شينحۋا اگەنتتىگىنىڭ 12 - ايدىڭ 19 - كۇنى فۋجوۋدان بەرگەن حابارى (تىلشىلەر حۋ گۋاڭحى، يان حۇڭشين). ”ساقشى جولداس، مەن ءبىر ءىستى مالىمدەمەكشىمىن، بىرەۋ جالعان اقشا وتكىزبەكشى، ورنى ’اجيزاي‘ رەستورانىنىڭ 304 - بولمەسىندە، قارجى سوماسى 80 نەشە مىڭ يۋان!“
جاعداي شۇعىل، مالىمەتتى العاننان كەيىن، فۋ مينچاۋ تاباندا 6 جاۋىنگەر سەرىگىن باستاپ، جاي بۇقاراشا كيىنىپ، ناق مايدانعا بارىپ تەكسەرۋ جۇرگىزۋدى ۇيعارادى.
بۇل ونىڭ ەڭ سوڭعى رەت مىندەت اتقارۋعا شىعۋى ەكەندىگىن كىم ويلاعان. 1998 - جىلى 10 - ايدىڭ 23 - كۇنى فۋ مينچاۋ اترەتكە قايتا ورالا المايدى.
فۋ مينچاۋ 1963 - جىلى دۇنيەگە كەلگەن، 1986 - جىلى 4 - ايدا جۇڭگو كوممۋنيستىك پارتياسىنا مۇشە بولعان، 1980 - جىلى اسكەري قوسىنعا قابىلدانعان، 1995 - جىلى اسكەردەن بوساعاننان سوڭ، قوعام حاۋىپسىزدىگى قوسىنىنا قوسىلعان. مىندەتكە اتتانعان كەزدە، ول چۋانجوۋ قالالىق قوعام حاۋىپسىزدىگى مەكەمەسى فىڭزى بولىمشە مەكەمەسى دۇڭحۋ قىلمىستىق ىستەر ساقشى ورتا اترەتىنىڭ ورتا اترەت باستىعى، 2 - دارەجەلى اتقارۋشى ساقشى بولاتىن.
سول كۇنى ساعات 15 شاماسىندا، الارمان بولىپ جاسانعان 2 حالىق ساقشىسى ”اجيزاي“ رەستورانىنىڭ 304 - بولمەسىنە بارىپ، قىلمىس كۇماندىسى حۋاڭ موۋحۋا سياقتى 3 اداممەن جولىعادى.
باعاعا كەلىسكەننەن كەيىن، حۋاڭ موۋحۋا ءبىر بۋدا جالعان اقشانى الىپ شىعىپ ساۋدالاسپاق بولادى.
بالىق قارماققا ءىلىندى، حالىق ساقشىلارى عيماراتتىڭ استىندا تورۋىلداپ تۇرعان فۋ مينچاۋعا ارەكەتتەنۋ سيگنالىن بەرەدى، فۋ مينچاۋ ءبىر جاۋىنگەر سەرىگىن ەرتىپ دەرەۋ عىماراتقا شىعادى، قالعان ەكەۋى سول ورىندا تورۋىلداپ، جاعدايعا قاراي ارەكەتتەنبەك بولادى.
ولار ۋاقىتتى تۋرالاپ تۇرىپ بولمەگە باسىپ كىرەدى، ءبىر حالىق ساقشىسى حۋاڭ موۋحۋانى تارپا باس سالىپ جەرگە الىپ ۇرادى، باسقا ۇشەۋى سەلبەسىپ، قالعان 2 قىلمىس كۇماندىسىنىڭ قولىن كوزىرلەپ، قىلمىستى مەن ارام ولجانى بىردەي قولعا تۇسىرەدى.
وسى كەزدە، حۋاڭ موۋحۋا جىعىلعانىنا قاراماي قۇتىرىنا بۇلقىنىپ، قانقۇيلىلىققا باسادى. ويلاماعان جەردەن پىشاعىن سۋىرىپ الىپ، الدىندا تۇرعان حالىق ساقشىسىنىڭ كەۋدەسىنەن، ارقاسىنان، بىلەگىنەن ارت - ارتىنان 4 جەردەن پىشاق سالادى، جاراقاتتان قان سۋداي اعادى.
ىلە - شالا حۋاڭ موۋحۋا ورنىنان تۇرىپ، قۇتىرىنعان جىرتقىشتاي قولىنداعى پىشاعىن سەرمەي حالىق ساقشىلارىنا قاراي اتىلادى.
”ابايلا!“ فۋ مينچاۋ جاۋىنگەر سەرىگىنە ايعايلاي ەسكەرتىپ، العا قاراي قاندىقولعا ۇمتىلىپ، ونى تاعى بويسۇندىرماقشى بولادى.
وسى ساتتە بۇزاقى پىشاعىن ونىڭ جونىنا سىلتەيدى، جاۋىنگەر سەرىگىن قورعاۋ ءۇشىن فۋ مينچاۋ قاتتى اۋىرعانىنا شىداپ، حۋاڭ موۋحۋانى بەلىنەن تاس قىپ قۇشاقتاپ الادى.
بارار جەر، باسار تاۋى قالماعان بۇزاقى قۇتىرىنا ونىڭ يىعىنا، ماڭدايىنا 2 رەت پىشاق سالادى.
فۋ مينچاۋدىڭ بار كۇشىمەن تەجەۋىندە، باسقا بىرنەشە حالىق ساقشىسى حۋاڭ موۋحۋانىڭ قولىنداعى پىشاقتى تارتىپ الىپ، ونى بويسۇندىرادى. وسى ارەكەتتە 3 قىلمىس كۇماندىسى ءساتتى قولعا الىنىپ، سول جەردىڭ وزىندە 80 مىڭ يۋاننان استام جالعان اقشا قولعا تۇسىرىلەدى. ال دەنەسى قانعا بويالعان فۋ مينچاۋ جىعىلىپ تۇسەدى.
قۇتقارۋ ماشيناسى فۋ مينچاۋدى شيپاحاناعا قۇتقارۋعا جەدەل جەتكىزەدى. ارقاسىنا كىرگەن پىشاق جۇرەگىنە زاقىم جەتكىزگەندىكتەن، شيپاگەرلەر فۋ مينچاۋدىڭ جاس ءومىرىن اجالدان اراشالاپ قالا المايدى، قان كوپ كەتكەندىكتەن ول 35 جاسىندا ەرلىكپەن قۇربان بولادى.
ول حالىقتىڭ مۇددەسىن قورعاپ، ساپتاستارىنىڭ حاۋىپسىزدىگىن قامتاماسىز ەتۋدى عانا ويلاپ، قىسىلتاياڭ ساتتە كەۋدە كەرىپ العا شىعىپ، دەنەسىمەن بۇزاقىنىڭ پىشاعىن توستى. ونىڭ عۇمىرى اققان جۇلدىزداي وتە شىققانىمەن، نۇر - شۇعىلا شاشتى.
1999 - جىلى فۋ مينچاۋعا مەملەكەتتىك قوعام حاۋىپسىزدىگى جۇيەسىندەگى 2 - دارەجەلى قاھارمان ۇلگى، توڭكەرىستىك قۇربان، تاڭداۋلى كومپارتيا مۇشەسى اتاعى بەرىلدى.
فۋ مينچاۋ − ونىڭ ەسىمى جۇرت جۇرەگىندە ماڭگى ساقتالادى.
