− ساياحات ارقىلى شينجياڭدى گۇلدەندىرۋ ستراتەگياسىن جاپپاي اتقارۋدى ىلگەرىلەتۋ جونىندە جالپى شولۋ (1)
ءتىلشى رىن جياڭ، پراكتيكانت ۋاڭ جيڭيۇي
قار جامىلعان تاۋلار، ءموپ - ءمولدىر كول، اق قىراۋ شالعان اعاشتار... 11 - ايدىڭ 25 - كۇنى تيانشان بوعدا كولى كورىنىس ءوڭىرى قىس - كوكتەمگى ساياحاتتان اقپار جاريالاۋ ماجىلىسىندە LED ەكرانىنان قىس ماۋسىمىنداعى تيانشان بوعدا كولىنىڭ كوركەم كورىنىسى كورسەتىلدى. بيىل 11 - ايدان 2020 - جىلى 3 - ايعا دەيىن بۇل كورىنىس ءوڭىرى 7 - كەزەكتى تايقازان قوي ەتى مەرەكەسىن، جاڭا جىلدا باقىت تىلەپ، جاڭا جىلدى قارسى الۋ سياقتى 36 ءتۇرلى ەرەكشە مادەنيەت، ساياحات قيمىلىن ورىستەتىپ، ماجىلىسكە قاتىناسقان كوپتەگەن ساياحات كووپەراتيۆتەرىن باۋرادى. تيانشان بوعدا كورىنىس ءوڭىرىنىڭ قىس - كوكتەمگى ساياحاتى كورىنىس ءوڭىرىنىڭ ەندى ءبىر تانىسقىسىنا اينالۋدا.
بايلىق قاينارىن تايانىش ەتۋ، ابزالدىلىقتى ساۋلەلەندىرۋ، ەرەكشەلىكتى كورنەكتىلەندىرۋ، كومەسكى كۇشتى اشۋ... بۇل كۇندەرى جەر - جەر ساياحات ارقىلى شينجياڭدى گۇلدەندىرۋ ستراتەگياسىن زور كۇشپەن اتقارۋ بارىسىندا ”شينجياڭ جاقسى جەر“ ماركاسىن كۇشتى شوعىرلاندىرا ايشىقتاپ، شينجياڭ ساياحاتىنىڭ تۇتاس تۇلعالىق وبرازىن جوعارىلاتتى. سونىمەن بىرگە، ءبىر توپ وڭىرلىك ەرەكشەلىككە يە ساياحات ماركالارىن قالىپتاستىرىپ، ماركا ستراتەگياسى ارقىلى ساياحات كاسىبىنىڭ تۇتاس تۇلعالىق دامۋ ورەسىن ۇزدىكسىز جوعارىلاۋعا باستادى.
■ بايلىق قاينارىن اشىپ، ەرەكشە ساياحات ماركالارىن ارت - ارتىنان ايگىلەدى
11 - ايدىڭ باسىندا، 2019 - جىلى تاكلاماكاندى موتوتسيكلمەن اينالىپ ساياحاتتاۋ ۇيىرمەسىندەگى 30 موتوتسيكل جارىس شەبەرى حوتاننىڭ اسقار تاۋلارىندا، قۇمدى شولدەرىندە 1400 كيلومەتردەن استام جول باسىپ، قىساڭ يادان جەر بەدەرى، تاكلاماكان قۇمى، قۇبا ءتۇزى، سونداي - اق كۇنلۇن قارلى تاۋلارى سياقتى وڭتۇستىك شينجياڭداعى ەرەكشە تابيعي كورىنىستەردەن، ۇلتتىق سالت - سانادان مەيلىنشە ءلاززاتتاندى. ”مەن كوپ جەرگە بارعانمىن، بۇل رەتكى حوتانداعى كەشىرمەلەرىمنىڭ اسەرى ەرەكشە تەرەڭ بولدى“، - دەدى موتوتسيكل جارىس شەبەرى شۇي يىفەي كوڭىلدەنە.
ەرەكشە بايلىق قاينارىن تايانىش ەتۋ، وزگەشە ساياحاتتى زور كۇشپەن دامىتۋ، بۇل حوتان ايماعىنىڭ جۋىق جىلداردان بەرى ساياحات ماركاسىن قالىپتاستىرۋداعى قۇلشىنىس جولى. حوتان ايماقتىق مادەنيەت - دەنە تاربيە، راديو - تەلەۆيزيا جانە ساياحات مەكەمەسى كاسىپ سالاسىن دامىتۋ ءبولىمىنىڭ باستىعى چىن سۇڭمەي بىلاي دەپ تانىستىردى: جەرگىلىكتى ورىن وزگەشە ساياحاتى قازىر ”كۇنلۇن اسپان جولىن“ ءتۇيىندى قالىپتاستىرۋدا. تاكلاماكان قۇمى سىندى وسى ءبىر ەرەكشە بايلىق قاينارىن توڭىرەكتەي وتىرىپ حوتان قالاسى ءشول دالا توراڭعى كورىنىس ءوڭىرى، لوپ اۋدانى تاكلاماكان قۇمدى ءشولى سايران باقشاسى، شەريا اۋدانى قۇم تەڭىزى بيحۋ كورىنىس رايونى سياقتى ءبىر توپ كورىنىس وڭىرلەرى كۇن سايىن كەمەلدەنە ءتۇستى.
