چىن چۋانگو اۆتونوميالى رايوننىڭ اۋىل - قىستاقتى گۇلدەندىرۋ باسشىلىق گرۋپپاسىنىڭ ماجىلىسىندە بىلاي دەپ باسا دارىپتەدى
باس شۋجي شي جينپيڭنىڭ اۋىل شارۋاشىلىعى، اۋىل - قىستاق، شارۋالار قىزمەتى جونىندەگى ماڭىزدى بايىمداۋىن ىشكەرىلەي دايەكتىلەندىرىپ، رايونىمىزدىڭ اۋىل شارۋاشىلىعى، اۋىل - قىستاق قىزمەتىندە جاڭا جاعداي اشۋدى ىلگەرىلەتۋ كەرەك
شينجياڭ گازەتىنىڭ تىلشىلەرى ياۋ تۇڭ، ۋاڭ شيڭرۇي 12 - ايدىڭ 14 - كۇنى ۇرىمجىدەن حابارلايدى. 12 - ايدىڭ 13 - كۇنى تۇستەن بۇرىن اۆتونوميالى رايوندىق پارتكومنىڭ شۋجيى، اۆتونوميالى رايوننىڭ اۋىل - قىستاقتى گۇلدەندىرۋ باسشىلىق گرۋپپاسىنىڭ باستىعى چىن چۋانگو اۆتونوميالى رايوننىڭ اۋىل - قىستاقتى گۇلدەندىرۋ باسشىلىق گرۋپپاسىنىڭ ءماجىلىسىن باسقارىپ اشتى. ول بىلاي دەپ باسا دارىپتەدى: شي جينپيڭنىڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، باس شۋجي شي جينپيڭنىڭ اۋىل شارۋاشىلىعى، اۋىل - قىستاق، شارۋالار قىزمەتى جونىندەگى ماڭىزدى بايىمداۋىن ىشكەرىلەي دايەكتىلەندىرىپ، يدەيا مەن ارەكەتتى پارتيا ورتالىق كوميتەتىنىڭ اۋىل - قىستاقتى گۇلدەندىرۋ جونىندەگى ورنالاستىرۋىمەن باتىل بىرلىككە كەلتىرىپ، اۋىل - قىستاقتى گۇلدەندىرۋ ستراتەگياسىن اناعۇرلىم زور سەرپىنمەن ىشكەرىلەي ىلگەرىلەتىپ، جۇڭگوشا سوتسياليستىك شينجياڭ قۇرۋعا ءتيىستى ۇلەس قوسۋ كەرەك.
اۆتونوميالى رايون باسشىلارىنان شوكىرات زاكىر، شاۋكەت يمىن، نۇرلان ءابىلماجىن، سۇن جينلۇڭ، لي پىڭشين، ەركىن تۇنياز، تيان ۋىن، سارقىت اقان، جاڭ چۇنلين قاتارلىلار ماجىلىسكە قاتىناستى.
ءماجىلىس بيىل جىل باسىنان بەرى اۆتونوميالى رايوننىڭ اۋىل - قىستاقتى گۇلدەندىرۋ ستراتەگياسىن اتقارۋدى ىلگەرىلەتۋ جاعدايىنان بەرىلگەن مالىمەتتى تىڭدادى، «اۆتونوميالى رايوننىڭ اۋىل - قىستاقتى گۇلدەندىرۋ باسشىلىق گرۋپپاسىنىڭ ءىس قاراۋ ەرەجەسى» قاتارلىلاردى قاراپ ماقۇلدادى.
چىن چۋانگو بىلاي دەپ اتاپ كورسەتتى: پارتيا 18 - قۇرىلتايىنان بەرى، باس شۋجي شي جينپيڭ اۋىل شارۋاشىلىعى، اۋىل - قىستاق رەفورماسى، دامۋى، ورنىقتىلىعى جونىندە ءبىر قىدىرۋ ماڭىزدى بايىمداۋ جاريالاپ، جاڭا داۋىردە اۋىل شارۋاشىلىعى، اۋىل - قىستاق، شارۋالار قىزمەتىن جاقسى ىستەۋدىڭ كەلەلى نازاريالىق جانە امالياتتىق ماسەلەلەرىنە جۇيەلى جاۋاپ بەردى، بۇل − جاڭا داۋىردە اۋىل شارۋاشىلىعى، اۋىل - قىستاق، شارۋالار قىزمەتىن جاقسى ىستەۋدىڭ ءتۇبىرلى بويسۇنۋ ولشەمى جانە ارەكەت باعدارناماسى. ”ءتورت تانىم“دى كۇشەيتىپ، ”ءتورت سەنىم“دى بەكەمدەپ، ”ەكىنى قورعاۋ“دى ورىنداپ، باس شۋجي شي جينپيڭنىڭ اۋىل شارۋاشىلىعى، اۋىل - قىستاق، شارۋالار قىزمەتى جونىندەگى ماڭىزدى بايىمداۋىن ىشكەرىلەي ۇيرەنىپ، دايەكتىلەندىرىپ، جاڭا داۋىردەگى پارتيانىڭ شينجياڭدى جونگە سالۋ جالپى جوباسىن دايەكتىلەندىرىپ، تياناقتاندىرىپ، نازاردى قوعام ورنىقتىلىعى مەن باياندى تىنىشتىق باس نىساناسىنا شوعىرلاندىرىپ، كەدەيلىكتەن ارىلتۋدان قامال الۋ شايقاسىنىڭ جەڭىسىنە قول جەتكىزۋ توڭىرەگىندە، اۋىل - قىستاقتى گۇلدەندىرۋدى ىلگەرىلەتۋدى جوبالاپ، رايونىمىزدىڭ اۋىل شارۋاشىلىعى، اۋىل - قىستاق قىزمەتىندە جاڭا جاعداي اشۋدى ىلگەرىلەتۋ كەرەك.
