تيانشان تورى   ›   ۇيرەنۋ   ›   شولۋ

حالىق تۇرمىسىنىڭ شۇلەن شۇعىلاسى، باقىتتىڭ جانعا جايلى كوكتەم سامالى

− شينجياڭنىڭ بەيبىت ازات بولعاندىعىنىڭ 70 جىلدىعى ساتىندە حالىق تۇرمىسىنىڭ جاقسارۋىنا جالپى شولۋ

ءتىلشى لي چۇنشيا

  ”مەن بيىل 80 جاسقا كەلدىم، ءساتى ءتۇسىپ جاڭا جۇڭگو قۇرىلعاندىعىنىڭ 70 جىلدىعىنا، شينجياڭنىڭ بەيبىت ازات بولعاندىعىنىڭ 70 جىلدىعىنا كۋا بولدىم، تۇرمىسىمىزدىڭ كۇن سايىن باقىتتى بولا تۇسكەنىنە كۋا بولدىم!“ 9 - ايدىڭ 15 - كۇنى كەلپىن اۋدانى گەزلىك قالاشىعى قالما قىستاعىندا شۋاقتى كۇن شۇعىلاسىن شاعىن شارۋا اۋلاسىنا توكتى، ۇستىنە اق جەيدە، قارا كۇرمە كيىپ ءوز ءۇيىنىڭ اۋلاسىندا تۇرعان ساقا پارتيا مۇشەسى راحمان تايىردىڭ رۋحى ەرەكشە كوتەرىڭكى كورىندى، كەۋدەسىنە پارتيا ىزناگىن ادەمىلەپ تاعىپتى.

  10 جىلدىڭ الدىن ەسكە الساق، 2009 - جىلى 9 - ايدىڭ 14 - كۇنگى «شينجياڭ گازەتى»نىڭ 1 - بەتىندە «ۇيعۇر ساقا پارتيا مۇشەسىنىڭ يدەيالىق مالىمەتى» تاقىرىبىندا ءبىر ماقالا جاريالانعان، ماقالاداعى باس كەيىپكەر راحمان ەدى. ول يدەيالىق مالىمەتىندە بىلاي دەپ جازعان: ”ءوز باسىم جاڭا، كونە ەكى قوعامدى باستان وتكەردىم، پارتيا مەن ۇكىمەتتىڭ كومەگىندە قىستاق تۇرعىندارىنىڭ كەدەيلىكتەن ارىلىپ باي تۇرمىسقا كەنەلگەنىن ءوز كوزىممەن كوردىم“. 10 جىلدان كەيىن قازىرگى جاعدايدى كورىپ، وتكەندى ەسكە العان قاريا اسەرلەنىپ: ”تۇرمىسىمىز تاعى دا تىڭ ساتىعا كوتەرىلدى!“، - دەدى.

  بۇل 80گە كەلگەن قاريانىڭ تەبىرەنىسى، ءتىپتى، شينجياڭنىڭ بەيبىت ازات بولعان 70 جىلدان بەرى كوپتى وتكەرگەن وراسان وزگەرىسىنىڭ ىقشام كورىنىسى. پارتيا ورتالىق كوميتەتىنىڭ ىقىلاستى قامقورلىعىندا، حالىق تۇرمىسىن جاقسارتۋ اياق الىسى شينجياڭنىڭ بايتاق دالاسىندا نىق قاداممەن العا ىلگەرىلەپ، تيانشاننىڭ وڭتۇستىگى مەن سولتۇستىگىندە ءار ۇلت حالقى الاڭسىز، شات - شادىمان تۇرمىس كەشىرگەن، جاراسىمدى، باقىتتى جاڭا كورىنىس جارىققا شىقتى.

■ ”باسپانادان ۋايىمداۋ“دان ”جايلى قونىس“قا دەيىن

  ”بۇرىن قىستاعىمىزداعى ۇيلەردىڭ ءبارى توپىراق كەرپىشتەن قالانعان، جەر سىلكىنىسى، تاسقىن سياقتى اپاتتار تۋىلعاندا ۇيلەر قۇلاپ قالاتىن. كەي ادامدار، اۋەلى، ’جەر كەپەدە‘ تۇراتىن“. راحمان يدەيالىق مالىمەتىندە وسىلاي سۋرەتتەگەن. ول بىلاي دەدى: كەيىن ۇكىمەت قوسىمشا قاراجات بەرىپ، قىستاق تۇرعىندارىنا سىلكىنىسكە ءتوزىمدى ۇيلەر، بەيقۇت ۇيلەر سالىپ بەردى، قىستاق تۇرعىندارى جەر سىلكىنىسىنەن ەندىگارى الاڭدامايتىن بولدى.