بۇل كۇندەرى وزىندىك ابزال بايلىق قاينارىن تولىق اشۋ وزىندىك ەرەكشەلىككە يە ساياحات ماركالارىن قالىپتاستىرۋ تۇتاس شينجياڭنىڭ جەر - جەرىندە ورتاق تانىمعا اينالدى.
”كىرشىكسىز قاناس، قارلى مەكەن التاي“ ”ادامزاتتىڭ بايىرعى قار شاڭعى مەكەنى“ ”جۇڭگوداعى قارلى مەكەن“... بۇلاردىڭ بارلىعى التاي ايماعىنىڭ جۋىق جىلداردان بەرگى شوعىرلاندىرا اشقان ساياحات ماركالارى. 11 - ايدىڭ 27 - كۇنى التايدا شىمدىلىعىن اشقان 14 - كەزەكتى شينجياڭ قىسقى ساياحات كاسىبى ساۋدا كورمەسى جۇرت نازارىن اۋداردى، بۇل التاي ايماعىنىڭ ءۇرتىس 2 - جىل بىرلەسىپ مىندەتىنە الىپ وتكىزگەن قىسقى ساياحات كاسىبى ساۋدا كورمەسى ءارى التاي ايماعىنىڭ شينجياڭ قىسقى ساياحات كوزەۋلى جەرىن ايگىلەۋدەگى تابىسى.
التاي ايماعى قىسقى ساياحاتتى ساياحات كاسىبىنىڭ جاڭا ارتۋ تۇيىنىنە اينالدىرۋدى ماقسات ەتىپ، دۇنيە جۇزىلىك ساياحات كوزەۋلى جەرىن، دۇنيە جۇزىلىك قار - مۇز ساياحاتى كوزەۋلى جەرىن جانە دۇنيە جۇزىلىك قار - مۇز سپورتى كوزەۋلى جەرىن ۇزدىكسىز اشتى. نەنى تۇتقا ەتۋدە جەرگىلىكتى ورىننىڭ وي جۇيەسى ايقىن − ول ەرەكشە بايلىق قاينارىن تايانىش ەتىپ، كومەسكى كۇشتى تەرەڭ اشۋ. ”قار - مۇز ساياحاتىنىڭ تانىمالدىلىعىن، القاۋلىلىعىن، ىقپالىن جانە باۋراۋ قۋاتىن ۇزدىكسىز جوعارىلاتامىز“، - دەدى التاي ايماقتىق پارتكومنىڭ مۇشەسى، اكىمشىلىك مەكەمەسىنىڭ ورىنباسار ءۋاليى ۋان جۇن - ان.
■ كوپ ءتۇيىن گۇل اشىپ، سارا ءونىم قۇرىلىسىنىڭ ناتيجەسى كورنەكتى بولدى
جۋىق جىلداردان بەرى قارامايلى قالاسىنىڭ دۇنيە ءجۇزى سايتان كەرىش مەملەكەتتىك 5A دارەجەلى كورىنىس ءوڭىرىن قۇرۋ قۇرىلىسى بۇرىن بولىپ كورمەگەن دارەجەدە ىلگەرىلەدى. بۇل كۇندەرى دۇنيە ءجۇزى سايتان كەرىش كورىنىس ءوڭىرىنىڭ كەشكى ساياحاتقا ارنالعان شىراق سالتاناتى نىسانى اياقتالدى، جىلى اۋا شارىمەن، موتورلى پاراشوتپەن، اينالما قاناتتى ۇشاقپەن، ت.ب تومەن كەڭىستىكتە ۇشۋ نىسانى دا ساياحاتشىلاردى باۋراعان تۇيىندەرگە اينالدى، سوعان ىلەسە كورىنىس ءوڭىرى قابىلداعان ساياحاتشىلار سانى دا قاۋىرت ارتتى.
بيىل شينجياڭنىڭ جەر - جەرى ساياحات سارا ونىمدەرى قۇرىلىسى تەبىنىن ارتتىرىپ، ونىمدىلىگى كورنەكتى بولدى.
