شينحۋا اگەنتتىگىنىڭ 12 - ايدىڭ 7 - كۇنى فۋجوۋدان بەرگەن حابارى (ءتىلشى چىن حۇڭ - ي). ”22 جىلدىڭ الدىنداعى سول كورىنىستى ويلاسام، كوكەيىمنەن استە كەتپەيدى“. توڭكەرىستىك قۇربان، شيامىن قالالىق قوعام حاۋىپسىزدىگى مەكەمەسى قاتىناس ساقشى تارماق اترەتى جيمەي ۇلكەن اترەتىنىڭ قىزمەتكەرى لين سۇڭرۇڭمەن بىرگە شايقاسقا قاتىناسقان حالىق ساقشىسى ليان ۋىنيۋان سول كەزدە 26 جاستاعى جاۋىنگەر سەرىگىنىڭ ناگان ۇستاعان بۇزاقىنى ۇستاۋ جولىندا ءبىرىنشى شەپتە باقىتقا قارسى قۇربان بولعاندىعىن ايتتى.
لين سۇڭرۇڭ 1971 - جىلى دۇنيەگە كەلگەن، فۋجياننىڭ چاڭتاي اۋدانى ۋ - ان قالاشىعىنان. 1995 - جىلى جيمەي داشۋەسىنەن وقۋ تاۋىسقاننان كەيىن، شيامىن قالالىق قوعام حاۋىپسىزدىگى مەكەمەسى جيمەي ۇلكەن اترەتى داچياۋ ورتا اترەتىندە حالىق ساقشىسى بولادى.
1997 - جىلى 2 - ايدىڭ 24 - كۇنى ساعات 7 مولشەرىندە، لين سۇڭرۇڭ مەن ليان ۋىنيۋان شيامىننىڭ جيمەيىنداعى سۇنسو قاراۋىلحاناسىندا كەزەكشى بولادى، كەنەت سىرت جاقتان ”توناپ كەتتى، قۇتقارىڭدار...“ دەگەن ايعاي ەستىلەدى. ءبىر كىرە اۆتوكولىك شوفەرى ۇرەيى ۇشا اماندىق ساقتاۋ قاراۋىلحاناسىنا جۇگىرىپ كىرىپ، ايعاي سالىپ قۇتقارۋ تىلەپ، ءوزىنىڭ ناگان ۇستاعان بۇزاقىنىڭ بارىمتاسىنا ۇشىراعاندىعىن ايتادى.
لين سۇڭرۇڭ قاراۋىلحانادان اتىلىپ شىققاندا، اقشىل سارى ءتۇستى شاپان كيگەن ءبىر جاس جىگىتتىڭ جول جاعاسىندا توقتاتۋلى تۇرعان كىرە اۆتوكولىكتەن سەكىرىپ ءتۇسىپ، اسىعىپ - ۇسىگىپ جولدىڭ قارسىسىنداعى سۇنسو امانات - قارىز كووپەراتيۆىنە قاراي قاشىپ بارا جاتقانىن كورەدى.
سۇنسو قىستاعىندا ايىرىق جول ءبىرشاما كوپ بولعاندىقتان لين سۇڭرۇڭ مەن ليان ۋىنيۋان ءبولىنىپ قۋعىندايدى. ءبىر ەگىنشىنىڭ اۋلاسىنىڭ الدىنا كەلگەندە، لين سۇڭرۇڭ بۇزاقىنى قۋىپ جەتەدى.
”تاستا قارۋىڭدى، توقتات قارسىلىعىڭدى...“ دەپ لين سۇڭرۇڭ جىگىتكە ەسكەرتۋ بەرەدى، ءبىراق اقىلىنان اداسقان بۇزاقى ناگانىن سۋىرىپ الىپ لين سۇڭرۇڭدى نىساناعا الادى. لين سۇڭرۇڭنىڭ قارنىنا وق تيەدى، ءبىراق ول قايتپاس جىگەر جانە ەرەكشە قايسارلىقپەن قاتتى اۋىرعانعا ءتوزىپ، الاقانىمەن جارا اۋزىن باسىپ الىپ نەشە مەتر جەرگە قۋىپ بارادى، اقىرىندا دارمەنى قالماي قۇلاپ تۇسەدى. جاراقاتى اۋىر بولعاندىقتان لين سۇڭرۇڭ سول كۇنى تۇستە ەرلىكپەن قۇربان بولىپ، ءوزى سۇيەتىن قىزمەت ورنىمەن قوشتاستى.
