شينحۋا اگەنتتىگىنىڭ 12 - ايدىڭ 6 - كۇنى كۇنميڭنەن بەرگەن حابارى (ءتىلشى زىڭ ۋي). ءار جىلعى چيڭميڭ، يۇننان ولكەسى حۇڭحى حانيزۋ، يزۋ اۆتونوميالى وبلىسى كاييۋان قالالىق قوعام حاۋىپسىزدىگى مەكەمەسى تۇگەل جاڭادان قابىلدانعان حالىق ساقشىلارى مەن جاردەمشى ساقشىلاردى ۇيىمداستىرىپ، قۇرباندار قابىرستانىنا بارىپ، جۇمىس ۇستىندە قۇربان بولعان ”ساقا بولىمشە باستىعى“ − ياڭ جىجيانعا ازا بىلدىرەدى. 23 جىلدىڭ الدىندا ول قىلمىسكەردى تۇتقىنعا العاندا، بۇقارانى قورعاۋ ءۇشىن تايسالماستان گراناتتى تۇتاندىرعان قىلمىسكەرگە تۇرا ۇمتىلىپ، نەبارى 31 جاسىندا ەرلىكپەن قۇربان بولعان.
ياڭ جىجيان، جۋاڭزۋ، 1965 - جىلى يۇنناننىڭ كاييۋانىنداعى ءبىر ديقان وتباسىندا دۇنيەگە كەلگەن. 1985 - جىلى 3 - ايدا قىزمەتكە قاتىناسقان 1990 - جىلى 2 - ايدا كاييۋان قالالىق قوعام حاۋىپسىزدىگى مەكەمەسى ياڭجيە ساقشى بولىمشەسىنىڭ ورىنباسار باستىعى بولىپ وسىرىلگەن، 1992 - جىلى ناتيجەسى كورنەكتى بولعاندىقتان حۇڭحى وبلىستىق پارتكوم، وبلىستىق ۇكىمەتتىڭ ماراپاتتاۋ سيلىعىنا ءبىر رەت يە بولىپ، ”وزات جەكە“ بولىپ باعالانعان، 1994 - جىلى 2 - ايدا كاييۋان قالالىق قوعام حاۋىپسىزدىگى مەكەمەسى ياڭجيە ساقشى بولىمشەسىنىڭ باستىعى بولىپ وسىرىلگەن ءارى سول جىلى 5 - ايدا جۇڭگو كوممۋنيستىك پارتياسىنا مۇشە بولعان.
حاۋىپ - قاتەر الدىندا، ەرجۇرەك تە تايسالماس ياڭ جىجيان اتويلاپ الدا جۇرۋگە ادەتتەنگەن. 1996 - جىلى 11 - ايدىڭ 29 - كۇنى تۇستە ياڭ جىجيان مەن جاۋىنگەر سەرىگى مىندەت اتقارىپ قايتار جولدا ءبىر بۇزاقىنىڭ قاساقانا پالە شىعارىپ جاتقانىن، قالىڭ بۇقارانىڭ ونى قورشاي قىزىقتاپ تۇرعانىن بايقايدى. ياڭ جىجيان دەرەۋ بارىپ توقتاتادى ءارى زاڭ بويىنشا بۇزاقىنى ساقشى بولىمشەسىنە بارۋعا شاقىرادى. سول ساتتە قانقۇيلى بۇزاقى كەنەتتەن بەلىنەن ءتۇتىنى بۋداقتاعان ءبىر گراناتتى الىپ شىعىپ، ماڭايداعى بۇقاراعا لاقتىرماق بولادى.
ماڭايداعى بۇقارا مەن جاۋىنگەر سەرىكتەرىنىڭ باس اماندىعىن قورعاۋ ءۇشىن، توتەنشە حاۋىپتى جاعدايدا، ياڭ جىجيان استە ءارى - ءسارى بولماستان، تۇرا ۇمتىلىپ بۇزاقىنىڭ گرانات ۇستاعان قولىن مىقتاپ ۇستاپ، ونىڭ جۇرتقا قاراي لاقتىرۋىنا مۇمكىندىك بەرمەيدى. گۇرس ەتكەن داۋىس شىعىپ گرانات جارىلادى، بۇزاقى تاباندا ولەدى، ماڭايداعى بۇقارا مەن جاۋىنگەر سەرىكتەرى قۇتقارىلادى، ياڭ جىجياننىڭ باسى مەن دەنەسىنىڭ 30 قانشا جەرى جارالانعاندىقتان، دەرەۋ اۋىلدىق ەمحاناعا جەتكىزىلىپ شۇعىل قۇتقارىلادى، سوڭىندا جاراقاتى اۋىر بولعاندىقتان سول كۇنى ساعات 15تەن 40 مينۋت وتكەندە ەرلىكپەن قۇربان بولادى.
ول ياڭ جىجياننىڭ ومىرىندەگى ەڭ ۇزاق بىرنەشە سەكۋند، الايدا ءدال وسى نەشە سەكۋندتا ول ءوزىنىڭ دەنەسىمەن ماڭايداعى بۇقارا ءۇشىن بەرىك قامال سوقتى.
