شينحۋا اگەنتتىگىنىڭ 10 - ايدىڭ 12 - كۇنى ءۇندىستاننىڭ چەننايىنان بەرگەن حابارى (تىلشىلەر چىن جى، لي جۇڭفا، لۇي چۋانجۇڭ). مەملەكەت ءتوراعاسى شي جينپيڭ 10 - ايدىڭ 12 - كۇنى چەننايدا ءۇندىستاننىڭ زۇڭليى موديمەن جالعاستى ءديدارلاستى، ەكى ەل باسشىلارى دوس، كوڭىلدى رايدا جۇڭگو مەن ءۇندىستاننىڭ قارىم - قاتىناسى جانە بىرگە كوڭىل ءبولىپ وتىرعان كەلەلى حالىقارالىق جانە وڭىرلىك ماسەلەلەر جونىندە بۇكپەسىز، تەرەڭ پىكىر اۋىستىردى.
شي جينپيڭ بىلاي دەپ اتاپ كورسەتتى: بىلتىر زۇڭلي مىرزا ەكەۋىمىز ۋحاندا تابىسپەن ءديدارلاسقاننان بەرى، جۇڭگو - ءۇندىستان قارىم - قاتىناسى اقاۋسىز، ورنىقتى دامۋدىڭ جاڭا كەزەڭىنە ءوتىپ، ءديدارلاسۋدىڭ بەلسەندى اسەرى ۇزدىكسىز جارىققا شىقتى. جۇڭگو مەن ءۇندىستان ءوزارا ماڭىزدى كورشى مەملەكەتتەر، حالىق سانى ءبىر ميللياردتان اساتىن 2 ءىرى مەملەكەت تە وسى ەكى مەملەكەت. جۇڭگو - ءۇندىستان قارىم - قاتىناسىن ويداعىداي قورعاۋ، ويداعىداي دامىتۋ − جۇڭگونىڭ مىزعىماس ساياساتى. قازىرگى حالىقارالىق جاعدايدا، جۇڭگو مەن ءۇندىستان دۇنيە ءجۇزىنىڭ ورنىقتىلىعىن قورعاۋ جانە دامۋدى ىلگەرىلەتۋ جاعىندا بارعان سايىن ماڭىزدى جاۋاپكەرشىلىك ارقالاۋدا. الداعى بىرنەشە جىل جۇڭگو مەن ءۇندىستاننىڭ ۇلتتىڭ گۇلدەنۋىن جۇزەگە اسىرۋىنداعى شەشۋشى مەزگىل، سونداي - اق جۇڭگو - ءۇندىستان قارىم - قاتىناسى دامۋىنىڭ شەشۋشى مەزگىلى سانالادى. ءبىز جۇڭگو - ءۇندىستان قارىم - قاتىناسىنىڭ باعدارىن مەڭگەرىپ، باعىتىن ايقىنداپ، ستراتەگيالىق بيىكتەن جانە ۇزاق بولاشاقتىق تۇرعىدان جۇڭگو - ءۇندىستان قارىم - قاتىناسىنىڭ عاسىرلىق ۇلى جوباسىن جوسپارلاپ، جۇڭگو - ءۇندىستان قارىم - قاتىناسىنىڭ دامۋىنا قۋاتتى ىشكى قوزعاۋشى كۇش ۇستەپ، قول ۇستاسا وتىرىپ جۇڭگو مەن ءۇندىستان سىندى 2 ۇلكەن وركەنيەتتىڭ ۇلى گۇلدەنۋىن جۇزەگە اسىرۋىمىز كەرەك.