A دارەجەلى كورىنىس وڭىرلەرىن قۇرۋدى جەبەۋ جاعىندا، سايتان كەرىش كورىنىس وڭىرىنەن باسقا، تاشقورعان تاجىك اۆتونوميالى اۋدانى پامير ساياحات ءوڭىرى دە مەملەكەتتىك 5A دارەجەلى كورىنىس ءوڭىرىن قۇرۋعا بەلسەنە قول جەتكىزدى، سايرام كولى كورىنىس ءوڭىرى، جانبۇلاق كورىنىس ءوڭىرى 5A دارەجەلى كورىنىس وڭىرلەرىنىڭ دە تانىستىرۋ، ءوتىنىش ەتۋ قىزمەتى ءساتتى جۇرگىزىلۋدە.
سارا ءونىم كەزەكتە ۇلگى نۇسقاعا اينالۋدا، شينجياڭ تۇتاس وڭىرلىك ساياحاتتان ۇلگى كورسەتۋ ءوڭىرىن قۇرۋدى بار كۇشپەن ىلگەرىلەتتى، موڭعۇلكورە اۋدانى، باعراش اۋدانى بيىل مادەنيەت جانە ساياحات مينيسترلىگى جاعىنان تۇڭعىش توپتاعى تۇتاس وڭىرلىك ساياحاتتان ۇلگى كورسەتەتىن ءوڭىر بولىپ باعالاندى؛ التاي قالاسى، بۋىرشىن اۋدانى، موري قازاق اۆتونوميالى اۋدانى، باركول قازاق اۆتونوميالى اۋدانى دا مەملەكەتتىك تۇتاس وڭىرلىك ساياحاتتان ۇلگى كورسەتەتىن ءوڭىر بولۋعا ۇمتىلۋدا...
جەر - جەر بەلسەنە قيمىلداۋدا، قارامايلى وزەنى ساياحات دەمالىس ءوڭىرى، ورقى ساياحات دەمالىس ءوڭىرى اۆتونوميالى رايون دارەجەلى ساياحات دەمالىس ءوڭىرىن قۇرۋدا؛ سايرام كولى كورىنىس ءوڭىرى، كوكتوعاي كورىنىس ءوڭىرى، قاناس كورىنىس ءوڭىرى، مارالباسى اۋدانى حۇڭحاي كورىنىس ءوڭىرى، حىجىڭ اۋدانى كۇنەس كورىنىس ءوڭىرى، باعراش كولى كورىنىس ءوڭىرى سياقتى 6 كورىنىس ءوڭىرى كەزەكتە اۆتونوميالى رايون دارەجەلى ەكولوگيالىق ساياحاتتان ۇلگى كورسەتەتىن ءوڭىر قۇرۋدا.
بيىل شينجياڭ ”S101 تيانشان جاعراپيالىق كاريدورى سارا ساياحات جەلىسى“ ”شىشى بايىرعى جولى سارا ساياحات جەلىسى“ ”تاشقورعان - ياركەن بايىرعى جولى سارا ساياحات جەلىسى“ ”التاي - قوم ساياحات تاس جولى“ سياقتى 4 سارا ساياحات جەلىسىن اشۋدى ورتاعا قويدى. مۇنان ۇزاق بولماعان بولاشاقتا بۇل 4 جەلىنىڭ، ءسوز جوق، ”مايتاۋ - كۇشار تاس جولى“ سياقتى كوركەم كورىنىس قالىپتاستىراتىندىعىن بولجاۋعا بولادى.
■ ۇگىتتەۋ، بازارعا سالۋ ”شينجياڭ جاقسى جەر“دى اسقاقتاتتى
ۇگىتتەۋ، تانىستىرۋ، بازارعا سالۋ قىزمەتى حوتاننىڭ مادەنيەت، ساياحات تاراۋلارىن اناعۇرلىم قاربالاستىققا ءتۇسىردى. بيىل حوتان تيانجين قالاسىنداعى چيڭلۇي ساياحات كووپەراتيۆىنىڭ ءارقايسى بولىمشەلەرىندە حوتانعا ساياحاتتاۋدان كەڭەس سۇراۋ، قىزمەت وتەۋ ورتالىعىن قۇردى، 3 - كەزەكتى شينجياڭ كوكتەم ماۋسىمى ساياحات كورمەسىنە، شينجياڭ كوكتەم ماۋسىمى ساياحات بايلىعىن ۇشتاستىرۋ ماجىلىسىنە قاتىناستى، تيانجين، حىفەي، جىڭجوۋ سياقتى جەرلەردە ساياحاتتى ۇگىتتەۋ، تانىستىرۋ ءماجىلىسىن وتكىزدى، سونداي - اق اۆتونوميالى رايوندىق مادەنيەت جانە ساياحات مەڭگەرمەسى ۇيىمداستىرعان ىشكى جەرلەرگە بارىپ ۇگىتتەۋ، تانىستىرۋ قيمىلىنا بەلسەنە قاتىناستى. حوتاننىڭ ”دۇنيە ءجۇزىنىڭ قاس تاسى ورتالىعى. جىبەك جولىنداعى ايگىلى قالا“ تانىمالىلىعى مەن بەدەلى بارىنشا جوعارىلادى.
