شينحۋا اگەنتتىگىنىڭ 12 - ايدىڭ 10 - كۇنى نانچاڭنان بەرگەن حابارى (تىلشىلەر مين زۇنتاۋ، لو چىن). جياڭشيدىڭ پيڭشياڭ قالاسى شاڭلي اۋدانىندا ادامدار وسى ءوڭىردىڭ اماندىعىن قورعاۋ جولىندا بۇزاقىلارمەن ايقاسىپ ەرلىكپەن قۇربان بولعان 3 قاھارمان ليۋ يۇنشىڭدى، شيە حۇڭۋيدى، پىڭ شين - اندى ماڭگى ەسىنە ساقتادى.
ليۋ يۇنشىڭ 1969 - جىلى دۇنيەگە كەلگەن، جياڭشيدىڭ پيڭشياڭىنان. حانزۋ. 1988 - جىلى 12 - ايدا قوعام حاۋىپسىزدىگى قىزمەتىنە قاتىناسىپ، 1996 - جىلى 12 - ايدا جۇڭگو كوممۋنيستىك پارتياسىنا مۇشە بولعان، پيڭشياڭ قالالىق قوعام حاۋىپسىزدىگى مەكەمەسى شاڭلي بولىمشە ساقشى مەكەمەسى تۇڭمۋ بولىمشەسىندە حالىق ساقشىسى، قىلمىستىق ىستەر ساقشىسى ۇلكەن اترەتىنىڭ ورىنباسار ۇلكەن اترەت باستىعى، ۇلكەن اترەت باستىعى مىندەتتەرىن وتەگەن، 2 - دارەجەلى اتقارۋشى ساقشى.
شيە حۇڭۋي، 1973 - جىلى دۇنيەگە كەلگەن، جياڭشيدىڭ پيڭشياڭىنان، حانزۋ. 1995 - جىلى 1 - ايدا جۇڭگو كوممۋنيستىك پارتياسىنا مۇشە بولعان، 1996 - جىلى 9 - ايدا جياڭشي ولكەلىك قوعام حاۋىپسىزدىگى ارناۋلى كاسىپتىك مەكتەبىنەن وقۋ تاۋىسىپ، قوعام حاۋىپسىزدىگى قىزمەتىنە قاتىناسقان. شاڭلي بولىمشە ساقشى مەكەمەسى قىلمىستىق ىستەر ساقشىسى ۇلكەن اترەتىندە حالىق ساقشىسى مىندەتىن وتەگەن، جاتتىعۋ مەرزىمىندەگى ساقشىلىق اتاعى بار.
پىڭ شين - ان، 1968 - جىلى دۇنيەگە كەلگەن، جياڭشيدىڭ پيڭشياڭىنان، حانزۋ. 1989 - جىلى 9 - ايدا جياڭشي ولكەلىك قوعام حاۋىپسىزدىگى ارناۋلى كاسىپتىك مەكتەبىنەن وقۋ تاۋىسىپ، قوعام حاۋىپسىزدىگى قىزمەتىنە قاتىناسقان. شاڭلي بولىمشە ساقشى مەكەمەسى قىلمىس بارلاۋ ءبولىمىنىڭ حالىق ساقشىسى، جينشان بولىمشەسىنىڭ حالىق ساقشىسى، ورىنباسار بولىمشە باستىعى مىندەتتەرىن وتەگەن، 2 - دارەجەلى اتقارۋشى ساقشى.
ليۋ يۇنشىڭ، شيە حۇڭۋي، پىڭ شين - اندار قىزمەتكە قاتىناسقاننان كەيىن، قىزمەتتىڭ تالابىنان شىعىپ، قىزمەتكە جان قيارلىقپەن كىرىسىپ، قاراستى رايوننىڭ حاۋىپسىزدىگىن قورعاۋ ءۇشىن كورنەكتى ۇلەس قوستى. مۇندا ليۋ يۇنشىڭ داڭقپەن ءبىر رەت 3 - دارەجەلى جەكە ەڭبەك ءسىڭىرىپ، 7 رەت ماراپاتتالدى. شيە حۇڭۋي داڭقپەن ءبىر رەت 3 - دارەجەلى جەكە ەڭبەك ءسىڭىرىپ، ءبىر رەت ماراپاتتالدى. پىڭ شين - ان 6 رەت ماراپاتتالدى.