شي جينپيڭ بىرنەشە ۇسىنىس ورتاعا قويدى:
ءبىرىنشى، ءبىر - ءبىرىنىڭ دامۋىنا دۇرىس مامىلە جاساپ، ستراتەگيالىق ءوزارا سەنىمدىلىكتى نىعايتۋ. مەيلى قايسى تۇرعىدان الىپ قاراساق تا جۇڭگو مەن ءۇندىستاننىڭ ەكەۋى دە جاراسىمدى قاتار ءومىر سۇرەتىن جاقسى كورشى، قول ۇستاسا العا باساتىن جاقسى سەرىك بولۋعا ءتيىس. ”ايداھار مەن ءپىلدىڭ قاتار بيلەۋى“ن جۇزەگە اسىرۋ جۇڭگو مەن ءۇندىستاننىڭ بىردەن - ءبىر دۇرىس تالعامى، بۇل ەكى ەل مەن ەكى ەل حالقىنىڭ ءتۇبىرلى مۇددەسىنە ۇيلەسەدى. ەكى ەل كورشىلەس ەكى ءىرى ەلدىڭ دوستىق سەلبەستىگىنىڭ داڭعىل جولىمەن ءجۇرۋى ءتيىس ءارى بۇعان تولىق مۇمكىندىك تە بار. ەكى ەل اراسىنداعى الاۋىزدىققا دۇرىس مامىلە جاساپ، ونىڭ ەكى ەل سەلبەستىگىنىڭ كەلەلى جاعدايىن سولعىنداتۋىنا جول بەرمەۋ، سونىمەن قاتار، پىكىرلەسۋ ارقىلى بىرتىندەپ تۇسىنىستىككە ۇمتىلىپ، الاۋىزدىقتاردى ۇزدىكسىز جويۋ كەرەك. جۇڭگو جاق ءوزىن جاقسى دامىتۋدى ءۇمىت ەتەدى، سونىمەن بىرگە ءۇندىستاننىڭ دا جاقسى دامۋىن ءۇمىت ەتەدى. جۇڭگو مەن ءۇندىستان ءبىر - ءبىرىن تابىسقا جەتكىزىپ، ءوزارا ”ساۋلە شاشۋى“ كەرەك.
ەكىنشى، ستراتەگيالىق پىكىرلەسۋدى دەر كەزىندە، ءونىمدى ورىستەتىپ، ءوزارا ءتۇسىنىسۋ مەن سەلبەستىكتى نىعايتىپ، ەكى ەل قارىم - قاتىناسى دامۋىنىڭ ۇلكەن بەتالىسىن مىقتى يگەرۋ. دوستىق پەن سەلبەستىككە نازاردى شوعىرلاندىرىپ، كۇدىكتەنۋ مەن الاڭداۋشىلىقتى جويىپ، الاۋىزدىقتار مەن سەزىمتال ماسەلەلەردى لايىقتى ءبىر جاقتى ەتۋ كەرەك. ساياسي جەتەكشى پرينسيپ كەلىسىمى بويىنشا، شەكارا ماسەلەسىن شەشۋدىڭ ءادىل، ۇيلەسىمدى جانە ەكى جاق تا قابىلداي الاتىن جوباسىن قاراستىرۋ كەرەك. ءبىر - ءبىرىنىڭ وزەكتى مۇددەسىنە ساياتىن ماسەلەلەردى بايىپپەن ءبىر جاقتى ەتۋ كەرەك. قازىرشە شەشىلمەيتىن ماسەلەلەردى لايىقتى مەڭگەرۋ قاجەت.
ءۇشىنشى، اسكەري ىستەر حاۋىپسىزدىگى اياسىنداعى بارىس - كەلىس پەن سەلبەستىك دەڭگەيىن شىنايى جوعارىلاتۋ. ەكى ارميا قارىم - قاتىناسىنىڭ سەنىمدىلىكتى ارتتىراتىن، كۇدىك - كۇماننان ارىلاتىن، دوستىق سەلبەستىك جاسايتىن دۇرىس بەتالىسپەن دامۋىن ىلگەرىلەتىپ، كاسىپتىك سەلبەستىك، بىرلەسكەن مانەۆر، بىرلەسكەن جاتتىعۋ سياقتى قيمىلداردى ويداعىداي ورىستەتىپ، ەكى ارميانىڭ ءوزارا سەنىمىن ۇزدىكسىز نىعايتىپ، زاڭ اتقارۋ جانە حاۋىپسىزدىك تاراۋلارىنىڭ سەلبەستىگىن كۇشەيتىپ، ءوڭىردىڭ حاۋىپسىزدىگى مەن ورنىقتىلىعىن قورعاۋ كەرەك.
