چىن شىشيننىڭ سۋرەتى. شينحۋا اگەنتتىگى تاراتقان
شينحۋا اگەنتتىگىنىڭ 12 - ايدىڭ 16 - كۇنى ۋحاننان بەرگەن حابارى (ءتىلشى لياڭ جيانچياڭ). حۋبەيدىڭ ۋحانىنداعى حۋبەي ساقشى - وفيتسەرلەر شۋەيۋانىندا ەرجۇرەك قۇرباندارعا ارنالعان وزگەشە داۋال بار. مۇندا، ءبىر پارشا سۋرەت پەن ءبىر ابزاتىس ءسوز ”مەملەكەتتىك قوعام حاۋىپسىزدىگى شەبىندەگى 2 - دارەجەلى قاھارمان ۇلگى“ چىن شىشيننىڭ ەرجۇرەك ىزگى ىستەرىن ەستەلىككە العان. تاياۋدا حۋبەي قوعام حاۋىپسىزدىگى ورگاندارى ”اۋەلگى ماقساتتى ۇمىتپاۋ، بورىشتى ەستە بەرىك ساقتاۋ“ نەگىزگى تاقىرىپتىق تاربيەسىندە حالىق ساقشىسى چىن شىشيننىڭ ىزگى ىستەرىن كوپ رەت اۋىزعا الدى.
1971 - جىلى تۋىلعان چىن شىشين كوممۋنيستىك پارتيا مۇشەسى. 1993 - جىلى 7 - ايدا ول حۋبەي ولكەلىك قوعام حاۋىپسىزدىگى جوعارى دارەجەلى ارناۋلى تەحنيكۋم مەكتەبىنەن وقۋ بىتىرگەننەن كەيىن فاڭشيان اۋداندىق قوعام حاۋىپسىزدىگى مەكەمەسىنە قىزمەتكە بولىنەدى. سوڭىنان، ول ىلگەرىندى - كەيىندى فاڭشيان اۋدانى ياۋحۋاي ساقشى بولىمشەسىندە، جۇنديان ساقشى بولىمشەسىندە قىزمەت ىستەيدى، 1995 - جىلى 8 - ايدان 1998 - جىلى 7 - ايعا دەيىن ىلگەرىندى - كەيىندى فاڭشيان اۋداندىق قوعام حاۋىپسىزدىگى مەكەمەسىنىڭ العاشقى تەرگەۋ بولىمىندە جانە قىلمىستىق ىستەر ۇلكەن اترەتىندە قىزمەت ىستەيدى.
1998 - جىلى 7 - ايدىڭ 8 - كۇنى كەشتە چىن شىشين فاڭشيان اۋدانى چىڭگۋان قالاشىعى شيحى بوگەۋىندەگى فاڭشيان ماقتا توقىماشىلىق زاۆودىنىڭ ماڭىندا ارت - ارتىنان تۋىلعان پىشاق الىپ توناۋشىلىق ىستەۋ دەلوسىن اشۋعا قاتىناسادى. كيىمدەرىن وزگەرتىپ كيگەن چىن شىشين مەن قىزمەتتەسى لو چين دەلو تۋىلعان بوگەۋ ارالىعىندا شارلاۋ جۇرگىزىپ، ءجۇرىس - ءتۇرىسى كۇماندى 4 ادامنىڭ بۇقپانتايلاپ كەلە جاتقانىن بايقاپ، ەكەۋى دەرەۋ الدارىنان شىعادى.
4 ەر ادام كەنەت بۇرىلادى، بىرەۋى ۇشكىر پىشاعىن سۋىرىپ شىعىپ چىن شىشيننىڭ كەۋدەسىنە تىرەپ: ”اكەل اقشاڭدى!“، - دەپ ايقۇلاقتانادى، ەندى ءبىر بۇزاقى لو چيننىڭ قولىنداعى سومكەنى تارتىپ الادى ءارى ونى بوگەۋدىڭ استىنا يتەرىپ جىبەرەدى. چىن شىشين زور داۋىسپەن: ”مەن ساقشىمىن!“، - دەپ ايقايلاۋمەن بىرگە، سول قولىمەن پىشاق ۇستاعان ءبىر بۇزاقىنىڭ بىلەزىگىنەن مىقتاپ ۇستاپ، وڭ قولىمەن بەلىنەن كوزىر الىپ شىعىپ ونى كوزىرلەمەكشى بولادى.
