ياڭ چيچۋاننىڭ سۋرەتى (ماتەريال سۋرەت). شينحۋا اگەنتتىگى تاراتقان
شينحۋا اگەنتتىگىنىڭ 10 - ايدىڭ 23 - كۇنى گۋاڭجوۋدان بەرگەن حابارى (تىلشىلەر لي شيۇڭيىڭ، ماۋ شين). نوپوس باسقاراتىن حالىق ساقشىسى بولعاندا تۇرعىندارمەن ەتەنە بولىپ، قاراستىلىعىنداعى ءوڭىردىڭ قوعامدىق اماندىعى كورنەكتى تۇردە جاقسارىپ، ەلەۋلى دەلو تۋىلمادى. ساقشى بولىمشەسىنىڭ ورىنباسار باستىعى مىندەتىنە وسىرىلگەننەن كەيىن، ۇنەمى بۇقارامەن ىشكەرىلەي ارالاسىپ، قاجىرلىلىقپەن قىزمەت ىستەپ، قايتا - قايتا دەلولاردى اشىپ، ءوزى جاۋاپتى كاسىپورىنداردىڭ حاۋىپسىزدىگىن قورعاۋ قىزمەتىنە قىرۋار كۇش سالىپ، كاسىپورىندار جاعىنان ”ەكونوميكالىق قۇرىلىستىڭ قورعاۋشىسى“ دەگەن اتاق الدى، ول ياڭ چيچۋان قۇربان.
ياڭ چيچۋان، 1956 - جىلى تۋعان، فوشان سانشۇي اۋدانى داتاڭ قالاشىعىنان. 1975 - جىلى ياڭ چيچۋان داتاڭ قالاشىعىنىڭ سوتسياليستىك تاربيە قىزمەت اترەتىنە قاتىناسقان ءارى جۇڭگو كوممۋنيستىك پارتياسىنا مۇشە بولعان، وسى جىلى شاقىرۋ بويىنشا اسكەرگە قاتىناسقان. 1985 - جىلى 12 - ايدا ياڭ چيچۋان كاسىپ اۋىستىرىپ قالا رايونىنداعى قوعام حاۋىپسىزدىگى بولىمشە مەكەمەسىندە حالىق ساقشىسى بولدى. ونىڭ قاراستىلىعىنداعى حۇڭچياڭ تۇرعىندار كوميتەتى يۇڭ - ءان ساقشى بولىمشەسىنە قاراستى وڭىردەگى ەڭ ۇلكەن تۇرعىندار كوميتەتى، قالا مەن اۋىل تۇتاسقان جەرگە ورنالاسقان، قالا، قالاشىق تۇرعىندارى دا، سۋ ۇستىندە تۇراتىن تۇرعىندار دا، اۋىل - قىستاق تۇرعىندارى دا بار، اماندىقتى قورعاۋ جاعدايى كۇردەلى ەدى. ول ۇنەمى كوشەلەردى ارالاپ، قاراستىلىعىنداعى ءوڭىردىڭ جاعدايىن ۇعىسىپ بىلەتىن، كەيدە باسقا قىزمەتتەردەن شىعا الماي، كۇندىز ءوز جاۋاپكەرشىلىگىندەگى وڭىرگە بارا الماسا، كەشكە ۋاقىت شىعارىپ، تۇرعىنداردىڭ ۇيىنە بارىپ، ولاردىڭ مۇڭ - مۇقتاجىن، حال - جاعدايىن ۇعىساتىن. سونىمەن وسى جەردىڭ قوعامدىق اماندىعى بارىنشا جاقساردى.
