2020 - جىلى 1 - ايدىڭ 8 - كۇنى
شي جينپيڭ
جولداستار:
بۇكىل پارتيادا ”اۋەلگى ماقساتتى ۇمىتپاۋ، بورىشتى ەستە بەرىك ساقتاۋ“ نەگىزگى تاقىرىپتىق تاربيەنى ورىستەتۋ − پارتيا 19 - قۇرىلتايى جاساعان ماڭىزدى شەشىم. پارتيا ورتالىق كوميتەتى بۇعان ايرىقشا ءمان بەرىپ، دەن قويا دايىندالىپ، جان - جاقتىلى ۇيىمداستىردى. بىلتىر 5 - ايدىڭ سوڭىنان باستاپ، نەگىزگى تاقىرىپتىق تاربيە جوعارىدان تومەنگە قاراي 2 توپ بويىنشا جۇرگىزىلىپ، قازىر نەگىزىنەن اياقتادى. ءار دارەجەلى پارتيا ۇيىمدارى پارمەندى ىلگەرىلەتتى، قالىڭ پارتيا مۇشەلەرى، كادرلار بەلسەنە ات سالىستى، حالىق بۇقاراسى ىستىق ىقىلاسپەن قولداۋ كورسەتتى، تۇتاس نەگىزگى تاقىرىپتىق تاربيە ەرەكشەلىگى ايقىن بولىپ، تىڭعىلىقتى دا، قاۋىرت جۇرگىزىلىپ، مەجەلى نىساناعا جەتىپ، ماڭىزدى جەتىستىككە قول جەتكىزدى.
ءبىرىنشى، ءار دارەجەلى پارتيا ۇيىمدارى مەن قالىڭ پارتيا مۇشەلەرى، كادرلار جاڭا داۋىردەگى جۇڭگوشا سوتسياليزم يدەياسىن ىشكەرىلەي ۇيرەنىپ، امالياتتا ايگىلەپ، تانىمدى، سەنىمدى جانە ارەكەتتى بىرلىككە كەلتىرۋ قابىلەتىن جوعارىلاتتى. قالىڭ پارتيا مۇشەلەرى، كادرلار جاۋاپكەرشىلىك ارقالاپ، ماسەلەلەردى كوزدەي وتىرىپ ءتۇپ نۇسقانى وقىپ، اۋەلگى ءماتىندى ۇيرەنىپ، وزەكتى گرۋپپانىڭ ۇيرەنۋى، كىتاپ وقۋ كلاسىن اشۋ، شوعىرلى پىكىر اۋىستىرۋ، زەرتتەۋ - تالقىلاۋ سياقتى تاسىلدەر ارقىلى تەرەڭدەي ۇيرەنىپ، ەگجەي - تەگجەيلى ۇعىنىپ، قيسىنىنا ءۇڭىلىپ، قاعيداسىنا تالداۋ جاساپ، ءتۇسىنۋدى جانە يگەرۋدى تەرەڭدەتىپ، ۇيرەنۋدىڭ تەرەڭدەۋىن، ناقتىلانۋىن ىلگەرىلەتىپ، مۇرات - سەنىمدى جانە بورىش ارقالاۋدى كۇشەيتىپ، ۇيرەنۋدىڭ تەرەڭدەمەۋى، تياناقتاندىرۋدىڭ تۇبەگەيلى بولماۋ ماسەلەسىن ءبىرشاما ويداعىداي شەشتى. كوپشىلىكتىڭ بارلىعى مىنانى تانىپ جەتتى: عىلمي نازاريا − ءبىزدىڭ قىزمەتتەردى ىلگەرىلەتۋىمىزدىڭ، ماسەلەلەردى شەشۋىمىزدىڭ ”التىن كىلتى“، نەعۇرلىم ۇيرەنگەن سايىن سولعۇرلىم سەنىمدى بولىپ، نەعۇرلىم ۇيرەنگەن سايىن سولعۇرلىم كۇش - قۋاتقا يە بولا تۇسەمىز.
ەكىنشى، ءار دارەجەلى پارتيا ۇيىمدارى مەن قالىڭ پارتيا مۇشەلەرى، كادرلار يدەيا - ساياسي جاقتا سىننان ءوتىپ جانە شىڭدالىپ، اۋەلگى ماقساتتان اينىماۋدىڭ، بورىش ارقالاۋدىڭ يدەيالىق سانالىلىعى مەن ارەكەت سانالىلىعىن كۇشەيتتى. بۇل رەتكى نەگىزگى تاقىرىپتىق تاربيە يدەيالىق جەتەكشىلىكپەن قوسا ارەكەت ولشەمىن دە مىقتى ۇستاپ، قالىڭ پارتيا مۇشەلەرى، كادرلار پارتيا ورتالىق كوميتەتىنىڭ شەشىم - ورنالاستىرۋلارىمەن سالىستىرىپ، پارتيا ۋستاۆىمەن، پارتيا ەرەجەلەرىمەن سالىستىرىپ، حالىق بۇقاراسىنىڭ جاڭا تىلەگىمەن سالىستىرىپ، وزات تيپتەرمەن، جانىنداعى ۇلگىلەرمەن سالىستىرىپ، پارىقتاردى تاۋىپ، ماسەلەلەردى ورتاعا قويىپ، ماركسيزمگە دەگەن سەنىمدى، جۇڭگوشا سوتسياليزمگە دەگەن سەنىمدى بەكەمدەدى. پارتيا تاريحىن، جاڭا جۇڭگو تاريحىن مۇقيات ۇيرەنۋ ارقىلى توڭكەرىستىك ءداستۇر تاربيەسىن ىشكەرىلەي ورىستەتىپ، پارتياعا كىرۋ سەرتىن قايتا ەسكە ءتۇسىرىپ، پارتياعا كىرۋدە باستان كەشكەندەرىن قايتا ەسكە الىپ، پارتياعا كىرۋدىڭ اۋەلگى ماقساتىن قايتا قاداعالاپ، ارناۋلى تاقىرىپتىق دەموكراتيالىق تۇرمىس جيىنىن، ۇيىمدىق تۇرمىس جيىنىن اشىپ، سىن جانە ءوز - وزىنە سىن ورىستەتىپ، پارتيانىڭ ىشكى ساياسي تۇرمىس جاعىندا ءبىر رەت قاتاڭ شىنىعۋدى قابىلدادى. بۇل رەتكى نەگىزگى تاقىرىپتىق تاربيە ارقىلى قالىڭ پارتيا مۇشەلەرىنىڭ، كادرلاردىڭ سەنىم نەگىزى اناعۇرلىم بەكەمدەلىپ، رۋحاني كالتسيى ونان ارى تولىقتانا ءتۇستى.
ءۇشىنشى، ءار دارەجەلى پارتيا ۇيىمدارى مەن قالىڭ پارتيا مۇشەلەرىنىڭ، كادرلاردىڭ ءىس تىندىرىپ، ناتيجە شىعاراتىن، جاۋاپكەرشىلىك ارقالاپ، ىسكەرلىك كورسەتەتىن رۋح - جىگەرى سەرپىلىپ، رەفورمانىڭ، دامۋدىڭ، ورنىقتىلىقتىڭ ءتۇرلى قىزمەتتەرىن ىلگەرىلەتتى. قالىڭ پارتيا مۇشەلەرى، كادرلار پىشاقتىڭ ءدۇزىن ىشكە قاراتۋ رۋحىمەن سىن جانە ءوز - وزىنە سىن ورىستەتىپ، اۋەلگى ماقساتتىڭ وزگەرگەن - وزگەرمەگەنىن، بورىشتى ارقالاعان - ارقالاماعانىن قاداعالاپ، پارتيانىڭ قامىن جەيتىن، مەملەكەت ءۇشىن ۇلەس قوساتىن، حالىققا باقىت اكەلەتىن جاۋاپكەرشىلىك سەزىمدى كۇشەيتىپ، تىنىم المايتىن كوكەي تەستىلىك سەزىمدى كۇشەيتىپ، ۋاقىتپەن جارىسىپ، قايراتتانا ءىس تىندىراتىن ىسكەرلىك جانە نەعۇرلىم قاتەرلى، قيىن بولعان سايىن سولعۇرلىم العا ۇمتىلاتىن كۇرەسكەرلىك رۋحتى قاۋلاتتى. نەگىزگى تاقىرىپتىق تاربيەنى پارتيا ورتالىق كوميتەتىنىڭ شەشىمدەرىن، ورنالاستىرۋلارىن دايەكتىلەندىرۋمەن، تياناقتاندىرۋمەن بىرلەستىرۋگە، رەفورمانىڭ، دامۋدىڭ، ورنىقتىلىقتىڭ كورنەكتى ماسەلەلەرىن جانە پارتيا قۇرىلىسىنىڭ كوكەي تەستى ماسەلەلەرىن شەشۋمەن بىرلەستىرۋگە، جاڭا جۇڭگو قۇرىلعاندىعىنىڭ 70 جىلدىعىن قۇتتىقتاۋمەن بىرلەستىرۋگە تاباندى بولىپ، قامداۋ جاعىنداعى قۇرىلىمدىق رەفورمانى ىلگەرىلەتىپ، كەدەيلىكتەن ارىلتۋدان قامال الۋدى ىلگەرىلەتىپ، ەكونوميكانىڭ، قوعامنىڭ جوعارى ساپالى دامۋىن پارمەندى تۇردە جەبەدى.
