شينحۋا اگەنتتىگىنىڭ 10 - ايدىڭ 18 - كۇنى كۇنميڭنەن بەرگەن حابارى (ءتىلشى ۋاڭ يان). يۇننان ولكەسى ۋىنشان جۋاڭزۋ، مياۋزۋ اۆتونوميالى وبلىسى يانشان اۋدانىنداعى قۇرباندار قابىرستانىنىڭ كورمە بولمەسىندەگى ”بەيبىتشىلىكتى قورعاۋشىلار“ قابىرعاسىندا ءبىرىنشى دارەجەلى قاھارمان ۇلگى گاۋ ۋىنلياڭنىڭ كەسكىنى سونداي جاس كورىنەدى. كەزىندە اسكەر بولعان ول، قوسىننان شەگىنگەننەن كەيىن يانشان اۋدانىنىڭ قوعام حاۋىپسىزدىگى حالىق ساقشىسى بولادى، ءولىم جازاسىنا ۇكىم ەتىلگەن قانقۇيلى قىلمىسكەردى تۇتقىندايتىن كەزدە، ول تيتتەي دە تايسالماي، ”باندىلار اپانى“نا ىشكەرىلەي كىرىپ، قىلمىسكەرمەن جاقىننان اتىسىپ، باقىتقا قارسى قارسى جاقتىڭ اۆتوماتى استىندا جىعىلىپ، ەرلىكپەن قۇربان بولادى.
گاۋ ۋىنلياڭ، حانزۋ، 1963 - جىلى دۇنيەگە كەلگەن، يانشان اۋدانىنان، كوممۋنيستىك پارتيا مۇشەسى. حۋايحاي شايقاسىنا قاتىناسقان اكەسى گاۋ ۋىنلياڭدى كىشكەنتايىنان حۋاڭ جيگۋاڭ قاتارلى قاھارمان ۇلگى قايراتكەرلەردەن ۇيرەنۋگە تاربيەلەگەن. 1979 - جىلى ورتالاۋ مەكتەپتى بىتىرگەننەن كەيىن، گاۋ ۋىنلياڭ ىرىقتىلىقپەن تىزىمدەلىپ اسكەر بولادى، ارمياداعى كەزىندە بەينەسى ۇزدىك بولعاندىقتان ورىنباسار بانجاڭ بولادى ءارى جۇڭگو كوممۋنيستىك جاستار وداعىنا مۇشە بولادى.
1982 - جىلى 10 - ايدا گاۋ ۋىنلياڭ قوسىننان شەگىنگەننەن كەيىن يانشان اۋداندىق قوعام حاۋىپسىزدىگى مەكەمەسىنىڭ حالىق ساقشىسى بولادى. قىزمەتكە جاڭادان بارعان كەزىندە اكەسى وعان: ”ماڭدايىڭداعى گەرب مەملەكەتكە ۋاكىلدىك ەتەدى، حالىققا ۋاكىلدىك ەتەدى. قوعام حاۋىپسىزدىگى قىزمەتى وتە حاۋىپتى، وتە جاپالى، پارتيا مەن حالىق قاجەت ەتكەندە الدىعا ءبىر قادام اتتاپ ءولىپ كەتۋگە پەيىل بولساڭ دا، ارتىڭا جارتى قادام شەگىنىپ جان ساۋعالاۋىڭا بولمايدى“، - دەپ قاداعالايدى. ساقشى بولىپ 2 ايدان كەيىن، گاۋ ۋىنلياڭ پيڭيۋان قوعام حاۋىپسىزدىگى بولىمشە مەكەمەسىنە قىزمەتكە ءبولىنىپ، سوندا 7 جىل ىستەيدى. 7 جىلدا، ول قىزمەتىنە ادال بولىپ، بار زەيىنىمەن ىستەيدى. 1989 - جىلى قىزمەت قاجەتىمەن گاۋ ۋىنلياڭ اۋداندىق قوعام حاۋىپسىزدىگى مەكەمەسىنىڭ ەسىرتكى بارلاۋ اترەتىنە قىزمەت ىستەۋگە اۋىستىرىلىپ، ىلگەرىندى - كەيىندى بولىپ ءتۇرلى ەسىرتكى ساۋدالاۋ دەلوسىنان 140ىن شەشۋگە قاتىناسادى؛ ەسىرتكى قىلمىستى ەلەمەنتتەرىنەن 193 ادامدى تۇتقىندايدى؛ گەرويننان 33829.6 گرامدى، اپيننان 31968.1 گرامدى، ءتۇرلى مىلتىقتان 15ىن، وقتان 69ىن، ەسىرتقى قارجىسىنان 404 مىڭ 565 يۋاندى قولعا تۇسىرەدى. قىزمەتتى اسا جاقسى ىستەگەندىكتەن، گاۋ ۋىنلياڭ تالاي رەت جوعارى ورىننىڭ ماراپاتىنا يە بولادى. 1990 - جىلى 6 - ايدا داڭقتى كوممۋنيستىك پارتيا مۇشەسى بولادى.