ساياحاتتى ۇگىتتەۋ، تانىستىرۋ قيمىلى بۇكىل ەلدىڭ جەر - جەرىندە ”شينجياڭ جاقسى جەر“دى اسقاقتاتتى. بيىل جىل باسىنان بەرى اۆتونوميالى رايوندىق مادەنيەت جانە ساياحات مەڭگەرمەسى مادەنيەتتى، ساياحاتتى نەگىزگى باسقارۋ تاراۋلارىن، كورىنىس وڭىرلەرىن، ساياحات كاسىپ قوعامدارىن، كاسىپورىنداردى، ساياحات كووپەراتيۆتەرىن ىشكى جەرلەردەگى ولكەلەرگە، اۆتونوميالى رايوندارعا، قالالارعا بارىپ 50 نەشە رەت ۇگىتتەۋگە، تانىستىرۋعا، بازارعا سالۋعا ۇيىمداستىردى، بۇل شينجياڭعا كومەكتەسەتىن 19 ولكە، قالانى جانە باتىس وڭتۇستىكتەگى، باتىس سولتۇستىكتەگى كوپ ساندى ولكەنى، اۆتونوميالى رايوندى، قالانى جانە شياڭگاڭ، اۋمىن سياقتى جەرلەردى قامتىدى.
بيىل 9 - ايدا اۆتونوميالى رايوندىق مادەنيەت جانە ساياحات مەڭگەرمەسى 11 ايماقتى، وبلىستى، قالانى بەيجيڭ الەمدىك باۋ - باقشا كورمەسىنىڭ ”شينجياڭ كۇنى“ ساياحات ارناۋلى تانىستىرۋ ماجىلىسىنە قاتىناسۋعا ۇيىمداستىردى، مادەنيەت، ساياحات سۋرەتتەر كورمەسى، مادەنيەت جاسامپازدىعى تاۋار كورمەسى، ءدامدى تاعامداردى تاتىپ كورۋ، ساراپتاۋ سياقتى جەلىلەس تانىستىرۋ قيمىلدارى ءتىپتى دە كوپ ادامدارعا بايتاق، كورىكتى شينجياڭنىڭ شەكسىز باۋرامدىلىعىن سەزىندىردى.
بيىل شينجياڭنىڭ جەر - جەرىنىڭ مادەنيەت، ساياحات قيمىلدارى 1000 نەشە تۇرگە جەتتى. شينجياڭ كوكتەم ماۋسىمى ساياحات كورمەسى، وزگەشە ساياحات مەرەكەسى، ىلە تۇلپار مەرەكەسى، لاۋاندا مەرەكەسى سياقتى ءبىر توپ مادەنيەت، ساياحات مەرەكە قيمىلدارىن وتكىزىپ، قىرۋار ساياحاتشىنى باۋراپ، ساياحاتتىق تۇتىنۋعا دەم بەردى. 3 - كەزەكتى شينجياڭ كوكتەم ماۋسىمى ساياحات كورمەسى كەزىندە، وتكىزۋشى ورىن تۇرپان قالاسى 755 مىڭ 700 ادام - رەت ساياحاتشى قابىلدادى، بۇل سايكەس مەزگىلدەگىدەن ％367.06 ارتتى؛ ساياحات جالپى كىرىسى 604 ميلليون يۋان بولىپ، سايكەس مەزگىلدەگىدەن ％378.18 ارتتى.
بۇگىنگى كۇندەرى ءتۇرلى ونىمدەردى بازارعا سالۋ، قيمىلداردى بازارعا سالۋ، باستان كەشىرۋدى بازارعا سالۋ سياقتى ۇگىتتەۋ، تانىستىرۋ قيمىلدارى تولاستامادى، ءجيى ورىستەتىلدى. جەر - جەر، تاراۋلار دا ”ءبىر جەرگە ءبىر ساياسات“ ”ءبىر ماۋسىمعا ءبىر ساياسات“ بولۋ جاعىنا كۇش سالىپ، جەر - جەردەگى ساياحاتشىلاردىڭ شينجياڭنىڭ قار - مۇز، حالىقتىق تۇسەلحانا، مادەنيەت، قۇمدى ءشول سياقتى ەرەكشە ساياحات بايلىعىنا دەگەن اڭسارىن مىقتاپ يگەرىپ، ساياحاتتاۋ، ۇگىتتەۋ، بازارعا سالۋ جوباسىن باعىتتامالى تۇردە رەتتەپ، شار تاراپتان كەلگەن قوناقتاردى باۋرادى.