ءتورتىنشى، ءار دارەجەلى پارتيا ۇيىمدارى مەن قالىڭ پارتيا مۇشەلەرى، كادرلار بۇقارا ەڭ اسىعىپ وتىرعان، ەڭ الاڭداپ وتىرعان، ەڭ ىنتىزار بولىپ وتىرعان ماسەلەلەردى بەلسەنە شەشىپ، تۇپكى ماقسات تانىمىن جانە حالىق ءۇشىن ىستەۋ سۇيىسپەنشىلىگىن كۇشەيتتى. قالىڭ پارتيا مۇشەلەرى، كادرلار نەگىزگى ساتىعا ىشكەرىلەي ارالاسىپ، ءبىرىنشى شەپكە ىشكەرىلەي ارالاسىپ، بۇقارانىڭ ءجىتى قاداعالاپ وتىرعان ماسەلەلەرىنە بەلسەنە جاۋاپ قايتارىپ، بۇقارا ەڭ كوڭىل ءبولىپ وتىرعان، ەڭ تىكە، ەڭ رەال مۇددە ماسەلەلەرىن شىنايى شەشتى، اسىرەسە، بۇقارانىڭ اۋرۋ كورسەتۋى قيىن بولۋ، مەكتەپكە ءتۇسىپ وقۋى قيىن بولۋ، جۇمىستانۋى قيىن بولۋ، تۇرعىن ءۇي قيىنشىلىعى سياقتى الاڭداتىپ وتىرعان ىستەردى، ۋايىمداپ وتىرعان ىستەردى شەشىپ، كوزگە كورىنەتىن وزگەرىسپەن بۇقارانىڭ تىلەگىنە جاۋاپ قاتىپ، بۇقارانىڭ تابىس سەزىمىن، باقىت سەزىمىن، حاۋىپسىزدىك سەزىمىن ايتارلىقتاي جوعارىلاتتى. كوپتەگەن بۇقارا قازىر ءبىزدىڭ كوڭىلىمىزدەگى ءسوزدى ايتاتىن جەرىمىز بار، كادرلاردى دا ۇنەمى كورەتىن بولدىق، بۇرىن ءبىتىرۋ قيىن جۇمىستاردى تىندىرىپ بەرەتىن ادام دا بار بولدى دەستى.
بەسىنشى، ءار دارەجەلى پارتيا ۇيىمدارى مەن قالىڭ پارتيا مۇشەلەرى، كادرلار پاك، كىرشىكسىز بولۋ تاربيەسىن ىشكەرىلەي جۇرگىزىپ، ستيلى پاك، سالتى دۇرىس ساياسي ەكولوگيانى نارلەندىردى. قالىڭ پارتيا مۇشەلەرىن، كادرلاردى باسىپ وتكەن جولعا قايىرىلا قاراۋعا، الداعى جولدى بولجاۋعا تاربيەلەۋ، جەتەكتەۋ ارقىلى مەن كىممىن، كىم ءۇشىن ىستەيمىن، كىمگە سۇيەنەمىن دەگەن ماسەلەنى ونان ارى ايقىنداپ، ادال، كىرشىكسىز بولۋدىڭ، جاۋاپكەرشىلىك ارقالاۋدىڭ ىرىقتىلىعى مەن سانالىلىعىن كۇشەيتتى. وزات تيپتەردىڭ ۇلگى كورسەتۋ، ىنتالاندىرۋ رولىن ساۋلەلەندىرىپ، ۇنامسىز تيپتەر ارقىلى ساقتاندىرۋ تاربيەسىن ىشكەرىلەي ورىستەتىپ، دەلو ارقىلى ساقتىق دابىلىن قاعىپ، دەلو ارقىلى ءتارتىپتى قاتايتىپ، پارتيا مۇشەلەرىنىڭ، كادرلاردىڭ يمەنە ءبىلۋىن، تومەنگى شەكتى ساقتاۋىن جەبەپ، ءتارتىپ تانىمى مەن قاعيدا تانىمىن ونان ارى جوعارىلاتىپ، بيلىكتەن ءادىل پايدالانۋدىڭ، بيلىكتى زاڭ بويىنشا ىستەتۋدىڭ، بيلىكتەن كىرشىكسىز پايدالانۋدىڭ سانالىلىعىن ايتارلىقتاي كۇشەيتىپ، پارتيا مەن بۇقارانىڭ، كادرلار مەن بۇقارانىڭ قاتىناسى اناعۇرلىم قويۋلادى، پارتيانىڭ ىشكى ساياسي ەكولوگياسى ءۇرتىس جاقساردى.
التىنشى، ءار دارەجەلى پارتيا ۇيىمدارى مەن قالىڭ پارتيا مۇشەلەرى، كادرلار كورنەكتى ماسەلەلەردى ارناۋلى رەتتەۋ - جونگە سالۋدى ءتۇيىندى تۇردە مىقتى يگەرىپ، پارتيانىڭ ىرگەسىن شايقالتۋى مۇمكىن، پارتيا ىستەرىنە كەدەرگى بولۋى مۇمكىن بولعان كەيبىر فاكتورلاردى جويدى. بۇل رەتكى نەگىزگى تاقىرىپتىق تاربيە ارناۋلى رەتتەۋ - جونگە سالۋدى ناقتى ونىمدىلىكتى كۇشەيتۋدىڭ ماڭىزدى تۇتقاسى رەتىندە مىقتى ۇستاپ، كورنەكتى ماسەلەلەرگە كەڭ كولەمدە تەكسەرۋ، كەڭ كولەمدە تازارتۋ جۇرگىزىپ، پارتيا ورتالىق كوميتەتىنىڭ شەشىمدەرىن، ورنالاستىرۋلارىن تياناقتاندىرۋدا كورىنىستە بويسۇنىپ، كومەسكىدە قايشىلىق جاساۋ، جاۋاپكەرشىلىك ارقالاماۋ، ىسكەرلىك كورسەتپەۋ، ورتالىقتىڭ سەگىز ءتۇرلى بەلگىلەمەسىنىڭ رۋحىنا قايشىلىق جاساۋ، نەگىزگى ساتىنىڭ اۋىرتپالىعىن ساتى - ساتى بويىنشا اۋىرلاتا ءتۇسۋ، باسشى كادرلاردىڭ جۇبايلارىنىڭ، ۇل - قىزدارىنىڭ جانە ولاردىڭ جۇبايلارىنىڭ بەلگىلەمەگە قايشى تۇردە ساۋدامەن شۇعىلدانۋ، كاسىپورىن قۇرۋ ماسەلەلەرىن باتىل رەتتەپ، جونگە سالىپ، بۇقارانىڭ مۇددەسىن زيانداۋ، نەگىزگى ساتى پارتيا ۇيىمىنىڭ ءالسىز، بىتىراڭقى بولۋى، بادىك نارسەلەردى، قۇمار ويناۋدى، ەسىرتكىمەن اينالىسۋدى جانە قارا - سۇرقيا كۇشتەردى ەركىنە جىبەرۋ، ءتىپتى، ولارعا باسقالقا بولۋ سياقتى ماسەلەلەردى باتىل رەتتەپ، جونگە سالىپ، ايگىلى، قىمبات، ەرەكشە ونىمدەردەن جانە ەرەكشە بايلىقتان پايدالانىپ جەكە مۇددەسىن كوزدەۋ ماسەلەسىن باتىل رەتتەپ، جونگە سالىپ، پارتيا ىشىندە ورىن تەپكەن كەيبىر كورنەكتى ماسەلەلەردى شىنداپ كىرىسىپ شەشىپ، كەيبىر ۇيرەنشىكتى قاساڭ سىرقات، كەتپەس كەسەلدەردى جويدى. كوپشىلىك جاپپاي مىنانى اڭىس ەتتى: ارناۋلى رەتتەۋ - جونگە سالۋ كىشكەنە ىستەردەن كىرىسىپ، ونىمدىلىگى جاقسى بولىپ، پارتيامىزدىڭ وزىنە باتىل توڭكەرىس جاسايتىن ايقىن قاسيەتىن تولىق كورسەتىپ، پارتيانىڭ العاباسارلىعى مەن كىرشىكسىزدىگىن ءونىمدى كۇشەيتتى.
بۇل رەتكى نەگىزگى تاقىرىپتىق تاربيە − جاڭا داۋىردەگى پارتيانىڭ وزىنە توڭكەرىس جاساۋىنىڭ، پارتيانى جاپپاي قاتاڭ جونگە سالۋدىڭ تەرەڭدەي دامۋىن ىلگەرىلەتۋدىڭ جاندى امالياتى، بۇكىل پارتيانىڭ يدەياداعى بىرلىگىن، ساياسيداعى ىنتىماعىن، ارەكەتتەگى بىركەلكىلىگىن جەبەپ، پارتيامىزدىڭ ”ءتورت ۇلى“نى ءبىر تۇتاس جوسپارلاۋى، ”قوس 100 جىلدىق“ كۇرەس نىساناسىن جۇزەگە اسىرۋى ءۇشىن يدەيالىق جاقتا، ساياسي جاقتا، ۇيىمدىق جاقتا، ستيل جاعىندا پارمەندى اتتانىسقا كەلتىردى، ماڭىزدى رەال مانگە جانە تەرەڭ تاريحي ىقپالعا يە.
جولداستار!
بۇل رەتكى نەگىزگى تاقىرىپتىق تاربيە پارتيا ىشىندەگى بۇدان بۇرىنعى ءار رەتكى شوعىرلى تاربيەنىڭ تاجىريبەسىن قورىتىندىلاپ، جاڭا داۋىردە پارتيا ىشىندە شوعىرلى تاربيە ورىستەتۋ جونىندە تىڭ ىزدەنىس جاساپ، جاڭا تاجىريبە توپتادى.
