شي جينپيڭ ءۇمىت ينجەنەرياسىنا تىلەك جولداپ بىلاي دەپ باسا دارىپتەدى
ءۇمىت ينجەنەرياسى سىندى ءىستى اناعۇرلىم جاقسى ىستەپ، قالىڭ جاستار مەن ورەندەرگە پارتيانىڭ قامقورلىعى مەن سوتسياليستىك ۇلى شاڭىراقتىڭ مەيىرىن تولىق سەزىندىرەيىك
شينحۋا اگەنتتىگىنىڭ 11 - ايدىڭ 20 - كۇنى بەيجيڭنەن بەرگەن حابارى. بيىل ءۇمىت ينجەنەرياسى اتقارىلعاندىعىنىڭ 30 جىلدىعى، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ تاياۋدا ءۇمىت ينجەنەرياسىنا تىلەك جولدادى. ول بىلاي دەپ اتاپ كورسەتتى: پارتيانىڭ باسشىلىعىندا ءۇمىت ينجەنەرياسى اتقارىلعان 30 جىلدان بەرى، نازاردى وقۋعا كومەك بەرىپ ادام تاربيەلەۋ نىساناسىنا شوعىرلاندىرىپ، وقىتۋشىلاردى قۇرمەتتەپ، وقۋ - اعارتۋعا ءمان بەرۋ ءداستۇرىن تەرەڭ تامىر تارتتىرىپ، قوعامدى اتتانىسقا كەلتىرۋ مەحانيزمىنە جاڭالىق ەنگىزىپ، مەيىر باعىشتاپ ءوزارا قارايلاسۋ جانە جەتكىزۋ كوپىرىن تۇرعىزىپ، ميلليونداعان كەدەي وتباسىلارىنداعى جاستار مەن ورەندەردىڭ وقۋ ارمانىن ىسكە اسىرۋىنا، وتان قۇرىلىسىنىڭ ءاربىر شەبىندە كۇرەس جاسايتىن تىرەككە اينالۋىنا كومەكتەستى. ءۇمىت ينجەنەرياسى كەدەيلىكتەن ارىلتۋدان قامال الۋعا دەم بەرۋ، وقۋ - اعارتۋدىڭ دامۋىن جەبەۋ، جاستار مەن ورەندەردىڭ ءوسىپ - جەتىلۋىنە قىزمەت ەتۋ، قوعامدىق سالتقا جەتەكشىلىك ەتۋ جاقتارىندا ماڭىزدى رولىن ساۋلەلەندىردى.
شي جينپيڭ بىلاي دەپ باسا دارىپتەدى: جاستار مەن ورەندەردىڭ اقاۋسىز ءوسىپ - جەتىلۋىنە مۇمكىندىك جاساۋ مەملەكەت پەن ۇلتتىڭ بولاشاعىنا سايادى. جاڭا داۋىرگە وتكەندە، كوممۋنيستىك جاستار وداعى ءۇمىت ينجەنەرياسى سىندى وسى ءىستى اناعۇرلىم جاقسى ىستەپ، جاستار مەن ورەندەرگە جاڭا دەمەۋشى كۇش ازىرلەۋگە، جاڭا ءۇمىت تۇقىمىن سەبۋگە قۇلشىنۋ كەرەك. بۇكىل پارتيا، بۇكىل قوعام ءۇمىت ينجەنەرياسىنا ۇزدىكسىز نازار اۋدارىپ جانە ونى قولداپ، قالىڭ جاستار مەن ورەندەردىڭ پارتيانىڭ قامقورلىعى مەن سوتسياليستىك ۇلى شاڭىراقتىڭ مەيىرىن تولىق سەزىنىپ، سوتسياليزمنىڭ قۇرىلىسشىلارى مەن ءىزباسارلارىنان بولۋعا قۇلشىنۋىنا مۇمكىندىك جاساۋ كەرەك.
ءۇمىت ينجەنەرياسى − كوممۋنيستىك جاستار وداعى ورتالىق كوميتەتى، جۇڭگو جاستار مەن ورەندەر دامۋ قورى 1989 - جىلى باستاپ اتقارعان، كەدەي وڭىرلەردىڭ نەگىزدىك وقۋ - اعارتۋ قۇرىلعىلارىن جاقسارتۋدى، كەدەي وڭىرلەردەگى وقۋدان قول ۇزگەن جاس وسپىرىمدەردىڭ مەكتەپ قۇشاعىنا قايتا ورالۋىنا كومەك بەرۋدى بورىش ەتكەن قوعامدىق الەۋمەتتىك يگىلىكتى ءىس. 2019 - جىلى 9 - ايعا دەيىن، بۇكىل ەل بويىنشا ءۇمىت ينجەنەرياسى جالپى 15 ميلليارد 229 ميلليون يۋان جىلۋ اقشا قابىلداپ، وتباسىندا ەكونوميكالىق قيىنشىلىعى بار 5 ميلليون 994 مىڭ 200 وقۋشىعا قارجىلاي كومەك كورسەتىپ، 20 مىڭ 195 ءۇمىت باستاۋىش مەكتەبىن كومەكتەسىپ سالىپ بەردى.