1989 - جىلى 9 - ايدا، ياڭ چيچۋان يۇڭ - ان ساقشى بولىمشەسىنىڭ ورىنباسار باستىعى مىندەتىنە تاعايىندالعاننان كەيىن، ۇنەمى تۇرعىنداردىڭ جاعدايىن ۇعىسىپ تۇردى، كەشتەردە توڭىرەكتى شارلادى. 1992 - جىلى 9 - ايدا، قاراستى وڭىرىندەگى ءبىر زاۆودتا ەرەكشە اۋىر دەلو تۋىلادى. سول كەزدە ول سالماقتى اسقازان اۋرۋىنا شالدىققان بولاتىن، دەلونى دەر كەزىندە اشۋ ءۇشىن، ول اۋرۋعا شىداپ، قىزمەتتەستەرىمەن بىرگە چيڭيۋانعا، گۋاڭجوۋعا 4 قايتارا بارىپ، اقىرى دەلونى اشىپ، زاۆودتى 100 مىڭ يۋاندىق ەكونوميكالىق زيانىنان امان الىپ قالادى. 1992 - جىلى 9 - ايدىڭ ءبىر كۇنى تۇستە، ياڭ چيچۋان قىزمەتتەن ءتۇسىپ ۇيىنە قايتىپ بارا جاتقان جولدا، ءبىر اجەيدى ۆەلوسيپەد سوعىپ، اياعىن سىندىرىپ كەتكەندىگىن بايقاپ، تاباندا اجەيدى شيپاحاناعا جەتكىزەدى، ءوز جانىنان اقشا شىعارىپ، اجەيدىڭ شيپاحاناعا جاتۋ راسمياتتارىن وتەيدى، راسمياتتاردىڭ ءبارىن وتەپ، اجەيدى جايعاستىرىپ بولعاننان كەيىن، ءۇن - ءتۇنسىز كەتىپ قالادى. وسى جىلى ياڭ چيچۋاننىڭ اكەسى ناۋقاستانادى، اپەكەسى دە مەرتىگەدى، ونىڭ ولارعا قارايلاساتىنداي ۋاقىتى بولمايدى، بۇل جونىندە ۇيىمعا دا ءتىس جارمايدى. وسى جىلعى كادرلار دەمالىسىنان ول ءبىر كۇن دە دەمالمايدى. قۇربان بولعاننان كەيىن، ونىڭ تارتپاسىنان دەمالىسىن تولىقتاپ دەمالۋ قاعازىنان 12سى بايقالادى، ول مۇنىڭ بىرەۋىن دە ىستەتپەپتى.
1992 - جىلى 12 - ايدىڭ 7 - كۇنى ساعات 18دە، ياڭ چيچۋان قىزمەتتەن قايتىپ، تيانچىڭ كوشەسىنەن ءوتىپ بارا جاتقاندا، ءبىر جىگىتتىڭ سومكە جانە نەيلون دوربا اكەتىپ بارا جاتقاندىعىن، ءىس - ارەكەتىنىڭ كۇدىكتى ەكەندىگىن بايقايدى دا، ونىڭ جانىنا بارىپ، ءوز سالاۋاتىن تانىستىرعاننان كەيىن ونى تەكسەرەدى. بۇل جىگىت قاشىپ كەتپەك بولعاندا، ياڭ چيچۋان ونى ۇستاپ الادى، جىگىت دەرەۋ ناگانىن سۋىرىپ الىپ، وعان ارت - ارتىنان 2 وق اتادى، وق ياڭ چيچۋاننىڭ باسىنا تيەدى، ول جاراسىن قولىمەن باسىپ، اۋىرعانىنا شىداپ، سودىردى تاس قىپ قۇشاقتاپ العاندا، سودىر وعان تاعى 6 وق اتادى، وق ونىڭ باسىنا جانە جۇرەگىنە تيەدى. ياڭ چيچۋان ەرەن قايسارلىقپەن 30 نەشە مەتر جەرگە دەيىن قۋىپ بارىپ، سودىردى الىپ ۇرادى، ءال - دارمەنى قالماعاندىقتان، ول سودىردىڭ قاشىپ كەتۋىن توسۋعا شاراسىز قالادى، جولدا 30 نەشە مەترگە سوزىلعان قان داعى قالادى، ەڭ سوڭىندا جاراقاتى تىم اۋىر بولعاندىقتان، ەرلىكپەن قۇربان بولادى.
1992 - جىلى 12 - ايدا، ياڭ چيچۋانعا فوشان قالالىق پارتكوم، قالالىق ۇكىمەت ”حالىق قورعاۋشىسى“ داڭق اتاعىن بەردى، گۋاڭدۇڭ ولكەلىك حالىق ۇكىمەتى ونى قۇربان دەپ تانىدى. 1993 - جىلى 2 - ايدا، ياڭ چيچۋانعا ”مەملەكەتتىك قوعام حاۋىپسىزدىگى شەبىندەگى ءبىرىنشى دارەجەلى قاھارمان ۇلگى“ اتاعى تولىقتاپ بەرىلدى.
فوشان قالالىق قوعام حاۋىپسىزدىگى مەكەمەسىنىڭ قاتىستى جاۋاپتىسى مىنالاردى ءبىلدىردى: ياڭ چيچۋان حالىقتىڭ مۇددەسىن قورعاۋ ءۇشىن، قانقۇيلى قارۋلى قىلمىسكەرمەن قۇر قول ەرلىكپەن ايقاسىپ، قاندى شايقاس جۇرگىزدى، قۇربان بولعاندا نەبارى 36 جاستا عانا ەدى. ول ءوزىنىڭ قىسقا دا شۇعىلالى ومىرىمەن ءبىر كوممۋنيستىك پارتيا مۇشەسىنىڭ كوممۋنيزم ىستەرى ءۇشىن ءومىر بويى كۇرەس جۇرگىزۋ سەرتىن امالياتتا ايگىلەپ، ومىرىمەن قاھارماندىق ماداق جىرىن جازدى.