بىرىنشىدەن، نازاردى نەگىزگى تاقىرىپقا شوعىرلاندىرىپ، نەگىزگى جەلىمەن تىعىز بايلانىستىردى. جاڭا داۋىردەگى پارتيا قۇرىلىسىنىڭ مىندەتتەرىنە جانە پارتيا ىشىندە ورىن تەپكەن كورنەكتى ماسەلەلەرگە مەڭزەس، ”اۋەلگى ماقساتتى ۇمىتپاۋ، بورىشتى ەستە بەرىك ساقتاۋ“ نەگىزگى تاقىرىبىن بەلگىلەپ، جاڭا داۋىردەگى جۇڭگوشا سوتسياليزم يدەياسىن ۇيرەنۋدى، دايەكتىلەندىرۋدى نەگىزگى جەلى ەتىپ، ”اۋەلگى ماقساتتان اينىماۋ، بورىش ارقالاۋ، پارىقتاردى تابۋ، تياناقتاندىرۋدى يگەرۋ“ باس تالابىن ورتاعا قويىپ، ۇيرەنۋ - تاربيەدە نەگىزگى تاقىرىپتى، نەگىزگى جەلىنى، باس تالاپتى ارقاۋ ەتە وتىرىپ ىشكەرىلەي ۇيرەنىپ، ەگجەي - تەگجەيلى ۇعىنىپ، تەكسەرۋ - زەرتتەۋدە نەگىزگى تاقىرىپتى، نەگىزگى جەلىنى، باس تالاپتى ارقاۋ ەتە وتىرىپ ءادىس - امال قاراستىرىپ، جول ىزدەستىرىپ، ماسەلەلەردى قاداعالاۋدا نەگىزگى تاقىرىپتى، نەگىزگى جەلىنى، باس تالاپتى ارقاۋ ەتە وتىرىپ ولشەمگە سالىستىرىپ پارىقتاردى تاۋىپ، رەتتەۋ - تۇزەتۋدى تياناقتاندىرۋدا نەگىزگى تاقىرىپتى، نەگىزگى جەلىنى، باس تالاپتى ارقاۋ ەتە وتىرىپ شىنايى تۇزەتىپ، ناقتى تۇزەتىپ، ۇيرەنۋ مەن ىستەۋدىڭ ءبىر - بىرىنەن قول ءۇزۋ ماسەلەسىن جەڭىپ، پارتيا ىشىندەگى شوعىرلى تاربيەنىڭ اۋساي كەتپەۋىنە شىنايى كەپىلدىك ەتتى.
ەكىنشىدەن، جوعارى ارقىلى تومەنگە جەتەكشىلىك ەتىپ، ۇلگى كورسەتىپ، باستاماشى بولدى. ورتالىق كوميتەت ساياسي بيۋروسى ”اۋەلگى ماقساتتى، بورىشتى ەستە بەرىك ساقتاۋ، وزىنە توڭكەرىس جۇرگىزۋدى ىلگەرىلەتۋ“ تاقىرىبىندا توپتىق ۇيرەنۋ جۇرگىزىپ، ارناۋلى تاقىرىپتىق دەموكراتيالىق تۇرمىس جيىنىن وتكىزىپ، بۇكىل پارتياعا ۇلگى كورسەتىپ، جەتەكشىلىك ىستەدى. ءار دارەجەلى پارتكومدار (پارتيا باسشىلىق گرۋپپالارى) تۇلعالىق جاۋاپكەرشىلىكتەرىن اتقارىپ، ءار دارەجەلى باسشىلىق القا مۇشەلەرى، اسىرەسە، نەگىزگى جاۋاپتى جولداستار باستاماشى بولا وتىرىپ ۇيرەنىپ، زەرتتەپ، تەكسەرىپ، تۇزەتىپ، ”شەشۋشى ازشىلىق“ ارقىلى ”باسىم كوپشىلىك“كە ۇلگى كورسەتىپ جانە ولاردى جەتەكتەپ، دەن قويا ۇيىمداستىرىپ، جوسپارلاپ، جاۋاپكەرشىلىكتى تياناقتاندىرۋدى ىلگەرىلەتىپ، سوڭىنا دەيىن دايەكتىلەندىرۋدى، تىڭعىلىقتى تياناقتاندىرۋدى ورىندادى.
ۇشىنشىدەن، جاندى تۇردە توعىستىرىپ، ءبىر تۇلعادا ىلگەرىلەتتى. بۇل رەتكى نەگىزگى تاقىرىپتىق تاربيەدە ءبىر ايقىن ەرەكشەلىك بولدى، ياعني كەزەڭگە بولمەي، بۋىنعا بولمەي، ۇيرەنۋ - تاربيە، تەكسەرۋ - زەرتتەۋ، ماسەلەلەردى قاداعالاۋ، رەتتەۋ - تۇزەتۋدى تياناقتاندىرۋ سىندى ءتورت ءتۇيىندى شارانى جالپى بارىسپەن ساباقتاستىرىپ، جاندى توعىستىرىپ، ءبىر تۇلعادا ىلگەرىلەتتى. ۇيرەنۋ مەن ىستەۋدى بىرلەستىرىپ، تەكسەرۋ مەن تۇزەتۋدى ساباقتاستىرىپ، ءبىر جاعىنان ۇيرەنىپ، ءبىر جاعىنان زەرتتەپ، ءبىر جاعىنان تەكسەرىپ، ءبىر جاعىنان تۇزەتىپ، ۇيرەنۋ ارقىلى زەرتتەۋدى جەبەدى، زەرتتەۋ ارقىلى تەكسەرۋدى جەبەدى، تەكسەرۋ ارقىلى تۇزەتۋدى جەبەدى. ۋاقىت كەزەڭدەرى جايلى قاتاڭ بەلگىلەمە جاساماي، ىلگەرى - كەيىن رەت ءتارتىبىن قاراپايىم تۇردە دارىپتەمەي، تەڭ قادامدا ىلگەرىلەتۋگە، سايكەستىرە اتقارۋعا ءمان بەرۋمەن بىرگە، اربىرىندە باسىم ءتۇيىن بولىپ، كىرىكتىرىلە جۇرگىزىلىپ، نەگىزگى تاقىرىپتىق تاربيەنىڭ ساپاسىن جوعارىلاتىپ، پارتيا ىشىندەگى شوعىرلى تاربيەنىڭ جالپى تۇلعالىق ناتيجەسىن جوعارىلاتتى.
تورتىنشىدەن، ماسەلەلەردى ءجىتى قاداعالاپ، دالمە - ءدال رەتتەپ، تۇزەتتى. ماسەلەنى باعدار ەتۋدى كورنەكتىلەندىرىپ، باستالعاندا-اق تۇزەتۋگە كىرىسىپ، ماسەلەلەرگە باعىتتاي وتىرىپ، ماسەلەلەردى قاداعالاي وتىرىپ تۇزەتىپ، ولشەممەن سالىستىرىپ رەتتەپ، تۇزەتىپ، قاينارىنان رەتتەپ، تۇزەتىپ، جۇيەلى رەتتەپ، تۇزەتىپ، بىرلەسە قيمىلداپ رەتتەپ، تۇزەتىپ، اشىق - اشكەرە رەتتەپ، تۇزەتىپ، رەتتەۋ - تۇزەتۋدى تياناقتاندىرۋدى، اسىرەسە، 8 جاقتاعى كورنەكتى ماسەلەلەردى ارناۋلى رەتتەۋ - جونگە سالۋدى كۇش سالا مىقتى يگەردى. ماسەلەلەردى رەتتەۋ - تۇزەتۋ تىزىمگە الىپ، باسقارىپ، نىسان تۇرىندە ىلگەرىلەتىپ، جاۋاپكەرشىلىك تۇلعالارىن، اياق الىستىڭ ۋاقىت شەگىن جانە قىزمەت شارالارىن ايقىنداپ، ءتىزىم جاساپ، بەلگى تاعىپ تىزىمنەن ءوشىرىپ، ءبىر - بىردەن ىلگەرىلەتىپ، تياناقتاندىرىپ، ماسەلەلەر شەشىلمەيىنشە تەبىندى بوساڭسىتپاي، تۇبەگەيلى شەشىلمەيىنشە دامىلداماي، بۇقارا مويىندامايىنشا تىنباي، ءبىر - بىردەن تىندىرىپ، قول جەتكىزگەن ناتيجەنىڭ امالياتتىڭ، حالىقتىڭ، تاريحتىڭ سىنىنان وتۋىنە شىنايى كەپىلدىك ەتتى.
بەسىنشىدەن، قاتاڭ باقىلاپ، ناقتى جەتەكشىلىك ەتىپ، ىشكى جانە سىرتقى جاقتا بىردەي كۇش جۇمسادى. ورتالىقتىڭ نەگىزگى تاقىرىپتىق تاربيەگە باسشىلىق ەتۋ گرۋپپاسى جانە ونىڭ كەڭسەسى ساياسات زەرتتەۋ مەن جەتەكشىلىك ەتۋدى كۇشەيتىپ، دارەجە بويىنشا، تۇرلەر بويىنشا ىلگەرىلەتىپ، جاۋاپكەرشىلىكتى قاتايتتى، ناقتىلاندىردى. ءار دارەجەلى جەتەكشىلىك ەتۋ گرۋپپالارى، ارالاپ قۋزاۋ گرۋپپالارى، ارالاپ جەتەكشىلىك ەتۋ گرۋپپالارى ىشكەرىلەي ارالاپ، باتىلدىقپەن پرينسيپكە تاباندى بولىپ، شىنايى كىرىسىپ، قيىن تۇيتكىلدەرگە شىنداپ شۇيلىگىپ، پارتيا ورتالىق كوميتەتىنىڭ رۋحىن تىڭعىلىقتى جەتكىزدى، قىسىمدى، قوزعاۋشى كۇشتى تىڭعىلىقتى جەتكىزدى. وڭىرلەر، تاراۋلار، مەكەمە - ورىندار اشىق جۇرگىزۋگە تاباندى بولىپ، بۇقارانى ات سالىسۋعا، باقىلاۋعا، باعا بەرۋگە شاقىرىپ، بۇقارا رازى بولماعاندارىن دەر كەزىندە ”قايتا ىستەپ“، ”ساباق تولىقتادى“. ۇنامدى جاقتان ۇگىتتەۋگە جانە قوعامدىق پىكىر باقىلاۋىنا تاباندى بولىپ، تاماشا اۋقىم قالىپتاستىردى.
