شينحۋا اگەنتتىگىنىڭ 10 - ايدىڭ 15 - كۇنى كۇنميڭنەن بەرگەن حابارى (ءتىلشى ۋاڭ يان). اۋىل - قىستاق شيپاگەرى، وقۋشى، اسكەر، ساقشى... 1 - دارەجەلى قاھارمان ۇلگى لي جۇڭگۇيدىڭ عۇمىرى تىم ۇزىن بولماسا دا، كوپ ورىندا قىزمەت ىستەگەن ەدى. مەيلى قايدا بولسا دا، ول بار كۇشىمەن ءوزىنىڭ قاسيەتىن ساقتاپ كەلگەن بولاتىن. ول قىلمىستىنى تۇتقىنداعان كەزدە، جاۋىنگەر سەرىگىن قورعاۋ ءۇشىن گرانات جارعان قىلمىستىعا تايسالماي تاپ بەرىپ، ەرلىكپەن قۇربان بولادى، سول جىلى 35 جاستا عانا ەدى.
لي جۇڭگۇي 1956 - جىلى دۇنيەگە كەلگەن، يۇننان ولكەسى ۋىنشان جۋاڭزۋ - مياۋزۋ اۆتونوميالى وبلىسى فۋنيڭ اۋدانىنان، جۇڭگو كوممۋنيستىك پارتياسىنىڭ مۇشەسى، جۋاڭزۋ. 1972 - جىلى فۋنيڭ اۋداندىق دەنساۋلىق ساقتاۋ باۋلۋ كلاسىنان وقۋ بىتىرگەننەن كەيىن لي جۇڭگۇي لاڭحىڭ اۋىلدىق ەمحاناعا بارىپ شيپاگەر بولادى. فۋنيڭ اۋدانىندا زور كولەمدى بەزگەك اۋرۋى تاراعان كەزدە ول ءار كۇنى ءدارى سومكەسىن ارقالاپ، تاۋ اسىپ، تاس باسىپ، ءۇي - ءۇيدى ارالاپ بۇقارانىڭ اۋرۋدان ساقتانۋىنا، اۋرۋىن ەمدەتۋىنە جەتەكشىلىك ەتەدى.
1977 - جىلى لي جۇڭگۇي شاقىرۋ بويىنشا قوسىنعا قاتىناسادى، اسكەري بولىمدە ەرەكشەلىگىن ساۋلەلەندىرىپ، دەنساۋلىق ساقتاۋشى مىندەتىن وتەيدى. 1978 - جىلى جۇڭگو كوممۋنيستىك پارتياسىنا مۇشە بولادى، كەيىن كەلە پايجاڭ بولىپ تاعايىندالىپ، داليان قۇرلىق ارمياسى مەكتەبىنە جىبەرىلىپ ءبىلىم تولىقتايدى. اسكەري مەكتەپتە ول قۇلشىنا ۇيرەنەدى، ناتيجەسى ۇزدىك بولعاندىقتان، 2 رەت ماراپاتتالادى. وقۋ بىتىرگەننەن كەيىن حيلۇڭجياڭ شەكارا قورعانىس 6 - تۋانىنا ءبولىنىپ، وندا تۇپ - تۋرا 7 جىل تۇرادى.
1987 - جىلى 12 - ايدا لي جۇڭگۇي كاسىپ اۋىستىرىپ، فۋنيڭ اۋدانىنا قايتىپ، اۋدان قالاشىعى رايونى ساقشى بولىمشەسىنىڭ حالىق ساقشىسى بولادى، كۇشتى جاۋاپكەرشىلىك سەزىم لي جۇڭگۇيدى ۇنەمى ەڭ زور قۇلشىنىسپەن زاڭعا قايشى قىلمىستى ىستەردى تيۋعا جەتەلەيدى. سول كەزدە ءبىر ەر ادام ءوزى جاساپ العان وق - ءدارى مىلتىعىن جاسىرادى، سونداي - اق جەندەتتىك قارۋىن الىپ ۇنەمى پويەز بەكەتىنىڭ توڭىرەگىندە توناۋشىلىق، ۇرلىق ىستەيدى، وسى ارادان ارلى - بەرلى وتكەن بۇقارا قاتتى قورقادى. لي جۇڭگۇي جالعىز ءوزى 3 كۇن، 3 ءتۇن كۇزەتىپ، اقىرى بۇل ەر ادامدى ۇستاپ الىپ تۇتقىندايدى.
