شينحۋا اگەنتتىگىنىڭ 10 - ايدىڭ 13 - كۇنى بەيجيڭنەن بەرگەن حابارى. 10 - ايدىڭ 13 - كۇنى كەشتە مەملەكەت ءتوراعاسى شي جينپيڭ ءۇندىستاننىڭ زۇڭليى موديمەن 2 - رەتكى بەيرەسمي ءديدارلاسۋىن جانە نەپالداعى مەملەكەت ىستەرى ساپارىن اياقتاتقاننان كەيىن، بەيجيڭگە قايتىپ كەلدى.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت شۋجيچۋىنىڭ شۋجيى، ورتالىق كوميتەت كەڭسەسىنىڭ مەڭگەرۋشىسى ديڭ شۋەشياڭ، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت سىرتقى ىستەر قىزمەت كوميتەتى كەڭسەسىنىڭ مەڭگەرۋشىسى ياڭ جيەچى، مەملەكەتتىك كەڭەستىڭ مۇشەسى، قوسىمشا سىرتقى ىستەر مينيسترى ۋاڭ ي، مەملەكەتتىك ساياسي كەڭەستىڭ ورىنباسار ءتوراعاسى، مەملەكەتتىك دامۋ جانە رەفورما كوميتەتىنىڭ مەڭگەرۋشىسى حى ليفىڭ قاتارلى ساپارلاستارى وسى ۇشاقپەن بىرگە كەلدى.
جەرگىلىكتى ۋاقىت 10 - ايدىڭ 13 - كۇنى تۇستە شي جينپيڭ كاتماندۋدان اتتانىپ، ەلگە قايتۋعا جول الدى. مىڭداعان، 10 مىڭداعان نەپال جۇرتشىلىعى وزدىكتەرىنەن كوشەگە شىعىپ، اۋەجايعا باراتىن جولدىڭ ەكى جاعىنا جينالدى. ولاردىڭ كەيبىرى جۇڭگو مەن نەپال ەكى ەلدىڭ مەملەكەت تۋىن بۇلعاپ، كەيبىرى ءتوراعا شي جينپيڭ مەن بانداري زۇڭتۇڭنىڭ سۋرەتىن جانە ”جۇڭگو مەن نەپالدىڭ دوستىعى جاساسىن“ دەگەن ۇراندى بيىك ۇستاپ، كەيبىرى نەپالدىڭ ۇلتتىق مۋزيكا اسپابىن ورىنداپ، تاعى بىرەۋلەرى داڭعارا قاعىپ، بارابان سوعىپ، ءان شىرقاپ، بيگە باسىپ، ءتوراعا شي جينپيڭگە دەگەن شىنايى ىززەت - قۇرمەتتەرىن ءبىلدىردى.
بانداري اۋەجايدا شي جينپيڭگە ارناپ سالتاناتتى اتتاندىرىپ سالۋ سالتىن وتكىزدى. نەپالدىڭ ورىنباسار زۇڭتۇڭى پۋ - ىن، زۇڭليى ولي، فەدەراتسيالىق پارلامەنت فەدەراتسيا پالاتاسىنىڭ ءتوراعاسى تيميلسينا، بيلىك كەڭسەسىنىڭ بارلىق مۇشەلەرى، اسكەري جاقتىڭ جوعارى دارەجەلى قولباسشىلارى قاتىناستى.
10 - ايداعى كاتماندۋدا كۇن شايداي اشىق، اقشا بۇلت قالىقتاپ، سامال جەل ەسىپ تۇر. گيمالاي تاۋى زەڭگىر كوككە بوي سوزىپ، نەپال حالقىنىڭ جۇڭگو باسشىلارىنا دەگەن تەرەڭ سۇيىسپەنشىلىگىنە، شىنايى دوستىعىنا كۋا بولۋدا. شي جينپيڭ اۋەجايعا جەتكەندە، بانداري زۇڭتۇڭ الدىنان شىعىپ قارسى الدى. ءساندى كيىنگەن نەپال كوركەمونەرشىلەرى ءان ايتىپ، ءبي بيلەدى، وسپىرىمدەر قولدارىنا جۇڭگو مەن نەپال ەكى ەلدىڭ مەملەكەت تۋىن ۇستاپ، حانزۋ تىلىندە ”شي اتاي قوش بولىڭىز!“، ”ءبىز ءسىزدى سۇيەمىز!“، ”ءسىزدىڭ نەپالعا تاعى دا ساپارلاي كەلۋىڭىزدى قارسى الامىز!“ دەپ الاقايلادى. شي جينپيڭ اتتاندىرىپ سالۋعا شىققان ادامدارعا ءالسىن - ءالى قول بۇلعاپ قۇرمەت ءبىلدىردى.