التىنشىدان، جالعان ناتيجەدەن كۇش سالا ساقتانىپ، ناقتى ونىمدىلىككە تالپىندى. فورماشىلدىققا، تورەشىلدىككە قارسى تۇرۋدى كورنەكتى تالاپ ەتىپ، ماماندار لەكسياسىن، نازاريالىق جەتەكشىلىكتى وزدىگىنەن ۇيرەنۋدىڭ جانە زەرتتەۋ - تالقىلاۋدىڭ ورنىنا قويۋدان اۋلاق بولىپ، جاقىن ماڭدا قىزىل تاربيە ورىستەتتى، كىتاپ وقۋ ەستەلىگىن جازۋ، اسەرىن جازۋ سياقتى قاتاڭ تالاپ قويىلمادى، ”ءۇستىرت“، ”شالاعاي“ تەكسەرۋ - زەرتتەۋمەن اينالىسپاي، قىسقاشا مالىمەت سانىن قاتاڭ مەڭگەردى، باسشىنىڭ بەكىتۋىنىڭ بار - جوقتىعى، جيىن اشىپ حۇجات تاراتۋ، قىسقاشا مالىمەت بەرۋ، ءتىزىم ەستەلىگى، قىزمەت ەستەلىگى سياقتىلاردى نەگىزگى تاقىرىپتىق تاربيەنىڭ ءتۇرلى قىزمەتتەرىنىڭ تياناقتانعان - تياناقتانباعاندىعىن ولشەيتىن ولشەم ەتپەدى. نەگىزگى تاقىرىپتىق تاربيەنى ”نەگىزگى ساتىنىڭ اۋىرتپالىعىن جەڭىلدەتۋ جىلى“نىڭ ءتۇرلى تالاپتارىن تياناقتاندىرۋمەن بىرلەستىرىپ، فورماشىلدىقتى، تورەشىلدىكتى رەتتەيتىن، جونگە سالاتىن، نەگىزگى ساتىنىڭ اۋىرتپالىعىن جەڭىلدەتەتىن جاقسى تاجىريبەلەردەن، جاقسى ادىستەردەن ءبىر توبىن قورىتىندىلاپ، جالپىلاستىرىپ، فورماشىلدىقتىڭ، تورەشىلدىكتىڭ تيپتىك دەلو مىسالدارىنان ءبىر توبىن حابارلاندىرىپ، اشكەرەلەپ، نەگىزگى ساتى كادرلارىنىڭ ءىس تىندىراتىن مۇمكىندىكتەرىن فورماشىلدىقتىڭ بۇعاۋىنان بوساتىپ، ”فورما“عا عانا ءمان بەرىپ، ”ونىمدىلىك“كە ءمان بەرمەۋدەن ساقتانىپ، قىزمەتتى ناقتى، تياناقتى ىستەدى.
ناتيجەلەردى تولىق تۇراقتاندىرۋمەن بىرگە، ورىن تەپكەن ماسەلەلەردى دە سەرگەكتىكپەن كورە بىلگەنىمىز ءجون، باستىسى، مىنالار: كەيبىر باسشى كادرلاردىڭ نازاريا ۇيرەنۋى تەرەڭ، جەتكىلىكتى، جۇيەلى ەمەس، ۇيرەنۋ مەن قولدانۋ ءبىر - بىرىنەن قول ۇزگەن، پارتيانىڭ جاسامپاز نازاريالارىنان پايدالانىپ قىزمەتتەردى ىلگەرىلەتۋ قابىلەتى جەتكىلىكسىز؛ كەيبىر ماسەلەلەردى رەتتەۋ - تۇزەتۋ ءالى دە تىڭعىلىقتى ەمەس، كەيبىر تەرەڭ قاتپارلى قايشىلىقتار مەن ماسەلەلەر ءالى تۇبىرىنەن شەشىلگەن جوق؛ كەيبىر نەگىزگى ساتى پارتيا ۇيىمدارىنىڭ قۇرىلىسى ءالى دە ءبىرشاما ءالسىز، پارتيا مۇشەلەرىمەن، بۇقارامەن بايلانىس ورناتۋ، پارتيا مۇشەلەرىنە، بۇقاراعا قىزمەت ەتۋ مەحانيزمى ءالى جەتكىلىكتى اقاۋسىز، ىركىلىسسىز ەمەس؛ كەيبىر جەرلەردە فورماشىلدىق، تورەشىلدىك ءالى بار، تابىسقا جەتۋگە اسىعۋ، كوز الداعى پايداعا جۇگىرۋ، نەگىزگى ساتىنىڭ جۇگىن اۋىرلاتۋ ءالى دە ساقتالۋدا، تاعىسىن، تاعىلار. بۇقارا تاربيەنىڭ جەلدەي ەسىپ، وتكىنشى جاڭبىرداي وتە شىعۋىنان قاتتى الاڭدايدى، ۇنەمىلىكتى ساقتاۋدى، باياندى مەحانيزم قالىپتاستىرۋدى ايرىقشا اڭسايدى. ءبىز جاقسى باستاپ، جاقسى اياقتاتۋىمىز، تىڭعىلىقتى ىستەپ، تياناقتى ناتيجەگە جەتۋىمىز، پارتيانى جاپپاي قاتاڭ جونگە سالۋ تالابىن شىنايى تۇردە ناقتى تياناقتاندىرۋىمىز كەرەك.
جولداستار!
پارتيامىز 90 ميلليوننان استام پارتيا مۇشەسى، 4 ميلليون 600 مىڭنان استام نەگىزگى ساتى پارتيا ۇيىمى بار پارتيا، ءبىر ميلليارد 400 ميلليون جان سانى بار ءىرى ەلدە ۇزاق ۋاقىت بيلىك جۇرگىزىپ كەلە جاتقان پارتيا، جۇڭگوشا سوتسياليزم ىستەرىنىڭ قۇدىرەتتى باسشىلىق ۇيتقىسى، پارتيانىڭ ءوز قۇرىلىسى ەجەلدەن بەرى كەلەلى ىسكە سايىپ، جالپى جاعدايدى بەلگىلەپ كەلەدى.
قازىر دۇنيە ءجۇزى 100 جىلدا بولماعان زور وزگەرىستى باستان كەشىرۋدە، ەلىمىز جۇڭحۋا ۇلتىنىڭ ۇلى گۇلدەنۋىن جۇزەگە اسىرۋدىڭ شەشۋشى مەزگىلىندە تۇر، پارتيامىز حالىقتى باستاپ كوپتەگەن جاڭا تاريحي ەرەكشەلىككە يە ۇلى كۇرەس جۇرگىزۋدە، جاعدايدىڭ، ورتانىڭ وزگەرىسىنىڭ تەزدىگى، رەفورما، دامۋ، ورنىقتىلىق مىندەتىنىڭ اۋىرلىعى، قايشىلىقتىڭ، حاۋىپ - قاتەردىڭ، سىن - سايىستىڭ كوپتىگى، پارتيامىزدىڭ ەل باسقارۋ سىنىنىڭ اۋىرلىعى بۇرىن بولىپ كورمەگەن دارەجەدە. پارتيامىز 100 جىلدىق ءىرى پارتيا رەتىندە، باستان - اياق حالىقتىڭ جاقتاۋىنا جانە قولداۋىنا يە بولىپ، جۇڭحۋا ۇلتىنىڭ ماڭگىلىك ۇلى ءىسىن جازۋدا، ءسوز جوق، باستان - اياق اۋەلگى ماقسات پەن بورىشتى ۇمىتپاي، پارتيانىڭ العاباسارلىق سيپاتىن السىرەتەتىن، پارتيانىڭ كىرشىكسىزدىگىن بۇلدىرەتىن بارلىق فاكتورلاردى باتىل جويۋ، پارتيانىڭ دەنەسىنە جابىسقان بارلىق ۋلى مەرەزدەردى باتىل الاستاۋ، اۋەلگى ماقسات پەن بورىشقا قايشى كەلەتىن، پارتيانىڭ ىرگەسىن شايقالتاتىن بارلىق حاۋىپ - قاتەرلەردەن باتىل ساقتانۋ كەرەك.
وتكەن ىستەر ەندىگى ىستەردىڭ باستاماسى. بۇكىل پارتيا وسى رەتكى نەگىزگى تاقىرىپتىق تاربيەنى جاڭا باستاما ەتىپ، پارتيانىڭ وزىنە توڭكەرىس جاساۋىن ۇزدىكسىز تەرەڭدەتىپ، بۇكىل پارتيانىڭ اۋەلگى ماقساتتى ۇمىتپاۋىن، بورىشتى ەستە بەرىك ساقتاۋىن ۇزدىكسىز ىلگەرىلەتۋ كەرەك. وسى ارادا مەن مىنا بىرنەشە ءتۇيىندى باسا دارىپتەيمىن:
ءبىرىنشى، اۋەلگى ماقساتتى ۇمىتپاۋدى، بورىشتى ەستە بەرىك ساقتاۋدى، ءسوز جوق، پارتيا قۇرىلىسىن كۇشەيتۋدىڭ ماڭگىلىك تاقىرىبى جانە بارلىق پارتيا مۇشەلەرىنىڭ، كادرلاردىڭ ومىرلىك تاقىرىبى ەتىپ بوساڭسىتپاي ۇدايى يگەرۋ كەرەك. ءبىر ادام بولسىن، ءبىر ساياسي پارتيا بولسىن، قىسىلتاياڭ كەزەڭدەردى باستان كەشىرسە دە اۋەلگى ماقساتتى وزگەرتپەۋى، بەينەت-تاۋقىمەتتى قانشا تارتسا دا ءوز قاسيەتىن باياعىداي ساقتاۋى ەڭ قىمباتتى. پارتيانىڭ اۋەلگى ماقساتى مەن بورىشى − پارتيانىڭ سيپاتىنىڭ، ءتۇبىرلى ماقساتىنىڭ، مۇرات - سەنىمىنىڭ، كۇرەس نىساناسىنىڭ شوعىرلى بەينەسى، ول پارتيامىزدى ماڭگى اينىماۋعا ىنتالاندىرىپ، پارتيامىزدى قاجىرلىلىقپەن العا باسۋعا جەبەپ كەلەدى. شىكۋمىننەن تيان - انمىنعا دەيىن، كاسىپتى وركەندەتۋ جولىنان گۇلدەنۋ جولىنا دەيىن، پارتيامىزدىڭ 100 جىلعا جۋىق ۋاقىتتا جاساعان بارلىق قۇلشىنىسى، جۇرگىزگەن بارلىق كۇرەسى، بەرگەن بارلىق قۇرباندىعى تۇگەلدەي حالىقتىڭ باقىتى مەن ۇلتتىڭ گۇلدەنۋى ءۇشىن بولىپ تابىلادى. وسى اۋەلگى ماقسات پەن بورىشتان باستان - اياق اينىماعاندىقتان دا پارتيامىز ەرەكشە قيىن − قىستاۋ جاعدايدا دامىپ زورايا الدى، تىعىرىققا تىرەلگەن تۇستا قات − قابات قورشاۋدى بۇزىپ شىعا الدى، كۇيزەلىستى ناشار جاعدايدا قايسارلىقپەن العا ۇمتىلا الدى. اۋەلگى ماقسات پەن بورىشتى ەستەن شىعارسا، پارتيامىز قاسيەتىن وزگەرتەدى، ءتۇسىن وزگەرتەدى، حالىقتان ايرىلادى، بولاشاقتان ايرىلادى.
