شينحۋا اگەنتتىگىنىڭ 11 - ايدىڭ 4 - كۇنى شاڭحايدان بەرگەن حابارى (تىلشىلەر ليۋ حۋا، ياڭ جينجى). مەملەكەت ءتوراعاسى شي جينپيڭ 11 - ايدىڭ 4 - كۇنى شاڭحايدا يامايكانىڭ زۇڭليى حولنەسسپەن كەزدەستى. ەكى جاق ەكى ەلدىڭ بىرگە دامىتقان دوستىق سەرىكتەستىك قارىم - قاتىناسىن ستراتەگيالىق سەرىكتەستىك قارىم - قاتىناس دەڭگەيىنە كوتەرۋگە قوسىلدى.
شي جينپيڭ حولنەسستىڭ 2 - كەزەكتى جۇڭگو حالقارالىق يمپورت كورمەسىنە قاتىناسۋ ءارى جۇڭگودا رەسمي ساپاردا بولۋ ءۇشىن جۇڭگوعا كەلگەندىگىن قارسى الدى. شي جينپيڭ بىلاي دەپ اتاپ كورسەتتى: جۇڭگو مەن يامايكا بىردەي دامۋ جولىنداعى ەلدەرگە جاتادى، ءبارى دە ءوزىن دامىتۋدىڭ شەشۋشى كەزەڭىندە تۇر، ەكى ەلدىڭ سەلبەستىگى اسا زور كومەسكى كۇشكە جانە كەڭ كولەمدى جارقىن بولاشاققا يە. ەكى جاقتىڭ بىرگە قۇلشىنىپ، جاڭا مەزگىلدەگى جۇڭگو مەن يامايكانىڭ ستراتەگيالىق سەرىكتەستىك قارىم - قاتىناسىنىڭ ۇزدىكسىز العا قاراي دامۋىن ىلگەرىلەتۋدى ءۇمىت ەتەمىن.
شي جينپيڭ بىلاي دەپ باسا دارىپتەدى: جۇڭگو مەن يامايكا ەكى جاق جوعارى جىكتەگىلەردىڭ بارىس - كەلىسىن ساقتاپ، ەل باسقارۋ تاجىريبەسى جونىندە اۋىس - كۇيىستى كۇشەيتىپ، دامۋ ستراتەگياسىن ۇشتاستىرۋدى كۇشەيتىپ، ”ءبىر بەلدەۋ، ءبىر جول“دى بىرگە قۇرۋدى وراي ەتىپ، سەلبەستىكتىڭ قارقىنىن ارتتىرۋدى، ساپاسىن جوعارىلاتۋدى ىلگەرىلەتىپ، گۋمانيتارلىق اۋىس - كۇيىستى جيىلەتۋ كەرەك. جۇڭگو جاق جۇڭگو كاسپورىندارىنىڭ يامايكاعا بارىپ قارجى قوسۋىن قولدايدى، يامايكانىڭ ءتىپتى دە كوپ ەرەكشە، ابزال ونىمدەرىنىڭ جۇڭگوعا كىرۋىن قارسى الادى. جۇڭگو جاق يامايكا جاقپەن بىرگە جۇڭگو مەن كارايپ ەلدەرى قارىم - قاتىناسىن دامىتۋىن ىلگەرىلەتۋگە كۇش سالىپ ءارى حالىقارالىق جانە كوپ جاقتى سالالارداعى سەلبەستىكتى كۇشەيتىپ، كوپ جاقتىلىقتى جانە كوپ جاقتى ساۋدا ءتۇزىلىسىن بىرگە قورعاپ، دامۋ جولىنداعى ەلدەردىڭ ورتاق مۇددەسىن قورعاۋدى قالايدى.
حولنەسس مىنالاردى ءبىلدىردى: جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعى ساتىندە ۇسىنىس بويىنشا جۇڭگودا ساپاردا بولعانىمدى ءارى 2 - كەزەكتى جۇڭگو حالىقارالىق يمپورت كورمەسىنە قاتىناسقانىمدى ەرەكشە داڭق سەزىنەمىن. جۇڭگونىڭ 70 جىلدان بەرى، وتە - موتە، رەفورما جاساعان، ەسىك اشقان 40 جىلدان بەرى قول جەتكىزگەن ۇلى جەتىستىكتەرى دۇنيە جۇزىندە سيرەك كەزدەسەدى، نەشە ءجۇز ميلليونداعان حالىقتى كەدەيلىكتەن ارىلتتى ءارى بۇكىل الەمدىك ەكونوميكانى جونگە سالۋدى ىلگەرىلەتتى، يامايكانى قامتىعان ءار ەل حالقىن يگىلىككە كەنەلدىردى، يامايكا جاق بۇعان شىن جۇرەكتەن سۇيىنەدى. ءسىزدىڭ حالىقارالىق يمپورت كورمەسىن وتكىزۋ دارىپتەمەڭىز ۇزاقتى كوزدەيتىن كورەگەندىكتى ايگىلەدى. جۇڭگونىڭ دۇنيە جۇزىنە بازارىن اناعۇرلىم اشىق ۇستاۋى، تۇتاس جەر شارى ەكونوميكاسىنىڭ باياندى دامۋىن بارىنشا جەبەيدى. يامايكا جاق جۇڭگونىڭ تابىستى دامۋ تاجىريبەلەرىن ۇيرەنۋدى، ۇلگى الۋدى ءۇمىت ەتەدى. ”ءبىر بەلدەۋ، ءبىر جول“دى بىرگە قۇرۋعا بەلسەندى ات سالىسىپ، نەگىزدىك قۇرىلعى قۇرىلىسى، زات اينالىمى، ساياحات، مادەنيەت، دەنە تاربيە سياقتى سالالارداعى سەلبەستىكتى، اۋىس - كۇيىستى كۇشەيتۋدى قالايدى. يامايكا جاق كوپ جاقتىلىقتى باتىل قولدايدى، كارايپ ءوڭىرى ەلدەرىنىڭ جۇڭگومەن قارىم - قاتىناسىن جەبەۋدە بەلسەندى رول اتقارۋدى قالايدى.
ديڭ شۋەشياڭ، لي چياڭ، ياڭ جيەچى، ۋاڭ ي، حى ليفىڭ قاتارلىلار كەزدەسۋگە قاتىناستى.
