تيانشان تورى
تيانشان تورى   ›   جاڭالىقتار   ›   ۇلتتىڭ گۇلدەنۋى جولىندا ەرجۇرەك قۇرباندار شەجىرەسى

لۋان جۇن: ومىرىمەن سەرتىن قورعادى

  شينحۋا اگەنتتىگىنىڭ 12 - ايدىڭ 15 - كۇنى حاربيننەن بەرگەن حابارى (ءتىلشى لياڭ شۋبين). شارلاۋ جۇرگىزۋ بارىسىندا، 4 بۇزاقىنىڭ پىشاق ۇستاپ تاپ بەرگەن شابۋىلىنا ۇشىراعان حاربين قالاسى تايپيڭ قوعام حاۋىپسىزدىگى بولىمشە مەكەمەسى قىلمىستىق ىستەر ۇلكەن اترەتىنىڭ بارلاۋشىسى لۋان جۇن ولارمەن ولىسپەي - بەرىسپەي ايقاسىپ، بار كۇشىمەن ولاردىڭ اراسىنداعى ءبىر بۇزاقىنى اتىپ ولتىرگەن سوڭ ەرلىكپەن قۇربان بولىپ، ومىرىمەن ءوزىنىڭ سەرتىن قورعادى.

  لۋان جۇن، 1959 - جىلى 7 - ايدا دۇنيەگە كەلگەن، جۇڭگو كوممۋنيستىك پارتياسىنىڭ مۇشەسى، 1982 - جىلى قوعام حاۋىپسىزدىگى قىزمەتىنە قاتىناسقان، حاربين قالالىق قوعام حاۋىپسىزدىگى مەكەمەسى قىلمىس بارلاۋ تارماق اترەتىندە بارلاۋشى، تايپيڭ قوعام حاۋىپسىزدىگى بولىمشە مەكەمەسى شينلى ساقشى بولىمشەسىندە حالىق ساقشىسى، تايپيڭ قوعام حاۋىپسىزدىگى بولىمشە مەكەمەسى قىلمىستىق ىستەر ۇلكەن اترەتىندە بارلاۋشى بولعان.

  1998 - جىلى 6 - ايدىڭ 28 - كۇنى تۇستەن كەيىن تايپيڭ قوعام حاۋىپسىزدىگى بولىمشە مەكەمەسى قىلمىستىق ىستەر ۇلكەن اترەتى 3 - ورتا اترەتىندەگى قىلمىستىق ىستەر ساقشىلارى بىرنەشە جولعا ءبولىنىپ، دەلو وڭاي تۋىلاتىن جەرلەرگە ىشكەرىلەي شارلاۋ جۇرگىزەدى، وسى جولى جۇمىسقا شىقپايتىن بولسا دا لۋان جۇن ىرىقتىلىقپەن ءوزى سۇرانىپ شايقاسقا قاتىناسادى.

  ساعات 16دان 30 مينۋت وتكەن مولشەردە لۋان جۇن قاراپايىم كيىنىپ، 3 اماندىق ساقتاۋ بەلسەندىسىن باستاپ سۇڭحۋاجياڭ وزەنى جاعاسىنا شارلاۋ جۇرگىزىپ، اۆتوكولىكپەن لينتي كوشەسىندەگى ماجياگۋ توسپاسىنا دەيىن بارادى. وسى جەردە بۇرىن كوپ رەت توناۋشىلىق دەلوسى تۋىلعاندىقتان، لۋان جۇن قاتارلىلار وسى جەردە ءتىنتۋ جۇرگىزەدى. ءدال وسى كەزدە، بۇزاقىلار شۇي چىڭىن، شۇي يانجۇڭ، سۇن جىگاڭ، يۇي جيانۋي ءدال وسى جەردە جاسىرىنىپ، توناۋشىلىق ىستەۋگە قارمانىپ جاتقان ەدى.