ءتورتىنشى، ناقتى سەلبەستىكتى تەرەڭدەتىپ، مۇددە دانەكەرىن بەكەمدەۋ. ەكونوميكا - ساۋدا جونىندەگى جوعارى دارەجەلىلەر تىلدەسۋ مەحانيزمىن ورناتۋدى وراي ەتىپ، ەكى ەلدىڭ ەكونوميكالىق دامۋ ستراتەگيالارىن ءتۇيىستىرۋدى كۇشەيتىپ، جاساۋ كاسىبىندە سەرىكتەستىك قارىم - قاتىناس ورناتۋدى تالقىلاۋ كەرەك. ءۇندىستاننىڭ ءدارى - دارمەك كاسىپورىندارى مەن ينفورماتسيا تەحنيكاسى كاسىپورىندارىنىڭ جۇڭگوعا كەلىپ قارجى قوسۋىن، سەلبەستىك جاساۋىن قارسى الامىز.
بەسىنشى، گۋمانيتارلىق اۋىس - كۇيىستى بايىتىپ، دوستىق نەگىزىن بەكەمدەۋ. ءبىز كەلەر جىلعى ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعىن قۇتتىقتاۋ قيمىلدارىن جانە ”جۇڭگو - ءۇندىستان گۋمانيتارلىق اۋىس - كۇيىس جىلى“ قيمىلىن ويداعىداي وتكىزۋىمىز كەرەك. جۇڭگونىڭ فۋجيان ولكەسى مەن تاميل نادۋ شتاتىنىڭ، چۋانجوۋ قالاسى مەن چەنناي قالاسىنىڭ دوس ولكە، قالا قارىم - قاتىناسىن ورناتۋىنا قولداۋ كورسەتىپ، تەڭىز جىبەك جولىنىڭ جاڭا تاراۋىن جازۋ كەرەك.
التىنشى، حالىقارالىق جانە وڭىرلىك ىستەردەگى سەلبەستىكتى كۇشەيتۋ. بىرلەسكەن مەملەكەتتەر ۇيىمىن وزەك ەتكەن حالىقارالىق جۇيە مەن حالىقارالىق زاڭدى نەگىز ەتكەن حالىقارالىق ءتارتىپتى ايقىن تۋ ۇستاي وتىرىپ قورعاپ، كوپ جاقتىلىقتى جانە دۇنيە ءجۇزى ساۋدا ۇيىمىن وزەك ەتكەن كوپ جاقتى ساۋدا ءتۇزىلىسىن باتىل قورعاپ، وركەندەپ كەلە جاتقان ەلدەردىڭ ورىندى دامۋ ۇقىق - مۇددەسىن قامتاماسىز ەتۋ كەرەك. 20 ەل توبى، بريكس ەلدەرى، شاڭحاي سەلبەستىك ۇيىمى، جۇڭگو - رەسەي - ءۇندىستان سياقتى كوپ جاقتى مەحانيزمدەر جۇلگەسىندە سايكەسۋدى كۇشەيتۋ كەرەك. ”جۇڭگو - ءۇندىستان +“ سەلبەستىگىن وڭتۇستىك ازياعا، شىعىس وڭتۇستىك ازياعا، افريكاعا بىرتىندەپ كەڭەيتۋدى تالقىلاپ، وڭىرلىك ۇلاسۋ - تۇتاسۋدىڭ اناعۇرلىم ىركىلىسسىز تورىن قالىپتاستىرىپ، ”وڭىرلىك جان - جاقتى ەكونوميكالىق سەرىكتەستىك قارىم - قاتىناس كەلىسىمىن“ ەرتەرەك جاساسۋ كەرەك.