  2004 - جىلدان باستاپ، رايونىمىز جەر سىلكىنىسى كوپ تۋىلاتىن، ءجيى تۋىلاتىن وڭىرلەردە سىلكىنىسكە ءتوزىمدى بەيقۇت ءۇي ينجەنەرياسىن اتقاردى؛ 2010 - جىلدان بەرى، اۋىل - قىستاقتاردا بەيقۇت ءۇي قۇرىلىسىن، كوشپەندى مالشىلاردى وتىرىقتاندىرۋدى، قالا - قالاشىقتاردىڭ قامتاماسىز ەتۋ سيپاتتى بەيقۇت ءۇي ينجەنەريا قۇرىلىسىن باستادى. بۇكىل رايونىمىزدا 10 ميلليوننان استام قالا - اۋىل تۇرعىنى توپىراق كەرپىشتەن قالانعان حاۋىپتى، كونە ۇيلەرگە جانە لاشىقتى رايوندارعا قوش ايتىپ، كەڭ، جارىق جاڭا ۇيلەردە تۇردى.

  ”بەيقۇت ۇيدەن يگىلىكتەندىرگەن كوممۋنيستىك پارتيانى ۇمىتپايمىز“. راحماننىڭ ايتقانىنداي، ول تۇرعان قالما قىستاعىنداعى 205 وتباسى تۇگەلدەي بەيقۇت ۇيگە كوشىپ كىردى. بۇگىنگى كۇنى وڭتۇستىك شينجياڭنىڭ اۋىل - قىستاقتارىنا بارساڭىز، قىستاق تۇرعىندارىنىڭ بەيقۇت ۇيلەرىن اشەكەيلەپ، ءۇي ءىشىن سافا، تەلەۆيزور، كىرجۋعىش، سۋ قايناتقىش سياقتىلارمەن تولىق جابدىقتاعانىن كورەسىز. قىستاق تۇرعىندارى تاعى اۋلا شارۋاشىلىعىمەن اينالىسا باستادى، تەپ - تەگىس اسفالت جولدار ەسىك الدىنا دەيىن جاتقىزىلىپ، قىستاق تۇرعىندارىن سىرتقى دۇنيەمەن تىعىز بايلانىستىردى.

  قاشقار بايىرعى قالاسىن جاڭالاۋ − بەيقۇت ءۇي سالىپ حالىققا تيىمدىلىك جاساۋ ينجەنەرياسىنىڭ كورىكتى ءبىر كورىنىسى. 2010 - جىلى قاشقار بايىرعى قالاسىن جاڭالاۋ نىسانى اتقارىلدى، نەشە ميلليارد يۋان قارجى قوسىلعان وسى ۇلكەن ينجەنەريا ”ءبىر وتباسىنا ءبىر جوبا اتقارۋ، اۋەلگى ەكولوگياسىن ساقتاۋ“ سىندى جاڭالاۋ ۇستانىمىنا تاباندى بولدى. جاڭالانعاننان كەيىنگى قاشقار بايىرعى قالاسى ءبىرجولا وزگەرىپ، 50 مىڭ وتباسىنداعى 200 مىڭنان استام تۇرعىن ”جەل سوقسا قوقىر - قوقسىق ۇشىپ جۇرەتىن، لاس سۋ قاپتاپ جاتاتىن، سۋ قۇبىرى تامعا تارتىلاتىن“ ىڭعايسىز جاعدايعا تۇبەگەيلى قوش ايتىپ، سۋ، ەلەكتر، جىلۋمەن قامداۋ قۇرىلعىلارى كەمەلدەنگەن وسى زامانعى وركەنيەتتى تۇرمىس كەشىردى. جاڭالانعاننان كەيىنگى قاشقار بايىرعى قالاسى بۇل كۇندەرى مەملەكەتتىك 5A دارەجەلى كورىنىس وڭىرىنە اينالدى.

■ ”وقيتىن مەكتەپ بولماۋ“دان ”جاقسى مەكتەپتە وقۋ“عا دەيىن

  ”ازاتتىقتىڭ الدىندا قىستاعىمىزدىڭ وقۋ - اعارتۋى، نەگىزىنەن، اق قالعان، بۇكىل اۋىلدا ءجوندى مەكتەپ جوق، باسىم كوپ ادام حات تانىمايتىن، جازۋ جازا المايتىن، قاعازعا بىردەڭەلەردى سىزىپ نەمەسە دوڭگەلەك سىزىپ بايلانىس جاسايتىن“. راحماننىڭ جازعانىنداي، ازاتتىقتىڭ الدىندا شينجياڭنىڭ وقۋ - اعارتۋ ىستەرى وتە مەشەۋ، ساۋاتسىزدىق سالىستىرماسى %90تەن اسقان.

