ءۇشتۇرپان اۋدانى ەلەكتروندىق ساۋدا ارقىلى كەدەيلەردى سۇيەمەلدەۋ ۇلگىسىن بەلسەنە قاراستىردى
الدىڭعى 11 ايدا ەلەكتروندىق ساۋدانىڭ ساۋدا سوماسى سايكەس مەزگىلدەگىدەن ％40 ارتتى
ءتىلشى جاڭ جىلي، ەرىكتى ءتىلشى حاۋ ليڭ 12 - ايدىڭ 28 - كۇنى ءۇشتۇرپاننان حابارلايدى. ”شاڭحايلىق حاريدار 3 ساندىق كەپتىرىلگەن جەمىسكە تاپسىرىس بەردى، شىنجىندىق حاريدار 8 ساندىق كەپتىرىلگەن جەمىسكە تاپسىرىس بەردى...“. 12 - ايدىڭ 28 - كۇنى ءۇشتۇرپان اۋدانى ءۇشتۇرپان قالاشىعى ەلەكتروندىق ساۋدا قىزمەت وتەۋ پۋنكتىنىڭ جاۋاپتىسى ءادىل الىم قىزمەتتەستەرىمەن بىرگە ساندىققا سالا وتىرىپ، تاپسىرىس بەرىلگەن زاتتارعا قاتىستى ينفورماتسيالاردى اداقتاپ جاتتى.
ءادىل قۋانا بىلاي دەدى: جاڭا جىل تاياپ قالدى، بەرىلگەن تاپسىرىستار وتە كوپ، پۋنكتىمىزدىڭ كۇندىك ساۋدا سوماسى 10 مىڭ يۋان اينالاسىندا، كەپتىرىلگەن جەمىس سياقتى اۋىل شارۋاشىلىعى ونىمدەرىنىڭ باسىم كوبى بەيجيڭگە جانە شىعىس وڭتۇستىكتەگى تەڭىز جاعالاۋىنداعى قالالارعا ساتىلادى.
ءۇشتۇرپان قالاشىعى ەلەكتروندىق ساۋدا قىزمەت وتەۋ پۋنكتىنىڭ قامباسى ءمينات جەمىس - ورمان كاسىپتىك سەلبەستىك كووپەراتيۆىنە ورنالاسقان. سەلبەستىك كووپەراتيۆىندە جۇمىسشىلار جاڭعاقتىڭ قابىعىن ارشىپ، كەپتىرىپ، سۇرىپتاپ وڭدەيدى، تاپسىرىس قابىلداۋعا ارناۋلى جاۋاپتى قىزمەتكەرلەر دە بار.
بيىل جىل باسىنان بەرى، ءۇشتۇرپان قالاشىعى ەلەكتروندىق ساۋدا جونىنەن قىزمەت وتەۋ پۋنكتىنىڭ ەلەكتروندىق ساۋداسىنىڭ ساۋدا سوماسى 4 ميلليون يۋاننان اسىپ، ءادىل مەن ءمينات جەمىس - ورمان كاسىپتىك سەلبەستىك كووپەراتيۆىنىڭ جاۋاپتىسى قۇربان ءاماتتى ەرەكشە تەبىرەندىردى. ”اۋدان جالپىلاستىرعان ’سەلبەستىك كووپەراتيۆى + ەلەكتروندىق ساۋدا + اۋىل شارۋاشىلىعى ونىمدەرى‘ تيجارات ۇلگىسى توتەنشە جاقسى، بيىلعى ساۋدا سوماسى بىلتىرعىدان ءبىر ميلليون يۋانعا تارتا ارتتى!“ - دەدى قۇربان.
ءادىل جاستايىنان ءۇشتۇرپان اۋدانى اقيار قالاشىعى تومەنگى حاڭدي قىستاعىندا تۋىپ وسكەن، ونىڭ ەسىندە قالۋىنشا ءوز جەرىنىڭ جاڭعاعى توتەنشە ارزانعا ساتىلاتىن، كەي كەزدەرى ءتىپتى ساتىلماي دا قالاتىن. 2015 - جىلى ول شاڭحايعا بارىپ وقىعاندا مەكتەپ ماڭىنداعى ەرەن بازارلارداعى جاڭعاقتىڭ توتەنشە قىمبات ەكەندىگىن، ساپاسى دا اۋىلىنداعى جاڭعاققا جەتپەيتىندىگىن بايقايدى.
