ما يۇيچيڭنىڭ سۋرەتى. شينحۋا اگەنتتىگى تاراتقان
شينحۋا اگەنتتىگىنىڭ 8 - ايدىڭ 22 - كۇنى حاربيننەن بەرگەن حابارى (ءتىلشى چي حۇڭشين). حاربين قالاسى داۋ - ۋاي رايونىنىڭ بايىرعى كوشەسىندە اۆتوكولىكتەر قايشالىسىپ، ەرەكشە جۇڭحۋا باروك ۇلگىسىندەگى قۇرىلىستار سىرت جەردەن كەلگەن كوپتەگەن ساياحاتشىلاردى ەستەلىك سۋرەتكە تۇسۋگە باۋراۋدا، قايشالىسقان ادامدار تىنىش تا جايبىراقات تۇرمىستىڭ ءلاززاتىن تاتۋدا. ال وسىدان 40 نەشە جىلدىڭ الدىندا وسى جەردە حاربيندى، ءتىپتى بۇكىل ەلدى تىكسىندىرگەن ءورت اپاتى تۋىلعان، سول كەزدە ءتىلسىز جاۋمەن ايقاسىپ حالىق ءۇشىن قۇربان بولعان ءورت ءسوندىرۋشى جاۋىنگەر ما يۇيچيڭ جۇرت كوزىنە تۇسكەن بولاتىن.
ما يۇيچيڭ، 1946 - جىلى دۇنيەگە كەلگەن، جۇڭگو كوممۋنيستىك پارتياسىنىڭ مۇشەسى، 1965 - جىلى 12 - ايدا شاقىرۋ بويىنشا قوسىنعا قاتىناسقان.
1974 - جىلى 12 - ايدىڭ 20 - كۇنى حاربيندە تاڭ ەندى الاكەۋىمدەپ اتىپ كەلە جاتقان، قار جاۋماعالى ۇزاق ۋاقىت بولعان قالا سۇرعىلت تۇسكە ەنىپ، قۇرعاقشىلىق جايلاپ تۇرعان ەدى. كەنەتتەن، ساقتىق قوڭىراۋى شالىندى. حاربين قالاسى 5 - ۇن زاۆودىنا تۇتقيىل ءورت كەتتى.
حاربين 5 - ۇن زاۆودى كونە ۇلگىدەگى كەرپىش - اعاش قۇرىلىمدى زاۆود ءۇيى بولاتىن، ءورت شيكىزات سەحىنان تۋىلىپ، ۇن تارتۋ بولمەسىنە قاراي جالماڭدادى. ما يۇيچيڭدەر ءورت تۋىلعان جەرگە جەتكەندە، جالىن اسپاندى شارپىپ، قويۋ ءتۇتىن بۋداقتاپ، ءار تۇستان قوپارىلىس ءۇنى شىعىپ جاتتى. جۇمىس باسىنداعى قولباسشى رەتىندە ما يۇيچيڭ قوپارىلىس تۋىلىپ، ءورت كەتكەن سەحتىڭ زاۆود ۇيلەرىنىڭ بيىك، عيماراتتا ەشقانداي تەرەزە جوق، ءتىپتى دە زور قوپارىلىس تۋىلۋدان بۇرىن سۇيىتىلعان توزاڭمەن ءورتتى ءسوندىرۋ ءۇشىن تەك 17 مەتر بيىكتىكتەگى سەحتىڭ توبەسىنە شىعۋ كەرەك ەكەندىگىن انىق بىلەتىن. ول باتىلدىقپەن شايقاس بۇيرىعىن ءتۇسىرىپ، بارلىق كوممۋنيستىك پارتيا مۇشەلەرى مەن كوممۋنيستىك جاستار وداعىنىڭ مۇشەلەرىن ەرلىكپەن الدا اتويلاپ جۇرۋگە بۇيىرادى.
