تيانشان تورى
تيانشان تورى   ›   جاڭالىقتار   ›   شينجياڭ حابارلارى

شينجياڭ كوپ ءتۇرلى شارامەن جايلىم مال شارۋاشىلىعىنىڭ تيبىن وزگەرتىپ، دارەجەسىن ءوسىرۋدى ىلگەرىلەتتى

  شينحۋا اگەنتتىگىنىڭ 9 - ايدىڭ 13 - كۇنى ۇرىمجىدەن بەرگەن حابارى (ءتىلشى سۇن شاۋشيۇڭ). كۇز كەلىسىمەن شينجياڭنىڭ التاي، ىلە سياقتى جەرلەرى پىشەن جيناۋ مەزگىلىنە ءوتتى. بۇرىنعىداي تابيعي وسكەن شوپكە عانا قاراپ وتىرماي، شابىندىق شوپتەردى قازىر مالشىلار كوبىنەسە وزدەرى ەگەدى. مالشىلاردى وتىرىقتاندىرۋ، جايلىمدى تىنىقتىرۋ، جايلىم مەن مالدى تەڭگەرۋ سياقتى ساياساتتاردىڭ جۇرگىزىلۋىنە مەڭزەس، شينجياڭنىڭ جايلىم مال شارۋاشىلىعى جاسىل، باياندى دامۋ جولىنا ءتۇستى.

  بىرنەشە كۇننەن بەرى، بۋرىلتوعاي اۋدانى كوكاعاش اۋىلى كوكجورعا قىستاعىندا پىشەننىڭ جاعىمدى ءيىسى بۇرقىرايدى، ءىرى باقتاشى زاينەش ناۋبەت تەمىر تىرمامەن تۋرالعان جەم - ءشوپتى جيناپ، قىمتاپ، اشىتىپ سۇرلەم جاساۋعا دايىنداپ جاتىپتى.

  ”ءشوپتى ءوزىمىز ەگەمىز، سىرتتان ساتىپ المايمىز، ءبىر جىلدا جەم - ءشوپ اقىسىنان نەشە مىڭ يۋان ۇنەمدەپ قالامىز، جايلىمدى دا قورعاپ، تاعى جاردەماقى سيلىق تا الىپ وتىرمىز“. زاينەشتىڭ ايتۋىنشا، جەرگىلىكتى ۇكىمەتتىڭ دەمەۋىندە، ول ۇيىندەگى ۇساق مالدى ءىرى قاراعا اۋىستىرىپ، ءىرى قارانىڭ تۇقىمىن اسىلداندىرعان، قازىر سيىر تۇقىمىنىڭ ءوزى 3 − 4 ءتۇرلى ەكەن، ”بۇل سيىرلار جەرگىلىكتى سيىرلاردان تەز وسەدى، ەرتە ساتىلىمعا شىعادى، ەتىنىڭ ساپاسى دا جاقسى، ءار سيىردان جىلىنا 4000دا 5000 يۋان تازا تابىس تاباسىز“.

  قازىر شينجياڭنىڭ جايلىم مال شارۋاشىلىعى وڭىرلەرىن ارالاساڭىز، ءتورت ماۋسىمدا كوشىپ - قونىپ جۇرەتىن، بەتكەي - بەتكەيگە قوي جاياتىن جاعدايدىڭ ازايىپ بارا جاتقانىن كورەسىز. مالشىلاردى وتىرىقتاندىرۋ، قونىس جاڭالاپ كەدەيلەردى سۇيەمەلدەۋ سياقتى ساياساتتاردىڭ جەدەل ىلگەرىلەتىلۋىنە سايكەس، كوپتەگەن مالشىلار اق تاياقتى تاستاپ، ءشوپ قۋالاپ، سۋ جاعالاپ جۇرەتىن كوشپەندى مال باعۋعا قوش ايتىپ، وتىرىقتاندىرۋ تۇيىنىندە جەم - ءشوپ ەگىپ، قورادا باعىپ، مال ”جازدا تويىپ، كۇزدە سەمىرىپ، قىستا ارىقتاپ، كوكتەمدە كوتەرەم بولىپ ولەتىن“ كەلەڭسىزدىكتەن قۇتىلىپ، مال شارۋاشىلىعى قۇنتسىز باعىمشىلىقتان شوعىرلى باسقارۋعا بۇرىلىس جاسادى.