  جاڭا جۇڭگو قۇرىلعاننان كەيىن، شينجياڭنىڭ وقۋ - اعارتۋ ىستەرى تاريحي سيپاتتى العا باستى.

  1988 - جىلى «شينجياڭ ۇيعۇر اۆتونوميالى رايونىنىڭ مىندەتتى وقۋ - اعارتۋدى اتقارۋ ءادىسى» شىعارىلدى، بۇكىل رايونىمىزدىڭ مىندەتتى وقۋ - اعارتۋى نەگىزدەلەتىن زاڭى بار بولۋداي جولعا ءتۇستى. 2000 - جىلدان باستاپ، مەملەكەت ىشكى وڭىرلەردىڭ ەكونوميكاسى دامىعان ءىشىنارا قالالارىندا شينجياڭ تولىق ورتا مەكتەپ كلاسىن اشتى، 2011 - جىلى شينجياڭ مىندەتتى وقۋ - اعارتۋدى تەپە - تەڭ دامىتۋ قىزمەتىن باستادى.

  پارتيا 18 - قۇرىلتايىنان بەرى، رايونىمىز مەكتەپكە دەيىنگى تاربيەدەن جوعارى وقۋ - اعارتۋعا دەيىنگى وقۋشىلارعا قارجىلاي كومەكتەسۋدىڭ ءبىرشاما كەمەلدەنگەن ساياساتتىق جۇيەسىن ورناتتى، 2018 - جىلى وقۋشىلارعا قارجىلاي كومەكتەسۋ بويىنشا 5 ميلليارد 854 ميلليون يۋان قارجى بوساتىپ، سان مىڭداعان كەدەي وقۋشىنىڭ وقۋىن تامامداۋىنا كومەكتەستى.

  وقۋ - اعارتۋ ارقىلى حالىققا تيىمدىلىك جاساۋ ينجەنەرياسى ارت - ارتىنان اتقارىلىپ، رايونىمىزدىڭ وقۋ - اعارتۋ ىستەرىندە جاندى ومىرشەڭدىك قاۋلاتتى. 1949 - جىلى شينجياڭداعى باستاۋىش مەكتەپكە تۇسۋگە ءتيىستى وقۋ جاسىنداعى بالالاردىڭ مەكتەپكە ءتۇسۋ سالىستىرماسى نەبارى %19.8 عانا ەدى، 2018 - جىلى باستاۋىش مەكتەپكە ءتۇسۋ سالىستىرماسى %99.94كە، ورتالاۋ مەكتەپكە ءتۇسۋ سالىستىرماسى %99.32كە جەتتى. بۇكىل رايونىمىزداعى ورتا دارەجەلى كاسىپتىك مەكتەپتەردە وقيتىن وقۋشىلار 2000 نەشە ادامنان 253 مىڭ 700 ادامعا ارتتى.

  ءبىلىم الۋدان يگىلىكتەندىرۋ بىرتىندەپ ىسكە اسىپ، ءاربىر بالانىڭ ارمانىنا قانات ءبىتىردى. بيىل 12 جاستاعى گۇلاشار جۇما اقتاۋ اۋدانى شياۋبايياڭ باستاۋىش مەكتەبىنىڭ 6 - جىلدىعىندا وقيدى، ونىڭ ارمانى ”ۇشاقپەن دۇنيە ءجۇزىن ساياحاتتاۋ“ ەدى. ول سياقتى شەت - شالعاي تاۋلى وڭىردەگى 3000نان استام ەگىنشى - مالشىلاردىڭ بالالارى كوپ مەديالى وقىتۋ بولمەسى، ەلەكتروندىق كۇي ساندىق وقىتۋ بولمەسى، سۋلياۋ جارىس جولى سياقتى وسىزاماندانعان قۇرىلعىلارى تولىق شياۋبايياڭ باستاۋىش مەكتەبىندە وقيدى. ”بالالار جاقسى تاربيە الىپ، ءوز تاعدىرىن وزگەرتۋ ورايىنا يە بولدى، كەدەيلىكتىڭ ۇرپاقتان - ۇرپاققا جالعاسۋى توقتادى“، - دەدى وسى مەكتەپتىڭ وقىتۋشىسى ەسەنالى وبۇلقاسىم.