1992 - جىلى 8 - ايدا يانشان ساقشى جاعى جوعارى ورىننىڭ تالابى بويىنشا پيڭيۋان وڭىرىندە ”قاتاڭ سوققى بەرۋ“دى ورىستەتەدى، گاۋ ۋىنلياڭ ءولىم جازاسىنا ۇكىم ەتىلگەن 19 - ءنومىرلى قاشقىن قىلمىسكەر ما سىليندى تۇتقىنداۋ شاعىن اترەتىنە بولىنەدى. بۇل تالاي جىل قۇتىرىنا ەسىرتكى ساۋدالاعان، ساقشى جاق تۇتقىنداپ، سوت مەكەمەسى ءولىم جازاسىنا ۇكىم ەتكەننەن كەيىن ويلاماعان جەردەن تۇرمەدەن قاشىپ كەتكەن اسقان توڭمويىن، قانىپەزەر قىلمىسكەر بولاتىن. پيڭيۋان وڭىرىنە جاسىرىن قايتقاننان كەيىن، ول تاعى دا قارۋلى ەسىرتكى ساۋدالاۋمەن اينالىسادى، ەسىكتەن اتتاپ شىقسا بولعانى 54 تۇرپاتتى ناگان مەن اۆتوماتتى جانىنان تاستامايدى، اۋەل دەسەڭ، ونىڭ ارنايى ساتىپ العان قورا - جايىندا دا ارالىق تام، جاسىرىن جول جانە ءبىر قىرلى اينەك سياقتى قورعانىس قۇرىلعىلارى بار ەدى.
8 - ايدىڭ 31 - كۇنى تاڭعا جۋىق، گاۋ ۋىنلياڭ مەن جاۋىنگەر سەرىكتەرى ما سىليندى تۇتقىنداۋعا كىرىسەدى، ولار ونىڭ تۇرارجايىنا جاقىنداعان سوڭ كەزەكپەن ءبىرىن - ءبىرى قورعاپ، الدىڭعى اۋلاعا كىرەدى. گاۋ ۋىنلياڭ مەن جاۋىنگەر سەرىكتەرى ءتور ءۇيدىڭ ەكى جاعىنا جەتكەندە، ءتور ءۇيدىڭ ەسىگى كەنەتتەن اشىلادى، ما سىليننىڭ ايەلى قوعام حاۋىپسىزدىگى حالىق ساقشىلارى ەكەنىن بىلە قويىپ، ”ما سىلين جوق“ دەپ دەرەۋ ەسىكتى ىشىنەن قۇلىپتاپ الادى. حالىق ساقشىلارى لەزدە ميكروفونمەن جارتى ساعات ساياسات ۇگىتتەگەن سوڭ، ول امالسىزدان ەسىكتى اشىپ، حالىق ساقشىلارىن تىنتۋگە كىرگىزەدى، الايدا 1 - قاباتتان عيماراتتىڭ توبەسىنە دەيىن ما سىليننىڭ قاراسى كورىنبەيدى. حالىق ساقشىلارى 1 - قاباتقا قايتىپ كەلگەندە، جاعداي شۇعىل وزگەرەدى! ءۇي ىشىنەن مىلتىق داۋىسى ەستىلىپ، ءبىر حالىق ساقشىسىنىڭ اياعىنان وق ءتيىپ جىعىلىپ تۇسەدى، گاۋ ۋىنلياڭ دەرەۋ ىڭعايلى ورىنعا بارىپ وق شىعارىپ قىلمىسكەردى توسىپ، باسقا حالىق ساقشىلارىنىڭ بارىپ ونى قۇتقارىپ الۋىن قورعايدى. ەكى جاق اتىسقاندا ما سىلين ءۇي ىشىنە ءورت قويادى، گاۋ ۋىنلياڭ تۇرعان قالتارىس جەرگە ءورت كەتكەندىكتەن، سىرتقا شىعا بەرگەندە قارسى جاق اۆتوماتپەن وق جاۋدىرىپ، موينىنىڭ، بەلىنىڭ كوپ جەرىنە وق ءتيىپ، ەرلىكپەن قۇربان بولادى.