كەلگەن جولىن ۇمىتقان ۇلت، ءسوز جوق، شىعار جولى جوق ۇلت بولادى، اۋەلگى ماقساتتى ۇمىتقان ساياسي پارتيا، ءسوز جوق، كەلەشەگى جوق ساياسي پارتيا بولادى. مىنانى كورە ءبىلۋ كەرەك: پارتيانىڭ ۇزاق ۋاقىت بيلىك جۇرگىزۋ شارت - جاعدايىندا، پارتيانىڭ العاباسارلىعىن السىرەتەتىن، پارتيانىڭ كىرشىكسىزدىگىن بۇلدىرەتىن ءتۇرلى فاكتورلار ءار ۋاقىت بولعان، اۋەلگى ماقسات پەن بورىشقا قايشى كەلەتىن، پارتيانىڭ ىرگەسىن شايقالتاتىن قاتەرلەر بارلىق جەردە بولعان، پارتيا ىشىندە ساقتالىپ وتىرعان يدەيا كىرشىكسىز بولماۋ، ساياسي كىرشىكسىز بولماۋ، ۇيىم كىرشىكسىز بولماۋ، ستيل كىرشىكسىز بولماۋ سياقتى كورنەكتى ماسەلەلەر ءالى دە تۇبەگەيلى شەشىلگەن جوق.
ماركستىك ساياسي پارتيانىڭ العاباسارلىعى مەن كىرشىكسىزدىگى ۋاقىتتىڭ جىلجۋىنا ىلەسىپ تابيعي تۇردە ساقتالىپ كەتە بەرمەيدى، كوممۋنيستىك پارتيا مۇشەلەرىنىڭ پارتيالىلىعى پارتيالىلىق ستاجىنىڭ ۇزارۋى مەن مىندەتىنىڭ جوعارىلاۋىنا ىلەسىپ تابيعي تۇردە جوعارىلاپ كەتە بەرمەيدى. اۋەلگى ماقسات تابيعي تۇردە ساپاسىن، جاڭالىعىن ساقتاي بەرمەيدى، ءسال عانا دەن قويماعاندا شاڭ باسىپ، رەڭى توزادى، ۇزاق ۋاقىت نارلەندىرمەگەندە سۋالىپ سولادى، جۇرە كەلە نە ءۇشىن جولعا شىققاندىق، قايدا باراتىندىق وتە وڭاي ۇمىتىلادى، وڭاي بولىنەدى، وڭاي اداسادى. ءبىز تەكسەرىپ ءبىر جاقتى ەتكەن شىرىكتەسكەن ەلەمەنتتەردىڭ تارتىپكە قايشىلىق جاساۋدىڭ، زاڭعا قايشىلىق جاساۋدىڭ قۇيىنا باتۋىنداعى سەبەپ، تۇبىرىنەن ايتقاندا، اۋەلگى ماقسات پەن بورىشتى ەستەن مۇلدە شىعارعاندىقتان. اۋەلگى ماقساتتى ۇمىتپاۋ، بورىشتى ەستە بەرىك ساقتاۋ مەزەتتىك ءىس ەمەس، قايتا ومىرلىك ءىس، ءاربىر پارتيا مۇشەسى تۇگەلدەي يدەيادا، ساياسيدا ۇزدىكسىز قاداعالاۋ، بورشالاۋ جۇرگىزۋى، ويلانۋى، بوگدە زاتتى ۇزدىكسىز الاستاۋى، ۋلى مەرەزدى جويۋى، لاستانۋدان ساقتانۋى كەرەك.
مەن ۇنەمى پارتيا مۇشەلەرى، كادرلار ۇنەمى پارتيا ۋستاۆىن قايتالاي ەسكە ءتۇسىرۋى، ءوزىنىڭ پارتياعا كىرۋ سەرتىن قايتالاي ەسكە ءتۇسىرۋى، توڭكەرىستىك قۇربانداردىڭ حاتىن قايتالاي ەسكە ءتۇسىرۋى كەرەك دەپ ايتىپ وتىرامىن. پارتيا ۋستاۆىن توسەكتىڭ باسىنا قويىپ، ۇنەمى سالىستىرىپ تەكسەرىپ، ءوزىنىڭ ىستەي العان - الماعاندىعىن قاداعالاۋ كەرەك. وزىندە اۋەلگى ماقساتقا قايشى ارەكەت بار - جوعىن قاداعالاۋ كەرەك. ءۇيدى ۇنەمى تازالاپ تۇرۋ، اينانى ۇنەمى ءسۇرتىپ تۇرۋ كەرەك. ءار دارەجەلى پارتيا ۇيىمدارى مەن قالىڭ پارتيا مۇشەلەرىن، كادرلاردى ۇنەمى يدەيا - ساياسي جاقتان دەنساۋلىق تەكسەرىپ، پارتيا ورتالىق كوميتەتىنىڭ تالاپتارىمەن ”تۋرالانىپ“، پارتيا ۋستاۆىمەن، پارتيا ەرەجەسىمەن ”سكانەرلەپ“، حالىق بۇقاراسىنىڭ جاڭا ءۇمىت - تىلەگىمەن ”رەنتگەنگە ءتۇسىپ“، اعا بۋىندارىمەن، قۇرباندارمەن، ۇزدىك تيپتەرمەن ”سالىستىرىپ“، ۇزدىكسىز تۇردە ءوزىنىڭ اۋەلگى ماقساتىن سۇراپ، اۋەلگى ماقساتىنان اينىماي، ۇزدىكسىز تۇردە بورىشتان بۇلجىماي، بورىش ارقالاپ، قاي - قاشان دا اۋەلگى ماقساتتا بەرىك بولۋعا، بورىشتى وتەۋگە تاربيەلەۋ، جەتەكتەۋ كەرەك. پارتيانىڭ جاسامپاز نازاريالارىمەن اۋەلگى ماقساتتى نارلەندىرىپ، بورىشقا جەتەكشىلىك ەتىپ، پارتيانىڭ تەڭدەسسىز تاريحىنان اۋەلگى ماقساتتى ىزدەپ تاۋىپ، بورىشقا ىنتالاندىرىپ، پارتيانىڭ ىشكى ساياسي تۇرمىسىن قاتايتۋ بارىسىندا اۋەلگى ماقساتتى شىڭداپ، بورىشتى شىنايى ءتۇيسىنىپ، اۋەلگى ماقسات پەن بورىشتى قايراتتانا العا باساتىن، ءورىس اشىپ، جاڭالىق اشاتىن رۋحاني كۇشكە جانە دەن قويا قاجىرلىلىقپەن ىستەيتىن، شىنايى يگەرىپ، شىنداپ ىستەيتىن تۇپكىلىكتى قوزعاۋشى كۇشكە اينالدىرۋ كەرەك.
ەكىنشى، اۋەلگى ماقساتتى ۇمىتپاۋدا، بورىشتى ەستە بەرىك ساقتاۋدا، ءسوز جوق، ماركسيزمنىڭ جۇڭگوشالانعان ەڭ جاڭا جەتىستىگىمەن يدەيانى بىرلىككە كەلتىرۋ، ەرىك - جىگەردى بىرلىككە كەلتىرۋ، ارەكەتتى بىرلىككە كەلتىرۋ كەرەك. ماركستىك ساياسي پارتيانىڭ العاباسارلىعى، ەڭ اۋەلى، يدەيالىق نازاريانىڭ العاباسارلىعىنان ايگىلەنەدى. يدەيالىق جاقتان پارتيا قۇرۋعا، نازاريالىق جاقتان پارتيانى كۇشەيتۋگە دەن قويۋ پارتيامىزدىڭ ايقىن ەرەكشەلىگى جانە داڭقتى ءداستۇرى. ماۋ زىدۇڭ جولداس كەزىندە: ”يدەيالىق تاربيەنى يگەرۋ − بۇكىل پارتيانى ىنتىماقتاستىرىپ ۇلى ساياسي كۇرەس جۇرگىزۋدىڭ وزەكتى بۋىنى“ دەگەن بولاتىن. كوممۋنيستەردىڭ اۋەلگى ماقساتى حالىققا دەگەن قاراپايىم سۇيىسپەنشىلىكتەن، اقيقاتقا دەگەن قاجىماس تالپىنىستان كەلىپ قانا قالماستان، ءتىپتى دە ماڭىزدىسى، ماركسيزمنىڭ عىلمي نازارياسى نەگىزىنە ورناعان. تەك يدەيالىق جاقتان پارتيا قۇرۋعا، نازاريالىق جاقتان پارتيانى كۇشەيتۋگە تاباندى بولعاندا عانا، اۋەلگى ماقساتتى ۇمىتپاۋدا اناعۇرلىم سانالى بولۋعا، بورىش ارقالاۋدا اناعۇرلىم بەكەم بولۋعا بولادى.