  لۋان جۇن توسپانىڭ استىنداعى باقشاعا ءتىنتۋ جۇرگىزگەن كەزدە، بۇزاقى شۇي يانجۇڭ، سۇن جىگاڭ كەنەتتەن اعاش اراسىنان اتىلىپ شىعادى. لۋان جۇن: ”نە ىستەپ ءجۇرسىڭ؟ مەن ساقشىمىن“، - دەپ زەكىپ سۇراۋ سالا باستاسىمەن 2 بۇزاقى الدىنا جەتىپ كەلىپ، ەكى اينالماي - اق پىشاقتارىن جالاڭداتىپ سۇعىپ الادى. ءدال وسى كەزدە بۇزاقى شۇي چىڭىن، يۇي جيانۋي دە توسپادان اتىلىپ شىعادى، 4 بۇزاقى لۋان جۇندى قورشاپ الىپ، قۇتىرىنا پىشاقتايدى.

  جاي ادامنىڭ ويى جەتپەس قاتتى اۋىرعانعا توزە ءجۇرىپ لۋان جۇن 4 بۇزاقىمەن ولىسپەي - بەرىسپەي سايىسادى. سايىس بارىسىندا لۋان جۇن ناگانىن سۋىرىپ الىپ، ءومىرىنىڭ اقتىق دەمىندە بۇزاقى شۇي چىڭىننىڭ سول سانىنان اتىپ - اتىپ جىبەرەدى، بۇزاقىلار جاعدايدىڭ مۇشكىل ەكەندىگىن بايقاپ الدى - الدىنا قاشا جونەلەدى.

  لۋان جۇننىڭ كەۋدەسىنە، قۇرساعىنا، ارقاسىنا، بۇيىرىنە، اياعىنا 23 جەردەن پىشاق ءتيىپ، ەرلىكپەن قۇربان بولادى. ”سول كۇنى جاڭبىر جاۋىپ تۇرعان بولاتىن، مۇمكىن، تابيعاتتىڭ كوز جاسى شىعار“، - دەيدى لۋان جۇننىڭ كاسىپتەسى، داۋۋاي قوعام حاۋىپسىزدىگى بولىمشە مەكەمەسى قىلمىس بارلاۋ 2 - ۇلكەن اترەتىنىڭ جىڭۋيى ۋاڭ حۇڭجيە.

  جاقىن ماڭدا ءتىنتۋ جۇرگىزىپ جۇرگەن 3 اماندىق ساقتاۋ بەلسەندىسى مىلتىق داۋىسىن ەستي سالا، وقيعا تۋىلعان جەرگە قاراي ۇشتىرتا جۇگىرىپ، قاشىپ بارا جاتقان شۇي چىڭىندى، يۇي جيانۋيدى تۇتقىندايدى. ەكىنشى كۇنى تۇستە، باسقا 2 بۇزاقى شۇي يانجۇڭ، سۇن جىگاڭ دا تۇتقىندالادى. تەرگەۋ ارقىلى مىنالار انىقتالادى: تورتەۋى دە كانىگى قىلمىسكەر ەكەن، 2 ايدىڭ ىشىندە جامىس قالاسىندا، حىگاڭ قالاسىندا 5 رەت توناۋشىلىق ىستەگەن، تاسىلدەرى قاتىگەز، ءبىر ادامدى ءولتىرىپ، 3 ادامدى جارالاعان.

  ”وسىنشاما جىلداردان بەرى مۇنداي قانىپەزەر بۇزاقىلاردى كورمەگەن ەكەنمىن. لۋان جۇن وق قورابىنداعى 5 وقتىڭ تورتەۋىن اتىپتى، ول ەڭ سوڭعى قايرات - كۇشىن اياماپتى“ دەيدى ۋاڭ حۇڭجيە.

  پارتياعا كىرۋ وتىنىشىندە لۋان جۇن ”حالىق ساقشىسى بولعان وسى كاسىپ ۇلەس قوسۋ مەن قۇربان بەرۋ دەگەندى بىلدىرەدى، ءارقانداي ۋاقىتتا، ءارقانداي جەردە كوممۋنيستىك پارتيا مۇشەسى ولشەمىمەن وزىمە قاتاڭ تالاپ قويىپ، قيىنشىلىق پەن حاۋىپ - قاتەر الدىندا كەۋدە كەرىپ العا شىعۋىم كەرەك“ دەپ جازعان بولاتىن. ول شىنىمەن وسىلاي ىستەدى.