■ ”جۇمىسسىز قالۋ“دان جوعارى ساپالى جۇمىستانۋعا دەيىن

  ”2 جىلدىڭ الدىندا مەن ءبىر شارۋا بولاتىنمىن، قازىر كاسىپ سالاسى جۇمىسشىسى بولىپ، تۇراقتى قىزمەتىم بار بولدى، ايىنا نەشە مىڭ يۋان ەڭبەكاقى الامىن، مۇنىڭ بارلىعى پارتيانىڭ جاقسى ساياساتىنىڭ ارقاسىندا كەلگەن“، - دەدى 9 - ايدىڭ 16 - كۇنى شينجياڭ شىڭشيۇڭ حلورلى ءسىلتى شەكتى سەرىكتەستىگى پوليمەرلەۋ سەحىنىڭ ارالاپ تەكسەرۋ جۇمىسشىسى ءماردان امەت.

  ازاتتىقتان ىلگەرى شينجياڭنىڭ ەكونوميكاسى ەگىن، مال شارۋاشىلىعىن نەگىزگى تۇلعا ەتكەن تابيعي ەكونوميكا، ءوندىرىس كۇش دەڭگەيى تومەن، ءوندىرىس ءتاسىلى مەشەۋ، حالىقتىڭ تۇرمىسى ەرەكشە كەدەي بولاتىن. ادامداردىڭ ىستەيتىن جۇمىسى بولۋىنا، تاباتىن اقشاسى بولۋىنا، كەدەيلىكتەن ارىلا الۋىنا مۇمكىندىك جاساۋدا جۇمىستاندىرۋدى جەبەۋ ماڭىزدى ءتۇيىن سانالادى.

  ۇزاق ۋاقىتتان بەرى، اۆتونوميالى رايوندىق پارتكوم مەن ۇكىمەت جۇمىستاندىرۋدى جەبەۋدى ەلەۋلى حالىق تۇرمىسى ينجەنەرياسى ەتىپ، جۇمىستانۋدا قيىنشىلىعى بار ادامداردىڭ جۇمىستانۋىنا كومەكتەسۋدىڭ باياندى مەحانيزمىن ورناتىپ، جوعارى مەكتەپتەردەن وقۋ تاۋىسقان وقۋشىلاردىڭ جۇمىستانۋىنا، شارۋاشىلىق قۇرۋىنا بەلسەنە جەتەكشىلىك ەتىپ، ۇكىمەتتىڭ جەتەكشىلىگىن نەگىز ەتكەن ۇيىمدى تۇردە باسقا سالاعا ويىستىرىپ جۇمىستاندىرۋدىڭ جاڭا مەحانيزمى سياقتىلاردى ورناتىپ، تۇرلىشە شارانى قاتار قولدانۋ ارقىلى قالا - قالاشىقتاعى جۇمىستانۋدا قيىنشىلىعى بار ادامدار، جوعارى مەكتەپتەردەن وقۋ تاۋىسقان وقۋشىلار، اۋىل - قىستاقتارداعى ارتىق ەڭبەككۇشتەر سياقتى ءتۇرلى قاۋىمنىڭ جۇمىستانۋدى، شارۋاشىلىق قۇرۋدى جۇزەگە اسىرۋىن جەبەدى.

  راحمان ساۋساقپەن ساناپ تۇرىپ تىلشىگە بىلاي دەدى: مەنىڭ ەكى ۇلىم جۇك اۆتوكولىك شوفەرى، اربىرەۋى ايىنا 10 مىڭ يۋانعا جۋىق كىرىس كىرگىزەدى؛ قىزىم جەرگىلىكتى ۇكىمەتتىڭ كومەگىندە، الەۋمەتتىك يگىلىك سيپاتتى جۇمىس ورنىنا ورنالاستى، اۋدان قالاشىعىندا قورشاعان ورتا تازالىقشىسى بولىپ ىستەيدى؛ نەمەرەلەرىمنىڭ وقۋ وقىپ جاتقاندارىنان باسقالارى تۇگەل جۇمىستانىپ بولدى. ”بالالاردىڭ بارلىعىندا قىزمەت بار، كىرىستەرى تۇراقتى، الاڭداۋىمنىڭ قاجەتى جوق، ۇنەمى ماعان اقشا بەرىپ تە تۇرادى“، - دەدى راحماننىڭ جۇزىنەن ريزالىق ءبىلىنىپ.