1992 - جىلى 11 - ايدا قوعام حاۋىپسىزدىگى مينيسترلىگى گاۋ ۋىنلياڭعا ءبىرىنشى دارەجەلى قاھارمان ۇلگى اتاعىن تولىقتاپ بەرەدى، جۇڭگو كوممۋنيستىك پارتياسى يۇننان ولكەلىك كوميتەتى ونى تاڭداۋلى كوممۋنيستىك پارتيا مۇشەسى دەپ تانيدى، يۇننان ولكەلىك حالىق ۇكىمەتى ونى توڭكەرىستىك قۇربان دەپ بەكىتەدى.
گاۋ ۋىنلياڭ قۇربان بولعان كەزدە، جالعىز ۇلى گاۋ جيچۇن نەبارى 4 جاستا بولاتىن، سول جىلداعى ىستەردەن كوپ ەلەس جوق ەدى. تەك كىشكەنتاي كەزىندە، ءار جىلعى بالالار مەرەكەسىندە، ءار رەتكى اتا - انالار جيىنىندا باسقا ساباقتاستارىنىڭ اكەلەرىمەن بىرگە بولعانىن كورگەندە گاۋ جيچۇن ىلعي قاتتى جابىرقايتىن. ”ءبىراق انام ءتىپتى دە كوپ، ءتىپتى دە تەرەڭ انالىق سۇيىسپەنشىلىگىمەن اكە سۇيىسپەنشىلىگىنىڭ اق تاڭداعىن تولتىردى“، - دەيدى ول، - انام مەنى ەرجەتكىزىپ، تالاي جىلدان بەرى اكەمنىڭ رۋحىمەن ۇزدىكسىز شابىتتاندىرىپ، كىشكەنتايىمنان حالىق ساقشىسى بولۋ مۇراتىن ورناتۋىما مۇمكىندىك جاسادى.
تولىق ورتا مەكتەپتى بىتىرگەننەن كەيىن گاۋ جيچۇن اكەسىنىڭ وسيەتىنە مۇراگەرلىك ەتىپ، يۇننان ساقشى - وفيتسەرلەر شۋەيۋانىنا تىزىمدەلىپ، ەمتيحان بەردى. 2009 - جىلى وقۋىن بىتىرگەننەن كەيىن مەملەكەت قىزمەتكەرلەرى ەمتيحانىنان ءوتىپ، اكەسى سياقتى يانشان اۋداندىق قوعام حاۋىپسىزدىگى مەكەمەسىنە قادام قويدى، بۇل كۇندەرى ساقشى بولىمشەسىنىڭ جەتەكشىسى بولدى. ”مەن اكەم سياقتى ءوزىمنىڭ بار كۇشىممەن ادىلدىكتى، ادىلەتتىلىكتى قورعاۋعا قۇلشىنامىن، قوعام ورنىقتىلىعىن قورعايمىن“. قىزىم ۇلكەيگەننەن كەيىن، وعان اكەمنىڭ اڭگىمەلەرىن ايتىپ بەرىپ، اكەمنىڭ رۋحىن ۇرپاقتان - ۇرپاققا جالعاستىرامىن، - دەيدى ول.
