شينحۋا اگەنتتىگىنىڭ 11 - ايدىڭ 13 - كۇنى برازيليادان بەرگەن حابارى (تىلشىلەر شۇي لينگۇي، نان چىن). جەرگىلىكتى ۋاقىت 11 - ايدىڭ 13 - كۇنى مەملەكەت ءتوراعاسى شي جينپيڭ برازيليادا رەسەيدىڭ زۇڭتۇڭى پۋتينمەن كەزدەستى.
شي جينپيڭ بىلاي دەپ اتاپ كورسەتتى: بيىل جۇڭگو مەن رەسەي قارىم - قاتىناسى بۇرىنعىعا مۇراگەر، كەيىنگىگە بۇيداگەر بولاتىن، الدىڭعىلاردىڭ ءىزىن باسىپ، بولاشاققا جول الاتىن ماڭىزدى جىل. ەكى جاق ديپلوماتيالىق قارىم - قاتىناس ورناتقاندىعىنىڭ 70 جىلدىعىن سالتاناتپەن قۇتتىقتاپ، ءبىر قىدىرۋ باي مازمۇندى الۋان ءتۇرلى قيمىلدار وتكىزدى، جۇڭگو مەن رەسەيدىڭ جەرگىلىكتى ورىندارىنىڭ سەلبەستىك، اۋىس - كۇيىس جىلى ءساتتى اياقتالۋ الدىندا تۇر، اسىرەسە، ءسىز ەكەۋىمىز جۇڭگو مەن رەسەيدىڭ جاڭا داۋىردەگى جاپپاي ستراتەگيالىق ىستەستىك سەرىكتەستىك قارىم - قاتىناسىن دامىتۋدى بىرگە جاريالاپ، ەكى ەل قارىم - قاتىناسىن جاڭا تاريحي بەلەسكە كوتەردىك.
شي جينپيڭ بىلاي دەپ باسا دارىپتەدى: جاڭا داۋىردە جاڭا شارا، جاڭا ىسكەرلىك بولۋ كەرەك. ەكى جاق ۇزدىكسىز تىزە قوسا قۇلشىنىپ، حالىقارالىق جاعدايدىڭ دامۋىمەن، وزگەرىسىمەن ۇشتاسىپ، ءوز ەلىنىڭ دامۋ جانە ەكى جاقتىڭ سەلبەستىك قاجەتىنە نەگىزدەلىپ، ءورىس اشا جاڭالىق اشىپ، جۇڭگو - رەسەي قارىم - قاتىناسىنىڭ جوعارى دەڭگەيدە بەلسەندى، اقاۋسىز دامۋ اۋقىمىن ساقتاۋدى جەبەپ، جاڭا جەتىستىكتەرگە ۇزدىكسىز قول جەتكىزىپ، ەكى ەل حالىقتارىنا اناعۇرلىم جاقسى باقىت جاراتىپ، وڭىرگە، سونداي - اق دۇنيە جۇزىنە تيىمدىلىك جەتكىزۋ كەرەك.
شي جينپيڭ بىلاي دەپ اتاپ كورسەتتى: كەزەكتە حالىقارالىق جاعدايدا كۇردەلى دە تەرەڭ وزگەرىستەر ۇزدىكسىز تۋىلىپ، ورنىقسىزدىق، تۇراقسىزدىق فاكتورلارى كوبەيدى. جۇڭگو مەن رەسەي ستراتەگيالىق ىستەستىكتى قويۋلاتىپ، حالىقارالىق قارىم - قاتىناستىڭ نەگىزگى ولشەمدەرىن قول ۇستاسا قورعاپ، سىڭار جاقتىلىققا، زورەكەرلىك ارەكەتتەرگە قارسى تۇرىپ، باسقا ەلدەردىڭ ىسىنە كيلىگۋگە قارسى تۇرىپ، وزدەرىنىڭ يەلىك ۇقىعى مەن حاۋىپسىزدىگىن قورعاپ، ءادىل، تۋراشىل حالىقارالىق ورتانى بىرگە تۇلعالاۋ كەرەك.
شي جينپيڭ بىلاي دەپ باسا دارىپتەدى: تاياۋدا عانا اياقتاعان 2 - كەزەكتى جۇڭگو حالىقارالىق يمپورت كورمەسىندە رەسەي جاقتىڭ كورمەگە قاتىناسقان كاسىپورىندارىنىڭ ساۋداعا كەلىسۋ سوماسى وتكەن كەزەكتەگىدەن ％74 ارتتى. ەكى جاقتى ساۋدا كولەمىن ۇزدىكسىز كەڭەيتۋ كەرەك. جۇڭگو - رەسەي شىعىس جەلى تابيعي گاز قۇبىرى نىسانى جۋىردا وندىرىسكە قوسىلىپ، گاز جەتكىزىلەدى، ەكى ەلدىڭ ەنەرگيا سالاسىنداعى اناعۇرلىم كوپ ستراتەگيالىق ۇلكەن نىساندارىنىڭ تياناقتانىپ، جەمىس بەرۋىن كۇتەمىن. كەلەر جىلى، ونان ارعى جىلى جۇڭگو - رەسەي عىلىم - تەحنيكادا جاڭالىق اشۋ جىلىنىڭ مول تابىستارعا قول جەتكىزۋىن تىلەيمىن. ”ءبىر بەلدەۋ، ءبىر جول“ باستاماسىنىڭ ەۆروپا - ازيا ەكونوميكالىق وداعىمەن ۇشتاسۋىن ىلگەرىلەتۋدە ۇزدىكسىز جاڭا ىلگەرىلەۋشىلىكتەرگە قول جەتكىزۋ كەرەك.
