جەرگىلىكتى ۋاقىت 11 - ايدىڭ 13 - كۇنى مەملەكەت ءتوراعاسى شي جينپيڭ برازيليادا برازيليانىڭ زۇڭتۇڭى بولسونارومەن كەڭەستى. سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن
شينحۋا اگەنتتىگىنىڭ 11 - ايدىڭ 13 - كۇنى برازيليادان بەرگەن حابارى (تىلشىلەر چىن ۋيحۋا، جاۋ يان، لۋ جيافي). جەرگىلىكتى ۋاقىت 11 - ايدىڭ 13 - كۇنى مەملەكەت ءتوراعاسى شي جينپيڭ برازيليادا برازيليانىڭ زۇڭتۇڭى بولسونارومەن كەڭەستى.
شي جينپيڭ بىلاي دەپ اتاپ كورسەتتى: الدىڭعى ايدا بولسونارو زۇڭتۇڭ جۇڭگودا ءساتتى تۇردە مەملەكەت ىستەرى ساپارىندا بولدى، ءبىزدىڭ كەلىسكەن ورتاق تانىمىمىز بەلسەندى تۇردە تياناقتاندىرىلۋدا. تاياۋدا عانا اياقتالعان 2 - كەزەكتى جۇڭگو حالىقارالىق يمپورت كورمەسىندە برازيليادان كورمەگە قاتىسۋشى جاقتىڭ جاساعان ساۋدا توقتامىنىڭ سوماسى الدىڭعى كەزەكتەگىدەن 3.6 ەسە ارتىپ، ناتيجەسى سۇيىنەرلىكتەي بولدى. جۇڭگو مەن برازيليا شىعىس، باتىس جارتى شارداعى ەڭ ۇلكەن بازارى جاڭادان گۇلدەنگەن ەلدەر رەتىندە، كەڭ كولەمدى ورتاق مۇددەسى بار. ءبىز برازيليانىڭ دامۋ بولاشاعىنان ءۇمىت كۇتەمىز، جۇڭگو - برازيليا سەلبەستىگىنە سەنىمىمىز كامىل، برازيليامەن دامۋ تاجىريبەلەرىنەن تەڭ ءبولىسىپ، دامۋ جەتىستىكتەرىنەن تەڭ يگىلىكتەنىپ، بىرگە گۇلدەنۋدى جۇزەگە اسىرۋدى قالايمىز. مەن سىزبەن بىرگە جۇڭگو - برازيليا قارىم - قاتىناسىنىڭ دامۋ بەتالىسىن ويداعىداي يگەرۋدى، ويداعىداي جەتەكشىلىك ەتۋدى قالايمىن.
شي جينپيڭ بىلاي دەپ باسا دارىپتەدى: جۇڭگو مەن برازيليا ەكەۋى دە ءىرى ەلدەر، ەكى جاق ستراتەگيالىق تاباندىلىقتى ساقتاپ، ءوزارا قۇرمەت ەتۋگە، تەڭ تۇرعىدا مامىلە جاساۋعا تاباندى بولىپ، قارىم - قاتىناستى كۇشەيتىپ، ءوزارا سەنىمدى بەكەمدەۋى كەرەك. ءبىر - بىرىنە بازارلارىن اشىپ، اۋىل شارۋاشىلىعى ونىمدەرى، تەمىر رۋداسى، شيكى مۇناي سياقتى نەگىزدىك ونىمدەر جونىندە ۇزاق ۋاقىتتىق، ورنىقتى، تىكە قامداۋ ارناسىن قۇرۋدى قاراستىرۋ كەرەك. جۇڭگو جاق ءوز ەلى كاسىپورىندارىنىڭ برازيليانىڭ نەگىزدىك قۇرىلعى قۇرىلىسىنا بەلسەنە ات سالىسۋىن قولداپ، ۇلاسۋدى، تۇتاسۋدى جەبەيدى. سيفرلى ەكونوميكا، جاڭا ۇرپاق حابارلاسۋ، ماتەريال عىلىمى، بيوتەحنيكا سياقتى سالالارداعى سەلبەستىكتەردى ىلگەرىلەتەدى، جۇڭگو - برازيليا جەر شارى بايلىعى جاساندى سەرىگىنىڭ تاياۋدا تاعى دا ءساتتى ۇشىرىلۋىن الدىن الا قۇتتىقتايدى ءارى كەيىنگى سەلبەستىكتەردى بىرگە ىلگەرىلەتەدى. گۋمانيتارلىق بارىس - كەلىستى كەڭەيتىپ، ادامداردىڭ بارىس - كەلىسىنىڭ قولايلىلانۋىن جەبەۋ كەرەك. جۇڭگو جاق برازيليا ۇكىمەتىنىڭ امازونكا جاڭبىرلى ورمانىنداعى اپاتقا قارسى تۇرۋداعى قۇلشىنىستارىن قولدايدى، برازيليا جاقتىڭ اپاتتى جەڭۋگە قابىلەتىنىڭ جەتەتىندىگىنە سەنەدى. جۇڭگو مەن لاتىن امەريكاسى ەلدەرىنىڭ جان - جاقتى اۋىس - كۇيىس سەلبەستىگىن ورىستەتۋىن بىرگە ىلگەرىلەتىپ، كوپ جاقتىلىققا تاباندى بولىپ، اشىق دۇنيە ءجۇزى ەكونوميكاسىن قۇرىپ، بازارى جاڭادان گۇلدەنگەن ەلدەردىڭ ورىندى دامۋ ۇقىق - مۇددەسىن قورعاۋ كەرەك. جۇڭگو جاق برازيليانىڭ بريكس ەلدەرى باسشىلارىنىڭ ديدارلاسۋىن وتكىزۋىن قولدايدى، ديدارلاسۋدىڭ ءساتتى بولۋىن ءار جاقپەن بىرگە ىلگەرىلەتۋدى قالايدى.
