− بۇراتالا وبلىستىق ادۆوكاتتار كاسىپتىك قوعامى پارتيا باس ياچەيكاسىنىڭ شۋجيى، شينجياڭ ايبو ادۆوكاتتار ءىس باسقارماسىنىڭ مەڭگەرۋشىسى چىن لەي تۋرالى
اۋەلگى ماقساتتى ۇمىتپاۋ بورىشتى ەستە بەرىك ساقتاۋ
قاسىمىزداعى ۇلگىلەر
ەرىكتى ءتىلشى لي ميڭشيڭ
”ادۆوكات اڭعارلى بولۋى، كاسىپتىك ءمورالىنا تاباندى بولۋى، دۇرىس جولمەن ءجۇرۋى كەرەك. سونىمەن قاتار يمەنۋ سەزىمى، العىس سەزىمى، قاناعات سەزىمى بولۋ كەرەك“. 8 - ايدىڭ 6 - كۇنى بۇراتالا موڭعۇل اۆتونوميالى وبلىستىق ادۆوكاتتار كاسىپتىك قوعامى پارتيا باس ياچەيكاسىنىڭ شۋجيى، شينجياڭ ايبو ادۆوكاتتار ءىس باسقارماسىنىڭ مەڭگەرۋشىسى چىن لەي اۆتورعا وسىنى ايتتى.
ادۆوكاتتىقپەن اينالىسقان 26 جىلدان بەرى، چىن لەي بەرىك نەگىز، تاماشا كاسىپتىك ناتيجەلەرىمەن، سونداي - اق زاڭ سالاسىنىڭ ۇزدىكتىگىنە ءتان پەيىلمەن زاڭنىڭ بەدەلىن قورعاۋدى بورىش سانايتىن، قوعامعا ۇلەس قوسۋدى مىندەت ەتەتىن تاڭداۋلى ادۆوكاتتىڭ وبرازىن سومدادى.
■ زاڭدى قاستەرلەۋدى قارۋ ەتىپ، زاڭنىڭ بەدەلىن قورعادى
ادۆوكاتتىق كاسىپتىك ءومىر چىن لەيعا سوت ۇستىندەگى ىجاعداتتى لوگيكالىق ويدى، سەزگىر بايقامپازدىقتى عانا ەمەس، اسىرەسە، ادىلدىكتەن، تۋراشىلدىقتان تايمايتىن تالپىنىستى سيلادى.
2016 - جىلى بەلگىلى كەڭەسشى ورىن ىرعىن پايداعا كەنەلۋ ءۇشىن، تاعى ءبىر كاسىپورىنعا جوعارى وسىممەن قىسقا مەرزىمدىك قارىز بەرىپ، وسىمىنەن پايدالانباقشى بولادى. چىن لەيدان كەڭەس سۇراعاندا، چىن لەي قارسى جاققا كاسىپورىندار اراسىندا قىسقا مەرزىممەن قارىز بەرۋدىڭ قاتىستى فينانس زاڭ ەرەجەسىنە قايشى ەكەنىن، كۇشكە يە ەمەس ارەكەتكە جاتاتىندىعىن، ءوسىمدى الۋ ۇقىعى جوق ەكەنىن ايتادى. كاسىپورىننىڭ جاۋاپتىسى بىرلەسىپ شارۋاشىلىق جۇرگىزۋگە قارجى قوسۋ نەمەسە ساتىپ الۋ - ساتۋ قارىز اقشاسى تاسىلىمەن قىسقا مەرزىمدىك قارىزدىڭ سيپاتىن جاسىرماقشى بولعاندا، چىن لەي: ”ءبىز ادۆوكاتتاردىڭ ءوزىنىڭ كاسىپتىك ءمورالى بولادى، ىسكە قاتىستى ادامداردىڭ زاڭسىز ماقساتىن زاڭدى فورمامەن جاسىرىپ - جابۋىنا استە كومەكتەسە المايمىز“ دەپ قاتاڭ ەسكەرتەدى. چىن لەيدىڭ بارىن سالا ناسيحاتتاۋىمەن كاسىپورىن جاۋاپتىسى اقىرىندا وسى ويىنان قايتادى.