ءبىرىنشى، اۋىل شارۋاشىلىعىنىڭ باسەكەلىك قۋاتىن جوعارىلاتۋدىڭ جاڭا جولىن قاراستىرۋ كەرەك. اۋىل شارۋاشىلىعىنىڭ قامداۋ جاعىنداعى قۇرىلىمدىق رەفورماسىن نەگىزگى جەلى ەتۋگە تاباندى بولىپ، اۋىل شارۋاشىلىعىنىڭ ءونىمدى ارتتىرۋ بەتالىسىنان ساپانى ءوسىرۋ بەتالىسىنا قاراي ويىسۋىن جەدەل ىلگەرىلەتىپ، وسى زامانعى اۋىل شارۋاشىلىعى كاسىپ جۇيەسىن، ءوندىرىس جۇيەسىن، تيجارات جۇيەسىن جەدەل قۇرىپ، اۋىل شارۋاشىلىعىنىڭ جالپىلىق ونىمدىلىگى مەن باسەكەلىك قۋاتىن ۇزدىكسىز جوعارىلاتۋ كەرەك.
ەكىنشى، دارىندى تاربيەلەۋدە جاڭا شارا قولدانۋ كەرەك. دارىندىلاردى اۋىل - قىستاققا جىبەرۋ ارناسىن كۇش سالا ىركىلىسسىزدەندىرىپ، ەگىنشى - مالشىلاردى عىلىم - تەحنيكالىق پراكتيكادان وتكىزۋدى كۇشەيتىپ، ءبىر توپ ”اۋىل ماماندارىن“، ”ەگىنجاي ءبىلىمدارلارىن“، كاسىپ باستاماشىلارىن جانە اۋىل - قىستاق ەلەكتروندىق ساۋدا دارىندىلارىن جەتىلدىرۋ، ءبىر توپ اۋىل شارۋاشىلىعى كاسىپتىك باسقارۋشىلارىن، دەلدالدارىن سۇيەمەلدەۋ، ءبىر توپ اۋىل - قىستاق ۇستالارىن، مادەنيەت مايتالماندارىن جانە بەيزاتتىق مادەنيەت مۇرا مۇراگەرلەرىن جەتىلدىرۋ كەرەك.
ءۇشىنشى، وبراز تۇلعالاپ، رۋح سومداپ، اۋىل - قىستاقتىڭ وركەنيەتتى جاڭا بەينەسىنە جەتەكشىلىك ەتۋ كەرەك. باس نىسانانى مىقتاپ ارقاۋ ەتىپ، زاتتىق وركەنيەت پەن رۋحاني وركەنيەتتى بىرگە يگەرۋگە تاباندى بولىپ، اۋىل - قىستاق يدەولوگيا شەبىن كۇشەيتىپ قۇرىپ، اۋىل - قىستاقتىڭ يدەيا - ءمورال قۇرىلىسىن كۇشەيتىپ، اۋىل - قىستاق الەۋمەتتىك مادەنيەت جۇيەسىن كەمەلدەندىرىپ، اۋىل - قىستاق وركەنيەت قۇرىلىسىن شىن مانىندە كۇشەيتۋ كەرەك.
ءتورتىنشى، تاماشا ەكولوگيالىق ورتا قالىپتاستىرۋدا جاسىل دامۋدىڭ جاڭا باسىمدىعىن ساۋلەلەندىرۋ كەرەك. تۇنىق سۋ، جاسىل تاۋ باعالى بايلىق، قارلى دالا، مۇزدى الاپ تا باعالى بايلىق دەگەن ۇستانىمدى مىقتاپ ورناتىپ، قورشاعان ورتانى قورعاۋدى، قالپىنا كەلتىرۋدى ويداعىداي يگەرىپ، قونىس ورتاسىن وڭاۋدى ىلگەرىلەتىپ، اۋىل - قىستاق ەكولوگيالىق جۇيەسى قۇرىلىسى ارقىلى ەكولوگيانىڭ كوركەمدىگىن جەبەۋ، اۋىل - قىستاق قونىس ورتاسىن وڭاۋ ارقىلى تۇرمىستىڭ كوركەمدىگىن جەبەۋ، اۋىل شارۋاشىلىعى قورشاعان ورتاسىنىڭ لاستانۋىن جونگە سالۋ ارقىلى ءوندىرىستىڭ كوركەمدىگىن جەبەۋ كەرەك.
