تيانشان تورى   ›   جاڭالىقتار   ›   شينجياڭ حابارلارى

گولمۋد - كورلا تەمىر جولىنىڭ التىنتاۋ تۋنەلى تۇتاستى

ەڭ سوڭعى قيىندىقتى جەڭىپ، ەڭ ۇزىن ”كەسىپ ءوتۋدى“ جۇزەگە اسىردى

گولمۋد - كورلا تەمىر جولىنىڭ التىنتاۋ تۋنەلى تۇتاستى

  ءتىلشى لۋ فىڭباۋ 11 - ايدىڭ 19 - كۇنى چارقىلىقتان حابارلايدى. 11 - ايدىڭ 19 - كۇنى ساعات 11دەن 30 مينۋت وتكەندە، ”گۇرس“ ەتكەن جويقىن داۋىسقا ىلەسە، رايونىمىزداعى شينجياڭنان شىعاتىن تاعى ءبىر تەمىر جول ۇلكەن وتكەلى − گولمۋد - كورلا تەمىر جولىنداعى ءتۇيىندى تىزگىندەۋ سيپاتىنا يە ينجەنەريا التىنتاۋ تۋنەلى ءساتتى تۇتاستى.

  ”التىنتاۋ تۋنەلى گولمۋد - كورلا تەمىر جولىنداعى ەڭ سوڭعى تۋنەل، سونداي - اق جالپى لەنياداعى ەڭ ۇزىن تۋنەل، وسى قيىندىقتى جەڭگەننەن كەيىن، پويەز تاۋدان مولشەرمەن 10 مينۋتتا - اق كەسىپ وتەدى“، - دەدى جۇڭگو تەمىر جولى ءۇرىمجى مەكەمەسى توبى شەكتى سەرىكتەستىگى كورلا تەمىر جولى قۇرىلىسىنا قولباسشىلىق ەتۋ شتابىنىڭ جاۋاپتىسى.

  3 جىلدان ارتىق ۋاقىت تاباندى بولۋ جانە جاپالى ەڭبەك ەتۋ ارقىلى بۇگىنگى تاڭدا تۋنەل حاۋىپسىز تۇردە ءساتتى تۇتاستى، وسىنداعى تەمىر جول قۇرىلىسشىلارى تۋ بۇلعاپ، شاتتانا الاقايلادى. ”تۋنەل تۇتاستى، قانشاما جاپا تارتساق تا تاتيدى“، - دەدى جۇڭگو جۇڭتيە تۋنەل مەكەمەسى توبى شەكتى سەرىكتەستىگى گولمۋد - كورلا تەمىر جولى شينجياڭ S6 بولىگى نىسان مەڭگەرۋ ءبولىمىنىڭ ديرەكتورى گو چۋان.

  گولمۋد - كورلا تەمىر جولىنىڭ شينجياڭ بولىگىندە جيىنى 16 تۋنەل بار، مۇنىڭ 15ى التىنتاۋ سىلەمىندە، مۇندا التىنتاۋ تۋنەلىنىڭ جالپى ۇزىندىعى 13.195 كيلومەتر بولىپ، تۇتاس لەنياداعى ءبىرىنشى ۇزىن تۋنەل، ول گولمۋد - كورلا تەمىر جولىنداعى ءتۇيىندى تىزگىندەۋ سيپاتىنا يە ينجەنەريا، وسى تەمىر جول قۇرىلىسىنىڭ ەڭ سوڭعى قارقىنىنا قاتىستى.

  گو چۋاننىڭ تانىستىرۋىنا قاراعاندا، التىنتاۋ تۋنەلى بۇكىل لەنياداعى بىردەن - ءبىر ءبىرىنشى دارەجەلى ەرەكشە ۇزىن، ايرىقشا قاتەرلى تۋنەل، تۋنەلدىڭ گەولوگيالىق جاعدايى ەرەكشە كۇردەلى، 11 وپىرىلما بەلدەۋدەن وتەدى، مۇندا سۋ مول 9 ءوڭىر بار، تۋنەلدىڭ ىشىندە سۋ شىعۋ مولشەرى ەداۋىر اۋىر بولىپ، ءبىر كۇندە ەڭ كوپ بولعاندا 27 مىڭ تەكشەمەتر سۋ شىعادى، بۇل ولشەمدى 10 مالتاۋ كولشىگىندە ساقتالعان سۋمەن قارايلاس. قۇرىلىس بارىسىندا جەمىرىلمە جارتاس، ۇلعايعىش جارتاس، ءۇستىرت كەرنەۋى سياقتى ءتۇرلى ناشار گەولوگيالىق شارت - جاعداي وتكەلدەرى بار. بۇدان سىرت، التىنتاۋدا قىس ماۋسىمىندا تەمپەراتۋرا نولدەن تومەن 30 نەشە سەلتسي گرادۋسقا ءتۇسىپ، اۋا سيرەك بولادى، وتتەگى جەتىسپەگەندىكتەن ادامداردىڭ جۇمىس ونىمدىلىگى %30تەن ارتىق تومەندەيدى، ماشينالاردىڭ ونىمدىلىگى %40تەن ارتىق تومەندەيدى.

