شينحۋا اگەنتتىگىنىڭ 12 - ايدىڭ 9 - كۇنى بەيجيڭنەن بەرگەن حابارى (چي شىڭ). 2015 - جىلى 12 - ايدىڭ 16 - كۇنى مەملەكەت ءتوراعاسى شي جينپيڭ 2 - كەزەكتى دۇنيە جۇزىلىك ينتەرنەت جينالىسىنىڭ اشىلۋ سالتىنا قاتىناستى ءارى ارقاۋ ءسوز سويلەپ، ينتەرنەت كەڭىستىگىنىڭ ادامزاتتىڭ ورتاق قيمىل كەڭىستىگى ەكەندىگىن دارىپتەپ، ينتەرنەت كەڭىستىگى تاعدىرلاس ورتاق تۇلعاسىن بىرگە قۇرۋعا ۇندەپ، جينالىسقا قاتىناسقان سيلى قوناقتاردىڭ كۇشتى اڭىسىن قوزعادى.
2014 - جىلى 11 - ايدا تۇڭعىش كەزەكتى دۇنيە جۇزىلىك ينتەرنەت جينالىسى جىجياڭنىڭ ۋجىنىندا وتكىزىلدى. بۇل جۇڭگو وتكىزگەن كولەمى ەڭ زور، دەڭگەيى ەڭ جوعارى ينتەرنەت جينالىسى، سونداي - اق دۇنيە ءجۇزىنىڭ ينتەرنەت سالاسىنداعى ءبىر رەتكى اسا دابىرالى جوعارى دەڭگەيلى ءماجىلىس. وسىدان كەيىن ءار جىلى ءبىر كەزەكتى دۇنيە جۇزىلىك ينتەرنەت جينالىسى تۇگەلدەي ۋجىندا وتكىزىلىپ كەلەدى.
2 - كەزەكتى دۇنيە جۇزىلىك ينتەرنەت جينالىسىندا شي جينپيڭ الەمدىك ينتەرنەتتى جونگە سالۋ جۇيەسى وزگەرىسىن ىلگەرىلەتۋدىڭ ”ءتورت ءتۇرلى پرينسيبىن“ ورتاعا قويدى، ياعني ينتەرنەتتىك يەلىك ۇقىققا قۇرمەت ەتۋ، بەيبىتشىلىك، حاۋىپسىزدىكتى قورعاۋ، جاريا بولۋدى، سەلبەستىك جاساسۋدى جەبەۋ، تاماشا ءتارتىپ ورناتۋ. سونىمەن تەڭ ينتەرنەت كەڭىستىگى تاعدىرلاس ورتاق تۇلعاسىن قۇرۋدىڭ ”بەس ءتۇيىندى قۋاتتاماسىن“ ورتاعا قويدى، ياعني الەمدىك ينتەرنەت نەگىزدىك قۇرىلعى قۇرىلىسىن جەدەلدەتىپ، ۇلاستىرۋدى، تۇتاستىرۋدى جەبەۋ؛ ينتەرنەتتەگى مادەنيەت اۋىس - كۇيىسىنەن بىرگە يگىلىكتەنۋ تۇعىرىن قۇرىپ، اۋىس - كۇيىستى، ءبىر - بىرىنەن ۇلگى الۋدى جەبەۋ؛ ينتەرنەت ەكونوميكاسىنداعى جاڭالىق اشا دامۋدى ىلگەرىلەتىپ، بىرگە كوركەيۋدى جەبەۋ؛ ينتەرنەت حاۋىپسىزدىگىن قامتاماسىز ەتىپ، ءتارتىپتى دامۋدى جەبەۋ؛ ينتەرنەتتى جونگە سالۋ جۇيەسىن ورناتىپ، تەڭدىكتى، ادىلەتتىلىكتى جەبەۋ. وسى ”ءتورت ءتۇرلى پرينسيىپ“ پەن ”بەس ءتۇيىندى قۋاتتاما“ جينالىسقا قاتىناسقان سيلى قوناقتاردىڭ ورتاق تانىم ۇيىستىرىپ، سونى پىكىر ارناۋداعى ەڭ كەڭ تۇعىرى مەن نەگىزىنە اينالىپ، دۇنيە ءجۇزىنىڭ ينتەرنەتتى جونگە سالۋعا جۇڭگو پاراساتى مەن جۇڭگو جوباسىن ۇسىندى.
جينالىس كەزىندە قاتىستى ينتەرنەت كاسىپورىندارى، قۇرىلىم - ۇيىمدار ءبىر توپ سەلبەستىك كەلىسىمىنە قول قويىپ، كوپ تابىستارعا قول جەتكىزدى. جينالىستىڭ جوعارى دارەجەلى ماماندارى كەڭەس بەرۋ كوميتەتىنىڭ ۇسىنىسىمەن جاريالانعان «ۋجىن باستاماسى» قاتىستى جاقتاردىڭ ينتەرنەت كەڭىستىگى قۇرىلىسىن ىلگەرىلەتۋ، دامۋ جانە جونگە سالۋ تۇزىمىندە جاڭالىق اشۋ، باسقارۋدا جاڭالىق اشۋ، تەحنيكادا جاڭالىق اشۋ تىلەكتەرى مەن جاۋاپكەرشىلىكتەرىن شوعىرلى بەينەلەپ، حالىقارالىق قوعامنىڭ ينتەرنەت كەڭىستىگىنىڭ ۇلاسۋىن، تۇتاسۋىن كۇشەيتۋ، بىرگە يگىلىكتەنىپ، بىرگە جونگە سالۋ سەنىمى مەن بەكىمىن اناعۇرلىم كۇشەيتىپ، حالىقارالىق ينتەرنەتتى دامىتۋ مەن جونگە سالۋ سالاسىنىڭ ماڭىزدى تابىسىنا اينالىپ، ”ينتەرنەت تاريحىنداعى تاريحي بەلەس“ دەپ اتالدى.