  2018 - جىلى تۇتاس رايونىمىزدىڭ قالا - قالاشىق تۇرعىندارىنىڭ ۇستاۋعا بولاتىن جان باسىندىق كىرىسى 32 مىڭ 764 يۋانعا جەتىپ، 1978 - جىلدان بەرى جىل سايىن ورتاشا ەسەپپەن %12.3 ارتقان؛ اۋىل - قىستاق تۇرعىندارىنىڭ جان باسىندىق ورتاشا تازا كىرىسى 11 مىڭ 975 يۋان بولىپ، 1978 - جىلدان بەرى جىل سايىن ورتاشا ەسەپپەن %12.2 ارتقان. مەملەكەتتىڭ حالىققا تيىمدىلىك جاساۋداي كوكتەم سامالىنىڭ ارقاسىندا، شينجياڭداعى ءار ۇلت بۇقاراسى قۇلشىنا كۇرەس جاساپ، قاجىرلىلىعى مەن ماڭداي تەرى ارقىلى تاماشا تۇرمىسقا جەتەتىن سارا جول اشتى.

■ ”شيپاگەر، ءدارى - دارمەك تاپشى بولۋ“دان ”سالاماتتى شينجياڭ“عا دەيىن

  تۇتاس حالىقتىڭ سالاماتتىعى بولمايىنشا، جاپپاي دوڭگەلەڭ داۋلەتتىلىك بولمايدى.

  ازاتتىقتان ىلگەرى شينجياڭنىڭ ەمدەۋ - دەنساۋلىق ساقتاۋ دەڭگەيى تومەن، شيپاگەر، ءدارى - دارمەك تاپشى، جەرگىلىكتى اۋرۋ، جۇقپالى اۋرۋ ءجيى تۋىلاتىن، ادامداردىڭ مەجەدەگى ورتاشا عۇمىرى 30 جاسقا دا جەتپەيتىن.

  حالىق بۇقاراسىنىڭ اۋرۋىن ەمدەتە الۋىنا، اۋرۋىن ەمدەتۋگە شاماسى جەتۋىنە، اۋرۋىن ەمدەتىپ ساۋىعۋىنا مۇمكىندىك جاساۋ − حالىق تۇرمىسىنىڭ نەگىزىن بەكەمدەۋدەگى ماڭىزدى ءتۇيىن سانالادى. 70 جىلدان بەرى، شينجياڭ ەمدەۋ ارقىلى حالىققا تيىمدىلىك جاساۋدى ماڭىزدى حالىق تۇرمىسى ينجەنەرياسى جانە حالىق قالاۋى ينجەنەرياسى رەتىندە يگەرىپ، قارجى ۇسىنىلىم سەرپىنىن جىل سايىن ارتتىرىپ، ءبىرشاما كەمەلدى اۋدان، اۋىل، قىستاق 3 دارەجەلى ەمدەۋ، الدىن الۋ، دەنساۋلىق ساقتاۋ جۇيەسىن ورناتىپ، ەمدەۋ تەحنيكاسى، ەمدەۋ ساپاسى ورنىقتى جوعارىلادى.

  ”ات جالىنداعى شيپاگەر“دەن وتباسى شيپاگەرىمەن كەلىسىم جاساسۋ بويىنشا قىزمەت وتەۋگە دەيىن، ادامداردىڭ اۋرۋىن كورسەتۋى بارعان سايىن قولايلىلاستى؛ ”جاڭاشا اۋىل - قىستاق سەلبەسىپ ەمدەلۋ“دەن قالا، اۋىل تۇرعىندارىنىڭ نەگىزدىك ەمدەلۋ قامسىزداندىرۋى تۇزىمىنە دەيىن، ادامداردىڭ ەمدەلۋ اقىسىن ۇكىمەتتىك ەسەپتەن كوتەرۋ سالىستىرماسى بارعان سايىن جوعارىلادى؛ مەملەكەتتىڭ نەگىزدىك ءدارى - دارمەك ءتۇزىمىن اتقارۋدان ۇكىمەت اشقان شيپاحانالاردىڭ ءدارى - دارمەك ۇلەس اقىسىن جالپى بەتتىك كۇشىنەن قالدىرۋعا دەيىن، ادامداردىڭ ەمدەلۋگە جۇمسايتىن اقشاسى بارعان سايىن ازايدى؛ الىس ارالىقتان ەمدەۋدەن وڭىرلىك ەمدەۋ بىرىككەن تۇلعاسى قۇرىلىسىنا دەيىن، نەگىزگى ساتىداعى بۇقارا ەمدەلۋ ءۇشىن ەندىگارى الىسقا شاپقىلامايتىن بولدى.

