چىن چۋانگو، شوكىرات زاكىر، شاۋكەت يمىن، نۇرلان ءابىلماجىن، سۇن جينلۇڭ، لي پىڭشين قاتارلىلار قاتىناستى
9 - ايدىڭ 30 - كۇنى قۇربانداردى ەسكە الۋ كۇنى حالىق قاھارماندارىنا ىززەتپەن گۇل شارباق قويۋ سالتى ءۇرىمجى حالىق الاڭىندا سالتاناتپەن وتكىزىلدى. اۆتونوميالى رايوننىڭ پارتيا، ۇكىمەت، ارميا جانە شينجياڭ ءوندىرىس - قۇرىلىس بيڭتۋانىنىڭ باسشىلارى بۇكىل رايونىمىزداعى ءار ۇلت، ءار سالا كادرلار مەن بۇقارانىڭ ۋاكىلدەرىمەن بىرگە حالىق قاھارماندارىنا ىززەتپەن گۇل شارباق قويدى. سۋرەتتى ءتىلشى سۇي جىجيان تۇسىرگەن
تىلشىلەر ياۋ تۇڭ، ۋاڭ شيڭرۇي 9 - ايدىڭ 30 - كۇنى ۇرىمجىدەن حابارلايدى. گۇل ۇسىنىپ، ەرجۇرەك قۇرباندارعا ازا تۇتتى، ەسكەرتكىش ورناتىپ، ادال قاھارماندارعا قۇرمەت ءبىلدىردى. 9 - ايدىڭ 30 - كۇنى تۇستەن بۇرىن قۇربانداردى ەسكە الۋ كۇنى حالىق قاھارماندارىنا ىززەتپەن گۇل شارباق قويۋ سالتى ءۇرىمجى حالىق الاڭىندا سالتاناتپەن وتكىزىلدى. اۆتونوميالى رايوننىڭ پارتيا، ۇكىمەت، ارميا جانە شينجياڭ ءوندىرىس - قۇرىلىس بيڭتۋانىنىڭ باسشىلارى بۇكىل رايونداعى ءار ۇلت، ءار سالا كادرلاردىڭ، بۇقارانىڭ ۋاكىلدەرىمەن بىرگە حالىق قاھارماندارىنا ىززەتپەن گۇل شارباق قويىپ، توڭكەرىستىك ارداگەر قۇربانداردىڭ ۇشان - تەڭىز ۇلەسى مەن ۇلى ەڭبەگىن تەرەڭ سەزىممەن ەسكە الىپ، بۇكىل رايونداعى ءار ۇلت كادرلاردىڭ، بۇقارانىڭ ارداگەر قۇربانداردىڭ مۇراتىنا مۇراگەر بولىپ، توڭكەرىستىك رۋحتى اسقاقتاتىپ، اۋەلگى ماقساتتى، بورىشتى ەستە بەرىك ساقتاپ، شي جينپيڭ جولداستى ۇيتقى ەتكەن پارتيا ورتالىق كوميتەتى نۇسقاعان دۇرىس بەتالىستى ەش بۇلجىماستان بويلاپ ەرلىكپەن العا تارتۋ، جۇڭگوشا سوتسياليستىك شينجياڭدى قۇلشىنا قۇرۋ مىزعىماس بەكىمى مەن سەنىمىن تولىق بەينەلەدى.
ءۇرىمجى حالىق الاڭى اسقاق تا ايبىندى، بەس جۇلدىزدى نارت قىزىل تۋ جەلبىرەپ، جۇڭگو حالىق ازاتتىق ارمياسىنىڭ شينجياڭعا كىرۋ ەسكەرتكىشى بيىككە بوي سوزىپ قاسقايىپ تۇر. چىن چۋانگو، شوكىرات زاكىر، شاۋكەت يمىن، نۇرلان ءابىلماجىن، سۇن جينلۇڭ، لي پىڭشين، ليۋ ۋانلۇڭ، لي ۋي، ەركىن تۇنياز، ۋاڭ جۇنجىڭ، تيان ۋىن، جي جىڭ، سارقىت اقان، ياڭ شين، جاڭ چۇنلين قاتارلىلار سالتقا قاتىناستى. اۆتونوميالى رايوندىق پارتكومنىڭ تۇراقتى مۇشەسى، ءۇرىمجى قالالىق پارتكومنىڭ شۋجيى شۇي حايرۇڭ سالتتى باسقاردى.
ساعات 9دا حالىق قاھارماندارىنا ىززەتپەن گۇل شارباق قويۋ سالتى رەسمي باستالدى. ايبىندى دا اسقاق ”ەرىكتىلەر مارىشى“ ورىندالعاندا، بۇكىل الاڭداعىلار بىركەلكى داۋىسپەن جۇڭحۋا حالىق رەسپۋبليكاسىنىڭ مەملەكەت ءانىن اسقاقتا شىرقادى، شارىقتاعان اسەرلى ىرعاق الاڭ كەڭىستىگىن كەرنەدى.
مەملەكەت ءانى شىرقالىپ بولعان سوڭ، بۇكىل الاڭداعىلار ىززەت - قۇرمەتپەن تۇرىپ، شينجياڭنىڭ ازاتتىعى مەن قۇرىلىس ىستەرى ءۇشىن ەرلىكپەن جانىن قيعان قۇرباندارعا، بولشەكتەۋشىلىككە قارسى تۇرۋ كۇرەسى مەن لاڭكەستىككە قارسى تۇرىپ، ورنىقتىلىقتى قورعاۋ كۇرەسىندە ەرلىكپەن جانىن قيعان قۇرباندارعا ءۇنسىز ازا ءبىلدىردى.