دەلو ىستەۋ بارىسىندا وزدەرىنە كومەكتەسۋگە تارتۋ ءۇشىن، ءبىرتالاي ادام چىن لەيعا قوسىمشا پايدا بەرۋدى ويلايدى. چىن لەي بۇدان قاتاڭ باس تارتىپ: ”تولىمدى ادۆوكات زاڭنىڭ تومەنگى شەگىن ساقتاپ قانا قويماي، ءوز جاۋاپكەرشىلىگىن زاڭ بويىنشا وتەۋى كەرەك“، - دەيدى.
چىن لەي تۋراشىل كاسىپتىك قاسيەتىمەن ادۆوكاتتىق كاسىپ سالاسىندا تاماشا اتاققا يە بولىپ، ىلگەرىندى - كەيىندى بۇكىل ەل بويىنشا ادۆوكاتتىق كاسىپ سالاسىنداعى وزات بولۋعا تالپىنۋ قيمىلىندا پارتيالى ادۆوكاتتاردىڭ ۇلگىسى، اۆتونوميالى رايوندىق تاڭداۋلى ادۆوكات، شينجياڭنىڭ ادۆوكات كاسىبىنە كورنەكتى ۇلەس قوسۋ سيلىعى، اۆتونوميالى رايوندىق ەڭبەك ەرى سياقتى داڭقتارعا يە بولدى.
■ حالىق ءۇشىن كىرشىكسىز، ءادىل بولىپ، ادىلدىكتى، تۋراشىلدىقتى جاقتادى
”مەن ادۆوكاتپىن، ونان دا ماڭىزدىسى، پارتيا مۇشەسىمىن، ءارقانداي كەزدە، ءارقانداي جاعدايدا پارتيانىڭ مۇددەسىن، حالىقتىڭ مۇددەسىن ماڭداي الدى ورىنعا قويۋىم كەرەك“. چىن لەي وسىلاي دەدى، ونان دا ماڭىزدىسى، ۋادەسىن وسىلاي ورىندادى. 26 جىلدان بەرى، چىن لەي حالىق ءۇشىن جۇمىس ىستەۋ ۇستانىمىنا باستان - اياق تاباندى بولىپ، بۇكىل ىنتا - پەيىلىمەن حالىق ءۇشىن قىزمەت ىستەدى.
2007 - جىلى 3 جاسار ءسابي ۋاڭ x كولىك اپاتىنا ۇشىراپ، ەكى اياعى توپ بولىپ قالادى. كولىك اپاتىن تۋدىرعان اۆتوموبيلدى كولىك اپاتىن تۋدىرعان ادام باسقالاردان پايدالانۋعا الا تۇرعاندىقتان، سونداي - اق كولىكتىڭ مەنشىك ۇقىعى قاتىناسى كۇردەلى بولعاندىقتان، تولەم مىندەتىن ۇستىنە الۋشى تۇلعالار ءبىر - بىرىنە يتەرىپ، تولەم ءتۇرى، سونداي - اق ولشەمى انىق بولماي، تولەم الۋ ءىسى تىعىرىققا تىرەلەدى. الگى بالانىڭ قامقورشىسى چىن لەيعا باستارىنداعى باقىتسىزدىق جاعدايدى جانە ەكونوميكا، زاڭ جاقتارىندا ءدوپ كەلگەن قيىنشىلىقتارىن ەڭىرەي ايتقاندا، چىن لەي تاباندا وكىلەتتىك اقىنى ازايتاتىندىعىن ايتادى ءارى قاتىستى دەلونى تەكسەرۋ ارقىلى ۋاڭ xتىڭ ۇيلەسىمدى ەكونوميكالىق تولەم الۋىنىڭ نەگىزىن قاراستىرادى، سوڭىندا ۋاڭ x زاڭ بويىنشا 700 مىڭ يۋاننان استام تولەمگە يە بولادى.
