ءتىلشى ياۋ گاڭ 9 - ايدىڭ 15 - كۇنى ۇرىمجىدەن حابارلايدى. اۆتونوميالى رايوندىق مادەنيەت جانە ساياحات مەڭگەرمەسىنەن ۇعىسۋعا قاراعاندا، 3 - جاق سەرىكتەستىكتىڭ تەكسەرۋ ساناعى بويىنشا، بيىل جۇڭچيۋ دەمالىسى كەزىندە رايونىمىزعا ەل ىشىنەن ساياحاتتاي كەلگەندەردىڭ سانى 7 ميلليون 205 مىڭ 700 ادام - رەتكە جەتىپ، سايكەس مەزگىلدەگىدەن %37.23 ارتقان؛ ادام باسى بويىنشا 1624.76 يۋان جۇمساپ، ەل ءىشى ساياحات كىرىسى 11 ميلليارد 708 ميلليون يۋانعا جەتىپ، سايكەس مەزگىلدەگىدەن %24.77 ارتىپ، ساياحاتشىلاردىڭ جالپى سانى، تۇتىنۋ جالپى سوماسى بىردەي تىڭ ورلەۋگە كوتەرىلدى.
اۋىل - قىستاق ساياحاتى، قىسقا ارالىق ساياحات ايرىقشا دۋماندى بولدى. شونجى اۋدانىنىڭ جۇڭچيۋ مەرەكەسى ءبيداي اتىزىنداعى كۇزگى جيىن - تەرىن قيمىلى، قابا اۋدانىنىڭ اق قايىڭ كورىنىس ءوڭىرى جۇڭچيۋ اسىل ىزدەۋ قيمىلى، باعراش اۋدانىنىڭ ”التىن كۇز شيحايدا. باس قوستىق حىكوۋدا“ جۇڭچيۋ نەگىزگى تاقىرىپتىق قيمىلى سياقتى ءبىرسىپىرا مادەنيەت جانە ساياحات قيمىلى كوپتەگەن ساياحاتشىلاردى باۋرادى.
ءۇي ماڭايىندا تىنىعۋ ساياحاتى دا ايرىقشا تارتىمدى بولدى. ەسىك بەلەتىن كەشىرۋ، ايكۇلشە سيلاۋ، شينجياڭدا كوپتەگەن كورىنىس وڭىرلەرى ءتيىمدى قيمىلدار ورنالاستىرىپ، ساياحاتشىلاردى ۇيىنەن شىعىپ كورىنىس وڭىرلەرىنە بارۋعا باۋرادى. شينجياڭ بايىرعى ەكولوگيالىق باقشاسىندا وتكىزىلگەن ”الەم اي نۇرىنا شومىپ، جاھان سۇيىسپەنشىلىككە بولەندى“ قيمىلى كوپتەگەن ساياحاتشىلاردى باۋرادى. شينجياڭ يەما مادەنيەت، دامۋ شەكتى سەرىكتەستىگىنىڭ قىزمەتكەرى ليۋ جيە جۇڭچيۋ دەمالىسى كەزىندە ءار كۇنى ساياحاتتاۋشىلاردىڭ سانى 1900دە 2000 ادامعا جەتىپ، جايشىلىقتاعىدان %20 شاماسىندا ارتتى دەپ تانىستىردى.
كوپتەگەن ساياحاتشىلار وتباسىنداعىلارمەن بىرگە ساياحاتتاۋدى تاڭدادى، بالا - شاعاسىن، قارتتاردى ەرتىپ ساياحاتتاپ جۇرگەندەر ساياحاتشىلاردىڭ %30 شاماسىن يەلەدى. ءۇرىمجى نانشاننان مادەنيەت، ساياحات ىستەرىن اشۋ شەكتى سەرىكتەستىگىنىڭ ديرەكتورى گۇلتاي بىلاي دەدى: ”قازىر كورىنىس ءوڭىرىنىڭ تەمپەراتۋراسى وتە ۇيلەسىمدى، كورىنىسى دە ەرەكشە تاماشا، ءوز كولىكتەرىمەن ساياحاتتاپ جۇرگەندەر، بالا - شاعاسىن ەرتكەن ساياحاتشىلار توتەنشە كوپ بولدى، كوپتەگەن وتباسىلارى جۇڭچيۋ دەمالىسى كەزىندە كورىنىس وڭىرلەرىن ءوز كولىكتەرىمەن ساياحاتتاۋدى تاڭدادى“.
نارات كورىنىس ءوڭىرى ءتيىمدى قيمىلدار ورىستەتتى، 9 - ايدىڭ 13 - كۇنىنەن 10 - ايدىڭ 31 - كۇنىنە دەيىن، ىلە قازاق اۆتونوميالى وبلىسىنداعى ساياحاتشىلار ازاماتتىق كۋالىكتەرىمەن تيىمدىلىك جاسالعان 10 يۋاندىق ەسىك بەلەتىنەن يگىلىكتەنەدى. شينجياڭ كولەمىندەگى ساياحاتشىلار ەرەكشە تيىمدىلىك جاسالعان 47 يۋاندىق ەسىك بەلەتىنەن يگىلىكتەنەدى. ءارقايسى كورىنىس ءوڭىرىنىڭ ەسىك بەلەتى باعاسىن ارزانداتۋداي تيىمدىلىك جاساۋ قيمىلى ساياحاتشىلاردىڭ كورىنىس وڭىرلەرىنە بارىپ تاماشالاۋ ىنتاسىن بارىنشا كۇشەيتتى.
توراڭعىنى تاماشالاپ، كۇزدىڭ كوركەم كورىنىسىنەن ءلاززاتتانۋ دەمالىس كەزىندە ساياحاتشىلارعا ەرەكشە ۇناعان ساياحات ءتۇرى بولدى. لوپنۇر اۋدانىنىڭ لوپنۇرلىقتار قىستاعى كورىنىس وڭىرىندە وتكىزگەن تاكلاماكان ءشولى ەلەكتروندى مۋزيكا مەرەكەسىندە ساياحاتشىلار توراڭعىنى تاماشالاۋمەن بىرگە، ءشول - جازيراداعى كورۋ - تىڭداۋ قوناعاسىنان ءلاززاتتاندى. جۇڭچيۋ دەمالىسى كەزىندە لوپنۇر اۋدانىنا ساياحاتتاي كەلگەندەردىڭ سانى جيىنى 44 مىڭ 455 ادام - رەتكە جەتىپ، ساياحات كىرىسى 7 ميلليون 356 مىڭ 800 يۋانعا جەتىپ، سايكەس مەزگىلدەگىدەن جەكە - جەكە %44.55 جانە %69.56 ارتتى.