وسى ساتتە 2 ۇشكىر پىشاق وڭ - سول ەكى جاعىنان ءبىر ۋاقىتتا چىن شىشيننىڭ بەلىنە قادالادى. چىن شىشين اۋىرعانىنا قاراماستان، قۇر قول بولسا دا بۇزاقىلارمەن ايانباي ايقاسادى. ايتسەدە، قالىڭ بۇزاقىعا جالعىز توتەپ بەرە الماي، 10 نەشە جەرىنەن پىشاقتالىپ، قانعا بويالىپ جىعىلادى. چىن شىشين ءبىر بۇزاقىنى جىبەرمەي قۇشاقتاپ الادى، قانقۇيلى بۇزاقى قاشىپ قۇتىلۋ ءۇشىن، ول جەرگە تالىپ تۇسكەنشە ونىڭ بىلەگىن، سانىن، بەلىن اياماي پىشاقتاي بەرەدى.
4 بۇزاقى ورايدان پايدالانىپ قاشىپ كەتەدى، چىن شىشين سوڭىنداعى ءبىر بۇزاقىنىڭ بالاعىنان تاس قىپ ۇستاپ الادى. قاشىپ كەتۋى قيىنعا سوققان بۇزاقى ونى اياماي تەبۋمەن بىرگە، چىن شىشيندى سۇيرەي العا جىلجيدى. چىن شىشيننەن اققان قان 7 مەترگە دەيىنگى جەردى بويايدى...
اۋىر جارالانعاندىقتان چىن شىشين سول كۇنى ساعات 22 دەن 25 مينۋت وتكەندە ەرلىكپەن قۇربان بولادى. ەرتەسى قىلمىستىق ىستەر ۇلكەن اترەتى 4 بۇزاقىنى تۇگەلدەي ۇستايدى. چىن شىشين ومىرىمەن قوعام حاۋىپسىزدىگى قىزمەتىنە دەگەن شەكسىز ادال نيەتىن ايگىلەدى. 1998 - جىلى 10 - ايدىڭ 12 - كۇنى چىن شىشينگە ”مەملەكەتتىك قوعام حاۋىپسىزدىگى جۇيەسىندەگى 2 - دارەجەلى قاھارمان ۇلگى“ اتاعى تولىقتاپ بەرىلدى. حۋبەي ولكەلىك حالىق ۇكىمەتى وعان ”توڭكەرىستىك قۇربان“ اتاعىن بەردى.
چىن شىشين قۇربان بولعان كەزدە ونىڭ ۇلى چىن ليشياۋ نەبارى 5 ايدان ەندى اسقان. ول قالدىرعان ساقشى باس كيىمى عانا ۇلىنىڭ ەرجەتۋىنە سەرىك بولدى.
بۇگىنگى كۇنى اكەسىنىڭ ورىندالماعان ءىسىن جالعاستىرعان چىن ليشياۋ قوعام حاۋىپسىزدىگى قىزمەتىمەن شۇعىلدانۋدى ماقسات ەتىپ، حۋبەي ساقشى - وفيتسەرلەر شۋەيۋانىنا وقۋعا تۇسەدى. ”ءسىز قۇربان بولعان كەزدە 5 ايدان ەندى اسسام دا، ەس بىلگەننەن كەيىن شەشەم كوز جاسىن كولدەتە وتىرىپ، ءسىزدىڭ بۇزاقىلارمەن ەرلىكپەن كۇرەسىپ قۇربان بولعان ءىسىڭىزدى تالاي رەت ايتىپ بەردى. اكە، ۇلىڭىز ءسىزدى ماقتانىش ەتەدى!“، - دەدى اكەسىن ەسكە العان چىن ليشياۋ.
