لي كىچياڭ مەن موڭعۇليانىڭ زۇڭليى كۇرەلسۇق ءوزارا قۇتتىقتاۋ تەلەگرامماسىن جولدادى
شينحۋا اگەنتتىگىنىڭ 10 - ايدىڭ 16 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 10 - ايدىڭ 16 - كۇنى جۇڭگو مەن موڭعۇليانىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعى بايلانىسىمەن موڭعۇليانىڭ زۇڭتۇڭى باتتۇلعامەن ءوزارا قۇتتىقتاۋ تەلەگرامماسىن جولدادى.
شي جينپيڭ قۇتتىقتاۋ تەلەگرامماسىندا بىلاي دەپ اتاپ كورسەتتى: جۇڭگو مەن موڭعۇليا تاۋ - سۋ جالعاسقان دوس كورشىلەر، موڭعۇليا جاڭا جۇڭگومەن ەڭ ەرتە ديپلوماتيالىق قارىم - قاتىناس ورناتقان مەملەكەتتەردىڭ ءبىرى. ديپلوماتيالىق قارىم - قاتىناس ورناتقان 70 جىلدان بەرى، جۇڭگو - موڭعۇليا ەكى ەلدىڭ دوستىق سەلبەستىگى ۇلكەن بەتالىستان جازباي، بەرەكەلى كورشىلەردىڭ دوستىق سەلبەستىك قارىم - قاتىناسىنىڭ تەرەڭدەي دامۋىن بىرگە ىلگەرىلەتىپ، ەكى ەلگە جانە ەكى ەل حالىقتارىنا ناقتى مۇددە الا كەلدى. جۋىرداعى جىلداردان بەرى، ەكى جاقتىڭ بىرگە قۇلشىنۋىندا، جۇڭگو - موڭعۇليا قارىم - قاتىناسى تەز دامۋ جولىنا ءتۇسىپ، جان سۇيىنەرلىك جاڭا بەينە جارىققا شىقتى. مەن جۇڭگو - موڭعۇليا قارىم - قاتىناسىنىڭ دامۋىنا وسكەلەڭ ءمان بەرەمىن، باتتۇلعا زۇڭتۇڭمەن بىرگە قۇلشىنىپ، جۇڭگو مەن موڭعۇليانىڭ جان - جاقتى ستراتەگيالىق سەرىكتەستىك قارىم - قاتىناسىن ديپلوماتيالىق قارىم - قاتىناس ورناعاندىعىنىڭ 70 جىلدىعىن جاڭا باستاما ەتە وتىرىپ بىرگە ىلگەرىلەتىپ، تىڭ دا اناعۇرلىم زور ىلگەرىلەۋشىلىكتەرگە ۇزدىكسىز قول جەتكىزۋدى قالايمىن.
باتتۇلعا قۇتتىقتاۋ تەلەگرامماسىندا مىنالاردى ءبىلدىردى: موڭعۇليا مەن جۇڭگو ديپلوماتيالىق قارىم - قاتىناس ورناتقاندىعىنىڭ 70 جىلدىعى سىندى ماڭىزدى تاريحي ساتتە، ەكى جاق 70 جىلدىق بارىس - كەلىستىڭ تابىستارىن قورىتىندىلادى ءارى كەلەشەكتەگى سەلبەستىكتىڭ ۇزاق ۋاقىتتىق بەتالىسى جونىندە جوعارى جىكتەگىلەردىڭ كەڭەسىن وتكىزدى جانە جوسپارىن جاسادى، موڭعۇليا جاق بۇعان قۋانادى. كەزەكتە موڭعۇليا مەن جۇڭگونىڭ جان - جاقتى ستراتەگيالىق سەرىكتەستىك قارىم - قاتىناسى ءار سالادا تۇگەلدەي تاماشا دامۋشىلىقتارعا قول جەتكىزدى، بۇل ەكى ەل حالىقتارىنىڭ مۇددەسىنە بۇكىلدەي ۇيلەسەدى ءارى وسى ءوڭىردىڭ بەيبىتشىلىگى مەن دامۋىنا ماڭىزدى ۇلەستەر قوستى. مەن ءتوراعا شي جينپيڭمەن بىرگە قۇلشىنىپ، ەكى ەلدىڭ دوستىق قارىم - قاتىناسى مەن ءار سالاداعى سەلبەستىگىن ونان ارى بەكەمدەۋدى جانە دامىتۋدى قالايمىن.
سول كۇنى مەملەكەتتىك كەڭەستىڭ زۇڭليى لي كىچياڭ مەن موڭعۇليانىڭ زۇڭليى كۇرەلسۇق تا ءوزارا قۇتتىقتاۋ تەلەگرامماسىن جولدادى. لي كىچياڭ قۇتتىقتاۋ تەلەگرامماسىندا بىلاي دەدى: جاڭا جاعدايدا، جۇڭگو جاق موڭعۇليا جاقپەن بىرگە ەكى ەلدىڭ قارىم - قاتىناسىنىڭ ارشىندى قاداممەن العا ىلگەرىلەۋىن بىرگە جەبەپ، ەكى ەلگە جانە ەكى ەل حالىقتارىنا ءتىپتى دە مول باقىت جاراتۋدى قالايدى. كۇرەلسۇق قۇتتىقتاۋ تەلەگرامماسىندا بىلاي دەدى: موڭعۇليا جاق جۇڭگو جاقپەن ەكى ەلدىڭ قارىم - قاتىناسىنىڭ مازمۇنىن ۇزدىكسىز بايىتىپ، ەكى جاقتىڭ حالىقارالىق، وڭىرلىك ىستەردەگى سەلبەستىگىن بەكەمدەپ، ەكى ەل حالىقتارىنىڭ دوستىق قارىم - قاتىناسىن كۇشەيتۋدى قالايدى.
