شينحۋا اگەنتتىگىنىڭ 10 - ايدىڭ 24 - كۇنى چاڭشادان بەرگەن حابارى (ءتىلشى جوۋ نان). ”شياڭبەيدىڭ قاقپاسى“ اتالعان حۋنان ولكەسى لينشياڭ قالاسىنىڭ باتىس وڭتۇستىگىنەن مولشەرمەن ءبىر كيلومەتر كەلەتىن جەردە ۋجيانشان مەملەكەتتىك ورمان باقشاسى بار. كوزى تىرىسىندە وسى ورماندى قورعاعان ءارى وسى ءۇشىن قىمباتتى ءومىرىن ارناعان لۋ يۇنشين قۇربان وسىندا ماڭگىلىك ۇيقىدا جاتىر.
باقشانىڭ قاقپاسىنان كىرىپ الدىعا 500 مەتر جۇرسەڭىز، لۋ يۇنشين قۇرباننىڭ قابىرىنا جەتەسىز، مۇنى لينشياڭ قالالىق حالىق ۇكىمەتى 1995 - جىلى 8 - ايدا سالعان. قۇلپىتاسقا ”راقىمسىز لاۋلاعان وت التىن رۋحتى سومدادى، اسقاق تۇلعا جاسىل تاۋعا جەرلەندى“ دەپ جازىلعان، مۇندا لۋ يۇنشين قۇرباننىڭ جان تەبىرەنتەتىن ىزگى ىستەرى ەستەلىككە الىنعان. ءار جىلى چيڭميڭ كەزىندە كوپتەگەن كادر - بۇقارا ونىڭ قابىرىنا كەلىپ، گۇل قويىپ، ونى ساعىنا ەسكە الادى.
لۋ يۇنشين، 1949 - جىلى دۇنيەگە كەلگەن، 1971 - جىلى 5 - ايدا جۇڭگو كوممۋنيستىك پارتياسىنا مۇشە بولعان. 1993 - جىلى 2 - ايدىڭ 6 - كۇنى، ياعني يۋانشياۋ مەرەكەسى كۇنى، شياڭبەيدىڭ اۋىل - قىستاقتارىندا قاس قارايعاندا اتا - بابالارىنىڭ قابىرىنا شىراق اپارىپ، تۇتانعىش تۇتاتىپ، اتا - باباسىنىڭ ارۋاعىنا سيىناتىن ءداستۇرلى سالت ەرەكشە ۇلكەن ءورت حاۋپىن تۋدىرادى. وسى كۇنى سول كەزدە لينشياڭ قالالىق قوعام حاۋىپسىزدىگى مەكەمەسى ۋجيانشان ورمانشىلىق ساقشى بولىمشەسىنىڭ ورىنباسار باستىعى مىندەتىن وتەيتىن لۋ يۇنشين وتكەن جىلدارداعى سياقتى تۋىس - تۋعاندارىنا سەرىك بولىپ مەرەكە وتكىزۋگە بارمايدى، قايتا كەزەكشى قىزمەتتەستەرىن باستاپ، توڭىرەگى بىرنەشە 10 شارشى كيلومەتر كەلەتىن ۋجيانشاندى ارالاپ، بۇقارانى تاۋعا وت الىپ شىقپاۋعا ءناسيحاتتايدى ءارى بۇلاي ىستەۋدى توسىپ، تاۋ ءورتىن وشىرۋگە ۇيىمداستىرادى.
2 - ايدىڭ 7 - كۇنى تاڭعى ساعات 2دە ورتتەن ساقتانۋ، ورتتەن قۇتقارۋدىڭ ءبىرىنشى شەبىندە ۇزدىكسىز 10 نەشە ساعات شايقاسقان لۋ يۇنشين شارشاپ - شالدىعىپ، ۇيىنە جەتىپ كيىمىن شەشكەنشە، سويلەسكىدەن ۋجيانشان ورمانشىلىق الاڭى 15 ورمان رايونىندا ءورت كەتكەندىگى جونىندەگى حاباردى ەستيدى. ءورت جاعدايىنىڭ ءوزى بۇيرىق، لۋ يۇنشين قول ەلەكترىن الا سالىپ ءورت اپاتى تۋىلعان جەرگە اتتانادى.
ءورت تۋىلعان جەرگە جەتكەننەن كەيىن، لۋ يۇنشين باسقا ورىنداردان كومەككە كەلگەن 30 نەشە جولداستى باستاپ، ولارعا قولباسشىلىق ەتىپ، ءورت وشىرۋگە جەدەل كىرىسەدى، ول قولباسشى دا، جاۋىنگەر دە بولدى. 7 ساعاتتان ارتىق ۋاقىت قايراتتانا ارپالىسۋ ارقىلى ولار جوتالارداعى ءورت جالىندارىن ءبىر - بىردەن وشىرەدى.
تۇستەن بۇرىن ساعات 10دا ەڭ سوڭعى جوتانىڭ ءورتىن ءوشىرىپ جاتقاندا، كەنەتتەن بوران سوعىپ، ءورت لاۋلاپ جانىپ، جەردەگى ءورت ءاپ - ساتتە اعاشتاردىڭ باسىنا تۇتاسادى. 130 نەشە رەتتەن ارتىق ءورت ءوشىرۋ تاجىريبەسى بار لۋ يۇنشين اۋىر قاتەردىڭ تونگەندىگىن، ەگەر وسى جەردە ۇزبەي وت اراسىندا تۇرا بەرگەندە اۋىر ءولىم - ءجىتىم جاعدايى تۋىلاتىندىعىن دەرەۋ اڭعارادى. ول باتىلدىقپەن بۇيرىق ءتۇسىرىپ، وسىندا ءورت ءوشىرىپ جۇرگەن 30 نەشە جولداستان دەرەۋ حاۋىپسىز جەرگە شەگىنۋدى تالاپ ەتەدى دە، ءوزى ومىرىنە تونگەن حاۋىپتى ەلەمەستەن ارتتا قالىپ، كوپشىلىكتى ورماننان تارتىپپەن شەگىنۋگە ۇيىمداستىرادى. ەڭ سوڭعى ءبىر جولداس ورتتەن ساقتانۋ سىزىعىنىڭ سىرتىنا شەگىنىپ بولعاندا، لۋ يۇنشين لاۋلاعان ءورتتىڭ اراسىندا قالىپ، ەرلىكپەن قۇربان بولادى، سول كەزدە نەبارى 44 جاستا ەدى.
