تيانشان تورى   ›   جاڭالىقتار   ›   ساياحات

2019 - جىلى تۇتاس شينجياڭ بويىنشا A دارەجەلى 45 كورىنىس ءوڭىرى تىڭنان قوسىلدى

پامير ساياحات ءوڭىرى مەملەكەتتىك 5A دارەجەلى ساياحات كورىنىس ءوڭىرى بولىپ ءساتتى قۇرىلدى

  تىلشىلەر ياۋ گاڭ، يۋان لەي 1 - ايدىڭ 2 - كۇنى ۇرىمجىدەن حابارلايدى. 1 - ايدىڭ 2 - كۇنى اۆتونوميالى رايوندىق مادەنيەت جانە ساياحات مەڭگەرمەسىنەن ۇعىسۋىمىزشا، 2019 - جىلى تۇتاس شينجياڭ بويىنشا تىڭنان قوسىلعان A دارەجەلى كورىنىس ءوڭىرى 45كە جەتكەن، تاشقورعان تاجىك اۆتونوميالى اۋدانىنىڭ پامير ساياحات ءوڭىرى مەملەكەتتىك 5A دارەجەلى ساياحات كورىنىس ءوڭىرى بولىپ ءساتتى قۇرىلعان. قازىر تۇتاس شينجياڭ (بيڭتۋاندى قامتيدى) بويىنشا مەملەكەتتىك 5A دارەجەلى ساياحات كورىنىس وڭىرىنەن 13ى بار.

  2019 - جىلى تۇتاس شينجياڭ بويىنشا تىڭنان قوسىلعان 5A دارەجەلى كورىنىس ءوڭىرى1، 4A دارەجەلى كورىنىس ءوڭىرى 13، 3A دارەجەلى كورىنىس ءوڭىرى 23، 2A دارەجەلى كورىنىس ءوڭىرى 8. مۇنان سىرت، تاعى 16 كورىنىس ءوڭىرى 5A دارەجەلى كورىنىس ءوڭىرى بولىپ قۇرىلۋعا بەلسەنە ءوتىنىش بەردى، مۇنىڭ ىشىندە قارامايلى سايتانكەرىش كورىنىس ءوڭىرى، بۇراتالا موڭعۇل اۆتونوميالى وبلىسىنىڭ سايرام كولى كورىنىس ءوڭىرى، شونجى جانبۇلاق كورىنىس ءوڭىرى مەملەكەتتىك 5A دارەجەلى كورىنىس ءوڭىرى بولىپ قۇرىلۋدىڭ شەشۋشى كەزەڭىنە ءوتتى.

  جۋىق جىلداردان بەرى تۇتاس شينجياڭنىڭ جەر - جەرى A دارەجەلى ساياحات كورىنىس ءوڭىرىن قۇرۋ تەبىنىن ارتتىردى. 2019 - جىلى 12 - ايدىڭ 26 - كۇنى، التاي قالاسىنىڭ حۋاليڭ باقشاسى كورىنىس ءوڭىرى، بۋىرشىن اۋدانىنىڭ جۇڭگو - رەسەي بايىرعى كەمەتۇراق سالت - سانا باقشاسى كورىنىس ءوڭىرى سياقتى 11 كورىنىس ءوڭىرى شينجياڭ ساياحات كورىنىس ءوڭىرى ساپاسىن، دارەجەسىن باعالاۋدان ءوتىپ، 4A دارەجەلى ساياحات كورىنىس وڭىرىنە اينالدى.

  كوپ ءتۇرلى ساياحات بايلىعى شينجياڭدى ساياحاتشىلار ساياحاتتاي بارۋدى اڭسايتىن جەرگە اينالدىردى. ورنىقتىلىقتىڭ پايداسى ۇزدىكسىز كورىلىپ، ءتۇرلى مادەنيەت ساياحات قيمىلدارى وتكىزىلىپ جانە ءتيىمدى ساياساتتار شىعارىلىپ، A دارەجەلى كورىنىس ءوڭىرىنىڭ ساياحاتشىلاردى باۋراۋ قۋاتى كورنەكتى ارتتى. ساناقتا كورسەتىلۋىنشە، 2019 - جىلى 11 - ايدا، قاشقار بايىرعى قالا كورىنىس ءوڭىرى قابىلداعان ساياحاتشىلار سايكەس مەزگىلدەگىدەن %135.94 ارتقان، تيانشان بوعدا كولى كورىنىس ءوڭىرى قابىلداعان ساياحاتشىلار سايكەس مەزگىلدەگىدەن %101 ارتقان.