ما يۇيچيڭ حاربين 5 - ۇن زاۆودىنىڭ جاعدايىنا قانىق ەدى، ەگەر ءورت جاعدايىن تىزگىندەمەگەندە، كاسىپورىننىڭ جوعارى قىسىمدى پار قازانى مەن 3000 جىڭنان استام اۆتول مايى ساقتالعان ماي قامباسىندا قوپارىلىس تۋىلىپ، ءتىپتى دە زور اپات كەلىپ شىعاتىن ەدى، سونىمەن بىرگە كورشىلەس جاتقان حاربين 1 - جابدىق زاۆودى، حاربين توقىماشىلىق 2 - زاۆودى، حاربين شوشقا جالى زاۆودى سياقتى مەملەكەت مەنشىگىندەگى كاسىپورىندار مەن توڭىرەكتەگى نەشە جۇزدەگەن تۇرعىننىڭ ءومىرىنىڭ، مال - مۇلكىنىڭ اماندىعىنا اۋىر قاتەر توندىرەدى. ءورت تۋىلعان جەردە قارا ءتۇتىن بۋداقتاپ، قاۋلاعان ورتتەن شىققان ىستىق ادامدى بەت قاراتپايدى. ما يۇيچيڭ قاتەر تۋىلارىن تۇجىرىمداپ، سۋ اتقىلاعىشتى ءوزى الىپ، باسقا جاۋىنگەرلەردى تۇگەلدەي جەرگە تۇسۋگە بۇيىرادى.
بانجاڭ ليۋ يۇييىن ما يۇيچيڭدى ۇستاي الىپ: دۇيجاڭ، قاتەرلى، مەن ىستەيىن، - دەيدى.
ما يۇيچيڭ بار كۇشىمەن ليۋ يۇييىندى يتەرىپ سىرتقا شىعارىپ، داۋىستاپ: مەن ولاي - بۇلاي بولىپ كەتسەم، جەڭگەڭە ايت، بالالارعا جاقسى قاراسىن! - دەيدى.
وسىدان كەيىن ما يۇيچيڭ سۋ اتقىلاعىش جابدىقتى قولىنا الىپ وت تەڭىزىنە سۇڭگىپ كەتەدى. ليۋ يۇيين مەن بىرنەشە جاۋىنگەر دە ونىڭ سوڭىنان ۇمتىلادى.
دۇنيەنى ءزىلزالاعا سالعان كۇشتى قوپارىلىس سەحتىڭ 5 - قاباتىنىڭ توبەسىن كۇل - پارشا ەتتى. ءاپ - ساتتە، قويۋ ءتۇتىن قاپتاپ، كەرپىش جارقىنشاقتارى جان - جاققا شاشىلادى. الدەقانداي الىپ كۇش ماي يۇيچيڭ مەن سەرىكتەرىن اسپانعا ءبىراق لاقتىرادى.
ءتۇتىن سەيىلدى، ءورت ءسوندىرىلدى، شايقاس اياقتالدى. جاۋىنگەرلەر كوز جاستارىن كول ەتە ءجۇرىپ قيراندىنىڭ اراسىنان ماي يۇيچيڭ مەن سەرىكتەرىنىڭ مۇردەسىن تاۋىپ الدى، مۇردەلەردىڭ بولىنگەن مۇشەلەرىنىڭ قايسىسى كىمدىكى ەكەندىگىن اجىراتىپ الۋ مۇمكىن ەمەس ەدى. جاۋىنگەرلەر ءبىر پارشا - پارشاسى شىعىپ، كۇيىپ كەتكەن مۇردەنىڭ كۇيۋ جاعدايىنان، جۇرناعى قالعان قول پروجەكتردەن جانە قولىنا تاس قىپ ۇستاعان جارتىسى قالعان سۋ اتقىلاعىشتاعى ”داۋ - ۋاي“ دەگەن جازۋدان وزدەرىنىڭ ما دۇيجاڭ ەكەندىگىن تۇسپالدادى.
ما يۇيچيڭ مەن جاۋىنگەر سەرىكتەرى ءتىلسىز جاۋمەن ايانباي الىسىپ، كومەككە كەلگەن ءورت ءسوندىرۋ قوسىنىنا ءورت ءسوندىرۋ ۋاقىتىن ۇتىپ بەردى. ولار وزدەرىن قۇربان ەتۋ ارقىلى كاسىپورىننىڭ جوعارى قىسىمدى پار قازانى مەن ماي قامباسىن امان ساقتاپ قالدى، وت تەڭىزىنە كورشىلەس تۇرعان باسقا زاۆودتاردى، مەكتەپتەردى جانە توڭىرەكتەگى نەشە جۇزدەگەن تۇرعىنداردىڭ اماندىعىن قورعاپ قالدى.