ۇيرەنۋدىڭ ەڭ ۇلكەن جاۋى وزىنە قاناعاتتانۋ، ۇيرەنۋدە ناتيجە بولۋدا، ءسوز جوق، ماڭگى وزىنە قاناعاتتانباۋ كەرەك. قازىر كەيبىر پارتيا مۇشەلەرى، كادرلار نازاريا ۇيرەنۋگە ءمان بەرمەيدى، وزدىگىنەن ۇيرەنۋدى ۇيرەنبەۋگە اينالدىرادى؛ كەيبىرەۋلەرى ەسىنە تۇسكەندە ۇيرەنىپ، ءۇش كۇن بالىق اۋلاسا، ەكى كۇن اۋ جايادى؛ كەيبىرەۋلەرى ۇيرەنۋدى اشەكەي كورەدى، ماردىمسىز بىلىمگە ءماز بولىپ، ىشكەرىلەي تۇسىنۋگە تالپىنبايدى؛ كەيبىرەۋلەردىڭ ۇيرەنۋى قيقىمدى، بەتالدى، قىزىقسا ۇيرەنەدى، قىزىقپاسا ۇيرەنبەيدى؛ كوپتەگەن جاس كادرلاردىڭ نازاريالىق نەگىزى ءالى مىعىم ەمەس، مۇرات - سەنىمى ءالى بەكەم ەمەس. شىنايى ۇيرەنىپ، شىن ءتۇسىنىپ، شىنايى سەنىپ، شىن قولدانۋ ءۇشىن، ءالى دە اناعۇرلىم كوپ كۇش سالۋعا تۋرا كەلەدى.
مەن تالاي رەت جۇڭگو كوممۋنيستەرى ۇيرەنۋدىڭ ارقاسىندا بۇگىنگە جەتكەن، ءسوز جوق، ۇيرەنۋگە سۇيەنىپ كەلەشەكتى بەتكە الۋى كەرەك دەپ باسا دارىپتەدىم. بۇكىل پارتياداعى جولداستار ءداۋىردىڭ قادامىنا ىلەسۋى كەرەك، دەنەسى جاڭا داۋىرگە كىرگەنىمەن، يدەياسى بۇرىنعىدا قالىپ قالۋىنا بولمايدى، ماسەلەگە قاراۋدا، شەشىم جاساۋدا، قىزمەتتى ىلگەرىلەتۋدە ءالى دە كونە كوزقاراستا، كونە سۇردەكتە، كونە ادىستە بولماۋى كەرەك. مۇنداي بولسا، داۋىرگە ىلەسە الماۋ، قىزمەتتى جاقسى ىستەي الماۋمەن بىرگە، ۋاقىت پەن ورايدان ۇتىلىپ، قىزمەتكە نۇقسان جەتكىزەدى. بۇل ماسەلەگە، ءسوز جوق، بۇكىل پارتياداعى جولداستار، اسىرەسە، ءار دارەجەلى باسشى كادرلار وسكەلەڭ ءمان بەرۋ كەرەك. داۋىرمەن بىرگە ىلگەرىلەۋدى ۇرانعا اينالدىرۋعا بولمايدى، يدەيا مەن ارەكەتتە شىن مانىندە تياناقتاندىرۋ كەرەك، «ۋي، جين پاتشالىقتارىن بىلاي قويعاندا، حان پاتشالىعىنىڭ بار ەكەندىگىن دە بىلمەيتىن» دۇنيەدەن سىرت ادامعا اينالىپ قالۋعا بولمايدى!
نازاريالىق جاسامپازدىق العا ءبىر قادام ىلگەرىلەگەن سايىن، نازاريامەن قارۋلانۋ ءبىر قادام ىلەسە ىلگەرىلەۋ كەرەك. پارتيانىڭ بۇرىنعى كەزەك شوعىرلى تاربيە قيمىلدارىنىڭ بارلىعى يدەيالىق تاربيەنى ماڭداي الدى ورىنعا قويىپ، ۇيرەنۋ تەرەڭ بولماۋ، يدەيا بىرلىككە كەلمەۋ، ارەكەت ىلەسە الماۋ ماسەلەلەرىن كۇش سالا شەشىپ، تولاسسىز كۇش تۇسىرۋمەن بىرگە، شوعىرلى كۇش ءتۇسىرىپ، بۇكىل پارتيانىڭ يدەيادا بىرلىككە كەلۋىن، ساياسيدا ىنتىماقتى بولۋىن، ارەكەتتە بىركەلكى بولۋىن ىلگەرىلەتتى. پارتيانىڭ جاسامپاز نازارياسىن ۇيرەنۋدى، دايەكتىلەندىرۋدى يدەيانى قارۋلاندىرۋدىڭ ماڭىزدىنىڭ ىشىندەگى ماڭىزدىسى ەتىپ، ماركسيزمنىڭ نەگىزگى قاعيداسىن ۇيرەنۋمەن ساباقتاستىرىپ، پارتيا تاريحىمەن، جاڭا جۇڭگو تاريحىمەن، رەفورما جاساۋ، ەسىك اشۋ تاريحىمەن، سوتسياليزمنىڭ دامۋ تاريحىمەن ۇشتاستىرىپ، جاڭا داۋىردەگى ءبىزدىڭ ۇلى كۇرەس جۇرگىزۋىمىزدىڭ، ۇلى ينجەنەريانى قۇرۋىمىزدىڭ، ۇلى ىستەردى ىلگەرىلەتۋىمىزدىڭ، ۇلى ارماندى جۇزەگە اسىرۋىمىزدىڭ باي امالياتىمەن بايلانىستىرىپ، جەتە ۇيرەنۋ، جەتە ءتۇسىنۋ، شىنايى تياناقتاندىرۋ جاعىنا كوپ كۇش سالىپ، يدەيانى ازات ەتۋ بارىسىندا يدەيانى بىرلىككە كەلتىرىپ، تانىمدى تەرەڭدەتۋ بارىسىندا تانىمدى جوعارىلاتىپ، دايەكتىلەندىرۋدەگى، تياناقتاندىرۋداعى يدەيالىق سانالىلىق پەن ارەكەت سانالىلىعىن شىنايى كۇشەيتۋ كەرەك.
ءۇشىنشى، اۋەلگى ماقساتتى ۇمىتپاۋدا، بورىشتى ەستە بەرىك ساقتاۋدا، ءسوز جوق، ماسەلەگە دۇرىس قاراۋ باتىلدىعى مەن پىشاق ءدۇزىن ىشكە قاراتۋداي سانالىلىق ارقىلى پارتيانىڭ ءوز - وزىنە توڭكەرىس جاساۋىن ۇزدىكسىز ىلگەرىلەتۋ كەرەك. ”قۇلىقتى ادامنىڭ قاتەسى كۇن مەن ايدىڭ تۇتىلعانى سياقتى: قاتەلىك وتكىزگەندە جۇرتتىڭ ءبارى كورىپ تۇرادى، قاتەلىگىن وزگەرتكەن كەزدە، ەلدىڭ ءبارى ىنتىزارمەن قارايدى“. باتىلدىقپەن ماسەلەگە بەتپە - بەت كەلۋ، جۇرەكتىلىكپەن قاتەلىكتى تۇزەتۋ − پارتيامىزدىڭ كورنەكتى ەرەكشەلىگى جانە ابزالدىلىعى. لەنين: ”قاتەلىكتى اشىق مويىنداۋ، قاتەلىك وتكىزۋدىڭ سەبەبىن اشىپ كورسەتۋ، قاتەلىك تۋىلعان ورتاعا تالداۋ جاساۋ، قاتەلىكتى وزگەرتۋدىڭ ءادىسىن ەگجەي - تەگجەيلى تالقىلاۋ − وسى عانا بايسالدى پارتيانىڭ بەلگىسى“ دەگەن بولاتىن. قۇدىرەتتى ساياسي پارتيا − ءوز - وزىنە توڭكەرىس جاساۋ بارىسىندا شىڭدالعان. پارتيانىڭ تاريحىنا قايىرىلا قاراساق، پارتيامىز قاشاندا قوعامدىق توڭكەرىستى ىلگەرىلەتۋمەن بىرگە، ءوز - وزىنە توڭكەرىس جاساۋدى ىلگەرىلەتۋگە باتىل بولىپ، باستان - اياق اقيقاتقا تاباندى بولىپ، قاتەلىكتى تۇزەتىپ، ماسەلەگە بەتپە - بەت كەلۋگە، كەمشىلىكتى جەڭۋگە باتىل بولىپ، سۇيەكتى قىرىپ ۋدى ەمدەۋگە، شىرىگەن جەردى كەسىپ بۇلشىق ەت جەتىلدىرۋگە باتىل بولدى. پارتيامىز باستان - اياق وسىلاي ىستەۋگە تاباندى بولعاندىقتان دا، قاتەرلى ساتتە قيىننان جول تاۋىپ، اعاتتىقتان كەيىن بىلىقپالىقتى وڭاپ، دۇرىستىققا ورالىپ، ماڭگى قۇلامايتىن، جەڭىلمەيتىن ماركستىك ساياسي پارتياعا اينالدى.
قازىر از سانداعى پارتيا مۇشەلەرىنىڭ، كادرلاردىڭ ءوز - وزىنە توڭكەرىس جاساۋ رۋحى سولعىندادى، قازىرگى كۇيىن قاناعات تۇتتى، ەپتەپ - سەپتەپ كۇن وتكىزدى؛ كەيبىرەۋلەردىڭ ماسەلەنى قاداعالاۋ قابىلەتى تومەندەدى، ءوز باسىنىڭ عانا قامىن جەدى، سىرقاتىن جاسىرىپ، ايىبىن بۇركەمەلەدى؛ كەيبىرەۋلەردىڭ سىن ايتۋ قابىلەتى السىرەدى، ءوز باسىن عانا قورعادى، قۇلاقسىز كەرەڭ، ءتىلسىز ساقاۋ بولىپ الدى؛ كەيبىرەۋلەر اسپا - توكتىككە سالىنىپ، ءىرىپ - ءشىرىپ، ءتارتىپتى كوزگە ىلمەدى، ءتىپتى، قاسارىسىپ تارتىپكە قايشىلىق جاسادى، پارتيانىڭ تارتىبىنە جانە ورتالىقتىڭ 8 ءتۇرلى بەلگىلەمەسىنىڭ رۋحىنا قايشىلىق جاساۋ ماسەلەلەرى تالاي رەت تيداۋ سالىنسا دا تيىلمادى. بۇرىنعىلار: ”دۇنيەدە ساقتاۋ ەڭ قيىن نارسە ادامنىڭ نيەتى، دۇنيەدە ازعىرۋعا ەڭ تەز تۇسەتىن نارسە ءناپسى“ دەگەن بولاتىن. ”كوڭىلدە بوتەن وي“ تۋىلا قالسا، ءوز - وزىنە توڭكەرىس جاساۋ ەرىك - جىگەرى شەگىنەدى، اۋەلگى ماقساتقا قيعاشتىق جاساپ، بورىشتى ۇمىتادى، ءتارتىپتىڭ تومەنگى شەگىن بۇزادى، ءتىپتى، زاڭعا قايشى قىملىس وتكىزەدى.
