شينجياڭنىڭ يمپورت - ەكسپورت جالپى قۇنى ءۇرتىس 8 اي بويى سايكەس مەزگىلدەگىدەن ارتتى
ءتىلشى چىن چياڭۋي 11 - ايدىڭ 29 - كۇنى ۇرىمجىدەن حابارلايدى. ءتىلشىنىڭ ءۇرىمجى كەدەنىنەن ۇعىسۋىنشا، الدىڭعى 10 ايدا شينجياڭنىڭ سىرتقى ساۋدا يمپورت - ەكسپورت جالپى قۇنى 131 ميلليارد 460 ميلليون يۋانعا جەتىپ، سايكەس مەزگىلدەگىدەن ％28 ارتىپ، بۇكىل مەملەكەتتىڭ ارتۋ جىلدامدىعىنان 6. 25 پايىز جوعارى بولعان. بيىل 3 - ايدان بەرى، شينجياڭنىڭ سىرتقى ساۋدا يمپورت - ەكسپورتى جىلدام ارتۋدى ساقتاپ، يمپورت - ەكسپورت جالپى قۇنى ءۇرتىس 8 اي بويى سايكەس مەزگىلدەگىدەن ارتقان.
ۇعىسۋعا قاراعاندا، 3 - ايدان باستاپ شينجياڭنىڭ سىرتقى ساۋدا ايلىق يمپورت - ەكسپورت قۇنى سايكەس مەزگىلدەگىدەن ارتۋ كۇيىن ساقتاپ كەلگەن، اسىرەسە، 9 - ، 10 - ايلاردا شينجياڭنىڭ سىرتقى ساۋدا ايلىق يمپورت - ەكسپورت قۇنى قاۋىرت ارتىپ، سايكەس مەزگىلدەگىدەن جەكە - جەكە ％75.9، ％83.9 ارتقان.
ساۋدا تاسىلىنەن قاراعاندا، الدىڭعى 10 ايدا شينجياڭنىڭ شاعىن سومالى شەكارا ساۋدا يمپورت - ەكسپورتى 79 ميلليارد 70 ميلليون يۋانعا جەتىپ، سايكەس مەزگىلدەگىدەن ％22.6 ارتىپ، ۇقساس مەزگىلدەگى شينجياڭنىڭ يمپورت - ەكسپورت جالپى قۇنىنىڭ ％60تەن استامىن يەلەگەن؛ ادەتتەگى ساۋدا تاسىلىندەگى يمپورت - ەكسپورتى 42 ميلليارد 810 ميلليون يۋانعا جەتىپ، سايكەس مەزگىلدەگىدەن ％28.6 ارتقان؛ كەدەننىڭ ەرەكشە باقىلاۋ - باسقارۋ رايونى ىشىندەگى زات اينالىمىندىق تاۋارلار يمپورت - ەكسپورتى 4 ميلليارد 390 ميلليون يۋانعا جەتىپ، سايكەس مەزگىلدەگىدەن ％254 ارتقان؛ شەكارا تۇرعىندارىنىڭ ءوزارا بازارشىلاۋ ساۋدا يمپورت - ەكسپورتى 110 ميلليون يۋانعا جەتىپ، سايكەس مەزگىلدەگىدەن ％112 ارتقان.
ساۋدا جاساسقان مەملەكەت جاعىنان قاراعاندا، جۇڭگو شينجياڭىنىڭ قازاقستانمەن يمپورت - ەكسپورت ساۋداسى يەلەيتىن سالىستىرما ％40تەن اسىپ، قازاقستان شينجياڭنىڭ ءبىرىنشى ءىرى ساۋدا سەرىگىندىك ورنىن ۇزدىكسىز بەكەمدەدى. الدىڭعى 10 ايدا جۇڭگو شينجياڭىنىڭ قازاقستانمەن يمپورت - ەكسپورتى 60 ميلليارد 220 ميلليون يۋانعا جەتىپ، سايكەس مەزگىلدەگىدەن ％28.2 ارتقان؛ قىرعىزستانمەن يمپورت - ەكسپورتى 19 ميلليارد 50 ميلليون يۋانعا جەتىپ، سايكەس مەزگىلدەگىدەن ％20.5 ارتقان؛ ۇقساس مەزگىلدە جۇڭگو شينجياڭىنىڭ امەريكامەن يمپورت - ەكسپورتى 3 ميلليارد 600 ميلليون يۋانعا جەتىپ، سايكەس مەزگىلدەگىدەن ％47.3 ارتقان؛ اۆستراليا، پاكيستان، انگليا، ارگەنتينا، ۆيەتنام سياقتى مەملەكەتتەرمەن يمپورت - ەكسپورتىنىڭ ارتۋى قاباعات جىلدام بولىپ، ساۋدا وبيەكتىسى كوپ نەگىزدەنۋ جاعدايى جارىققا شىقتى.