  وسى قيىندىقتان قامال الۋ ءۇشىن، قۇرىلىسشىلار الدىعا ءوتىپ گەولوگيالىق بولجال جاساپ، ارناۋلى قۇرىلىس جۇرگىزۋ جوباسىن جاسادى ءارى مۇنى قاتاڭ اتقاردى؛ جۇمىس ءادىسىن ۇيلەسىمدى تاڭداپ، دەر كەزىندە العاشقى تىرەك قويىپ وتىردى؛ تارامدى سىرنەلەۋ تەحنيكاسى شاراسىن قولدانىپ، سۋدى بوگەۋ، ىعىستىرۋ سياقتى شارالاردى كۇنى بۇرىن قولدانىپ، تۋنەل قازۋدىڭ حاۋىپسىز دە ءتارتىپتى جۇرگىزىلۋىنە شىنايى كەپىلدىك ەتىپ، 3 جىلدان ارتىق ۋاقىت تالماي كۇرەس جۇرگىزىپ، اقىرى وسى قيىندىقتى جەڭدى.

  گولمۋد - كورلا تەمىر جولى شىعىستا چيڭحاي ولكەسىنىڭ گولمۋدىنان باستالىپ، باتىستا رايونىمىزدىڭ كورلاسىنا كەلەدى، جالپى ۇزىندىعى 1213.95 كيلومەتر، مۇندا شينجياڭ شەكاراسى ىشىندەگى ۇزىندىعى 708 كيلومەتر، باتىس بولىكتەگى ماڭىزدى تەمىر جول تورى نەگىزگى لەنياسى جانە شينجياڭ تەمىر جولىنىڭ نەگىزگى قاڭقاسىنىڭ ءبىرى بولىپ، ”شولدەگى جاڭا جىبەك جولى“ اتالعان، لەنيانىڭ قۇرىلىس ولشەمى مەملەكەتتىك ءبىرىنشى دارەجەلى ەلەكترلەنگەن جالاڭ لەنيالى تەمىر جول. تۇتاس لەنيادا پويەز قاتىناعاننان كەيىن، كورلادان گولمۋدقا نە بارى 12 ساعات مولشەرىندە جەتۋگە بولادى.

  التىنتاۋ تۋنەلىنىڭ تۇتاسۋىنا ىلەسە، گولمۋد - كورلا تەمىر جولى قۇرىلىسىنىڭ اياق الىسى اناعۇرلىم جەدەلدەدى، مەجەمەن كەلەر جىلى تۇتاس لەنيادا پويەز قاتىناپ، ىسكە قوسىلادى. سول كەزدە، شينجياڭ لانجوۋ - شينجياڭ لەنياسىن جانە لانجوۋ - شينجياڭ جوعارى قارقىندى تەمىر جولىن نەگىزگى وتكەل، ەزنا - قۇمىل تەمىر جولىن سولتۇستىك وتكەل، گولمۋد - كورلا تەمىر جولىن وڭتۇستىك وتكەل ەتكەن ”ءبىر نەگىز، ەكى قوسىمشا“ جاعدايىن قالىپتاستىرىپ، شىعىسپەن تۇتاسۋ قابىلەتى اناعۇرلىم كۇشەيەدى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.

  • وسى كەزەكتى جۇڭگو − ازيا - ەۆروپا كورمەسى تۇڭعىش رەت نەگىزگى قوناق ولكەلەردى بەلگىلەدى
  • تاپسىرىس ونىمدەردى جەدەل ءوندىرىپ، قامداۋدى قامتاماسىز ەتتى
  • جىلدىق مىندەتتى ءساتتى ورىنداۋعا شىنايى كەپىلدىك ەتتى
  • شينجياڭ جۇڭتاي توبى دۇنيە جۇزىندەگى 500 قۋاتتى كاسىپورىن قاتارىنا ءوتتى
  • جەل - جارىق ەنەرگياسى ءوزارا تولىقتىردى