شي جينپيڭ بانداريدىڭ سەرىك بولۋىمەن پارات مىنبەسىنە شىقتى. اسكەري وركەستر جۇڭگو مەن نەپال ەكى ەلدىڭ مەملەكەت ءانىن ورىندادى، 21 قۇرمەت ساليۋتى اتىلدى.
شي جينپيڭ نەپالدىڭ ۇلتتىق مۋزيكاسى جانە بالالاردىڭ الاقايلاعان ءۇنى ىشىندە نەپال جاقتىڭ جوعارى دارەجەلى مانساپتىلارىمەن ءبىر - بىرلەپ قول الىسىپ قوشتاستى. بانداري جۇڭگو جاقتان سەرىك بولىپ بارعاندارمەن قول الىستى.
بانداري قىزى ۋشامەن ۇشاق باسپالداعىنىڭ جانىنا بارىپ اتتاندىرىپ سالدى. ۋشا شي جينپيڭگە گۇل شوعىن ۇسىندى. شي جينپيڭ بانداريمەن ىقىلاستى تۇردە قوش ايتىستى. شي جينپيڭ بىلاي دەدى: مەنىڭ بۇل رەتكى نەپالعا ساپارىم توتەنشە تابىستى بولدى. مەن نەپال توپىراعىنا قادام باسقان زامان نەپال ۇكىمەتى مەن حالقىنىڭ ىقىلاستى قارسى الۋىنا بولەندىم. نەپالداعى ءار سالا قايراتكەرلەرى مەن حالىق جۇرتشىلىعىنىڭ شىنايى، شۋاقتى جۇزدەرىنەن مەن جۇڭگو مەن نەپال دوستىعىنىڭ جۇرت كوڭىلىنە تەرەڭ ۇيالاعاندىعىن بارىنشا سەزىندىم، جۇڭگو مەن نەپالدىڭ ءداستۇرلى دوستىعىنىڭ مىزعىمايتىندىعىنا اناعۇرلىم بەرىك سەنىم ورناتتىم. زۇڭتۇڭ حانىمنىڭ، نەپال ۇكىمەتىنىڭ جانە حالقىنىڭ مەنىڭ ساپارىمدى دەن قويا ورنالاستىرعاندىعىنا العىس ايتامىن. بۇل رەتكى ساپارىم جۇڭگو مەن نەپال قارىم - قاتىناسىنىڭ دەڭگەيىن جوعارىلاتتى، مەن توتەنشە ريزامىن. ءبىز بىرگە قۇلشىنىپ، جۇڭگو مەن نەپال دوستىعىن جالعاستىرايىق جانە دامىتا تۇسەيىك.
بانداري مىنانى ءبىلدىردى: ءسىزدىڭ ساپارلاي كەلۋىڭىز بارلىق نەپال حالقىنىڭ داڭقى، ءبىز شاتتانعان كوڭىل كۇيىمىزدى سوزبەن جەتكىزىپ بەرە المايمىز. ساپار توتەنشە تابىستى، جەتىستىكتەر مول بولىپ، نەپال مەن جۇڭگو قارىم - قاتىناسى تاريحىنداعى ءبىر ماڭىزدى بەلەسكە اينالدى، نەپال مەن جۇڭگو قارىم - قاتىناسى وسىدان باستاپ جاڭا داۋىرگە ءوتىپ، جاڭا بيىككە قادام تاستادى، نەپال بۇكىل مەملەكەت بويىنشا قۋانىشقا بولەنىپ، شاتتىققا شومدى. نەپال جاق جۇڭگو جاقپەن بىرگە ەكى ەلدىڭ تاتۋ كورشىلىك دوستىق جانە ستراتەگيالىق سەلبەستىك سەرىكتەستىك قارىم - قاتىناسىن مىزعىماي ىلگەرىلەتەدى.