مودي مىنالاردى ءبىلدىردى: ەكى ءىرى وركەنيەتتى بايىرعى ەل جانە وركەندەپ كەلە جاتقان ءىرى ەل رەتىندە، ءۇندىستان مەن جۇڭگونىڭ قازىرگى تۇراقسىزدىق جايلاعان حالىقارالىق جاعدايدا پىكىرلەسۋدى، سايكەسۋدى، سەلبەسۋدى كۇشەيتىپ، قارىم - قاتىناستىڭ ورنىقتى دامۋىن ساقتاۋى ەكى ەل جونىنەن دە جانە دۇنيە ءجۇزى جونىنەن دە بەلسەندى، ماڭىزدى ءمان الادى. ءبىز ءبىر - ءبىرىمىزدىڭ ءجىتى قاداعالاپ وتىرعان ماسەلەلەرىمىزبەن ساناسىپ، الاۋىزدىقتاردى ءونىمدى مەڭگەرىپ جانە ءبىر جاقتى ەتىپ، الاۋىزدىقتى تالاس - تارتىسقا اينالدىرماۋىمىز، اناعۇرلىم تىعىز سەرىكتەستىك قارىم - قاتىناستى دامىتىپ، ءۇندىستان - جۇڭگو قارىم - قاتىناسىنىڭ جاڭا ءداۋىرىن اشۋىمىز كەرەك.
مودي جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعىن تاعى ءبىر مارتە قۇتتىقتاپ، مىنالاردى ءبىلدىردى: ءۇندىستان جاق جۇڭگو قول جەتكىزگەن وراسان زور تابىستارعا سۇيىنەدى، ءۇندىستان مەن جۇڭگو ەكى ەل دە ۇلتتى گۇلدەندىرۋ ۇدەرىسىندە تۇر، ەكى ەل كوپتەگەن ۇقساس سىن - سايىستارعا ءدوپ كەلىپ وتىر، ءۇندىستان جاق جۇڭگو جاقپەن اۋىس - كۇيىس جاساپ، ءوزارا ونەگە الۋدى، ناقتى سەلبەستىكتى تەرەڭدەتۋدى، كەڭەيتۋدى قالايدى. ءۇندىستان جاق جۇڭگو جاقتىڭ ءۇندىستاننىڭ كۇرىش جانە ازىقتىق قانت سياقتى ونىمدەرىن يمپورت ەتۋدى بەلسەنە كوبەيتكەندىگىنە العىس ايتادى، ەكونوميكا - ساۋدا جونىندەگى جوعارى دارەجەلىلەر تىلدەسۋ مەحانيزمىنەن ويداعىداي پايدالانىپ، ەكى جاقتى ساۋدانىڭ تەڭگەرىمدى، باياندى دامۋىن ىلگەرىلەتۋدى ءۇمىت ەتەدى. ءۇندىستان جاق اناعۇرلىم كوپ جۇڭگو كاسىپورىندارىنىڭ ءۇندىستانعا كەلىپ جاساۋ كاسىبى سياقتى كاسىپتەرگە قارجى قوسۋىن قارسى الادى. ەكى جاق كەلەر جىلى ديپلوماتيالىق قارىم - قاتىناس ورناتقاندىعىنىڭ 70 جىلدىعىنا ارنالعان 70 كەزەك جەلىلەس قيمىلدى بىرگە ويداعىداي وتكىزۋگە ءتيىس، اناعۇرلىم كوپ جۇڭگولىق ساياحاتشىلاردىڭ ءۇندىستانعا كەلۋىن قارسى الامىز. ەكى جاقتىڭ بىرلەسكەن زەرتتەۋ جۇرگىزىپ، ءۇندىستان مەن جۇڭگونىڭ ۇزاق بارىس - كەلىس تاريحىن تەرەڭدەي اشۋىن ءۇمىت ەتەمىز. ءۇندىستان جاق ءوزىنىڭ ستراتەگيالىق تاۋەلسىزدىگىن قادىرلەيدى، قورعايدى، جۇڭگو جاقپەن كوپ جاقتى جۇلگەدەگى پىكىرلەسۋدى، سايكەسۋدى كۇشەيتىپ، جاھاندىق سىن - سايىستارعا بىرگە توتەپ بەرىپ، وركەندەپ كەلە جاتقان ەلدەردىڭ زاڭدى ۇقىق - مۇددەسىن قورعاۋدى قالايدى. ءۇندىستان جاق جۇڭگو جاقپەن بىرگە ”وڭىرلىك جان - جاقتى ەكونوميكالىق سەرىكتەستىك قارىم - قاتىناس كەلىسىمىن“ ەرتەرەك جاساسۋدى ىلگەرىلەتىپ، ۇلاسۋ - تۇتاسۋ سەلبەستىگىن ورىستەتۋدى قالايدى. ءۇندىستان جاق جۇڭگو جاقپەن لاڭكەستىككە قارسى تۇرۋ سەلبەستىگىن كۇشەيتۋدى قالايدى.
