
”كۇز، قىس ماۋسىمى قۇمدى ءشول ساياحاتىن دامىتۋعا پايدالى مەزگىل، حوتان ورايدى مىقتى يگەرىپ، قولايلى قاتىناسقا سۇيەنىپ، التاي ايماعىمەن بايلانىس جاساپ، بىرلەسە قيمىلداپ، ەكى جەردىڭ سەلبەستىگى ارقىلى كۇزدەگى، قىستاعى حوتاننىڭ ساياحات كاسىبىنىڭ دامۋىن ىلگەرىلەتپەك“، - دەيدى حوتان ايماقتىق مادەنيەت - دەنە تاربيە، راديو - تەلەۆيزيا جانە ساياحات مەكەمەسى پارتيا باسشىلىق گرۋپپاسىنىڭ ورىنباسار شۋجيى، مەكەمەنىڭ ورىنباسار باستىعى جوۋ نىڭۋىن.