”ول وتە باۋىرمال ەدى، ۇنەمى بىزگە كومەكتەسىپ جۇرەتىن، بۇقاراعا كومەكتەسەتىن“. جاۋىنگەر سەرىگىن تىلگە العاندا، ليان ۋىنيۋان قاتتى تولقىدى. ءبىر جولى بىرگە مىندەت اتقارا شىققاندا، انا - بالالى ەكەۋدىڭ جول شەتىندە جۇرەلەپ وتىرعانىن كورەدى. لين سۇڭرۇڭ ولاردىڭ قاسىنا بارىپ سۇراستىرىپ، بۇل ايەلدىڭ بالاسىن ەرتىپ شاڭحايعا كۇيەۋىن ىزدەپ بارا جاتقاندىعىن، ناتيجەدە جول ورتادان اقشا قاپشىعىن جوعالتىپ الىپ، قالتاسىندا اقشا قالماي، ءبىر كۇن بويى تاماق ىشپەگەندىگىن ۇعىسادى. لين سۇڭرۇڭ دەرەۋ انا - بالالى ەكەۋىنە تاماق ساتىپ اكەلىپ بەرەدى، سونان سوڭ ولاردىڭ پويەز بەلەتىن ساتىپ الۋىنا 200يۋان اقشا بەرەدى. ”سول كەزدە ءبىزدىڭ ايلىق ەڭبەكاقىمىز 1000يۋان عانا بولاتىن“، - دەيدى ليان ۋىنيۋان.
بۇقاراعا توتەنشە ىقىلاستى بولىپ قالماستان، قىزمەتتەستەرىنە دە سونداي ەدى. 1995 - جىلى ليان ۋىنيۋان جاڭادان قىزمەتكە قاتىناسىپ، لين سۇڭرۇڭمەن سەرىك بولادى. ”سول كەزدە قىزمەتكە تىم قانىق ەمەس ەدىم، ول ۇنەمى ماعان جەتەكشى بولاتىن“. ليان ۋىنيۋان بىلاي دەدى: جايشىلىقتاعى قىزمەتتە كىمنىڭ شۇعىل جۇمىسى شىعىپ قالىپ، كەزەك اۋىسۋ، ورنىنا ىستەي تۇرۋ كەرەك بولسا، لين سۇڭرۇڭ ەش ءارى - سارى بولماستان ءبىرىنشى بولىپ ورنىنا ىستەيتىن.
”ول قايتىس بولعاننان كەيىن، جاتاقتاعى ونىڭ كورپەسىن، شاپكىسىن، كيىمدەرىن ورنىنان قوزعاماي 3 جىل قويىپ قويدىم، جيناستىرىپ تاستاۋعا قيمادىم...“ - دەگەن ليان ۋىنيۋان مۇڭايا كەي كەزدەرى جاتاققا قايتىپ كەلگەندە، ونى سول ورنىندا وتىرعانداي سەزىنەتىندىگىن ايتتى.
لين سۇڭرۇڭ قۇربان بولعاننان كەيىن، قوعام حاۋىپسىزدىگى مينيسترلىگى وعان 2 - دارەجەلى قاھارمان ۇلگى اتاعىن تولىقتاپ بەردى ءارى فۋجيان ولكەلىك حالىق ۇكىمەتى وعان توڭكەرىستىك قۇربان اتاعىن بەردى. ءار جىلعى چيڭميڭ كەزىندە شيامىن قوعام حاۋىپسىزدىگى سالاسى تۇگەلدەي قابىر سىپىرۋ قيمىلىن ورىستەتىپ، ەرەكشە رايون قۇرىلىسى ءۇشىن قۇربان بولعان قوعام حاۋىپسىزدىگى قۇرباندارىن ساعىنا ەسكە الادى، ولاردىڭ اراسىندا، ارينە، لين سۇڭرۇڭ قۇربان دا بار.
