ءتىلشى جىڭ ييۋان
جاراقات - اۋرۋ، ۋاقىت پارقى سياقتى قيىنشىلىقتاردى جەڭىپ، 31 جاستاعى ساقا سپورتشى ءدىلنار - ءدىلشات مەملەكەتتىك جارىسقا العاش قاتىناسقان جاس سپورتشى ديڭ چيحاڭ مەن ما جيا - يدى باستاپ، از ۇلتتاردىڭ 11 - كەزەكتى مەملەكەتتىك ءداستۇرلى سپورت جارىسىنىڭ ۋشۋ تۇرىندە شينجياڭدىقتاردىڭ جۇڭحۋانىڭ ءداستۇرلى ۋشۋ ونەرىن جالعاعان جانە اسقاقتاتقان بەينەسىن كورسەتتى.
وسى رەتكى از ۇلتتاردىڭ مەملەكەتتىك سپورت جارىسىنا قاتىناسقان شينجياڭ ۋشۋ كومانداسىنداعى جالپى 5 ادام 5 ۇلتتان قۇرام تاپقان، كوماندانىڭ جەتەكشىسى جاۋ كۇن حانزۋ، جاتتىقتىرۋشى ۋ شياۋلين جۋاڭزۋ، 3 سپورتشى جەكە - جەكە ۇيعۇر، ءمانزۋ جانە حۇيزۋ ەدى. ۇيىمداسۋدان شوعىرلى جاتتىعۋعا، ونان جارىس كەزىنە دەيىن، كومانداداعىلار ىنتىماقتى، جاراسىمدى بولىپ كەلەدى.
”ەكى كوزىڭدى الدىڭعى جاققا قادا، جۇدىرىققا قارا، باسىڭدى جىلدامىراق تايدىر... “ جارىستىڭ الدىنداعى شوعىرلى جاتتىعۋدا كوماندادا اپەكە بولىپ كەلەتىن ءدىلنار شاكىرت باۋىر، شاكىرت سىڭلىلەرىنىڭ ارەكەتتەرىنە تالداۋ جاساپ، سپورتتىق دەڭگەيلەرىن جوعارىلاتۋعا كومەكتەستى.
”جارىستاعى ءبىر مينۋتىڭ ءۇشىن جايشىلىقتا 10 جىل جاتتىعۋىڭ كەرەك. جارىستاعى ءار قيمىل قاراماققا قاراپايىم كورىنگەنىمەن، ءار ارەكەتتىڭ بارلىعى قايتا - قايتا جاتتىعۋدان، مۇقيات شىڭدالۋدان كەلەدى“، - دەيدى ءدىلنار، - ”مەنىڭ باستى قۇلشىنۋ بەتالىسىم تيانشان جۇدىرىعى مەن تيانشان سەمسەرى، ءبىزدىڭ جۇدىرىق ونەرىمىز ۇقساماعانىمەن، بىرلەسىپ جاتتىققان كەزدە ءبىر - ءبىرىمىزدىڭ ولقىلىعىمىزدى كورسەتىپ، ءوزارا ۇلگى الىپ، ۇيرەنۋىمىزگە بولادى“.
ما جيا - ي بىلاي دەيدى: ”2 اي بىرگە ءجۇرىپ، تۇسىنىسە كەلە، مەنىڭ ءدىلنار اپەكەممەن سۇيىسپەنشىلىگىم كۇن سايىن نىعايا ءتۇستى. ول بىزگە دەن قويا كوڭىل ءبولىپ، قارايلاسىپ، تۋعان اپەكەمدەي بولىپ كەتتى“.
ساقا سپورتشى ءدىلنار 2003 - جىلدان باستاپ شينجياڭ ۋشۋ كومانداسىنىڭ ۋاكىلى رەتىندە، از ۇلتتاردىڭ مەملەكەتتىك سپورت جارىسىنا 4 كەزەك قاتىناسىپ، ۇلتتىق ۋشۋ ءتۇرى بويىنشا 2 - دارەجەلى سيلىق، 3 - دارەجەلى سيلىق سياقتىلارعا يە بولعان.
ءمانزۋ جاس سپورتشى ديڭ چيحاڭ مەن حۇيزۋ بويجەتكەن ما جيا - يدىڭ ەكەۋى دە ورتا مەكتەپتىڭ وقۋشىسى، اپەكەلەرى ءدىلناردىڭ ءوزى باستاپ ونەگە كورسەتۋىندە، 2 اي بويى ماشاقاتتى جاتتىعۋدان كەيىن، ولاردىڭ سپورتتىق دەڭگەيلەرى ايرىقشا ءوسىپ، ايتارلىقتاي جوعارىلادى.
جاتتىقتىرۋشى ۋ شياۋلين بىلاي دەيدى: ”جاقسى ناتيجەگە قول جەتكىزۋ ءۇشىن، كوماندا مۇشەلەرى جاتتىعۋ الاڭىندا ايانباي تەر توگىپ، جارىستا قايراتتانا بەلدەسىپ، قايتپاس قايسار جىگەر ايگىلەدى“.
كوماندا جەتەكشىسى جاۋ كۇن بىلاي دەيدى: ”بۇل رەت از ۇلتتاردىڭ مەملەكەتتىك سپورت جارىسىنا قاتىناسقان كوماندا مۇشەلەرىنىڭ بارلىعى حالىق اراسىنان تاڭدالىپ شىققان ۋشۋ مايتالماندارى. كوپشىلىك شوعىرلى جاتتىعۋدان جارىسقا قاتىناسۋعا دەيىن بىرنەشە اي عانا بىرگە بولعانىمەن، ۇنەمى ءوزارا ۇيرەنىپ، ونەر سىناسىپ، ءبىر - ءبىرىنىڭ ارتىقشىلىعىنان ۇيرەنىپ، كەمشىلىكتەرىن تولىقتادى. ال جارىس كەزىندە، كوپشىلىك وسى ۇلكەن شاڭىراقتا ءوزارا اۋىس - كۇيىس جاساپ، ۇلگى الىپ، ۇيرەنىپ، دەڭگەيلەرىن ءوسىرىپ، جۇڭحۋا ۇلتىنىڭ ءداستۇرلى ۋشۋ ونەرىن بىرگە اسقاقتاتتى“.
