جاڭا جۇڭگو قۇرىلعاننان كەيىنگى 1 - رەتكى مەملەكەتتىك حالىق قۇرىلتايى 1954 - جىلى 9 - ايدىڭ 15 - كۇنى بەيجيڭ جۇڭنانحاي حۋايرىنتاڭدا سالتاناتپەن اشىلدى. بۇدان بۇرىن، جۇڭگو حالىق ساياسي ءماسليحات كەڭەسى مەملەكەتتىك حالىق قۇرىلتايىنىڭ فۋنكتسياسىن ۋاقىتشا اتقارىپ كەلدى.
1 - رەتكى مەملەكەتتىك حالىق قۇرىلتايىنا قاتىناسقان 1226 ۋاكىل (قۇرىلتايعا ناقتى قاتىناسۋشى 1210 ادام)، جۇڭگو تاريحىندا تۇڭعىش رەت جالپىلىق سايلاۋ ارقىلى بارلىققا كەلدى. 1953 - جىلى 2 - ايدا، ورتالىق حالىق ۇكىمەتى كوميتەتى «جۇڭحۋا حالىق رەسپۋبليكاسى مەملەكەتتىك حالىق قۇرىلتايىنىڭ جانە جەرگىلىكتى ءار دارەجەلى حالىق قۇرىلتايلارىنىڭ سايلاۋ زاڭى»ن قاراپ ماقۇلدادى، ليۋ شاۋچي ءتوراعا بولعان ورتالىق سايلاۋ كوميتەتى قۇرىلدى. 1953 - جىلى 4 - ايدا، ءار دارەجەلى حالىق قۇرىلتايى ۋاكىلدەرىن سايلاۋ قىزمەتى باستالدى. جەر - جەر جەكە - جەكە جاسىرىن بەلەت تاستاۋ، قول كوتەرىپ سايلاۋ، بۇرشاق تاستاپ سايلاۋ سياقتى تاسىلدەر ارقىلى سايلاۋ جۇرگىزدى. ماۋ زىدۇڭ قاتارلىلار 1953 - جىلى 12 - ايدىڭ 8 - كۇنى كەشتە بەيجيڭ قالاسى شيدان رايونى جۇڭنانحاي بەلەت تاستاۋ ورنىندا بەلەت تاستاۋعا قاتىناستى.
وسى رەتكى جالپىلىق سايلاۋدا ءار ۇلتتان، ءار جىكتەن، ءارقايسى دەموكراتيالىق پارتيا - توپتان جانە حالىقتىق ۇيىمداردان ۋاكىلدەر سايلاندى، ولار ونەركاسىپ شەبىندەگى ەڭبەك وزاتى ۋاڭ چۇڭلۇن، اۋىل شارۋاشىلىعى شەبىندەگى ەڭبەك وزاتى لي شۇندا، سەكسەننىڭ سەڭگىرىندەگى چي بايشى، سايلاۋ جاسىنا ەندى عانا تولعان جاس ايەل جۇمىسشى حاۋ جيانشيۋ، سونداي - اق از ۇلت ۋاكىلدەرى، وتانعا ورالعان حۋاچياۋلاردىڭ ۋاكىلدەرى قاتارلىلاردى قامتىدى.
1954 - جىلى 9 - ايدىڭ 15 - كۇنى، 1 - كەزەكتى مەملەكەتتىك حالىق قۇرىلتايىنىڭ 1 - رەتكى ءماجىلىسى ءساتتى اشىلدى. ءماجىلىس ليۋ شاۋچي جاساعان «جۇڭحۋا حالىق رەسپۋبليكاسى نەگىزگى زاڭىنىڭ جوبا نۇسقاسى جونىندەگى بايانداما»نى، جوۋ ىنلاي جاساعان «ۇكىمەت قىزمەتىنەن بايانداما»نى، سونداي - اق «جۇڭحۋا حالىق رەسپۋبليكاسىنىڭ نەگىزگى زاڭى»، «جۇڭحۋا حالىق رەسپۋبليكاسى مەملەكەتتىك حالىق قۇرىلتايىنىڭ ۇيىمدىق زاڭى»، «جۇڭحۋا حالىق رەسپۋبليكاسى مەملەكەتتىك كەڭەستىڭ ۇيىمدىق زاڭى» سياقتى ءبىر قىدىرۋ زاڭداردى ماقۇلدادى. قۇرىلتاي ماۋ زىدۇڭدى جۇڭحۋا حالىق رەسپۋبليكاسىنىڭ ءتوراعاسى، جۋ دىنى جۇڭحۋا حالىق رەسپۋبليكاسىنىڭ ورىنباسار ءتوراعاسى، ليۋ شاۋچيدى مەملەكەتتىك حالىق قۇرىلتايى تۇراقتى كوميتەتىنىڭ باستىعى ەتىپ سايلادى؛ ماۋ زىدۇڭنىڭ كورسەتۋىنە ساي، قۇرىلتاي جوۋ ىنلايدىڭ مەملەكەتتىك كەڭەستىڭ زۇڭليى بولۋىن ۇيعاردى.
9 - ايدىڭ 28 - كۇنى ءماجىلىس ءساتتى جابىلدى، بۇل رەتكى ءماجىلىس − ەلىمىز حالىق دەموكراتياسى قۇرىلىسىنداعى ماڭىزدى بەلەس. 1 - كەزەكتى حالىق قۇرىلتايىن بەلگى ەتكەن حالىق قۇرىلتايى ءتۇزىمى جاڭا جۇڭگونىڭ ءتۇبىرلى ساياسي ءتۇزىمى رەتىندە رەسمي ورنادى.
(شينحۋا اگەنتتىگىنىڭ 9 - ايدىڭ 11 - كۇنگى بەيجيڭنەن بەرگەن حابارى)