ءۇنسىز ازا ءبىلدىرۋ اياقتالعاننان كەيىن، ءار ۇلت جاس وسپىرىمدەر ەسكەرتكىشكە قاراپ تۇرىپ، «ءبىز كوممۋنيزم ىستەرىنىڭ ءىزباسارلارىمىز»دى اسقاقتاتا شىرقادى ءارى پيونەرلىك سالەم بەردى.
شارشى توپتىڭ الدىنا اۆتونوميالى رايوندىق پارتكوم، اۆتونوميالى رايوندىق حالىق قۇرىلتايى تۇراقتى كوميتەتى، اۆتونوميالى رايوندىق حالىق ۇكىمەتى، اۆتونوميالى رايوندىق ساياسي كەڭەس، شينجياڭ اسكەري رايونى، شينجياڭ ءوندىرىس - قۇرىلىس بيڭتۋانى، دەموكراتيالىق پارتيا - توپتار، اۆتونوميالى رايوندىق ساۋدا - ونەركاسىپشىلەر بىرلەستىگى جانە پارتيادا، توپتا جوق قايراتكەرلەر، ءۇرىمجى قالاسىنداعى ءار ۇلت، ءار سالا بۇقاراسى، جۇڭگو پيونەرلەر وتريادى اتىنان ۇسىنىلعان 9 گۇل شارباق رەتىمەن قويىلدى. گۇل شارباقتاردىڭ قىزىل تورعىن لەنتاسىنا التىن تۇسپەن جازىلعان ”حالىق قاھارماندارى ماڭگى جاسايدى“ دەگەن سوزدەر ەرەكشە جارقىرايدى.
تەرەڭ سەزىمگە تولى گۇل قويۋ مۋزيكاسىنا ىلەسە، 18 قۇرمەت قاراۋىلى گۇل شارباقتاردى ورنىقتى كوتەرىپ، ەسكەرتكىشكە قاراي باياۋ قادام تاستاپ، گۇل شارباقتاردى ەسكەرتكىشتىڭ تۇعىرىنا اكەلىپ قويدى.
چىن چۋانگو، شوكىرات زاكىر، شاۋكەت يمىن، نۇرلان ءابىلماجىن، سۇن جينلۇڭ، لي پىڭشين، ليۋ ۋانلۇڭ قاتارلىلار وسىدان سوڭ ەسكەرتكىش تۇعىرىنا شىعىپ، گۇل شارباقتاردىڭ الدىندا كوز الماي قاراپ تۇردى، گۇل شارباقتىڭ تورعىن لەنتاسىن ىجداعاتپەن رەتتەدى. ىلە - شالا، اۆتونوميالى رايوننىڭ پارتيا، ۇكىمەت، ارميا جانە شينجياڭ ءوندىرىس - قۇرىلىس بيڭتۋانىنىڭ باسشىلارى، ءار ۇلت، ءار سالا كادرلار مەن بۇقارا باياۋ قاداممەن اينالىپ، جۇڭگو حالىق ازاتتىق ارمياسىنىڭ شينجياڭعا كىرۋ ەسكەرتكىشىنە قۇرمەتپەن قارادى.
ءار ۇلت، ءار سالا كادرلار مەن بۇقارا مىنانى ءبىلدىردى: بۇگىنگى باقىتتى تۇرمىس سانسىز توڭكەرىستىك ارداگەر قۇربانداردىڭ ىستىق قانىنىڭ جانە ءومىرىنىڭ بوداۋىمەن كەلگەن، ەرجۇرەك قۇربانداردىڭ ۇلى ەڭبەگىن، ءسوز جوق، ەستە بەرىك ساقتاپ، توڭكەرىستىك رۋحتى اسقاقتاتىپ، ۇلى كۇش - قۋاتتان ءنار الىپ، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە ونان ارى تىعىز ىنتىماقتاسىپ، شي جينپيڭنىڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، جاڭا جۇڭگو قۇرىلعاندىعىنىڭ 70 جىلدىعىن قۇتتىقتاۋدى قوزعاۋشى كۇش ەتىپ، جاڭا داۋىردەگى پارتيانىڭ شينجياڭدى جونگە سالۋ جالپى جوباسىن، اسىرەسە، قوعام ورنىقتىلىعى مەن باياندى تىنىشتىق باس نىساناسىن ىشكەرىلەي دايەكتىلەندىرىپ، تياناقتاندىرىپ، ءبىر نيەتپەن ىنتىماقتاسىپ، تىڭعىلىقتى قىزمەت ىستەپ، ءاربىر قاراپايىم ءىستى تاباندىلىقپەن جاقسى ىستەپ، ءىس جۇزىندىك ارەكەتىمىز ارقىلى ”قوس 100 جىلدىق“ كۇرەس نىساناسىن جۇزەگە اسىرۋعا، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋعا كۇش - قۋاتىمىزدى ارنايمىز.
اۆتونوميالى رايوندىق حالىق قۇرىلتايىنىڭ، ۇكىمەتتىڭ، ساياسي كەڭەستىڭ، شينجياڭ اسكەري رايونىنىڭ، شينجياڭ ءوندىرىس - قۇرىلىس بيڭتۋانىنىڭ باسشىلىق القاسىنىڭ مۇشەلەرى، اۆتونوميالى رايوندىق جوعارى حالىق سوتى مەكەمەسىنىڭ، اۆتونوميالى رايوندىق حالىق پروكۋراتۋراسىنىڭ، قارۋلى ساقشى شينجياڭ باس اترەتىنىڭ نەگىزگى جاۋاپتى جولداستارى قاتارلىلار حالىق قاھارماندارىنا ىززەتپەن گۇل شارباق قويۋ سالتىنا قاتىناستى.