بەسىنشى، نەگىزگى ساتىنىڭ نەگىزىن نىعايتۋدا، اۋىل - قىستاقتى شەبەرلىكپەن جونگە سالۋدىڭ جاڭا جۇلگەسىن قۇرۋ كەرەك. اۋىل - قىستاقتى جونگە سالۋدى كۇشەيتىپ جانە وعان جاڭالىق ەنگىزىپ، پارتكوم باسشىلىق ەتەتىن، ۇكىمەت جاۋاپتى بولاتىن، قوعام سايكەسەتىن، جۇرتشىلىق ات سالىساتىن، زاڭمەن جونگە سالۋ ارقىلى قامتاماسىز ەتىلەتىن وسى زامانعى اۋىل - قىستاقتى جونگە سالۋ ءتۇزىلىسىن قۇرۋ، اقاۋسىزداندىرۋ، ءوزىن - ءوزى جونگە سالۋ، زاڭمەن جونگە سالۋ، مورالمەن جونگە سالۋ ۇشتاستىرىلعان اۋىل - قىستاقتى جونگە سالۋ جۇيەسىن اقاۋسىزداندىرۋ كەرەك.
التىنشى، اۋىل - قىستاقتى گۇلدەندىرۋدىڭ قوزعاۋشى كۇشىن، ومىرشەڭدىك كۇشىن قاۋلاتۋدا، تىڭنان قامال الۋدى جۇزەگە اسىرۋ كەرەك. اۋىل شارۋاشىلىعىن كۇشەيتىپ، شارۋالارعا تيىمدىلىك جەتكىزۋ ساياساتىن بۇلجىماي تياناقتاندىرىپ، اۋىل - قىستاقتىڭ نەگىزگى شارۋاشىلىق ءتۇزىمىن بەكەمدەپ جانە كەمەلدەندىرىپ، اۋىل - قىستاق جەر ءتۇزىمى رەفورماسىن تەرەڭدەتىپ، اۋىل - قىستاق كوللەكتيۆ مال - مۇلىك ۇقىعى ءتۇزىمى رەفورماسىن نىق قاداممەن ىلگەرىلەتىپ، اۋىل شارۋاشىلىعىنا، اۋىل - قىستاققا، شارۋالارعا فينانستىق قىزمەت وتەۋدىڭ ءاربىر بۋىنىن ىركىلىسسىزدەندىرىپ، اۋىل شارۋاشىلىعى، اۋىل - قىستاق، شارۋالار ءىسىنىڭ دامۋىنا ومىرشەڭدىك كۇش، قوزعاۋشى كۇش قوسۋ كەرەك.
چىن چۋانگو بىلاي دەپ باسا دارىپتەدى: پارتيانىڭ باسشىلىعىن شىن مانىندە كۇشەيتىپ، بارلىعىندا ءىس جۇزىندىك جاعدايدى نەگىزگە الۋعا تاباندى بولىپ، فورماشىلدىقتى، تورەشىلدىكتى باتىل تيىپ، اۋىل - قىستاقتى گۇلدەندىرۋ ستراتەگياسىنىڭ ەگجەي - تەگجەيلى، ناقتى تياناقتاندىرىلۋىن ىشكەرىلەي ىلگەرىلەتۋ كەرەك. ءار دارەجەلى پارتكوم مەن ۇكىمەت بەتالىستى يگەرۋگە، كەلەلى جاعدايدى جوبالاۋعا، ساياسات بەلگىلەۋگە، رەفورمانى جەبەۋگە تاباندى بولۋ، ءار دارەجەلى اۋىل - قىستاقتى گۇلدەندىرۋ باسشىلىق گرۋپپالارى ماكرولىق جوبانى، ۇيىمدىق سايكەستىرۋدى، تياناقتاندىرۋدى قۋزاۋدى كۇشەيتۋ، ءار دارەجەلى قاتىستى تاراۋلار سايكەسىپ، سەلبەسىپ، بىرىككەن كۇش قالىپتاستىرىپ، اۋىل - قىستاقتى گۇلدەندىرۋ ستراتەگياسىن اتقارۋعا پارمەندى قامتاماسىزدىق ازىرلەۋى كەرەك.
اۆتونوميالى رايوننىڭ اۋىل - قىستاقتى گۇلدەندىرۋ باسشىلىق گرۋپپاسىنىڭ مۇشەلەرى ماجىلىسكە قاتىناستى.