1991 - جىلى 6 - ايدىڭ 12 - كۇنى كەشتە 4 قاراقشى قالا رايونى شينحۋا قالاشىعىنداعى ءبىر قوناقجايدا توناۋشىلىق ىستەگەننەن كەيىن قاشىپ كەتەدى. ساقشى بولىمشەسى دەلو مالىمەتىن تاپسىرىپ العاننان كەيىن تىزگىن ۇشىمەن سوققى بەرىپ، ولاردىڭ اراسىنداعى جاۋ xxتى تۇتقىندايدى، ول باسقالارىنىڭ اتى - ءجونىن، مەكەن - جايىن ايتىپ بەرگەن سوڭ، فۋنيڭ اۋداندىق قوعام حاۋىپسىزدىگى مەكەمەسى حالىق ساقشىلارىن شىعارىپ، 3 گرۋپپاعا ءبولىنىپ تۇتقىنداۋ جۇرگىزەدى. 13 - كۇنى تاڭعا جاقىن ساعات بىردە لي جۇڭگۇي مەن جاۋىنگەر سەرىكتەرى جاۋ xxتى كەپىلگە ۇستاپ ”لاۋفەي“ لاقامدى قاراقشىنىڭ تۇراعىنا بارادى. ءۇيدىڭ ەسىگىن شاعىپ كىرگەننەن كەيىن، حالىق ساقشىلارى كۇڭگىرت قول پروجەكتردىڭ جارىعىندا بۇل ادامنىڭ ارت - ارتىنان 3 رەت مەرزىمدى قاماق جازاسىنا ۇكىم ەتىلگەن توناۋشىلىق جاساعان كانىگى قىلمىسكەر ەكەندىگىن بايقايدى. ”لاۋفەي“دىڭ ۇيىندە اعاسى، جەڭگەسى جانە بالالارى بار بولعاندىقتان، جازىقسىز جانداردى زاقىمداپ الۋدان ساقتانۋ ءۇشىن حالىق ساقشىلارى ونى ۇيىنەن شىرعالاپ شىعارۋ بەكىمىنە كەلەدى. ”لاۋفەي“دى سىرتقا شىرعالاپ شىعارعان سوڭ، حالىق ساقشىلارى قول پروجەكتردى ونىڭ جۇزىنە تۋرا سالادى، ءبىر حالىق ساقشىسى ونىڭ دەنەسىن تىنتە باستاعاندا “لاۋفەي“ كوتەرىپ تۇرعان قوس قولىن اياق استىنان ءتۇسىرىپ، دەرەۋ سىمىنىڭ قالتاسىنا سالا قويادى. بۇل حالىق ساقشىسى قالىپسىزدىقتى سەزە قويىپ، ”ونىڭ قولىندا گرانات بار ەكەن، ونى ۇستاڭدار!“ دەپ ايعاي سالادى، وت جارق ەتە تۇسكەندە، لي جۇڭگۇي قاراقشىعا نايزاعايداي اتىلىپ بارىپ، قاراقشىنىڭ قولىن مىقتاپ ۇستاي الادى ءارى ءوز دەنەسىمەن ارتىندا تۇرعان جاۋىنگەر سەرىگىن توسادى. گۇرس ەتكەن جويقىن ۇننەن كەيىن، لي جۇڭگۇي ەرلىكپەن قۇربان بولادى.
1991 - جىلى 10 - ايدا لي جۇڭگۇيگە قوعام حاۋىپسىزدىگى مينيسترلىگى 1 - دارەجەلى قاھارمان ۇلگى اتاعىن بەرەدى، يۇننان ولكەلىك حالىق ۇكىمەتى توڭكەرىستىك قۇربان دەپ بەكىتەدى.
لي جۇڭگۇي قۇربان بولعان كەزدە، ۇلى لي گوبين 10 جاستا عانا، قىزى 6 جاستا عانا ەدى. سۋىق حابار جەتكەندە شەشەسىنىڭ ونى مەن قارىنداسىن قۇشاقتاپ الىپ قايعى جۇتىپ ۇزاق جىلاعانى لي گوبيننىڭ الى كۇنگە ەسىندە. وتكەندە وتباسىنداعىلار اكەسىنىڭ تاپقان تابىسىنا عانا سۇيەنىپ كۇن كورەتىن، تىرەك قۇلادى، قايسار اناسى كوپ جىلداردان بەرى ۋاقىتتىق جۇمىس ىستەپ اعا - قارىنداستى ەكەۋىن باعىپ ەرجەتكىزەدى. تالاي قيىنشىلىق تارتسا دا، شەشەسى اكەلەرىنىڭ رۋحىمەن 2 بالاسىن جىگەرلەندىرىپ، ولاردىڭ جاقسى ۇيرەنۋىنە مۇمكىندىك جاسايدى.
لي گوبين شەشەسىنىڭ ءۇمىتىن جەردە قالدىرمادى. 2004 - جىلى يۇننان ولكەلىك ساقشى - وفيتسەرلەر شۋەيۋانىنان وقۋ تاۋىسقان سوڭ مەملەكەت قىزمەتكەرى بولۋعا ەمتيحان تاپسىرىپ، ەكىنشى جىلى فۋنيڭ اۋداندىق قوعام حاۋىپسىزدىگى مەكەمەسىنە كىرەدى. بۇل كۇندەرى ول اكەسى سياقتى نەگىزگى ساتى ساقشى بولىمشەسىندە قىزمەت ىستەيدى ءارى ساقشى بولىمشەسىنىڭ ورىنباسار باستىعى بولدى. ”مەن ءبىر قاراپايىم ساقشىمىن، ىستەگەن قىزمەتىم اكەم سياقتى جان تەبىرەنتىپ، رۋحتى جىگەرلەندىرەرلىك بولماعانىمەن، ءبىراق اكەم سياقتى حالىق بۇقاراسىنىڭ ءومىرىنىڭ، مال - مۇلكىنىڭ حاۋىپسىزدىگى مەن قوعام تىنىشتىعىن قورعاۋ جولىندا ۇزبەي قۇلشىنىپ، ءۇن - ءتۇنسىز ۇلەس قوسامىن“، - دەيدى لي گوبين. ساقشى بولعان 10 نەشە جىلدان بەرى، لي گوبين كوپ رەت ۇزدىك مەملەكەت قىزمەتكەرى، ءورت سوندىرۋدە وزات جەكە سياقتى داڭقتى اتاقتاردى ەنشىلەدى، اكەسىنىڭ رۋحى ونى العا باسۋعا ءار دايىم جىگەرلەندىرىپ كەلەدى.