ياڭ جىجياننىڭ ەرلىكپەن قۇربان بولعانى تۋرالى سۋىق حابار تارالىسىمەن ياڭجيە اۋىلى مەن داجۋاڭ اۋىلىنداعى كادر - بۇقارا جانە ونىمەن قىزمەتتەس، مايدانداس بولعان جاۋىنگەر سەرىكتەرى تۇگەلدەي اۋىر قايعىعا باتادى. 12 - ايدىڭ 6 - كۇنى وزدىكتەرىنەن ۇيىمداسقان نەشە مىڭ كادر - بۇقارا قاقاعان سۋىققا قاراماستان، نەشە ون شاقىرىم الىستان جەرلەۋ مەكەمەسىنە بارىپ، قىزمەتىنە ادال، قالتقىسىز دا قايمىقپاس، جۇرتشىلىق پەن جاۋىنگەر سەرىكتەرىنىڭ ءومىرى مەن حاۋىپسىزدىگى ءۇشىن ەرلىكپەن قۇربان بولعان ياڭ جىجياننىڭ سۇيەگىمەن قوشتاسادى.
ياڭ جىجيان قىزمەت ورنىن ءسۇيىپ، كاسىپتى قۇرمەتتەدى. قاراستى اۋماقتىڭ جاۋ جاعدايى، قوعامدىق جاعدايى كۇردەلى بولعان ناقتى جاعدايعا مەڭزەس، ول بارلىق حالىق ساقشىلارىن نەگىزگى ساتىداعى نەگىزدىك قۇرىلىس پەن كوپشىلىككە سۇيەنىپ ساقتانۋ جانە جونگە سالۋ قىزمەتىن مىقتى يگەرۋگە باستاپ، ارناۋلى كۇرەستەردى جانە قاتاڭ سوققى بەرۋ، رەتتەۋ - جونگە سالۋ قىزمەتىن بەلسەنە ورىستەتىپ، ءتۇرلى زاڭعا قايشى قىلمىستىق ارەكەتتەرگە قاتاڭ سوققى بەرىپ، قاراستى اۋماقتىڭ قوعام اماندىعىن وڭاۋ ءتارتىبىن ءونىمدى قورعادى. ول ىلگەرىندى - كەيىندى 105 قىلمىستىق ىستەر دەلوسىن اشكەرەلەپ، 506 قوعام اماندىعى دەلوسىن تەكسەرىپ ءبىر جاقتى ەتىپ، 77 جۇرتشىلىق داۋ - شارىن جاراستىرىپ، جۇرتتىڭ اماندىعىنا شىنايى كەپىلدىك ەتۋگە كورنەكتى ۇلەس قوسىپ، تالاي رەت وزات جەكە بولىپ باعالاندى.
1997 - جىلى 5 - ايدا يۇننان ولكەلىك حالىق ۇكىمەتى ياڭ جىجيان جولداسقا قۇربان اتاعىن تولىقتاپ بەردى؛ 1997 - جىلى 9 - ايدا قوعام حاۋىپسىزدىگى مينيسترلىگى ياڭ جىجيان جولداسقا ءبىرىنشى دارەجەلى قاھارمان ۇلگى اتاعىن تولىقتاپ بەردى.
ياڭ جىجيان قۇربان بولعاندا، ۇلى ياڭ مىڭنان نەبارى 6 جاستا بولاتىن، اكەسى تۋرالى تەك ”اكەم قاربالاس، ۇيگە از كەلەدى ...“دەيتىنى عانا ەسىندە. ەرجەتكەننەن كەيىن، شەشەسىنەن، اكەسىنىڭ قىزمەتتەستەرىنەن ەستىگەن اكەسىنىڭ ەرجۇرەك تە تايسالماس ساقشى وبرازى ونىڭ كوڭىلىنە تەرەڭ ۇيالايدى، بۇل ياڭ مىڭناننىڭ اكەسى سياقتى ساقشى بولۋعا بەل بايلاۋىنا دەم بەرەدى.
2009 - جىلى ياڭ مىڭنان يۇننان ساقشى - وفيتسەرلەر شۋەيۋانىنىڭ بارلاۋ ءىلىمى ماماندىعىنا قابىلدانادى، وقۋ بىتىرگەننەن كەيىن، ءوزىنىڭ ارمانىن جۇزەگە اسىرىپ، اكەسىنىڭ كوزى تىرىسىندەگى جۇمىس ورنى − كاييۋان قالالىق قوعام حاۋىپسىزدىگى مەكەمەسىنىڭ ءبىر مۇشەسى بولادى.
بيىل ياڭ مىڭناننىڭ ساقشى بولعانىنىڭ 5 - جىلى، قازىر ول كاييۋان قالالىق قوعام حاۋىپسىزدىگى مەكەمەسى ساقشى ىستەرىن قامتاماسىز ەتۋ كەڭسەسىنىڭ ىشكى جۇمىس قىزمەت ورنىندا ەلدەن ەرەك كاسىپ شەبەرىنە بىرتىندەپ اينالىپ كەلەدى. ”مەن قاھارمان ۇلگىنىڭ ۇلىمىن، اكەمدى ۇياتقا قالدىرمايمىن!“، - دەدى ول.