اۋەلگى ماقساتتى تابۋ وڭاي، باستان - اياق اينىماۋ قيىن. بۇكىل پارتياداعى جولداستار، ءسوز جوق، وسكەلەڭ توڭكەرىستىك مۇراتتى جانە تاسقىنداعان توڭكەرىستىك ەرىكتى باستان - اياق ساقتاپ، سىن جانە ءوز - وزىنە سىن ايتۋ سىندى وسى وتكىر قارۋدان ويداعىداي پايدالانىپ، ستيلدى دۇرىستاۋدى، ءتارتىپتى قاتايتۋدى، شىرىكتەسۋگە قارسى تۇرۋدى تىنباي ويداعىداي يگەرىپ، پارتيانىڭ ءوزىن كىرشىكسىزدەندىرۋ، ءوزىن كەمەلدەندىرۋ، ءوزىن جاڭالاۋ، ءوزىن جوعارىلاتۋ قابىلەتىن ۇزدىكسىز كۇشەيتىپ، پارتيانىڭ ىرگەسىن شايقالتۋى، پارتيانىڭ ىستەرىنە كەسە - كولدەنەڭ بولۋى مۇمكىن قۇبىلىس اتاۋلىمەن باتىل كۇرەسىپ، پارتيانىڭ تۇلعاسىندا جابىسىپ تۇرعان لاس نارسە اتاۋلىنى الاستاپ، پارتيامىزدى اناعۇرلىم پارمەندى، تەبىندى ەتىپ قۇرىپ شىعۋ كەرەك.
ءتورتىنشى، اۋەلگى ماقساتتى ۇمىتپاۋدا، بورىشتى ەستە بەرىك ساقتاۋدا، ءسوز جوق، كۇرەس جاساۋ رۋحىن ساۋلەلەندىرىپ، باتىلدىقپەن جاۋاپكەرشىلىك ارقالاۋ، ىسكەرلىك كورسەتۋ كەرەك. پارتيامىز مەملەكەت ىشكى دۇربەلەڭ مەن سىرتقى شاپقىنشىلىققا ۇشىراعان، ۇلت حاۋىپ - قاتەر مەن قيىنشىلىقتا قالعان ساتتە دۇنيەگە كەلدى، دۇنيەگە كەلە سالىسىمەن كۇرەس جۇرگىزۋ تاڭباسى باسىلدى، باسىپ وتكەن جولىندا كۇرەس جۇرگىزۋ بارىسىندا تىرشىلىك تاپتى، دامۋعا يە بولدى، جەڭىسكە قول جەتكىزدى. ۇلتتىڭ گۇلدەنۋىنە قانشالىق جاقىنداعان سايىن، بارلىعى سونشالىق ساتىنە باسا بەرمەيدى، سونشالىق حاۋىپ - قاتەرگە، سىن - سايىسقا، ءتىپتى، اقجال تولقىن، اساۋ اعىسقا تۋرا كەلەدى. اۋەلگى ماقساتتى ۇمىتپاۋدا، بورىشتى ەستە بەرىك ساقتاۋدا، ءسوز جوق، بەيبىت كۇندە دە بەيعام بولماي، ءومىر ءسۇرۋ بارىسىندا ءولىمدى ۇمىتپاي، قۋانىشتى كۇندە دە قام - قايعىنى ۇمىتپاي، قاشاندا ساق بولىپ، رۋحتى ۇزدىكسىز جەلپىنتىپ، جاڭا تاريحي ەرەكشەلىككە يە كوپتەگەن ۇلى كۇرەستەردى جۇرەكتىلىكپەن جۇرگىزۋ كەرەك.
ءبىز ايتىپ وتىرعان كۇرەس، كۇرەس ءۇشىن كۇرەسۋ ەمەس، جەكە پايدا ءۇشىن كۇرەسۋ دە ەمەس، قايتا حالىقتىڭ تاماشا تۇرمىسقا دەگەن تالپىنىسىن جۇزەگە اسىرۋ جولىنداعى، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ جولىنداعى اۋىر ەكەنىن بىلە تۇرا اۋىر جۇك ارقالاۋ، قاجىرلىلىقپەن ىستەۋ، شىنايى ىستەۋ، قامال الىپ قيىنشىلىقتاردى جەڭۋ. پارتيا مۇشەلەرىندە، كادرلاردا كۇرەس رۋحىنىڭ بار - جوقتىعىن، باتىل جاۋاپكەرشىلىك ارقالاعان - ارقالاماعانىن تارازىلاۋدا، ۇلكەن دۇرىس، ۇلكەن بۇرىس الدىندا باتىل پوزيتسيا بىلدىرگەن - بىلدىرمەگەنىنە، قايشىلىق الدىندا قيىندىقتان تايسالماي باتىلدىقپەن العا ۇمتىلعان - ۇمتىلماعانىنا، داعدارىس الدىندا باتىل كەۋدە كەرىپ شىققان - شىقپاعانىنا، اعاتتىقتار الدىندا جاۋاپكەرشىلىكتى باتىل ارقالاعان - ارقالاماعانىنا، بۇرىس ستيل، تەرىس پيعىلمەن باتىل كۇرەس جۇرگىزگەن - جۇرگىزبەگەنىنە قاراۋ كەرەك.
قازىر ءىشىنارا پارتيا مۇشەلەرى، كادرلار اراسىندا جاۋاپكەرشىلىك ارقالاعىسى كەلمەۋ، جاۋاپكەرشىلىك ارقالاۋعا باتىلدىق ەتپەۋ، جاۋاپكەرشىلىك ارقالاي الماۋ ماسەلەلەرى تۇرلىشە دارەجەدە ءومىر ءسۇرىپ وتىر. كەيبىرەۋى ”ماقۇلباي“، ”ماۋباس ۇلىق“، ”سولقىلداق“، ”شىنىنى قانشا كوپ جۋعان سايىن، شىنىنى سونشا كوپ شاعىپ الۋدان“ ۋايىمدايدى، ”وزگەنىڭ كوڭىلىن جىقپاسام، قيىنشىلىققا جولىقسا مەنەن جاردەم سۇراماسا“ دەگەندى، ”ءىس تۋدىرماۋ ءۇشىن، ىستەمەۋدى“، ”تەك ناتيجەنى ويلاپ، قاتەلىكتەردەن باسىن اۋلاققا سالۋدى، كۇش شىعارماي، ناتيجەگە يە بولۋدى ۇستانادى“؛ كەيبىرەۋى ”بۇتحاناداعى بالشىق بۇدتىڭ بوران - شاشىنعا شىداي الماۋىنىڭ“ كۇيىن كەشىپ، قايشىلىققا جولىقسا نە ىستەرىن بىلمەي ساسقالاقتايدى، كۇرەسكە كەلگەندە تايساقتايدى، كوممۋنيستەرگە ءتان بەينە وسى ما؟! جاۋاپكەرشىلىك ارقالاپ ىسكەرلىك كورسەتپەيدى، ءىس تىندىرماعانىمەن قويماي، ءىستى ناسىرعا شاپتىرىپ، كەلەلى ىسكە كەسىرىن تيگىزەدى.
پارنيكتە ءزاۋلىم بايتەرەك وسپەيدى، بويكۇيەزدەر ۇلى ءىس تىندىرا المايدى. قالىڭ پارتيا مۇشەلەرى، كادرلار ىستىق - سۋىقتى باستان وتكەرۋ، ومىرگە ارالاسۋ بارىسىندا ىسكەرلىگىن جەتىلدىرىپ، ءوزىن سومداپ، جاۋاپكەرشىلىك ارقالاپ، ىسكەرلىك كورسەتەتىن بەرىك ومىرتقانى، قۇرىش يىقتى، ناعىز قابىلەتتى شىڭداپ، باتىلدىقتى الدىڭعى ورىنعا قويىپ، ءىس تىندىرۋدى الدىڭعى ورىنعا قويىپ، باتىلدىقپەن جاۋاپكەرشىلىك ارقالاپ، شەبەرلىكپەن ىسكەرلىك كورسەتىپ، ەلەۋلى سىن - سايىستارعا ءونىمدى تۇردە توتەپ بەرۋ، ەلەۋلى حاۋىپ - قاتەرلەرگە قارسى تۇرۋ، ەلەۋلى كەدەرگىلەردى جەڭۋ، ەلەۋلى قايشىلىقتاردى شەشۋ بارىسىندا اتويلاپ الدا ءجۇرۋ، ەڭبەك ءسىڭىرىپ، ەسە قوسۋ كەرەك.
بەسىنشى، اۋەلگى ماقساتتى ۇمىتپاۋدا، بورىشتى ەستە بەرىك ساقتاۋدا، ءسوز جوق، پارتيانىڭ ىشكى ءتۇزىمىن كەمەلدەندىرىپ جانە دامىتىپ، باياندى مەحانيزم قالىپتاستىرۋ كەرەك. ءتۇزىم ابزالدىلىعى − ءبىر ساياسي پارتيانىڭ، ءبىر مەملەكەتتىڭ ەڭ ۇلكەن ابزالدىلىعى. دىڭ شياۋپيڭ جولداس: ”ءتۇزىم جاقسى بولسا، جامان ادامدار وزبىرلىق ىستەي المايدى، ءتۇزىم جاقسى بولماسا، جاقسى ادام جاقسى ىستەردى جەتكىلىكتى ىستەي المايدى، ءتىپتى، كەرى جاعىنا كەتەدى“ دەگەن ەدى. پارتيامىز ءتۇزىم كەمەلسىزدىگىنىڭ زيانىن تارتقان. پارتيانىڭ 18 - قۇرىلتايىنان بەرى، پارتيا ورتالىق كوميتەتى پارتيانى ءتۇزىم ارقىلى جونگە سالۋعا، پارتيانى ەرەجە ارقىلى جونگە سالۋعا تاباندى بولىپ، جۇيەلى دە كەمەلدى، عىلمي ارناعا تۇسىرىلگەن، جۇمىسى ءونىمدى ءتۇزىم جۇيەسىن قۇلشىنا قۇرىپ، پارتيانى جاپپاي قاتاڭ جونگە سالۋدى تىڭ ورەگە كوتەردى.