سوتتا جەڭگەن سوڭ، كوپكە دەيىن چىن لەيدىڭ كوڭىلى جاي تاپپادى. ول قيىنشىلىعى بار وتباسىلاردىڭ كوبىنىكى ەكونوميكالىق قيىنشىلىق دەپ ەسەپتەيتىن، زاڭ مەن زاڭ ەرەجەلەردى قانىق بىلمەۋدەن قيىنشىلىق قىسپاعىندا قالاتىندىعىن ويلاپ كورمەپتى. ول ادۆوكات رەتىندە، شاعىم ايتۋشىلاردىڭ سوتتا جەڭۋىنە كومەكتەسىپ قانا قويماي، ونان دا ماڭىزدىسى، ادۆوكاتتىڭ قوعامدىق قۇنىن جۇزەگە اسىرىپ، ادىلدىك پەن تۋراشىلدىقتى قورعاۋ ەكەنىن بىرتىندەپ سەزىندى.
وسىدان كەيىن، چىن لەي بۇقارانىڭ زاڭدىق قيىن ماسەلەلەرىن شەشۋگە اناعۇرلىم پەيىل تانىتىپ، ۇنەمى قيىنشىلىعى بار قاۋىمعا اقىسىز وكىلەتتىك ىستەپ، اقىسىز كەڭەس بەرىپ، جول - قاتىناس قاراجاتىن، تاماق، جاتاق قاراجاتىن تولەيتىن بولدى.
■ بورىشىن ادا ەتىپ، قوعامدىق جاۋاپكەرشىلىكتى وتەدى
ۋاقىتتىڭ سىنىنان ءوتىپ شىنىعۋ ارقىلى چىن لەي جايشىلىقتاعى دەلو ىستەۋدەن سىرت، ءبىر ادۆوكات ۇستىنە الۋعا ءتيىستى ءتىپتى كوپ قوعامدىق جاۋاپكەرشىلىكتى ىرىقتىلىقپەن ۇستىنە الدى.
ادۆوكاتتىقپەن اينالىسقان 26 جىلدان بەرى، چىن لەي 1000نان استام ءار ءتۇرلى دەلونى ىستەپ، 2000نان استام ادامعا (رەت) مىندەتتى تۇردە زاڭدىق كەڭەس بەرىپ، 50 رەتتەن استام زاڭ لەكسياسىن وتكىزىپ، 40تان استام ۇكىمەت ورگانىنىڭ، كاسىپورىن، ءىسورىننىڭ زاڭ اقىلشىسى مىندەتىن ۇستىنە الدى. ول ىلگەرىندى - كەيىندى اۆتونوميالى رايوندىق حالىق پروكۋراتۋراسى ماماندار كەڭەس بەرۋ القاسىنىڭ مۇشەلىگىنە، اۆتونوميالى رايون دارەجەلى حالىق باقىلاۋشىلىعىنا، بۇراتالا وبلىستىق حالىق قۇرىلتايى زاڭ شىعارۋ جونىندە كەڭەس بەرۋشى ماماندار گرۋپپاسىنىڭ مۇشەلىگىنە، بۇراتالا وبلىستىق ۇكىمەتتىڭ زاڭ شىعارۋ كەڭەسشىلىگىنە ۇسىنىس ەتىلدى.
ءبىر تامشى سۋ كۇننىڭ نۇرىن شاعىلىستىرا الادى. چىن لەي ءىس جۇزىندىك ارەكەتىمەن جۇرتشىلىقتى اسەرلەندىردى، كاسىپتەستەرى ونى ”قۇلشىنا قىزمەت ىستەيتىن وگىز“ دەپ القادى، ءبىراق ول ءوزىنىڭ جاپالى ەڭبەگىنە وكىنىپ كورگەن ەمەس، ول: ”ءوز قۇلشىنىسىم ارقىلى قوعامعا، باسقالارعا پايدالى ىستەردى ىستەۋ باقىت سانالادى“، - دەيدى.