  2016 - جىلدان باستاپ، رايونىمىز جىلىنا ءبىر رەت جالپى حالىقتىڭ دەنساۋلىعىن تەكسەرۋدى ورىستەتتى، قازىرگە دەيىن جالپى 4 ميلليارد 68 ميلليون يۋان قارجى ءبولىپ، جيىنى 53 ميلليون 830 مىڭ ادام - رەت دەنساۋلىق تەكسەرىپ، نوپوستاعى جان سانىن تەگىس قامتۋدى نەگىزىنەن جۇزەگە اسىردى. قازىر جالپى حالىقتىڭ دەنساۋلىعىن تەكسەرۋ − ”ەمدەۋ ارقىلى حالىققا تيىمدىلىك جاساۋ“دىڭ جانە ”سالاماتتى شينجياڭ“نىڭ بوگەنايى بولەك بەلگىسىنە اينالدى.

  ”جىلىنا ءبىر رەت دەنساۋلىق تەكسەرۋدەن يگىلىكتەنە الامىن، ناۋقاستانساق ەرتە بايقاپ، ەرتە ەمدەيمىز، اقشانى دا از جۇمسايمىز، بۇل حالىققا تيىمدىلىك جاسايتىن جاقسى ساياسات“. دەنساۋلىق تەكسەرۋ اۋىزعا الىنعاندا، مارالباسى اۋدانى سەرىقبۇيا قالاشىعى بوزارىق قىستاعىنىڭ تۇرعىنى تۇرسىن قادىر اۋىز جاپپاي ماقتاپ.

  وسىمەن ءبىر ۋاقىتتا، رايونىمىز قالا، اۋىلدى ءبىر تۇتاس جوسپارلاعان، بۇكىل حالىقتى قامتىعان قوعامدىق قامتاماسىزداندىرۋ جۇيەسىن ورناتتى، قوعامدىق قامتاماسىزداندىرۋدا قامتاماسىزداندىرىلۋعا تيىستىلەرى تۇگەل قامتاماسىزداندىرىلىپ، قالا - اۋىلدىڭ ەڭ تومەنگى تۇرمىستى قامتاماسىزداندىرۋ ءتۇزىمى جالپى بەتتىك ورناتىلىپ، قوعامدىق قۇتقارۋ - كومەكتەسۋ جۇيەسى ۇزدىكسىز كەمەلدەندىرىلدى. ”قارتتاردى كۇتىمدەۋ قاراجاتى ءۇرتىس 15 جىل جوعارىلاتىلدى، مەنىڭ زەينەتاقىم ايىنا نەشە 100 يۋاننان قازىرگى 3000 نەشە يۋانعا جوعارىلادى، قارتتاردى كۇتىمدەۋگە سۇيەنىش بار بولعاندىقتان، تۇرمىسىم بارعان سايىن جايلى بولىپ بارادى“، - دەدى ءۇرىمجى قالاسىنىڭ كاسىپورىننان زەينەتكە شىققان قىزمەتكەرى ۋاڭ فۋليڭ قۋانىشپەن.

  مەكتەپكە دەيىنگى تاربيەدەن، مەكتەپتەگى تاربيەدەن، ەڭبەكاقىدان، ەمدەلۋدەن يگىلىكتەندىرۋ... شينجياڭ ۇزدىكسىز نەشە جىل بويى الەۋمەتتىك مەجە ەسەپ شىعىسىنىڭ %70تەن استامىن حالىق تۇرمىسىن قامتاماسىزداندىرۋعا جانە جاقسارتۋعا جۇمساپ، ناقتى جەتىستىكتەرگە قول جەتكىزدى.

  حالىق تۇرمىسىنىڭ جىلى شۋاعى سان مىڭداعان وتباسىن مەيىرگە بولەدى. پارتيا ورتالىق كوميتەتىنىڭ ىقىلاستى قامقورلىعىندا، جاڭا تاريحي باستامادا تۇرعان شينجياڭداعى ءار ۇلت بۇقاراسىنىڭ تابىس سەزىمى، باقىت سەزىمى، حاۋىپسىزدىك سەزىمى ۇزدىكسىز كۇشەيىپ، بولاشاقتاعى تۇرمىسقا اناعۇرلىم زور ءۇمىت ارتتى.

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.