  اۆتونوميالى رايوندىق مادەنيەت جانە ساياحات مەڭگەرمەسى كورىنىس وڭىرلەرىن كۇندەلىكتى باقىلاۋ - باسقارۋ ءتۇزىمى مەن جاۋاپكەرشىلىكتى قۋزاستىرۋ ءتۇزىمىن ورناتىپ، قىزمەتتى تياناقتاندىرۋدى مىقتى يگەرىپ، ەسكەرتۋ بەرىلگەن، شەكتى مەرزىم ىشىندە رەتتەلىپ وزگەرتىلەتىن كورىنىس وڭىرلەرىن رەتتەۋ - تۇزەتۋدى تياناقتاندىرۋ قىزمەتىنىڭ سوڭىنا ءتۇسىپ باقىلاپ، جەتەكشىلىك ەتىپ، ”كىرە دە، شىعا دا الاتىن، جوعارىلاي دا، تومەندەي دە الاتىن“ يكەمدى باسقارۋ مەحانيزمىن قالىپتاستىرىپ، شينجياڭنىڭ ساياحات كورىنىس وڭىرلەرىنىڭ ولشەمگە ساي قىزمەت وتەۋ يقۋاتىن سانالى تۇردە كەمەلدەندىرىپ، قىزمەت وتەۋ ساپاسى مەن باسقارۋ دەڭگەيىن جوعارىلاتۋىن جەبەپ، تۇتاس شينجياڭ بويىنشا ساياحات كورىنىس وڭىرلەرىنىڭ قىزمەت وتەۋ ساپاسىنىڭ زور دارەجەدە جوعارىلاۋىنا شىنايى كەپىلدىك ەتتى.

  بىلتىر اۆتونوميالى رايوندىق مادەنيەت جانە ساياحات مەڭگەرمەسى ساياحاتقا قىزمەت وتەۋ، نەگىزدىك قۇرىلعى قۇرىلىسى سياقتى جاقتاردان ىسكە كىرىسىپ، A دارەجەلى 39 كورىنىس ءوڭىرىن باعالاۋ جۇمىسىن ۇيىمداستىردى، سونداي - اق 4A دارەجەلىدەن جوعارى 23 كورىنىس ءوڭىرىن سىناق رەتىندە جاسىرىن سالىستىرىپ تەكسەرۋدى 3 - جاققا تاپسىردى. 4A دارەجەلى ءبىر كورىنىس ءوڭىرىنىڭ تولىمدىلىعىن كۇشىنەن قالدىرىپ، 4A دارەجەلى 3 كورىنىس وڭىرىنە ەسكەرتۋ بەردى ءارى شەكتى مەرزىم ىشىندە رەتتەۋ - وزگەرتۋدى بۇيىردى، 4A دارەجەلى جانە ونان جوعارى 9 كورىنىس ءوڭىرىن شەكتى مەرزىمدە رەتتەۋ - وزگەرتۋدى بۇيىردى. ءبىرسىپىرا شارا قولدانۋ ارقىلى، 2019 - جىلى 11 - ايدا، ساياحاتشىلاردىڭ كورىنىس وڭىرلەرىنىڭ قىزمەت وتەۋىنە ريزا بولۋ دەڭگەيى %98.62كە جەتىپ، بىلتىرعى سايكەس مەزگىلدەگىدەن 5 پايىز جوعارىلادى.

  2020 - جىلى رايونىمىز مەملەكەتتىك A دارەجەلى كورىنىس وڭىرلەرىنىڭ، تۇتاس وڭىرلىك ساياحاتتان ۇلگى كورسەتۋ وڭىرلەرىن، ساياحاتتىق تىنىعۋ وڭىرلەرىن جانە ەكولوگيالىق ساياحاتتان ۇلگى كورسەتۋ وڭىرلەرىن قۇرۋ قىزمەتىن كۇش سالا ىلگەرىلەتىپ، 2020 - جىلدىڭ سوڭىندا مەملەكەتتىك 5A دارەجەلى ساياحات كورىنىس وڭىرلەرىنىڭ سانىن 15كە، 4A دارەجەلى ساياحات كورىنىس ءوڭىرىن 100گە جەتكىزۋگە كۇش سالادى.

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.