شي جينپيڭ مىنالاردى ءبىلدىردى: چەنناي ءديدارلاسۋى ارقىلى مەن مودي زۇڭليمەن جۇڭگو - ءۇندىستان قارىم - قاتىناسى جونىندە جان - جاقتى، تەرەڭدەي پىكىر اۋىستىرىپ، ءوزارا تۇسىنىستىكتى تەرەڭدەتىپ، اناعۇرلىم ايقىن نىساناعا جانە اناعۇرلىم انىق وي جەلىسىنە يە بولدىق. ءبىز ەكى جاقتاعى قاتىستى تاراۋلاردىڭ وسىنى تياناقتاندىرۋىنا نۇسقاۋ بەرىپ، جۇڭگو - ءۇندىستان سەلبەستىگىنىڭ جاڭا جاعدايىن اشۋىمىز كەرەك.
شي جينپيڭ مىنالاردى ءبىلدىردى: وسى رەتكى ساپاردا مەن باستان - اياق ءۇندىستان ۇكىمەتى مەن حالقىنىڭ سالتاناتتى، قىزۋ، جان - جاقتى قارسى الۋىنا بولەنىپ، ەكى ەل حالقى اراسىنداعى تەرەڭ ءداستۇرلى دوستىقتى سەزىندىم. مەن مودي زۇڭليدى جۇڭگوعا تاعى بارىپ ءديدارلاسۋ وتكىزۋگە شاقىرامىن.
مودي مىنالاردى ءبىلدىردى: بۇل رەت ءبىز دوستىق رايدا تەرەڭدەي پىكىرلەسىپ، ارامىزداعى دوستىقتى تەرەڭدەتىپ، ءوزارا ءتۇسىنىسۋ مەن سەنىمدى نىعايتىپ، وركەنيەتتى ەكى بايىرعى ەل اراسىنداعى دانەكەردى بەكەمدەدىك. مەن ءتوراعا شي جينپيڭنىڭ كورەگەندىگى مەن سۇڭعىلالىعىن جانە شىن پەيىلى مەن ناقتى ىسكەرلىگىن ايرىقشا القايمىن. ايتىپ - ايتپاي، ءۇندىستان مەن جۇڭگو ەكى ەل تاريحتى بەتكە الۋمەن بىرگە، ونان دا ماڭىزدىسى، تاريح شەڭبەرىنەن شىعىپ، بولاشاققا جول اشۋى كەرەك. 21 - عاسىرعا كەلگەندە دۇنيە ءجۇزىنىڭ بەيبىتشىلىگى مەن ادامزاتتىڭ العا باسۋى ءۇندىستان - جۇڭگو سەلبەستىگىنەن ايرىلا المايدى. مەن ءتوراعا شي جينپيڭمەن دوستىعىمدى ەرەكشە قاستەرلەيمىن، سىزبەن وسىنداي پايدالى ءارى مول ناتيجەلى ستراتەگيالىق پىكىرلەسۋدى ۇزدىكسىز ساقتاپ، ءۇندىستان - جۇڭگو قارىم - قاتىناسىنىڭ جارقىن بولاشاعىن قول ۇستاسا بىرگە اشۋدى قالايمىن. مەن جۇڭگوعا بارىپ سىزبەن تاعى دا ءديدارلاسۋدى اسىعا كۇتۋدەمىن.
ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.