حاربين قالالىق قوعام حاۋىپسىزدىگى مەكەمەسى وسى رەتكى ءورت ءسوندىرۋ شايقاسىندا قۇربان بولعان جاۋىنگەرلەردى ماداقتادى ءارى ما يۇيچيڭگە ءبىر رەت 2 - دارەجەلى ەڭبەك جازدى. 1975 - جىلى 3 - ايدىڭ 25 - كۇنى جۇڭگو كوممۋنيستىك پارتياسى حاربين قالالىق قوعام حاۋىپسىزدىگى مەكەمەسى وزەكتى گرۋپپاسى ما يۇيچيڭگە ۇلگىلى كوممۋنيستىك پارتيا مۇشەسى اتاعىن بەردى. 1975 - جىلى 11 - ايدىڭ 9 - كۇنى حيلۇڭجياڭ ولكەلىك توڭكەرىستىك كوميتەتى ما يۇيچيڭدى توڭكەرىستىك قۇربان دەپ بەكىتتى. الايدا، ما يۇيچيڭنىڭ حيكاياسى مۇنىمەن اياقتاپ كەتكەن جوق.
1988 - جىلى ما يۇيچيڭنىڭ ۇلكەن ۇلى ما جۇڭشۋە اسكەرگە قاتىناسىپ قوسىنعا كىردى، ول اكەسىنىڭ جەتپەگەن مۇراتىن ويداعىداي جالعاستىرۋ بەكىمىنە كەلدى. اسكەري قوسىن ونىڭ قاھارمان قۇرباننىڭ ۇرپاعى ەكەندىگىن ويلاستىرىپ، ونى ارتقى شەپ بولىمىنە قىزمەتكە اۋىستىرادى. ءبىراق ول تارماق اترەتتىڭ باسشىسىنا كەلىپ، شايقاستىڭ ءبىرىنشى شەبىندە بولۋدى باتىل تالاپ ەتەدى.
ءورت ءسوندىرۋ قوسىنىندا ما جۇڭشۋە جاتتىعۋعا بەلسەندىلىكپەن قاتىناسىپ، ءۇرتىس 2 جىل جەكەلىك 3 - دارەجەلى ەڭبەك سىڭىرەدى. 1993 - جىلى 3 - ايدىڭ 29 - كۇنى تاڭعى ساعات 3تە حاربين قالاسى سۇڭحۋاجياڭ رايونىنداعى اۆتوكولىك رەمونتتاۋ، جابدىقتاۋ زاۆودىنا ءورت كەتەدى. ما جۇڭشۋە ساقشىعا مالىمدەۋدى تاپسىرىپ العاننان كەيىن دەرۋ ءورت تۋىلعان جەرگە بارادى، بۇل ونىڭ ومىرىندەگى 121 - رەتكى ءورت ءسوندىرۋ شايقاسى بولاتىن. ءورت تۋىلعان جەرگە بارعاننان كەيىن، ما جۇڭشۋە جەلدىڭ ىعىنداعى ماي قامباسىنىڭ ماڭىنا بارىپ، ءورت جاعدايىن تىكە تىزگىندەۋدى ىرىقتىلىقپەن سۇرانادى. ءتۇن قاراڭعىلىعىندا، ءبىر ۇلكەن جۇك اۆتوموبيلى بەلگىلەمەدەگى قارقىننان اسىپ زىمىراپ كەلە جاتىپ، بار زەيىنىمەن ءورت ءسوندىرىپ تۇرعان ما جۇڭشۋەنى قاعىپ كەتەدى دە، ما جۇڭشۋە قانعا بويالىپ قۇربان بولادى.
19 جىلدىڭ الدىندا اكەسى ما يۇيچيڭ ءورت ىشىندە ەرلىكپەن قۇربان بولدى، ول كەزدە نەبارى 28 جاستا بولاتىن؛ 19 جىلدان كەيىن، ۇلى ما جۇڭشۋە دە ءورت الاڭىندا ەرلىكپەن قۇربان بولدى، ول نەبارى 23 جاستا عانا ەدى.