2016 - جىلى ءۇشتۇرپان اۋدانى شينجياڭ بويىنشا ەلەكتروندىق ساۋدانى اۋىل - قىستاقتارعا جەتكىزۋدەن تۇڭعىش توپتا ۇلگى كورسەتەتىن اۋدان بولىپ بەلگىلەنىپ، اۋىل - قىستاق ەلەكتروندىق ساۋدا جونىنەن قىزمەت وتەۋ پۋنكتى تۇتاس قامتىمدى تەز ارادا جۇزەگە اسىرىپ، بۇكىل اۋداندا اۋىل - قالاشىق دارەجەلى 9 ەلەكتروندىق ساۋدا جونىنەن قىزمەت وتەۋ پۋنكتى، قىستاق دارەجەلى 108 ەلەكتروندىق ساۋدا جونىنەن قىزمەت وتەۋ ءتۇيىنى قۇرىلىپ، ەلەكتروندىق ساۋدا ارقىلى كەدەيلەردى سۇيەمەلدەۋ ۇلگىسىندە ىزدەنىس جاساۋ بارىسىندا ۇزدىكسىز جاڭالىق اشتى.
بيىل 9 - ايدا ۇرىمجىدە قىزمەت ىستەيتىن ءادىل قىزمەتتەن شەگىنىپ اۋىلعا قايتىپ كەلىپ، ۇسىنىسپەن ءۇشتۇرپان اۋدانى ءمينات جەمىس - ورمان كاسىپتىك سەلبەستىك كووپەراتيۆىنىڭ ەلەكتروندىق ساۋدا كاسىبىنە جاۋاپتى بولادى. ”اتا مەكەننىڭ ەلەكتروندىق ساۋدا ىستەرىنىڭ جەدەل دامىعاندىعىن كورىپ، وسى بەكىمگە كەلدىم“، - دەدى ول.
ءتىلشىنىڭ ءۇشتۇرپان اۋداندىق ساۋدا جانە ونەركاسىپ، ينفورماتسيالاندىرۋ مەكەمەسىنەن ۇعىسۋىنا قاراعاندا، وسى اۋداننىڭ ەلەكتروندىق ساۋدا ارقىلى كەدەيلەردى سۇيەمەلدەۋىنىڭ ”ەلەكتروندىق ساۋدا + ساياحات“، ”ەلەكتروندىق ساۋدا + وتباسىلىق قىزمەت وتەۋ“، ”ەلەكتروندىق ساۋدا + ۇعىسۋ، تيىمدىلىك جاساۋ، توعىستىرۋ“، ”سەلبەستىك كووپەراتيۆى + ەلەكتروندىق ساۋدا + اۋىل شارۋاشىلىق ونىمدەرى“، ”ەلەكتروندىق ساۋدا + اۋىل شارۋاشىلىق ونىمدەرى + كەدەي وتباسى“ سياقتى ۇلگىلەرى بار، ءادىل سياقتى ءتىپتى دە كوپ اۋىل - قىستاق جاستارىن وعان ات سالىسىپ، ەلەكتروندىق ساۋدا تۇعىرى ارقىلى كەدەيلىكتەن ارىلىپ، بايۋعا باۋراپ جاتىر ەكەن.
”ءۇشتۇرپان اۋدانى اۋىل شارۋاشىلىق ونىمدەرىن جەلىدە تەزدەتىپ ساتۋ، جەلىدەن تىس سەزىنۋ ءتاسىلىن قولدانىپ، كەدەي وتباسىلارىن ەلەكتروندىق ساۋدانىڭ ساتۋ بۋىنىنا ات سالىسۋعا شابىتتاندىرىپ، كەدەي بۇقارانىڭ اۋىل شارۋاشىلىعى ونىمدەرىن ساتۋىنا كومەكتەستى. الدىڭعى 11 ايدا تۇتاس اۋدان ەلەكتروندىق ساۋدا بويىنشا 495 مىڭ 200 تاپسىرىستى ورىنداپ، ساۋدا سوماسى 30 ميلليون 305 مىڭ 700 يۋانعا جەتىپ، سايكەس مەزگىلدەگىدەن％ 42.73 ارتتى. ەلەكتروندىق ساۋدا بويىنشا 10 كەزەك 2259 ادامدى باۋلىدى، مۇنىڭ ىشىندە، ارحيۆ تۇرعىزىلىپ، كارتچكالاندىرىلعان كەدەي وتباسىنان 802 ادام - رەت باۋلىنىپ، ەلەكتروندىق ساۋدا بويىنشا 1081 ادام جەتىلىپ شىقتى“، - دەدى ءۇشتۇرپان اۋداندىق ساۋدا جانە ونەركاسىپ، ينفورماتسيالاندىرۋ مەكەمەسىنىڭ قاتىستى جاۋاپتىسى جاڭ نان.