  1998 - جىلى 7 - ايدىڭ 8 - كۇنى لۋان جۇنگە قوعام حاۋىپسىزدىگى مينيسترلىگى جاعىنان مەملەكەتتىك قوعام حاۋىپسىزدىگى شەبىندەگى 1 - دارەجەلى قاھارمان ۇلگى اتاعى تولىقتاپ بەرىلدى. 7 - ايدىڭ 20 - كۇنى حيلۇڭجياڭ ولكەلىك حالىق ۇكىمەتى جاعىنان توڭكەرىستىك قۇربان دەپ بەكىتىلدى.

  ساقشىلىقپەن شۇعىلدانعان ون نەشە جىلدا، لۋان جۇن باستان - اياق قىلمىسقا قاتاڭ سوققى بەرۋدى مىندەتىم دەپ ءبىلىپ، 311 قىلمىستىق ىستەر دەلوسىن اشۋعا قاتىناسىپ، 94 قىلمىس كۇماندىسىن تۇتقىندادى. لۋان جۇن قىزمەتتى كۇش سالا ىستەيدى، كىرە اۆتوكولىگىن توناۋ جەلىلەس دەلوسىن بارلاۋ، اشۋ ءۇشىن ول كەزىندە اۋىل - قىستاق وڭىرىندە ءۇرتىس ءبىر ايدان استام ۋاقىت قاراۋىلدايدى.

  ادەتتە لۋان جۇن ۇنەمى ءماز - مايرام بولىپ جۇرەتىن، جايدارى دا كىشى پەيىل ەدى. وقيعا تۋىلعان كۇنى تۇستەن بۇرىن قىلمىستىق ىستەر ۇلكەن اترەتىنىڭ ىشكى قىزمەتىندەگى جوۋ يىڭنان ونىمەن كاسىپتىك قىزمەت مولشەرىن ساناققا الۋ ءىسىن اقىلداسادى، 20 جىل ءوتىپ كەتسە دە سول جىلعى لۋان جۇننىڭ ”بارلىعىن جاس جولداستارعا بەرىڭدەر، مەن ەشتەڭە المايمىن“ دەگەن جاۋابى ءالى ونىڭ ەسىندە سايراپ تۇر.

  جۇبايىنىڭ، بالاسىنىڭ نازارىندا ول ايتسا - ايتقانداي ناعىز قىزمەتكە ءوزىن ارناعان جان. كەيدە ۇيىنە قايتقاندا كيىمىن دە شەشپەستەن تەلەفون قابىلداپ قايتا شىعىپ كەتە باراتىن. ”كەيدە شەشەم تاڭەرتەڭ ماعان اكەڭ كەشە تۇندە قايتىپ كەلگەن، مەن ورنىمنان تۇرىپ ۇلگىرمەي - اق ول تاعى دا قىزمەتكە شىعىپ كەتتى دەۋشى ەدى“، - دەيدى ۇلى لۋان ياڭ.

  اكەسى قۇربان بولعان كەزدە لۋان ياڭ 12 جاستا عانا ەدى. بالاسى اكەسىنىڭ ىسىنە مۇراگەرلىك ەتىپ، لۋان ياڭ دا كەيىن كەلە ساقشى كيىمىن كيىپ، اكەسىنىڭ قىزمەتتەستەرىمەن بىرگە كۇرەس جۇرگىزدى. بۇل كۇندەرى لۋان ياڭ مەكەمە - ورىنداعى كاسىپتىك تىرەكتىگە اينالىپ ۇلگىرىپ، ءۇرتىس 3 جىل حاربين قالالىق قىلمىس بارلاۋ شەبى قاتارىندا اعالاپ الدا كەلەدى. ”اكەم ماعان ابىروي اكەلىپ قالماستان، قىسىم كۇش تە بولىپ كەلەدى، مەن، ءسوز جوق، قىزمەتتى اناعۇرلىم قۇلشىنا ىستەيمىن“، - دەيدى لۋان ياڭ.

  وسىنشاما جىلدار ءوتتى، لۋان ياڭ باستان - اياق ساقشى كيىمىن كيگەن ءبىرىنشى كۇنى شەشەسىنىڭ وزىنە ايتقان ”ۇلىم، اكەڭنىڭ ابىرويىن توگە كورمە“ دەگەن ءسوزىن جادىندا جاتتاپ كەلەدى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.