1997 - جىلى 8 - ايدىڭ 15 - كۇنى تاڭ سارىدە، پيڭشياڭ قوعام حاۋىپسىزدىگى مەكەمەسى شاڭلي بولىمشە ساقشى مەكەمەسى قۇرال الىپ ادام ءولتىرىپ، قاشىپ جۇرگەن قاشقىن قىلمىستىنى قورشاپ ۇستاۋ شايقاسىن ۇيىمداستىرادى. شاڭلي بولىمشە ساقشى مەكەمەسى قىلمىستىق ىستەر ساقشى ۇلكەن اترەتىنىڭ ۇلكەن اترەت باستىعى ليۋ يۇنشىڭ تۇتقىنداۋ گرۋپپاسىن باستاپ قىلمىسكەر جاسىرىنعان عيماراتقا اتىلىپ كىرەدى، قانقۇيلى قىلمىسكەر قۇتىرىنا وق جاۋدىرىپ، گرانات لاقتىرادى. ليۋ يۇنشىڭ سابىرلىلىقپەن جاۋىنگەر سەرىكتەرىن قورعاپ شەگىندىردى، كۇتپەگەن جەردەن قىلمىسكەر ەكىنشى قاباتتان ءبىرىنشى قاباتقا قاراي زىتتى، ليۋ يۇنشىڭ ەش ءارى - ءسارى بولماستان، قىلمىسكەرمەن بەتپە - بەت اتىسقاندا، باقىتقا قارسى وق ءتيىپ اۋىر جارالاندى، ول سوندا دا قايسارلىق كورسەتىپ، قايراتتانا وق اتىپ، قايتارما سوققى بەرىپ، قىلمىسكەردىڭ سول جاق بۇيىرىنە وق دارىتتى، سوڭىندا وق تاۋسىلىپ قالعاندىقتان، باسىنا تاعى وق ءتيىپ، ەرلىكپەن قۇربان بولادى.
شاڭلي بولىمشە ساقشى مەكەمەسى قىلمىستىق ىستەر ساقشى ۇلكەن اترەتىنىڭ حالىق ساقشىسى شيە حۇڭۋي باستان - اياق الدىدا اتويلاپ ءجۇرىپ، بىلەگى گراناتتان جارالانعان جاعدايدا، جاراقاتىنىڭ جانىنا باتقانىنا قاراماستان ۇيگە اتىلىپ كىرەدى. ول قىلمىسكەردىڭ بالا مەن ايەلدى قۇتقارىپ جۇرگەن 2 جاۋىنگەر سەرىگىنە تۋ سىرتىنان تۇتقيىل شابۋىلداماق بولعانىن بايقاعان زامان دەرەۋ قىلمىسكەرگە وق شىعارىپ، قىلمىسكەردىڭ نازارىن وزىنە اۋدارىپ، جاۋىنگەر سەرىكتەرىن قورعاپ قالادى، باقىتقا قارسى باسىنا وق ءتيىپ، ەرلىكپەن قۇربان بولادى.
شاڭلي بولىمشە ساقشى مەكەمەسى جينشان بولىمشەسىنىڭ ورىنباسار باستىعى پىڭ شين - ان شايقاس بارىسىندا، ومىرىنە تونگەن حاۋىپكە قاراماي، شەپتى باتىل قورعاپ، قىلمىسكەر ارتقى ەسىكتەن قاشپاق بولعاندا، ەشتەڭەدەن تايىنباي اتىلىپ بارىپ جولىن توستى، نەبارى 4 مەتر قاشىقتىقتا قىلمىسكەرمەن اتىسىپ، اۋىر جارالانسا دا، سوڭىنا دەيىن قىلمىسكەرگە تاياپ كەلىپ قايسارلىقپەن اتىسادى، سوڭىندا قىلمىسكەر اۋىر جارالانىپ جەرگە سۇلاپ، كومەككە كەلگەن حالىق ساقشىلارى جاعىنان قولعا تۇسەدى. پىڭ شين - ان جولداس دەنەسىنىڭ كوپ جەرىنە وق ءتيىپ، جاراقاتى وتە اۋىر بولعاندىقتان، ەرلىكپەن قۇربان بولادى.
1997 - جىلى 8 - ايدىڭ 28 - كۇنى ليۋ يۇنشىڭ، شيە حۇڭۋي، پىڭ شين - انگە قوعام حاۋىپسىزدىگى مينيسترلىگى جاعىنان 1 - دارەجەلى قاھارمان ۇلگى اتاعى تولىقتاپ بەرىلدى. ”ءبىز ءار جىلى چيڭميڭ كەزىندە، 8 - ايدىڭ 15 - كۇنى، قۇربانداردى ەسكە ءتۇسىرۋ كۇنىندە، ’15 - تامىز‘ شايقاسىنا قاتىناسقان حالىق ساقشىلارى مەن جاڭادان ساقشى قاتارىنا قوسىلعان جولداستاردى قۇرباندار قابىرستاندىعىنا بارىپ، گۇل قويۋعا، قۇرباندارعا ازا بىلدىرۋگە ۇيىمداستىرىپ، قاھارمان قۇربانداردىڭ حالىق بۇقاراسىنىڭ حاۋىپسىزدىگىن قورعاۋ، قوعام حاۋىپسىزدىگى ىستەرى ءۇشىن ءومىر بويى ۇلەس قوسقان رۋحىنا مۇراگەرلىك ەتەمىز“، - دەدى شاڭلي اۋداندىق قوعام حاۋىپسىزدىگى مەكەمەسىنىڭ قاتىستى جاۋاپتىسى.
بۇگىنگى كۇندە ليۋ يۇنشىڭ، پىڭ شين - ان قۇرباننىڭ ۇرپاقتارى ساقشى كيىمىن كيىپ، اكەلەرىنىڭ مۇراتىنا مۇراگەرلىك ەتىپ، قوعام حاۋىپسىزدىگى ىستەرىنە ات سالىسۋدا.