  ” ءالى دە ءشوپ قۋالاپ، سۋ جاعالاپ جۇرەتىن مالشىلار دا ۇكىمەت بەلگىلەگەن جايلىم مەن مالدى تەڭگەرىپ باسقارۋ ءادىسى بويىنشا جايلىمعا قاراي مال سانىن بەلگىلەپ، مال سانىن قاتاڭ بەكىتىپ، بەلگىلەمەدەگى مال سانى بويىنشا تاۋعا شىعىپ مال باعادى“، - دەدى بۋرىلتوعاي اۋداندىق پارتكومنىڭ ورىنباسار شۋجيى نۇربەك ريزابەك. ونىڭ ايتۋىنشا، نازاردى وسى زامانعى مال شارۋاشىلىعىن دامىتۋعا شوعىرلاندىرىپ، عىلمي رەتسەپپەن باعۋدى، دالادا جايۋ مەن قولدا جەم - شوپپەن باعۋدى عىلمي تۇردە اۋىستىرىپ وتىرۋدى جالپىلاستىرىپ، وسى زامانعى مال شارۋاشىلىعىنان ۇلگى كورسەتۋ بازاسىن قالىپتاستىرۋدان تىس، اۋدان تاعى ساۋداگەر شاقىرۋ، اۋىل - قىستاق دەلدالدارىن جەتىلدىرۋ سياقتىلار ارقىلى ەگىنشى - مالشىلاردى باعىمشىلىق سەلبەستىك كووپەراتيۆىن قۇرۋعا جەتەكتەپ، مالشىلار مالدى، جايلىمدى، ەڭبەككۇشتى جارنا رەتىندە قوسۋ سياقتى شارالار قولدانىپ، مال شارۋاشىلىعى بايلىقتارىن بىرىكتىرگەن.

  بۋرىلتوعاي اۋدانى سياقتى، تاياۋ جىلداردان بەرى شينجياڭنىڭ جەر - جەرى ءداستۇرلى مال شارۋاشىلىعىن ۇزدىكسىز جاقسارتىپ، دەڭگەيىن ءوسىرىپ، وسى زامانعى مال شارۋاشىلىعىندا ءورىس اشىپ، جاڭالىق ەنگىزىپ، جاسىل، باياندى دامۋ جولىنا قاراي بىرتىندەپ قادام تاستاۋدا، مال تابىندارىنىڭ، مال تۇقىمدارىنىڭ قۇرىلىمى ۇيلەسىمدى، ءۇش كاسىپ توعىسا داميتىن وسى زامانعى مال شارۋاشىلىعىنىڭ تىڭ جۇلگەسى قالىپتاسىپ كەلەدى.

  ءتىلشىنىڭ اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسىنىڭ مال شارۋاشىلىعى، مال شيپاگەرلىگى مەكەمەسىنەن ۇعىسۋىنشا، قازىر شينجياڭ جاسىل، باياندى وسى زامانعى مال شارۋاشىلىعىنىڭ دامۋىن جەدەل ىلگەرىلەتىپ، مال شارۋاشىلىعىنىڭ قۇرىلىمىن رەتتەپ، مال، ءۇي قۇستارىنىڭ تۇقىمدارىن ساپالىلاندىرىپ، مال، ءۇي قۇستارىن كولەمدەندىرىپ باعۋ دەڭگەيىن جوعارىلاتۋدا. وسى زامانعى ءسۇت شارۋاشىلىعىنىڭ دامۋىن، شوشقا، ءۇي قۇستارى شارۋاشىلىعىنىڭ دامۋىن، جاسىل، ورگانيكالىق سيىر، قوي ەتى شارۋاشىلىعىنىڭ دامۋىن، جىلقى شارۋاشىلىعىنىڭ دامۋىن بەلسەنە ىلگەرىلەتۋمەن بىرگە، وسى زامانعى مال شارۋاشىلىعىنىڭ جاڭا تيجارات تۇلعالارىنىڭ دامۋىن سۇيەمەلدەپ، مال، ءۇي قۇستارى باعىمشىلىعىنىڭ ءوندىرىس قالدىقتارىن بايلىق رەتىندە پايدالانۋ، جايلىم ەكولوگياسىن قورعاۋ بويىنشا سيلىق، جاردەماقى بەرۋ سياقتى ەلەۋلى ينجەنەريالار اتقارىپ وتىر ەكەن.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.