بولسونارو مىنالاردى ءبىلدىردى: تاياۋدا جۇڭگوداعى مەملەكەت ىستەرى ساپارىم ءساتتى بولدى، ءبىز برازيليا - جۇڭگو قارىم - قاتىناسىن دامىتۋ جونىندە كوپتەگەن ورتاق تانىمعا كەلدىك، مەن برازيليا جاقتىڭ قاتىستى تاراۋلارىنىڭ تەزىرەك تياناقتاندىرۋى جونىندە نۇسقاۋ بەردىم. جۇڭگو دۇنيە جۇزىندەگى ماڭىزدى ءىرى ەل، برازيليانىڭ ءبىرىنشى ۇلكەن ساۋدا سەرىگى. برازيليا حالقى جۇڭگو حالقىنا سۇيىنەدى، قۇرمەت ەتەدى جانە دوستىق سۇيىسپەنشىلىگى بار، برازيليا - جۇڭگو سەلبەستىگى برازيليانىڭ بولاشاقتىق دامۋى جونىنەن كۇن سايىن ماڭىزدى مانگە يە بولۋدا. برازيليا - جۇڭگو ەكونوميكاسىنىڭ ءبىرىن - ءبىرى تولىقتاۋ سيپاتى وتە كۇشتى، سەلبەستىك سالالارى كۇن سايىن كەڭەيۋدە. برازيليا جاق جۇڭگو كاسىپورىندارىنىڭ برازيلياعا كەلىپ قارجى قوسىپ، نەگىزدىك قۇرىلعى قۇرىلىسى جانە تەمىر رۋداسى، مۇناي - تابيعي گاز سياقتى ەنەرگيا سالالارىندا سەلبەستىكتى كۇشەيتۋىن قارسى الادى. برازيليا جاق جۇڭگونىڭ اشىق بازارى اكەلگەن ماڭىزدى ورايعا باسا ءمان بەرەدى، ەكى جاقتى ساۋدانى كەڭەيتىپ، برازيليانىڭ اناعۇرلىم مول اۋىل شارۋاشىلىعى ونىمدەرىنىڭ جۇڭگوعا كىرۋىن ىلگەرىلەتۋدى ءۇمىت ەتەدى، برازيليا جاق جۇڭگو كاسىپورىندارى مەن ونىمدەرىنىڭ دە برازيلياعا كىرۋىنە تاماشا شارت - جاعداي ازىرلەۋدى قالايدى. برازيليا جاق قولايلىلاندىرۋ شارالارىن قولدانىپ، ەكى جاقتىڭ ادامدارىنىڭ قارىم - قاتىناسى مەن گۋمانيتارلىق بارىس - كەلىسىن جەبەۋدى قالايدى. جۇڭگو جاقتىڭ امازونكا جاڭبىرلى ورمانى ماسەلەسىندە برازيليا جاقتىڭ يەلىك ۇقىعىن قولداعاندىعىنا العىس ايتادى، جۇڭگو جاقپەن ورگانيزمدەردىڭ كوپ تۇرلىلىگىن قورعاۋ ماسەلەسىندە سەلبەستىك ورىستەتۋدى قالايدى. جۇڭگو جاقتىڭ برازيليا جاقتىڭ بريكس ەلدەرى باسشىلارىنىڭ ديدارلاسۋىن وتكىزۋىنە قولداۋ كورسەتكەندىگىنە العىس ايتادى، ءار جاقپەن سەلبەسۋدى، سايكەسۋدى كۇشەيتىپ، ديدارلاسۋدىڭ بەلسەندى جەتىستىكتەرگە قول جەتكىزۋىن ىلگەرىلەتۋدى قالايدى.
بولسونارو مىنانى ءبىلدىردى: جۇڭگونىڭ برازيلياعا دەگەن سەنىمى مەن دوستىعىنا العىس ايتامىن. برازيليا جۇڭگومەن كەڭ كولەمدى سالالارداعى سەلبەستىكتى كۇشەيتىپ، ءداستۇرلى دوستىقتى تەرەڭدەتىپ، ەكى ەل حالىقتارىن باقىتقا كەنەلتۋگە ۇزاق بولاشاقتىق تۇرعىدان ءمان بەرەدى.
كەڭەستەن كەيىن، ەكى ەلدىڭ مەملەكەت باسشىلارى تىلشىلەرمەن بىرگە كەزدەستى ءارى كوپ ءتۇرلى ەكى جاقتى سەلبەستىك حۇجاتتارىن اۋىستىرۋعا كۋا بولدى.
ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.