لۋ يۇنشين جولداس 1968 - جىلى قىزمەتكە قاتىناسىپ، ورمان جۇمىسشىسى بولعان، 1986 - جىلى ۋجيانشان ورمان قوعام حاۋىپسىزدىگى ساقشى بولىمشەسىنە قىزمەت اۋىستىرىپ كەلىپ، تاۋلى رايوندا 25 جىل تۇرعان. ول ىستەگەن كاسىبىن ءسۇيىپ، بەرىلە ىستەپ، قىزمەتكە شىن پەيىلىن سالىپ، شارشاپ - شالدىققانىنا قاراماستان، قىزمەتىنە ادال، كىرشىكسىز دە كوپشىل بولىپ، قالتقىسىز ۇلەس قوسىپ، بۇكىل ىنتا - پەيىلىمەن حالىق ءۇشىن قىزمەت ىستەدى، ىلگەرىندى - كەيىندى 130 نەشە رەتتەن استام ءورت ءوشىرۋ شايقاسىنا قاتىناستى، بۇعان قاتىستى 218 دەلونى تەكسەرىپ ءبىر جايلى ەتتى، زاڭعا قايشىلىق جاساعان 334 قىلمىسكەردى تۇتقىنداپ، مەملەكەت ءۇشىن 300 نەشە مىڭ يۋان ەكونوميكالىق زياننىڭ الدىن الدى، 32 رەت ولكە، قالا، اۋدان جاعىنان ماداقتالىپ - سيلاندى.
لۋ يۇنشين قۇربان بولعاننان كەيىن، 1993 - جىلى 8 - ايدىڭ 10 - كۇنى قوعام حاۋىپسىزدىگى مينيسترلىگى وعان ”مەملەكەتتىك قوعام حاۋىپسىزدىگى شەبىندەگى 1 - دارەجەلى قاھارمان ۇلگى“ داڭق اتاعىن بەردى.
قاھارمان رۋحى ۇرپاقتان - ۇرپاققا جالعاستى. ۇلەس قوسۋ رۋحىنا مۇراگەرلىك ەتىپ، تۇنىق سۋ، جاسىل تاۋدى ويداعىداي قورعاۋ لۋ اۋلەتى ۇرپاقتارىنىڭ وسكەلەڭ بورىشىنا اينالدى.
ءار جىلى قىس ماۋسىمى ورمان ءورت اپاتى كوپ تۋىلاتىن مەزگىل، لينشياڭ قالالىق ورمان قوعام حاۋىپسىزدىگى بولىمشە مەكەمەسىندە قىزمەت ىستەيتىن 2 - ۇلى لۋ ميڭ ۇنەمى ءورت ءوشىرۋدىڭ ءبىرىنشى شەبىندە جان قيارلىقپەن شايقاس جۇرگىزەدى. ءار جولى ءتۇن ورتاسىندا ول ءورت وشىرۋگە اتتانعاندا، وتباسىنداعىلار ونى ورىندارىنان تۇرىپ اتتاندىرىپ، ”حاۋىپسىزدىككە، ءسوز جوق، كوڭىل ءبول!“ دەپ قايتا - قايتا تاپسىرادى.
لينشياڭ قالالىق ورمان قوعام حاۋىپسىزدىگى بولىمشە مەكەمەسىنىڭ باستىعى ياۋ موحۋا بىلاي دەدى: وسى جىلدارى، باسشىلار مەن كاسىپتەستەرىنىڭ كومەگىندە، قولداۋىندا، لۋ ميڭ ءتۇرلى ورمانشىلىق دەلولارىنان 1000نان استامىن ءبىر جايلى ەتتى، مۇنىڭ 20 نەشەسى اۋىر، ەرەكشە ۇلكەن دەلو. لۋ ميڭ مەن ونىڭ كاسىپتەستەرى 120 نەشە قىلمىس كۇماندىسىن تۇتقىندادى، ونىڭ جەكە وزىنە ىلگەرىندى - كەيىندى 30 نەشە رەت ەڭبەك جازىلدى، ماداقتالدى جانە وزات بولىپ باعالاندى.
”مەنىڭ قاھارمان اكەم بار، مەن ونىڭ ءىزىن قۋىپ العا ىلگەرىلەي بەرەمىن...“. بيىل 9 - ايدىڭ 4 - كۇنى لۋ يۇنشين، لۋ ميڭ اكەلى - بالالى ەكەۋىنىڭ ىزگى ىستەرى باستى شىعارماشىلىق مازمۇنى ەتىلگەن قىسقا بەينە جازبا «مۇراگەرلىك ەتۋ» ورتالىق ساياسي - زاڭ كوميتەتى باسقارىپ وتكىزگەن 4 - كەزەكتى تىنىش جۇڭگو ميكرو فيلم، ميكرو بەينەجازبا، ميكرو انيماتسيا جارىسىندا تاڭداۋلى تۋىندى سيلىعىنا يە بولدى.