شي جينپيڭ بىلاي دەپ اتاپ كورسەتتى: وسى رەتكى بريكس ەلدەرى باسشىلارىنىڭ ديدارلاسۋى حالىقارالىق ارنا وزگەرىسى مەن الەمدىك جونگە سالۋ وزگەرىسىنىڭ شەشۋشى ساتىندە وتكىزىلدى. جۇڭگو مەن رەسەي ءار جاقتىڭ ىنتىماعىن، سەلبەستىگىن كۇشەيتۋىن بىرگە ىلگەرىلەتىپ، بريكس ەلدەرىنىڭ كوپ جاقتىلىققا تاباندى بولۋىنىڭ، كوپ جاقتى ساۋدا ءتۇزىلىسىن قورعاۋىنىڭ بەلسەندى سيگنالىن تاراتۋ كەرەك. جۇڭگو جاق رەسەي جاقتىڭ كەلەر جىلى بريكس ەلدەرى باسشىلارىنىڭ ديدارلاسۋىن جانە شاڭحاي سەلبەستىك ۇيىمى جوعارى دارەجەلى باسشىلار باس قوسۋىن وتكىزۋىن بار كۇشپەن قولدايدى.
پۋتين مىنالاردى ءبىلدىردى: رەسەي - جۇڭگو قارىم - قاتىناسى بەكەم دە ورنىقتى، ەشقانداي سىرتقى فاكتوردىڭ ىقپالىنا ۇشىرامايدى، دامۋ بەتالىسى وتە جاقسى، كەلەشەگى توتەنشە كەڭ. رەسەي - جۇڭگو قارىم - قاتىناسى تەرەڭ دوستىق پەن ءوزارا سەنىمدىلىكتى نەگىز ەتكەن، ساياسي جاقتا تىعىز ىستەستىك جاساپ، ەكونوميكالىق جاقتا ءوزارا تيىمدىلىك جەتكىزىپ، سەلبەسىپ، حالىقارالىق ساحنادا تىعىز سايكەسۋى شىن مانىندەگى جاپپاي ستراتەگيالىق ىستەستىك سەرىكتەستىك ەسەپتەلەدى. رەسەي مەن جۇڭگو الەمدىك ستراتەگيالىق حاۋىپسىزدىكتى، ورنىقتىلىقتى قورعاۋ سياقتى جاقتاردا ماڭىزدى ورتاق تانىمعا جانە ورتاق مۇددەگە يە. كەزەكتەگى جاعدايدا، ەكى جاق ستراتەگيالىق بايلانىستى ۇزدىكسىز قويۋلاتىپ، ارىپتەسىنىڭ ءوز يەلىك ۇقىعىن، حاۋىپسىزدىگىن، دامۋ ۇقىق - مۇددەسىن قورعاۋىن باتىل قولداۋ ءتيىس. رەسەي جاقتا ەكى جاقتى ساۋدانىڭ كولەمى مەن ورەسىن ونان ارى جوعارىلاتىپ، ەۆروپا - ازيا ەكونوميكالىق وداعىن ”ءبىر بەلدەۋ، ءبىر جول“ باستاماسىمەن ۇشتاستىرۋدى جەدەل ىلگەرىلەتىپ، ونەركاسىپ، اۋىل شارۋاشىلىعى، عارىش، اۆياتسيا، ەنەرگيا، فينانس سياقتى سالالارداعى سەلبەستىكتى تەرەڭدەتىپ، جۇڭگوعا تابيعي گاز ەكسپورتىن ارتتىرۋ سەنىمى بار. گۋمانيتارلىق اۋىس - كۇيىس پەن جەرگىلىكتى ورىندار بارىس - كەلىسىن ۇزدىكسىز كۇشەيتۋ كەرەك. رەسەي جاق كەلەر جىلى بريكس ەلدەرىنىڭ كەزەكتى ءتوراعاسى مىندەتىن ۇستىنە الادى، جۇڭگو جاقپەن تىعىز سايكەسىپ، بريكس ەلدەرى سەلبەستىك مەحانيزمىنىڭ ىقپال قۋاتىن جوعارىلاتۋدى قالايدى. رەسەي جاق جۇڭگو جاقپەن شاڭحاي سەلبەستىك ۇيىمى اياسىنداعى سەلبەستىكتى، اسىرەسە، حاۋىپسىزدىك جانە لاڭكەستىككە قارسى تۇرۋ سەلبەستىگىن كۇشەيتۋدى قالايدى.
ەكى ەلدىڭ مەملەكەت باسشىلارى تاعى ورتاق كوڭىل ءبولىپ وتىرعان كەلەلى حالىقارالىق جانە وڭىرلىك ماسەلەلەر جونىندە ىشكەرىلەي پىكىر اۋىستىردى.
ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار كەزدەسۋگە قاتىناستى.