پارتيا 19 - كەزەكتى ورتالىق كوميتەتىنىڭ ءتورتىنشى جالپى ماجىلىسىندە اۋەلگى ماقساتتى ۇمىتپاۋ، بورىشتى ەستە بەرىك ساقتاۋ ءتۇزىمىن ورناتۋ العا قويىلدى. ەرەجە - ءتۇزىم ورناتۋدا جۇيەلى ويلاۋعا، ديالەكتيكالىق ويلاۋعا، تومەنگى شەكتە ويلاۋعا تاباندى بولىپ، جەتەكشىلىگىن، باعىتتامالىلىعىن، اتقارىمدىلىعىن ايگىلەۋ كەرەك. ماسەلەنى شەشۋگە تاباندى بولۋمەن بىرگە، قولايلى بولۋعا تاباندى بولىپ، ناقتى، جارامدى شارا قولدانىپ، ماسەلەنىڭ تالماۋ جەرىنە ءدال تيگىزۋ؛ نىسانانى باعدار ەتۋگە تاباندى بولۋمەن بىرگە، ءىس جۇزىندىكتى تياناق ەتۋگە تاباندى بولىپ، پارتيا ورتالىق كوميتەتىنىڭ تالاپتارىن تياناقتاندىرۋدى، امالياتتىق قاجەتتى قاناعاتتاندىرۋدى، نەگىزگى ساتىنىڭ تىلەگىنە ۇيلەستىرۋدى بىرلىككە كەلتىرۋگە كۇش سالۋ؛ جاڭالىق اشا دامۋعا تاباندى بولۋمەن بىرگە، ورگانيكالى ۇشتاستىرۋعا تاباندى بولىپ، پارتيانىڭ ىشكى زاڭ ەرەجەلەرىمەن، تۇزىمدەرىمەن توعىستىرىپ، ساباقتاستىرىپ، تاباندى بولۋعا تيىستىلەرىنە تاباندى بولۋ، كەمەلدەندىرۋگە تيىستىلەرىن كەمەلدەندىرۋ، ورناتۋعا تيىستىلەرىن ورناتۋ، تياناقتاندىرۋعا تيىستىلەرىن تياناقتاندىرۋ كەرەك. ءتۇزىم ورناتۋدا ۇلكەن دە تولىق بولىپ كەتۋگە دە، شاعىن دا ۇساق بولىپ قالۋعا دا بولمايدى، ”سيىر قوراعا مىسىقتى قاماۋعا“ دا، ءارى وتە كۇردەلىلەستىرىپ جىبەرۋگە دە بولمايدى.
ءتۇزىم بويسۇنۋعا جانە اتقارۋعا ارنالادى. بۇكىل پارتيا، ءسوز جوق، ءتۇزىم تانىمىن كۇشەيتىپ، ءتۇزىمدى سانالى تۇردە ارداقتاپ، ءتۇزىمدى قاتاڭ اتقارىپ، ءتۇزىمدى باتىل قورعاپ، قۇزىرەتتىلىگى جوعارى ءونىمدى تۇزىمدەردى اتقارۋ مەحانيزمىن اقاۋسىزداندىرىپ، ءتۇزىمنىڭ اتقارىلۋىن باقىلاۋدى كۇشەيتىپ، اۋەلگى ماقساتتى ۇمىتپاۋ، بورىشتى ەستە بەرىك ساقتاۋ ءتۇزىمىنىڭ ناقتىلانۋىن، تياناقتانۋىن ىلگەرىلەتىپ، تالعاۋ، بۇلتاققا سالۋ، قاز - قالپىندا ورىنداماۋ جايتتەرىن باتىل تەجەپ، قاتاڭ تەجەۋدىڭ ”رازىنكە“گە، ”ۇزاق ۋاقىتتىق ءونىمدى“ بولادى دەگەننىڭ ”ءونىمسىز“ بولىپ قالۋىنان ساقتانۋ كەرەك.
التىنشى، اۋەلگى ماقساتتى ۇمىتپاۋدا، بورىشتى ەستە بەرىك ساقتاۋدا، ءسوز جوق، باسشىلىق ورگاندار مەن باسشى كادرلار باستاماشى بولۋعا تاباندى بولۋ كەرەك. باسشىلىق ورگان − مەملەكەتتىڭ جونگە سالۋ جۇيەسىندەگى ماڭىزدى ورگان، باسشى كادرلار − پارتيا مەن مەملەكەت ىستەرىنىڭ دامۋىنداعى ”شەشۋشى ازشىلىق“، بۇكىل پارتيا، بۇكىل قوعام ءۇشىن باعىت كورسەتكىشتىك رولعا يە. ”اسىلزادانىڭ ءمورالى سامال سياقتى، قاراشانىڭ ءمورالى ءشوپ سياقتى، سامال تۇرسا ءشوپ سامالمەن تەربەلەدى“. جوعارىدا تۇرىپ ادامعا تالاپ قويعاننان، ارتتا تۇرىپ ادامدى يتەرگەننەن گورى، بارىنەن دە الدىدا تۇرىپ ادامدارعا جەتەكشىلىك ەتكەن ءتاۋىر. اۋەلگى ماقساتتى ۇمىتپاۋدا، بورىشتى ەستە بەرىك ساقتاۋدا باسشىلىق ورگاندار مەن باسشى كادرلار، ءسوز جوق، ۇلگى بولۋ، الدا ءجۇرۋ كەرەك.
”ۇلگى بولىپ ناتيجە جاراتپاساڭ، وزگەلەر ساعان بويسۇنبايدى ءارى سەنبەيدى“. باسشىلىق ورگان مەن باسشى كادرلاردىڭ باستاماشىلدىقپەن اتويلاپ الدا ءجۇرۋى، الدا ءجۇرىپ ىستەۋى پارتيامىزدىڭ تابىسقا بەت الۋىنىڭ تەتىگى. توڭكەرىستىك سوعىس جىلدارىندا «ماعان ەرىڭدەر» دەپ ايعاي سالعان مەن «ۇمتىلىڭدار» دەپ باقىرعاننىڭ پارقى زور بولاتىن. جاڭا جۇڭگو قۇرىلعاننان كەيىن، پارتيامىزدا جياۋ يۇيلۋ، گۋ ۋىنچاڭ، ياڭ شانجوۋ، جاڭ فۋچيڭ سياقتى ءبىر توپ قاھارمان ۇلگىلەر الدا ءجۇرىپ ۇلگى كورسەتكەندىكتەن دە حالىق بۇقاراسىن ىنتىماقتاستىرىپ باستاپ ءتۇرلى ىستەردىڭ دامۋىنىڭ جاڭا جاعدايىن ۇزدىكسىز اشا الدى. باسشىلىق ورگان مەن باسشى كادرلار وزىندىك جاۋاپكەرشىلىكتى جەتە تانىپ، قاشاندا قىراعى بولىپ، ۇنەمى سالىستىرىپ تەكسەرىپ، قاداعالاپ بورشالاپ، ءوزىن تەكسەرىپ وتىرۋى كەرەك.
بيىل − جاپپاي دوڭگەلەك داۋلەتتى قوعام ورناتۋدىڭ شەشۋشى جەڭىسىنە قول جەتكىزەتىن، كەدەيلىكتەن دالمە - ءدال ارىلتۋدان قامال الۋ شايقاسىنىڭ جەڭىسىنە قول جەتكىزەتىن، ”13 - بەسجىلدىق“ جوبا اياقتالاتىن جىل، سىرتقى ورتادا ءتيىمسىز فاكتورلار كوبەيدى، ەل ءىشى ەكونوميكاسىنىڭ باياۋلاۋ قىسىمى كۇشەيدى، رەفورما، دامۋ، ورنىقتىلىق مىندەتتەرى اۋىرلادى. جاعداي نەعۇرلىم قاتاڭ، كۇردەلى بولعان سايىن، باسشىلىق ورگاندار مەن باسشى كادرلاردىڭ تاباندىلىقتى سولعۇرلىم ساقتاپ، العان بەتىنەن قايتپاۋىن سولعۇرلىم قاجەت ەتەدى، مىندەت نەعۇرلىم جاپالى، اۋىر بولعان سايىن، باسشىلىق ورگاندار مەن باسشى كادرلاردىڭ باتىلدىقپەن الدا ءجۇرۋىن، شىنايى ىستەپ، جاۋاپكەرشىلىك ارقالاۋىن سولعۇرلىم قاجەت ەتەدى. ءار دارەجەلى باسشىلىق ورگاندار مەن باسشى كادرلار باستاماشىلدىقپەن ”ءتورت تانىم“دى كۇشەيتىپ، ”ءتورت سەنىم“دى بەكەمدەپ، ”ەكىنى قورعاۋ“دى ورىنداپ، ءار ۇلت حالقىن ىنتىماقتاستىرىپ، باستاپ، العا باسۋ جولىنداعى ءتۇرلى قيىندىقتار مەن بوگەتتەردى جۇرەكتىلىكپەن جەڭىپ، ”ەمتيحان تاپسىرۋ“ كوڭىل كۇيىمەن پارتيا مەن حالىققا قاناعاتتانارلىق جاۋاپ بەرۋ كەرەك.
(شينحۋا اگەنتتىگىنىڭ 1 - ايدىڭ 8 - كۇنى بەيجيڭنەن بەرگەن حابارى)