تاۋار تۇرلەرىنەن قاراعاندا، شينجياڭنىڭ ماشينا - ەلەكتر ونىمدەرى، ەڭبەككۇش شوعىرلانعان ونىمدەر يمپورت - ەكسپورتىنىڭ ارتۋى كورنەكتى بولعان، كيىم - كەشەك، سونداي - اق كيىم - كەشەك قوسالقى بولشەكتەرى ەكسپورتى 26 ميلليارد 440 ميلليون يۋانعا جەتىپ، ％17.8 ارتقان.
كاسىپورىن تۇرلەرىنەن قاراعاندا، حالىقتىق كاسىپورىندار جالعاستى باسىم ورىندى يەلەگەن. الدىڭعى 10 ايدا شينجياڭداعى حالىقتىق كاسىپورىنداردىڭ يمپورت - ەكسپورتى 98 ميلليارد 370 ميلليون يۋانعا جەتىپ، ％22.4 ارتىپ، شينجياڭنىڭ يمپورت - ەكسپورت جالپى قۇنىنىڭ ％74.8ىن يەلەگەن.
ءۇرىمجى كەدەنىنىڭ تالداۋ جاساۋىنا نەگىزدەلگەندە، الدىڭعى 10 ايدا شينجياڭنىڭ سىرتقى ساۋداسىنىڭ ارتۋىنا ساۋدا قۇرىلىمىنىڭ، سونداي - اق ەلىمىزدىڭ جانە ەۆرو - ازيا وڭىرىندەگى مەملەكەتتەردىڭ شارۋاشىلىق - ساۋدا ورتاسىنىڭ ۇزدىكسىز ساپالىلانۋىنىڭ ارقاسىندا قول جەتكەن. شينجياڭنىڭ ساۋدا قۇرىلىمىندا ادەتتەگى ساۋدانىڭ يەلەيتىن سالىستىرماسى جالپى تۇلعالىق جاقتان جوعارىلاعان، يمپورت - ەكسپورت ونىمدەر قۇرىلىمى ۇزدىكسىز ساپالىلانعان جاعداي جارىققا شىقتى، بۇل شينجياڭنىڭ سىرتقى ساۋداسىنىڭ ورنىقتىلىق بارىسىندا ساپالىلانۋىنا نەگىز قالادى. الدىڭعى 10 ايدا شينجياڭ كاسىپورىندارىنىڭ ەكسپورت ەتكەن ماشينا - ەلەكتر ونىمدەرى 598 مىڭ تونناعا جەتىپ، سايكەس مەزگىلدەگىدەن ％8 تومەندەگەن، تاۋار قۇنى 26 ميلليارد 590 ميلليون يۋان بولىپ، ％34.7 ارتقان. بۇدان مىنانى بايقاۋعا بولادى: ەكسپورت ەتىلەتىن ماشينا - ەلەكتر ونىمدەرىنىڭ تيبىن جاڭالاپ، دارەجەسىن جوعارىلاتۋ كورنەكتى بولعان، ۇستەمە قۇنىنىڭ جوعارىلاۋى كورنەكتى بولعان؛ يمپورت جاعىندا جوعارى، جاڭا تەحنيكالىق ونىمدەردى، ەمدەۋ اسپاپتارى مەن جابدىقتاردى جانە سۋ - تەڭىز ونىمدەرىن يمپورت ەتۋ جەكە - جەكە ％14.4، ％59.7، 3.3 ەسە ارتقان.
